BƆ NI WƆƆFEE WƆYE HETSƐ̃ NƆ

2 | Kaatɔ Owele

Biblia Mli Tsɔɔmɔ:

“Nyɛkɛ efɔŋ akatoa mɔ ko mɔ ko efɔŋ najiaŋ. . . . Kɛ́ ebaahi lɛ, nyɛgbɛfaŋ lɛ, nyɛfea bɔ fɛɛ bɔ ni nyɛaanyɛ koni toiŋjɔlɛ ahi nyɛ kɛ mɛi fɛɛ ateŋ. . . . Nyɛkatɔa nyɛ diɛŋtsɛ nyɛhe owele, . . . ejaakɛ aŋma akɛ: ‘“Minɔ ji oweletɔɔ lɛ; mi mato najiaŋ,” Yehowa kɛɛ.’”—ROMABII 12:17-19.

Nɔ Ni Etsɔɔ:

Kɛ́ mɔ ko fee wɔ efɔŋ lɛ, ejeee tɔmɔ akɛ wɔmli baafu, shi Nyɔŋmɔ sumɔɔɔ ni wɔtɔɔ owele. Eesumɔ ni wɔto wɔtsui shi moŋ, ni wɔshi sane lɛ fɛɛ wɔhã lɛ, ejaakɛ etsɛŋ, ebaajie wɔnaagbai lɛ fɛɛ kɛya.—Lala 37:7, 10.

Nɔ Ni Obaanyɛ Ofee:

Akɛni adesai yeee emuu hewɔ lɛ, kɛ́ amɛtɔ owele lɛ, eyatsɛɔ hetsɛ̃ kɛbaa. No hewɔ lɛ, kɛ́ mɔ ko fee bo efɔŋ ko lɛ, kaatɔ owele. Bɔɔ mɔdɛŋ ni oye ohe nɔ, ni obaa toiŋjɔlɛ yi. Bei komɛi lɛ, ebaahi waa akɛ obaaŋmɛɛ sane lɛ he kwraa. (Abɛi 19:11) Bei komɛi hu lɛ, ebaahi akɛ obaafee nɔ ko yɛ sane lɛ he. Akɛ nɔkwɛmɔnɔ lɛ, kɛ́ mɔ ko fee bo nɔ ko ni teɔ shi ewoɔ maŋ lɛ mla lɛ, obaanyɛ owó polisifoi lɛ loo amralofoi krokomɛi atoi nɔ.

Oweletɔɔ hãa mɔ yeɔ lɛ diɛŋtsɛ ehe awui

Ni kɛ́ etamɔ nɔ ni onyɛŋ otsu sane lɛ he nii bɔ ni kɛ toiŋjɔlɛ baaba hu? Aloo ekolɛ ofee bɔ fɛɛ bɔ ni obaanyɛ koni otsu he nii bɔ ni kɛ toiŋjɔlɛ baaba, shi ehiii hu? Loloolo lɛ, kaatɔ owele. Kɛ́ otɔ owele lɛ, obaafite sane lɛ kwraa. Kɛ́ otɔɔɔ owele lɛ, no baahã oye hetsɛ̃ nɔ. Hemɔ oye waa akɛ, Nyɔŋmɔ baatsu sane lɛ he nii jogbaŋŋ. “Okɛ ohiɛ afɔ̃ enɔ, ni ebaatsu nibii ahe nii ehã bo.”—Lala 37:3-5.

Mɔ Ko Shihilɛ Mli Sane—ADRIÁN

Ekpa Oweletɔɔ

Be ni Adrián ji oblanyo fioo lɛ, efeɔ yiwalɛ nii, ehe tsɛ̃ɔ mɛi fɛɛ ni efee lɛ nɔ ko pɛŋ lɛ, ni esumɔɔ ni eye amɛ awui. Ewie akɛ: “Bei pii lɛ, mikɛ mɛi nɔɔ kɛ tu, ni ashiɔ mi afɔ̃ɔ lɔle gbɛ lɛ nɔ kɛ mihe lá kpɔtɔɔ; asusuɔ akɛ migbo.”

Akɛ Adrián bɔi Biblia lɛ kasemɔ be ni eye afii 16. Ewie kɛfata he akɛ: “Be ni akɛ mi kaseɔ Biblia lɛ, mibayɔse akɛ esa akɛ mafee tsakemɔi komɛi yɛ mishihilɛ mli.” Ehe bahia ni eye hetsɛ̃ nɔ, ni ekpa yiwalɛ nifeemɔ. Nɔ ni Romabii 12:17-19 lɛ wie yɛ oweletɔɔ he lɛ ná enɔ hewalɛ waa. Ewie akɛ: “Mibanu shishi akɛ, Yehowa diɛŋtsɛ baatsu jalɛsane ni ayeee ni yaa nɔ lɛ he nii yɛ be ni sa mli. Fiofio lɛ, mikpa awuiyeli nifeemɔi lɛ.”

Gbi ko gbɛkɛ lɛ, oblahii akuu ko ni be ko ni eho lɛ amɛkɛ Adrián fɔɔ nɔɔ lɛ, ba lɛ tutuamɔ. Amɛhiɛnyiɛlɔ lɛ bo akɛ: “Fã ohe wɔkwɛ!” Adrián wie akɛ: “Minu he waa yɛ mimli akɛ mito amɛ najiaŋ.” Shi etɔɔɔ owele. Moŋ lɛ, esɔle kuku ehã Yehowa, ni eshi amɛ etee.

Adrián tsa nɔ akɛ: “Enɔ jetsɛremɔ lɛ, mikɛ amɛhiɛnyiɛlɔ lɛ kpe ní ekome too pɛ enyiɛ. Minu he waa akɛ mito lɛ najiaŋ, shi shi kome ekoŋŋ lɛ, misɔle yɛ miyitsoŋ, ni mikpa Yehowa fai koni eye ebua mi ni manyɛ maye mihe nɔ. Shi oblanyo lɛ ba miŋɔɔ tɛ̃ɛ ni ebakɛɛ mi akɛ: ‘Okɛ nɔ ni mifee bo nyɛgbɛkɛ lɛ ake mi. Ole, miitao matsɔ tamɔ bo. Miitao makase Biblia lɛ.’ Enɛ hã minaa kpɛ mihe waa. Miná miishɛɛ waa akɛ minyɛ miye mihe nɔ! Enɛ hã akɛ lɛ hu bɔi Biblia lɛ kasemɔ.”