BƆ NI WƆƆFEE WƆYE HETSƐ̃ NƆ

4 | Hã Nyɔŋmɔ Awa Bo Ni Oye Hetsɛ̃ Nɔ

Biblia Mli Tsɔɔmɔ:

“Yibii ni mumɔ lɛ woɔ lɛ ji suɔmɔ, miishɛɛ, toiŋjɔlɛ, tsuishitoo, mlihilɛ, ekpakpafeemɔ, hemɔkɛyeli, mlijɔlɛ, henɔyeli.”—GALATIABII 5:22, 23.

Nɔ Ni Etsɔɔ:

Nyɔŋmɔ baanyɛ ewa wɔ ni wɔye hetsɛ̃ nɔ. Emumɔ krɔŋkrɔŋ lɛ baanyɛ ewa wɔ ni wɔná sui ni wɔ diɛŋtsɛ wɔnyɛŋ wɔná. No hewɔ lɛ, ebaahi waa akɛ wɔbaahã Nyɔŋmɔ aye abua wɔ ni wɔye hetsɛ̃ nɔ, moŋ fe nɔ ni wɔbaabɔ mɔdɛŋ akɛ wɔ diɛŋtsɛ wɔbaafee nakai. Kɛ́ wɔhã eye ebua wɔ lɛ, wɔbaanu he tamɔ bɔ ni bɔfo Paulo nu he lɛ. Ewie akɛ: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.” (Filipibii 4:13) Hɛɛ, wɔbaanyɛ wɔkɛɛ akɛ: ‘Miyelikɛbuamɔ lɛ jɛɔ Yehowa ŋɔɔ.’—Lala 121:2.

Nɔ Ni Obaanyɛ Ofee:

“Yehowa etsake mi, ni kulɛ miji awuiyelɔ lɛ, kɛbatsɔ mɔ ko ni tiuɔ toiŋjɔlɛ sɛɛ.”—WALDO

Sɔlemɔ ohã Yehowa, ni ojɛ otsuiŋ obi lɛ ni ehã bo emumɔ krɔŋkrɔŋ lɛ. (Luka 11:13) Bi lɛ ni ewa bo ni ojie sui kpakpai kpo. Kasemɔ nibii ni Biblia lɛ ewie yɛ sui ni baanyɛ awa bo ni oye hetsɛ̃ nɔ lɛ ahe. Sui nɛɛ ekomɛi ji suɔmɔ, toiŋjɔlɛ, tsuishitoo, kɛ henɔyeli. Bɔɔ mɔdɛŋ ni ojie sui nɛɛ kpo. Ni okɛ mɛi ni miibɔ mɔdɛŋ ni amɛ hu amɛjie sui nɛɛ kpo lɛ abɔ. Mɛi ni tamɔ nakai lɛ ‘baawo bo hewalɛ ni ojie suɔmɔ kpo ni otsu nitsumɔi kpakpai.’—Hebribii 10:24; shishigbɛ niŋmaa.

Mɔ Ko Shihilɛ Mli Sane—WALDO

Eye Hetsɛ̃ Ni Hãa Efeɔ Yiwalɛ Nii Lɛ Nɔ

Be ni nuu ko ni atsɛɔ lɛ Waldo lɛ daa lɛ, ekɛ shihilɛ ni mli wa waa kpe, ni enɛ hã ehe tsɛ̃ mɛi. Ewie akɛ: ‘Mikɛ mɛi ni hɔ̃ɔ kokein kɛ ehenɔi nɔɔ yɛ maŋjaanɔ. Be ko lɛ, kuu ko ni kɛ wɔkuu lɛ yeee lɛ yahai yiwalɔ ko ni ale lɛ jogbaŋŋ lɛ akɛ ebagbe mi, etsu mi kakla moŋ nɛ shi enyɛɛɛ egbe mi.’

Be ni Yehowa Odasefoi kɛ Waldo ŋa bɔi Biblia lɛ kasemɔ lɛ, enáaa he miishɛɛ. Ewie akɛ: “No mli lɛ, misumɔɔɔ Odasefoi lɛ asane kwraa, ni mibolɔɔ miwoɔ amɛ, ni mijɛɔ amɛ yakayaka. Shi be fɛɛ be ni mafee nakai lɛ, bɔ ni amɛkɛ naajɔlɛ jieɔ naa lɛ hãa minaa kpɛɔ mihe.”

Sɛɛ mli lɛ, akɛ Waldo hu bɔi Biblia lɛ kasemɔ. Ewie akɛ: “Ebawa kɛhã mi akɛ mikɛ nɔ ni mikaseɔ lɛ baatsu nii. Mibanu he akɛ minyɛŋ makudɔ mibɛku tsui lɛ kɔkɔɔkɔ.” Shi nɔ ko ni ekase yɛ Biblia lɛ mli lɛ ná enɔ hewalɛ waa.

Waldo tsɔɔ mli akɛ: “Gbi ko lɛ, Alejandro, ni ji mɔ ni kɛ mi kaseɔ Biblia lɛ bi koni makane Galatiabii 5:22, 23 lɛ. . . . Alejandro tsɔɔ mli akɛ, jeee mi diɛŋtsɛ minyɛmɔ naa manyɛ maná nakai sui lɛ, shi moŋ ja Nyɔŋmɔ mumɔ krɔŋkrɔŋ lɛ eye ebua mi. Nakai anɔkwale lɛ hã mitsake misusumɔ kwraa!”

Waldo hã Nyɔŋmɔ ye ebua lɛ ni eye hetsɛ̃ nɔ. Ewie akɛ: “Miwekumɛi kɛ mitsutsu nanemɛi lɛ anaa kpɛɔ amɛhe waa yɛ tsakemɔi kpele ni minyɛ mifee lɛ ahewɔ.” Ekɛfata he akɛ: “Yehowa etsake mi, ni kulɛ miji awuiyelɔ lɛ, kɛbatsɔ mɔ ko ni tiuɔ toiŋjɔlɛ sɛɛ.”