Sanebimɔi Ni Jɛ Kanelɔi Adɛŋ
Be ni Yesu wie akɛ, “Nyɛkasusua akɛ miba ni mabahã toiŋjɔlɛ aba” lɛ, no mli lɛ te etsɔɔ tɛŋŋ?
Yesu tsɔɔ mɛi akɛ, esa akɛ amɛkɛ mɛi ahi shi yɛ toiŋjɔlɛ mli. Shi be ko lɛ, ekɛɛ ebɔfoi lɛ akɛ: “Nyɛkasusua akɛ miba ni mabahã toiŋjɔlɛ aba shikpɔŋ lɛ nɔ; jeee toiŋjɔlɛ hãmɔ miba, shi klante moŋ. Ejaakɛ miba koni mikɛ mligbálamɔ aba, nuu kɛ epapa teŋ, kɛ biyoo kɛ emami teŋ, kɛ ŋa kɛ eshaayoo teŋ.” (Mat. 10:34, 35) Mɛni Yesu wiemɔi nɛɛ tsɔɔ?
Yesu baaa wekumɛi ateŋ fitemɔ, shi ele akɛ etsɔɔmɔi lɛ kɛ mligbálamɔ baaba wekui komɛi amli. No hewɔ lɛ, esa akɛ mɛi fɛɛ ni miitao amɛbatsɔmɔ Yesu kaselɔi ni abaptisi amɛ lɛ ahã ehi amɛjwɛŋmɔ mli akɛ, ekolɛ amɛweku lɛ mli bii lɛ nyaŋ yiŋ ni amɛkpɛ lɛ he. Ekolɛ, amɛhefatalɔ loo amɛwekunyo ko baanyɛ ate shi awo amɛ, ni kɛ́ eba lɛ nakai lɛ, ebaanyɛ ewa kɛhã amɛ akɛ amɛbaabo Yesu toi ni amɛkɛ nibii ni etsɔɔ amɛ lɛ atsu nii.
Biblia lɛ woɔ Kristofoi hewalɛ ni amɛhã ‘toiŋjɔlɛ ahi amɛ kɛ mɛi fɛɛ ateŋ.’ (Rom. 12:18) Shi Yesu tsɔɔmɔi lɛ baanyɛ atsɔ “klante” yɛ wekui komɛi amli. Ebaanyɛ eba lɛ nakai kɛ́ weku lɛ mli nyo ko he Yesu tsɔɔmɔi lɛ eye ni ekɛbɔi nitsumɔ shi weku lɛ mli bii krokomɛi lɛ nyaaa he loo amɛwie amɛshi. Kɛ́ eba lɛ nakai lɛ, mɔ ni kaseɔ anɔkwale lɛ diɛŋtsɛ “shĩabii” loo ewekumɛi lɛ batsɔmɔɔ “ehenyɛlɔi.”—Mat. 10:36.
Bei komɛi lɛ, ehe bahiaa ni Kristo kaselɔi ni kɛ amɛwekumɛi ni yɔɔ jamɔi krokomɛi amli yɔɔ shĩa kome mli lɛ akpɛ amɛyiŋ kɛji amɛbaafee nɔ ni sa Yehowa kɛ Yesu hiɛ loo nɔ ni sa amɛwekumɛi lɛ ahiɛ. Akɛ nɔkwɛmɔnɔ lɛ, ekolɛ amɛwekumɛi lɛ baanyɛ amɛnɔ ni amɛkɛ amɛ afee ekome kɛye gbi jurɔ ko tamɔ Blonya nɛkɛ. Kɛ́ eba lɛ nakai lɛ, ani amɛbaafee nɔ ni sa amɛwekumɛi lɛ ahiɛ loo nɔ ni sa Yehowa kɛ Yesu hiɛ? Yesu wie akɛ: “Mɔ fɛɛ mɔ ni sumɔɔ epapa loo emami fe mi lɛ esaaa mi.” (Mat. 10:37) Nɔ ni Yesu wie nɛɛ etsɔɔɔ akɛ kɛ́ mɔ ko batsɔ esɛɛnyiɛlɔ lɛ, esa akɛ bɔ ni esumɔɔ efɔlɔi tsutsu ko lɛ nɔ agbɔ. Moŋ lɛ etsɔɔ akɛ, nibii komɛi ahe hiaa fe nibii krokomɛi yɛ shihilɛ mli. No hewɔ lɛ, eyɛ mli akɛ wɔsumɔɔ wɔwekumɛi ni yɔɔ jamɔi krokomɛi amli lɛ moŋ, shi kɛ́ amɛka akɛ amɛbaahã wɔkpa Yehowa jamɔ lɛ, wɔkɛ wɔnifeemɔi baahã amɛna akɛ Yehowa suɔmɔnaa nii ni wɔbaafee lɛ he miihia wɔ fe nɔ fɛɛ nɔ yɛ wɔshihilɛ mli.
Kɛ́ wɔwekumɛi te shi amɛwo wɔ lɛ, eyɛ dɔlɛ waa. Shi esa akɛ wɔhã sane nɛɛ ni Yesu kɛɛ ekaselɔi lɛ ahi wɔjwɛŋmɔ mli be fɛɛ be. Ekɛɛ amɛ akɛ: “Mɔ fɛɛ mɔ ni sumɔɔɔ akɛ ewóɔ epiŋmɔ tso ni enyiɛɔ misɛɛ lɛ, esaaa mi.” (Mat. 10:38) No hewɔ lɛ, kɛ́ wɔwekumɛi te shi amɛwo wɔ lɛ, wɔfiɔ shi ejaakɛ wɔbuɔ lɛ akɛ efata naagbai ni wɔkɛbaakpe kɛ́ wɔbatsɔmɔ Kristofoi lɛ ahe. Nakai beiaŋ nɔŋŋ lɛ, wɔshwelɛ ji akɛ, wɔwekumɛi ni jáaa Yehowa lɛ atsake amɛjeŋba ni amɛ hu amɛhã akɛ amɛ akase Biblia lɛ.—1 Pet. 3:1, 2.