4 | Ŋaawoi Kpakpai Yɛ Biblia Lɛ Mli
BIBLIA LƐ KƐƐ: ‘Ŋmalɛ muu lɛ fɛɛ he yɛ sɛɛnamɔ.’—2 TIMOTEO 3:16.
Nɔ Ni Etsɔɔ
Eyɛ mli akɛ Biblia lɛ jeee wolo ni woɔ ŋaa yɛ helatsamɔ saji ahe moŋ, shi emli ŋaawoi lɛ ahe yɛ sɛɛnamɔ waa. Ebaanyɛ ewa mɔ ko ni ená jwɛŋmɔŋ naagba. Naa ŋaawoi lɛ ekomɛi.
Bɔ Ni Obaanyɛ Oná He Sɛɛ
“Mɛi ni yɔɔ hewalɛ lɛ, datrɛfonyo he ehiaaa amɛ, shi mɛi ni bɛ hewalɛ lɛ moŋ ehe hiaa.”—MATEO 9:12.
Biblia lɛ tsɔɔ akɛ, bei komɛi lɛ ehe baahia ni wɔyana dɔkitafoi loo helatsalɔi. Mɛi ni yɔɔ jwɛŋmɔŋ naagbai lɛ ateŋ mɛi pii ekase amɛnaagba lɛ he nii jogbaŋŋ ni amɛyana dɔkitafoi hu, ni no ewa amɛ.
“Kpɔiaŋgbɔlemɔ he yɛ sɛɛnamɔ.”—1 TIMOTEO 4:8, shishigbɛ niŋmaa.
Kɛ́ wɔfee nibii ni baahã wɔná gbɔmɔtsoŋ hewalɛ kpakpa lɛ, ebaanyɛ ehã wɔkpee jwɛŋmɔŋ naagba naa loo wɔkaná eko. Nibii nɛɛ ekomɛi ji, ni wɔbaafɔ wɔkpɔiaŋ gbɔlemɔ, wɔbaaye niyenii kpakpa, kɛ agbɛnɛ hu, ni wɔbaaná wɔ kpakpa wɔwɔ.
“Tsui ni yɔɔ miishɛɛ lɛ, eji tsofa kpakpa, shi tsui ni ekumɔ lɛ, egbɔjɔɔ mɔ.”—ABƐI 17:22.
Kɛ́ okaneɔ Biblia mli saji ni woɔ mɔ hewalɛ, ni okɛ otii ni obaanyɛ oshɛ he mamɔɔ ohiɛ lɛ, no baanyɛ ahã oná miishɛɛ. Kɛ́ okɛ ojwɛŋmɔ ma nibii kpakpai ni yaa nɔ yɛ shihilɛ mli lɛ anɔ ni ohe oye akɛ wɔsɛɛ lɛ nibii baahi lɛ, no baanyɛ awa bo ni onyɛ okpee ojwɛŋmɔŋ naagbai lɛ anaa.
“Mɔ ni le he ni enyɛmɔ yawaa lɛ, ehiɛ kã shi.”—ABƐI 11:2, shishigbɛ niŋmaa.
Ekolɛ obaana akɛ, jeee nɔ fɛɛ nɔ ni osumɔɔ ni ofee lɛ onyɛɔ ofeɔ, hewɔ lɛ, kpɛlɛmɔ ni mɛi awa bo. Ŋwanejee ko bɛ he akɛ, onanemɛi kɛ owekumɛi lɛ baasumɔ ni amɛwa bo, shi ekolɛ amɛleŋ nɔ tuuntu ni esa akɛ amɛfee. Hã amɛle nɔ ni kɛ́ amɛfee lɛ no baawa bo waa. Kaakpa babaoo gbɛ kɛmiijɛ amɛdɛŋ, ni be fɛɛ be ni amɛbaaye amɛbua bo lɛ, daa amɛ shi.
Bɔ Ni Biblia Lɛ Mli Ŋaawoi Lɛ Waa Mɛi
“Minu he akɛ naagba yɛ bɔ ni mifeɔ minii mihãa lɛ he, hewɔ lɛ, miyana dɔkitafonyo. Enyɛ ena nɔ ni feɔ mi lɛ. Enɛ wa mi ni mina nɔ tuuntu ni ji minaagba lɛ kɛ helatsamɔ gbɛi srɔtoi ni abaanyɛ akɛtsu he nii.”—Nicole,a eyɛ bipolar disorder.
“Mina akɛ, kɛ́ mikɛ miŋa fee ekome kɛkane Biblia lɛ daa leebi lɛ, ehãa mikɛ mijwɛŋmɔ maa nibii kpakpai anɔ. Ni bei pii kɛ́ minaaa nibii anaa lɛ, ŋmalɛ pɔtɛɛ ko shɛjeɔ mimii.”—Peter, ená jwɛŋmɔŋ naagba ko ni hãa efeɔ basaa.
“Kulɛ ewa hã mi akɛ mahã mɛi ale minaagba lɛ, ejaakɛ eefee mi hiɛgbele. Shi minaanyo kpaakpa ko bo mi toi jogbaŋŋ, ni ebɔ mɔdɛŋ koni enu bɔ ni minuɔ he mihãa lɛ shishi. Ewa mi ni mitsɛ mitsui miŋmɛ mimli, ni ehã mina akɛ jeee mikome mikɛ naagba nɛɛ kpeɔ.”—Ji-yoo, eeye jwɛŋmɔŋ naagba ko ni saa bɔ ni eyeɔ nii ehãa lɛ he.
“Biblia lɛ ewa mi ni miŋmɛɔ pɛpɛɛpɛ yɛ minifeemɔi amli, mijɔɔ mihe bɔ ni sa, ni mitsuuu nii fe nine. Emli ŋaawoi kpakpai lɛ ahewɔ lɛ, minyɛɔ mikpeɔ mijwɛŋmɔŋ naagba lɛ naa.”—Timothy, eyɛ obsessive-compulsive disorder.
a Atsake gbɛ́i lɛ ekomɛi.