3 | Biblia Mli Gbɔmɛi Baanyɛ Awa Bo

BIBLIA LƐ EWIE . . . Hii kɛ yei anɔkwafoi ni ná “henumɔi tamɔ wɔ nɔŋŋ” lɛ ahe.—YAKOBO 5:17.

Nɔ Ni Etsɔɔ

Biblia lɛ mli eyi kɛ hii kɛ yei ni ná henumɔi srɔtoi ahe saji. Be ni okaneɔ amɛhe saji lɛ, ekolɛ obaana akɛ amɛteŋ mɔ ko nu he tamɔ bɔ ni onuɔ he lɛ.

Bɔ Ni Obaanyɛ Oná He Sɛɛ

Wɔteŋ mɔ fɛɛ mɔ sumɔɔ ni mɛi anu bɔ ni wɔnuɔ he wɔhãa lɛ shishi, titri lɛ, be ni wɔkɛ jwɛŋmɔŋ naagba ko miikpe. Mɛi ni susu nii ahe ni amɛnu nii ahe tamɔ wɔ nɔŋŋ lɛ ahe saji yɛ Biblia lɛ mli. Kɛ́ okane amɛhe saji lɛ, obaana akɛ mɛi komɛi na nɔ tamɔ wɔ nɔŋŋ, ni no hewɔ lɛ, jeee wɔ pɛ wɔnuɔ he tamɔ bɔ ni wɔnuɔ he lɛ.

Mɛi ni fee basaa ni amɛnu he akɛ amɛnyɛɛɛ dɔŋŋ lɛ anaawiemɔi pii yɛ Biblia lɛ mli. Ani okɛɛ ohe pɛŋ akɛ, ‘Agbɛnɛ lɛ, minyɛɛɛ dɔŋŋ’? Nakai Mose, Elia, kɛ David fɛɛ nu he.—4 Mose 11:14; 1 Maŋtsɛmɛi 19:4; Lala 55:4.
Biblia lɛ kɛɔ wɔ akɛ, yoo ko ni atsɛɔ lɛ Hana lɛ ‘werɛ ho ehe waa diɛŋtsɛ,’ ejaakɛ enyɛɛɛ efɔ ni ebienyɛ ko hu yeɔ ehe fɛo waa.—1 Samuel 1:6, 10.
Nuu ko hu ni atsɛɔ lɛ Hiob, ni ekolɛ, shihilɛ ni ekɛkpe lɛ tamɔ wɔnɔ lɛ he sane yɛ Biblia lɛ mli. Eyɛ mli akɛ, eyɛ hemɔkɛyeli ni mli wa moŋ, shi be ko lɛ ehao waa ni ewie akɛ: “Minyaŋeɔ miwala; Misumɔɔɔ maya nɔ mahi wala mli.”—Hiob 7:16.

Kɛ́ wɔna bɔ ni fee ni mɛi ni Biblia lɛ ewie amɛhe nɛɛ tsu susumɔi ni esaaa ni amɛná lɛ ahe nii lɛ, no baawa wɔ ni wɔ hu wɔnyɛ wɔkpee wɔnɔ lɛ naa.

Bɔ Ni Biblia Lɛ Waa Mɛi Kevin

Nɔ Ni Bipolar Disorder Lɛ Feɔ Mi

“Be ni eshwɛ fioo ni maná afii 50 lɛ, ana akɛ miná bipolar disorder. Hela nɛɛ hewɔ lɛ, bei komɛi lɛ, minuɔ he akɛ nɔ ko nɔ ko bɛ ni minyɛŋ mafee. Shi bei komɛi hu lɛ, shihilɛ jeɔ mitsine.”

Bɔ Ni Biblia Lɛ Waa Mi

“Biblia mli gbɔmɔ ko ni sane lɛ tamɔ minɔ lɛ ji bɔfo Petro. Etɔ̃ tɔmɔi komɛi ni hã enu he akɛ ehe bɛ sɛɛnamɔ. Ehãaa nakai susumɔ lɛ aya nɔ akudɔ lɛ, moŋ lɛ, ekɛ enanemɛi ni jwɛŋɔ ehe lɛ bɔ. Kɛ́ mihela lɛ ba lɛ, mifãtɔi lɛ hãa minuɔ he akɛ sɛɛnamɔ bɛ mihe. Taakɛ Petro fee lɛ, mi hu mikɛ minanemɛi ni sumɔɔ ni amɛwa mi koni minijiaŋ akaje wui lɛ bɔɔ waa.

“Biblia mli gbɔmɔ kroko ni esane lɛ shɛjeɔ mimii waa ji Maŋtsɛ David. Bei pii lɛ, shihilɛ ni eyɔɔ mli lɛ hãa ehaoɔ ni eshwaa ehe yɛ etsutsu tɔmɔi lɛ ahewɔ. Shihilɛ ni etsɔ mli lɛ tamɔ minɔ lɛ, ejaakɛ mi hu bei komɛi lɛ miwieɔ loo mifeɔ nibii komɛi ni sɛɛ mli lɛ mishwaa mihe. David wiemɔi ni yɔɔ Lala 51 lɛ shɛjeɔ mimii. Ewie yɛ kuku 3 lɛ akɛ: ‘Mile mitɔmɔi lɛ jogbaŋŋ, ni mihe esha lɛ yɛ mihiɛ daa.’ Nakai pɛpɛɛpɛ mi hu minuɔ he kɛ́ mifee basaa waa, ejaakɛ mináa susumɔi gbohii yɛ mi diɛŋtsɛ mihe. Shi minyaa David wiemɔi ni yɔɔ kuku 10 lɛ hu he waa. Ekɛɛ: ‘Ao Nyɔŋmɔ, bɔɔ tsui ni he tse yɛ mimli ohã mi, ni okɛ mumɔ hee, mumɔ ni fĩɔ shi, awo mimli.’ Mikɛ wiemɔi ni tamɔ nakai nɔŋŋ tsuɔ nii kɛkpaa Nyɔŋmɔ fai ni ewa mi koni mana mihe tamɔ bɔ ni enaa mi lɛ. Ni kuku 17 lɛ hu shɛjeɔ mimii. Jɛmɛ kɛɛ: ‘Ao Nyɔŋmɔ, tsui ni ekumɔ ni werɛ eho ehe lɛ, okpoŋ.’ Ŋmalɛ nɛɛ hãa miheɔ miyeɔ waa akɛ Nyɔŋmɔ sumɔɔ mi.

“Kɛ́ mijwɛŋ Biblia mli gbɔmɛi lɛ asaji lɛ kɛ nɔ ni Nyɔŋmɔ feɔ ehãa mi bianɛ lɛ nɔ lɛ, ehãa hiɛnɔkamɔ ni miyɔɔ kɛhã wɔsɛɛ lɛ mli waa. Minaa akɛ, shiwoi ni yɔɔ Biblia lɛ mli lɛ baaba mli lɛɛlɛŋ, ni no waa mi koni maya nɔ makpee shihilɛ ni mikɛkpeɔ lɛ naa.”