Feemɔ Nibii Ni Baahã Ohe Oye Waa Akɛ Yehowa Asafo Lɛ Nɛ

1. Te ato Yehowa webii lɛ ahe gbɛjianɔ ahã tɛŋŋ yɛ blema Kristofoi lɛ abeiaŋ?

BE FƐƐ be ni Yehowa baahã ewebii lɛ nitsumɔ lɛ, eesumɔ ni amɛto he gbɛjianɔ jogbaŋŋ. (1 Kor. 14:33) Akɛ nɔkwɛmɔnɔ lɛ, Yehowa miisumɔ ni ewebii lɛ ashiɛ sane kpakpa lɛ yɛ shikpɔŋ lɛ nɔ fɛɛ. (Mat. 24:14) Ehala Yesu akɛ ekwɛ nitsumɔ nɛɛ nɔ. Ni Yesu hu miikwɛ koni ato nitsumɔ nɛɛ he gbɛjianɔ jogbaŋŋ ni atsu. Yɛ blema Kristofoi lɛ abeiaŋ lɛ, ato asafoi ashishi yɛ heihei, ni ahole asafoŋ onukpai yɛ asafoi nɛɛ amli koni amɛnyiɛ nitsumɔ lɛ hiɛ ni amɛkɛ gbɛtsɔɔmɔi ahã nyɛmimɛi lɛ. (Bɔf. 14:23) Agbɛnɛ hu, bɔfoi lɛ kɛ onukpai lɛ ni yɔɔ Yerusalem lɛ fee ekome ni amɛkpɛ yiŋ komɛi ni ehe bahia ni asafoi fɛɛ ni yɔɔ nakai beiaŋ lɛ kɛtsu nii. (Bɔf. 15:2; 16:4) Nyɛmimɛi lɛ kɛ gbɛtsɔɔmɔi ni amɛnine shɛ nɔ lɛ tsu nii, ni no hã “asafoi lɛ tee nɔ amɛhe wa yɛ hemɔkɛyeli lɛ mli ni amɛyibɔ lɛ tee nɔ efa daa gbi.”—Bɔf. 16:5.

2. Kɛjɛ afi 1919 kɛbaa nɛɛ, namɛi anɔ Yehowa tsɔɔ ekɛ gbɛtsɔɔmɔi hãa ewebii lɛ ni etsɔɔ amɛ nii?

² Ŋmɛnɛ hu lɛ, Yehowa miiya nɔ eeto ewebii lɛ ahe gbɛjianɔ. Yɛ egbɛtsɔɔmɔ naa lɛ, kɛjɛ afi 1919 kɛbaa nɛɛ, Yesu tsɔɔ hii fioo komɛi ni afɔ amɛ mu ni miisɔmɔ akɛ kuu lɛ anɔ eeto shiɛmɔ nitsumɔ lɛ he gbɛjianɔ ni eejɛ Nyɔŋmɔ Wiemɔ lɛ mli eehã ewebii lɛ gbɛtsɔɔmɔi yɛ be ni sa mli.a (Luka 12:42) Ni wɔmiina faŋŋ akɛ, Yehowa miijɔɔ amɛnitsumɔ lɛ nɔ.—Yes. 60:22; 65:​13, 14.

3-4. (a) Okɛ nɔkwɛmɔnɔ ko atsɔɔ bɔ ni wɔnáa asafo lɛ he gbɛjianɔ ni ato lɛ he sɛɛ wɔhãa. (b) Mɛni he wɔbaasusu yɛ nikasemɔ nɛɛ mli?

³ Eji atoko wɔhe gbɛjianɔ kulɛ, wɔnyɛŋ wɔtsu nitsumɔ ni Yesu kɛwo wɔdɛŋ lɛ. (Mat. 28:​19, 20) Akɛ nɔkwɛmɔnɔ lɛ, eji asafoŋ onukpai lɛ etoko asafo lɛ shikpɔŋkuku lɛ he gbɛjianɔ ni mɔ fɛɛ mɔ nyɛɔ eshiɛɔ yɛ he ni esumɔɔ kulɛ, mɛni baaba? Kulɛ shikpɔŋkuku lɛ fãi komɛi yɛ ni shiɛlɔi srɔtoi baatsu mli nii shii abɔ, ni efãi komɛi hu yɛ ni ekolɛ ayashiɛŋ yɛ jɛmɛ kwraa. Kɛ́ okwɛ lɛ, mɛɛ gbɛi krokomɛi anɔ wɔnáa wɔhe gbɛjianɔ ni ato lɛ he sɛɛ?

⁴ Bɔ ni Yesu to esɛɛnyiɛlɔi lɛ ahe gbɛjianɔ be ni eyɔɔ shikpɔŋ lɛ nɔ lɛ, nakai nɔŋŋ ŋmɛnɛ lɛ, etoɔ Nyɔŋmɔ webii lɛ ahe gbɛjianɔ. Yɛ nikasemɔ nɛɛ mli lɛ, wɔbaakwɛ nibii ni Yesu fee kɛ nibii ni asafo lɛ feɔ ŋmɛnɛ ni tsɔɔ akɛ enyiɛ Yesu nanemaahei lɛ asɛɛ pɛpɛɛpɛ. Agbɛnɛ hu, wɔbaakwɛ nɔ ni wɔbaanyɛ wɔfee koni hemɔkɛyeli ni wɔyɔɔ akɛ Yehowa asafo lɛ nɛ lɛ mli awa.

ASAFO LƐ NYIƐƆ YESU NANEMAAHEI LƐ ASƐƐ PƐPƐƐPƐ

5. Mɛni ji nɔ kome ni asafo lɛ feɔ ni hãa wɔnaa akɛ enyiɛ Yesu nanemaahei lɛ asɛɛ? (Yohane 8:28)

⁵ Nibii ni Yesu Tsɛ ni yɔɔ ŋwɛi lɛ tsɔɔ lɛ lɛ, nomɛi pɛpɛɛpɛ efee, ni nomɛi pɛpɛɛpɛ ewie. Ŋmɛnɛ hu lɛ, Yehowa asafo lɛ jɛɔ Nyɔŋmɔ Wiemɔ lɛ mli etsɔɔ wɔ nɔ ni ja kɛ nɔ ni ejaaa, ni ekɛ gbɛtsɔɔmɔi hãa wɔ. (Kanemɔ Yohane 8:28; 2 Tim. 3:​16, 17) Be fɛɛ be lɛ, awoɔ wɔ ŋaa ni wɔkane Nyɔŋmɔ Wiemɔ lɛ ni wɔkɛtsu nii. Kɛ́ wɔbo ŋaawoo nɛɛ toi lɛ, mɛɛ gbɛ nɔ wɔbaaná he sɛɛ?

6. Mɛɛ gbɛ nɔ wɔnáa Biblia lɛ ni wɔkaseɔ lɛ he sɛɛ? Ni mɛni hewɔ ehe hiaa?

⁶ Kɛ́ wɔkase Biblia lɛ kɛ asafo lɛ woji lɛ, wɔnáa he sɛɛ waa. Akɛ nɔkwɛmɔnɔ lɛ, wɔnyɛɔ wɔkɛ nɔ ni wɔkase yɛ Biblia lɛ mli lɛ toɔ gbɛtsɔɔmɔi ni asafo lɛ kɛhãa wɔ lɛ ahe ni wɔnaa akɛ ekɛ lɛ nyiɛ pɛpɛɛpɛ. Ni kɛ́ wɔna akɛ gbɛtsɔɔmɔi ni asafo lɛ kɛhãa wɔ lɛ kɛ Ŋmalɛ lɛ nyiɛ pɛpɛɛpɛ lɛ, no hãa hemɔkɛyeli ni wɔyɔɔ akɛ Yehowa asafo lɛ nɛ lɛ mli waa.—Rom. 12:2.

7. Mɛɛ sane Yesu shiɛ? Ni mɛɛ gbɛ nɔ Yehowa asafo lɛ nyiɛɔ enanemaahei lɛ asɛɛ?

⁷ Yesu shiɛ “Nyɔŋmɔ Maŋtsɛyeli lɛ he sane kpakpa lɛ.” (Luka 4:​43, 44) Agbɛnɛ hu, Yesu fã ekaselɔi lɛ akɛ amɛshiɛ Nyɔŋmɔ Maŋtsɛyeli lɛ he sane lɛ. (Luka 9:​1, 2; 10:​8, 9) Ŋmɛnɛ lɛ, mɛi fɛɛ ni yɔɔ Yehowa asafo lɛ mli lɛ shiɛɔ Maŋtsɛyeli lɛ he sane lɛ ekɔɔɔ he eko he ni amɛyɔɔ loo nibii abɔ ni amɛtsuɔ yɛ asafo lɛ mli.

8. Mɛɛ hegbɛ ni nɔ bɛ wɔná?

⁸ Eji hegbɛ kpele ni wɔná akɛ wɔbaagba mɛi Nyɔŋmɔ Maŋtsɛyeli lɛ he sane! Jeee mɔ fɛɛ mɔ kɛkɛ náa hegbɛ nɛɛ. Akɛ nɔkwɛmɔnɔ lɛ, be ni Yesu yɔɔ shikpɔŋ lɛ nɔ lɛ, ehãaa mumɔi fɔji lɛ agba mɛi ehe sane. (Luka 4:41) Ŋmɛnɛ hu lɛ, dani abaahã mɔ ko hegbɛ ni efata Nyɔŋmɔ webii lɛ ahe kɛshiɛ lɛ, akwɛɔ kɛji eehi shi yɛ Nyɔŋmɔ gbɛtsɔɔmɔi lɛ anaa. Kɛ́ wɔgba mɛi Nyɔŋmɔ Maŋtsɛyeli lɛ he sane be fɛɛ be, kɛ agbɛnɛ hu, yɛ he fɛɛ he lɛ, no hãa anaa akɛ wɔhiɛ sɔɔ hegbɛ ni wɔná akɛ wɔbaashiɛ lɛ. Wɔmiisumɔ ni wɔkase Yesu, no hewɔ lɛ, wɔfeɔ bɔ fɛɛ bɔ ni wɔbaanyɛ koni wɔshiɛ wɔhã mɛi ni wɔtsɔɔ amɛ anɔkwale lɛ.—Mat. 13:​3, 23; 1 Kor. 3:6.

9. Mɛɛ gbɛ nɔ asafo lɛ hãa mɛi leɔ Nyɔŋmɔ gbɛ́i lɛ?

⁹ Yesu hã mɛi le Nyɔŋmɔ gbɛ́i lɛ. Be ko be ni esɔleɔ ehãa e-Tsɛ ni yɔɔ ŋwɛi lɛ, ewie akɛ: “Mihã amɛle ogbɛ́i lɛ.” (Yoh. 17:26) Yehowa asafo lɛ kaseɔ Yesu, ni no hewɔ lɛ, amɛfeɔ nɔ fɛɛ nɔ ni amɛbaanyɛ kɛyeɔ amɛbuaa mɛi koni amɛle Nyɔŋmɔ gbɛ́i lɛ. Gbɛ kome ni Yehowa asafo lɛ tsɔɔ nɔ efeɔ nakai ji, kɛtsɔ Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ nɔ. Kɛ́ okwɛ Biblia shishitsɔɔmɔ nɛɛ mli lɛ, obaana akɛ aku sɛɛ akɛ Nyɔŋmɔ gbɛ́i lɛ ewo he fɛɛ he ni blema Bibliai ni akɛ niji ŋmala lɛ tsɔɔ akɛ esa akɛ eje kpo yɛ lɛ. Atsɔɔ Jeŋ Hee Shishitsɔɔmɔ muu lɛ fɛɛ loo efã ko shishi kɛtee wiemɔi 270 kɛ sɛɛ amli. Kɛ́ okwɛ Saji Krokomɛi A4 kɛ A5 ni yɔɔ shishitsɔɔmɔ nɛɛ mli lɛ, obaana nɔ hewɔ ni yɛ shishitsɔɔmɔ nɛɛ mli lɛ, akɛ Nyɔŋmɔ gbɛ́i lɛ ewo hei fɛɛ ni esa akɛ eje kpo yɛ yɛ Biblia lɛ mli lɛ. Sane ni yitso ji, “Ani Esa akɛ Akɛ Gbɛ́i Yehowa Lɛ Atsu Nii yɛ Kpaŋmɔ Hee lɛ Mli?” ni je kpo yɛ August 1, 2008 Buu-Mɔɔ lɛ baafã 18 kɛyashi 23 lɛ hu tsɔɔ wɔ nɔ hewɔ ni esa akɛ Nyɔŋmɔ gbɛ́i lɛ aje kpo shii 237 yɛ Kristofoi A-Greek Ŋmalɛ lɛ mli.

10. Mɛni okaseɔ yɛ nɔ ni yoo lɛ ni yɔɔ Myanmar lɛ wie lɛ mli?

¹⁰ Tamɔ Yesu fee lɛ, wɔ hu wɔmiisumɔ ni wɔye wɔbua mɛi pii koni amɛbale Nyɔŋmɔ gbɛ́i lɛ. Be ni atsɔɔ yoo ko ni yɔɔ Myanmar ni eye afii 67 lɛ Nyɔŋmɔ gbɛ́i lɛ, ebɔi yaafó, ni ekɛɛ mɔ ni kɛ lɛ kaseɔ nii lɛ akɛ: “Kɛjɛ be ni afɔ mi lɛ, enɛ ji be klɛŋklɛŋ ni minu akɛ Nyɔŋmɔ gbɛ́i ji Yehowa. . . . Nɔ ni otsɔɔ mi lɛ ji nii ni he hiaa fe fɛɛ ni mikase yɛ mishihilɛ mli.” Niiashikpamɔ nɛɛ hãa wɔnaa akɛ, kɛ́ wɔtsɔɔ mɛi Nyɔŋmɔ gbɛ́i lɛ, ebaanyɛ etsake amɛshihilɛ.

YAA NƆ OFEE NIBII NI TSƆƆ AKƐ OHEƆ OYEƆ AKƐ YEHOWA ASAFO LƐ NƐ

11. Mɛni ji nɔ kome ni asafoŋ onukpai baanyɛ afee kɛtsɔɔ akɛ amɛheɔ amɛyeɔ akɛ Yehowa asafo lɛ nɛ? (Kwɛmɔ mfoniri lɛ hu.)

¹¹ Mɛni ji nɔ kome ni asafoŋ onukpai baanyɛ afee kɛtsɔɔ akɛ amɛheɔ amɛyeɔ akɛ Yehowa asafo lɛ nɛ? No ji, ni amɛbaakane gbɛtsɔɔmɔi fɛɛ ni asafo lɛ kɛhãa amɛ lɛ jogbaŋŋ ni amɛfee bɔ fɛɛ bɔ ni amɛbaanyɛ ni amɛkɛtsu nii. Akɛ nɔkwɛmɔnɔ lɛ, ahã amɛ gbɛtsɔɔmɔi yɛ bɔ ni amɛtsu asafoŋ kpeei lɛ fãi srɔtoi lɛ ahe nii amɛhã, bɔ ni amɛsɔle amɛhã kɛ́ amɛdamɔ asafo lɛ najiaŋ amɛmiisɔle, kɛ agbɛnɛ hu, bɔ ni amɛkwɛ nyɛmimɛi lɛ anɔ amɛhã, ni esa akɛ amɛkɛ gbɛtsɔɔmɔi nɛɛ fɛɛ atsu nii. Kɛ́ asafoŋ onukpai lɛ kɛ gbɛtsɔɔmɔi fɛɛ ni Yehowa asafo lɛ kɛhãa amɛ lɛ tsu nii lɛ, no hãa nyɛmimɛi lɛ naa akɛ Yehowa sumɔɔ amɛ ni ekwɛɔ amɛnɔ jogbaŋŋ.

12. (a) Mɛni hewɔ esa akɛ wɔbo mɛi ni nyiɛɔ hiɛ lɛ toi ni wɔba wɔhe shi wɔhã amɛ lɛ? (Hebribii 13:​7, 17) (b) Mɛni hewɔ esa akɛ wɔkɛ wɔjwɛŋmɔ ama sui kpakpai ni mɛi ni nyiɛɔ hiɛ lɛ yɔɔ lɛ anɔ?

¹² Kɛ́ asafoŋ onukpai lɛ hã wɔ gbɛtsɔɔmɔ lɛ, esa akɛ wɔjɛ wɔtsuiŋ wɔkɛtsu nii. Kɛ́ wɔfee nakai lɛ, ebaahã amɛnitsumɔ lɛ afee mlɛo. Biblia lɛ woɔ wɔ hewalɛ ni wɔbo mɛi ni nyiɛɔ hiɛ lɛ toi ni wɔba wɔhe shi wɔhã amɛ. (Kanemɔ Hebribii 13:​7, 17.) Shi jeee be fɛɛ be enɛ feemɔ yɔɔ mlɛo. Mɛni hewɔ? Nɔ hewɔ lɛ ji, asafoŋ onukpai lɛ yeee emuu. Shi, kɛ́ wɔkɛ wɔjwɛŋmɔ ma amɛfatɔi lɛ anɔ, moŋ fe amɛsui kpakpai lɛ anɔ lɛ, belɛ wɔmiiye wɔmiibua wɔhenyɛlɔi lɛ. Mɛni hewɔ wɔkɛɔ nakai? Kɛ́ wɔná asafoŋ onukpai lɛ ahe jwɛŋmɔ ni ejaaa lɛ, ewaaa kwraa akɛ wɔbaaná asafo lɛ hu he jwɛŋmɔ ni ejaaa ni wɔnu he akɛ jeee Yehowa asafo lɛ nɛ. Ni enɛ pɛpɛɛpɛ ji nɔ ni wɔhenyɛlɔi lɛ taoɔ. Mɛni wɔbaanyɛ wɔfee koni wɔyɔse amalei ni wɔhenyɛlɔi lɛ gbɛɔ amɛshwãa lɛ, ni wɔkahe wɔye?

KAAHÃ NIBII NI MƐI WIEƆ LƐ HÃ ONU HE AKƐ JEEE YEHOWA ASAFO LƐ NƐ

13. Mɛɛ gbɛ nɔ Nyɔŋmɔ henyɛlɔi lɛ hãa efeɔ tamɔ nɔ ni asafo lɛ ehiii?

¹³ Mɛi ni teɔ shi amɛwoɔ Yehowa kɛ esafo lɛ hãa mɛi naa nibii kpakpai ni asafo lɛ feɔ lɛ akɛ nibii gbohii. Akɛ nɔkwɛmɔnɔ lɛ, wɔkase yɛ Biblia lɛ mli akɛ, Yehowa miisumɔ ni mɛi ni jáa lɛ lɛ ahiɛ amɛhe falefale, amɛba amɛjeŋ jogbaŋŋ, ni amɛjá lɛ yɛ gbɛ ni etsɔɔ akɛ ajá lɛ lɛ nɔ. Yehowa efã akɛ ajie mɛi fɛɛ ni feɔ nibii gbohii ni amɛsumɔɔɔ akɛ amɛtsakeɔ amɛtsui lɛ kɛje asafo lɛ mli. (1 Kor. 5:​11-13; 6:​9, 10) Wɔyeɔ famɔ nɛɛ ni yɔɔ Nyɔŋmɔ Wiemɔ lɛ mli lɛ nɔ. Shi mɛi ni teɔ shi amɛwoɔ wɔ lɛ kɛɛ nakai ni wɔfeɔ lɛ tsɔɔ akɛ wɔyɛ kpɛŋŋ, wɔkojoɔ mɛi, ni wɔbɛ suɔmɔ.

14. Namɔ hɔ amalei fɛɛ ni agbɛɔ ashwãa yɛ asafo lɛ he lɛ asɛɛ?

¹⁴ Le mɔ tuuntu ni hɔ amalei ni agbɛɔ ashwãa yɛ asafo lɛ he lɛ asɛɛ. Satan Abonsam ji mɔ ni hɔ amalei fɛɛ ni agbɛɔ ashwãa yɛ asafo lɛ he lɛ asɛɛ. Lɛ ji “malemɔ tsɛ” lɛ. (Yoh. 8:44; 1 Mo. 3:​1-5) No hewɔ lɛ, esaaa akɛ efeɔ wɔ naakpɛɛ akɛ etsɔɔ esamaŋfoi lɛ anɔ egbɛɔ Yehowa asafo lɛ he amalei eshwãa. Nakai efee yɛ blema Kristofoi lɛ abeiaŋ.

15. Mɛni jamɔŋ hiɛnyiɛlɔi lɛ fee Yesu kɛ esɛɛnyiɛlɔi lɛ?

¹⁵ Be ni Yesu ba shikpɔŋ lɛ nɔ lɛ, no mli lɛ eye emuu, ni efee naakpɛɛ nii babaoo. Fɛɛ sɛɛ lɛ, Satan tsɔ mɛi komɛi anɔ egbɛ ehe amalei pii eshwã. Akɛ nɔkwɛmɔnɔ lɛ, jamɔŋ hiɛnyiɛlɔi lɛ kɛɛ mɛi akɛ, “daimonioi anɔyelɔ lɛ” hewalɛ Yesu kɛfamɔɔ daimonioi lɛ. (Mar. 3:22) Agbɛnɛ hu, be ni ayeɔ Yesu sane lɛ, jamɔŋ hiɛnyiɛlɔi lɛ kɛɛ ewie wiemɔ fɔŋ eshi Nyɔŋmɔ, ni amɛwo maŋbii lɛ ayiŋ koni amɛbi ni agbe lɛ. (Mat. 27:20) Sɛɛ mli be ni Kristo sɛɛnyiɛlɔi lɛ shiɛɔ sane kpakpa lɛ, mɛi ni teɔ shi amɛwoɔ amɛ lɛ “wo jeŋmajiaŋbii lɛ ayiŋ ni amɛfite amɛjwɛŋmɔ” koni amɛwa Kristofoi lɛ ayi. (Bɔf. 14:​2, 19) Be ni agbálaa Bɔfoi 14:2 lɛ mli yɛ December 1, 1998 Buu-Mɔɔ lɛ mli lɛ, awie akɛ: “Akɛni shɛɛ sane lɛ ni amɛ diɛŋtsɛ amɛkpoo lɛ kɛkɛ hãaa amɛtsui anyɔ amɛmli hewɔ lɛ, Yudafoi shiteekɛwolɔi lɛ je amale naafolɔmɔ wiemɔi ahe tafaa shishi, ni amɛbɔ mɔdɛŋ ní amɛhã Jeŋmajiaŋbii lɛ aná Kristofoi ahe jwɛŋmɔ fɔŋ.”

16. Kɛ́ wɔnu asafo lɛ loo mɛi ni nyiɛ hiɛ lɛ ahe sane fɔŋ ko lɛ, mɛni esa akɛ wɔkai?

¹⁶ Satan miimale kɛbashi ŋmɛnɛ. Ekã he ‘eelaka shikpɔŋ muu lɛ fɛɛ.’ (Kpo. 12:9) No hewɔ lɛ, be fɛɛ be ni obaanu asafo lɛ loo mɛi ni nyiɛɔ hiɛ lɛ ahe sane fɔŋ ko lɛ, kaimɔ nɔ ni Nyɔŋmɔ henyɛlɔi lɛ fee Yesu kɛ blema Kristofoi lɛ. Ŋmɛnɛ lɛ, aawa Yehowa webii lɛ ayi, ni aagbɛ amɛhe saji fɔji aashwã tamɔ bɔ ni Biblia lɛ egba efɔ̃ shi lɛ pɛpɛɛpɛ. (Mat. 5:​11, 12) Kɛ́ wɔhã ehi wɔjwɛŋmɔ mli akɛ Satan ji mɔ ni hɔ amalei nɛɛ asɛɛ lɛ, wɔheŋ wɔyeŋ, shi moŋ, wɔbaafee nɔ ni wɔbaanyɛ kɛbu wɔhe amrɔ nɔŋŋ. Mɛni nɛkɛ wɔbaanyɛ wɔfee kɛbu wɔhe?

17. Mɛni wɔbaanyɛ wɔfee kɛbu wɔhe koni saji ni bɛ mli akafite wɔjwɛŋmɔ? (2 Timoteo 1:13) (Kwɛmɔ akrabatsa ni ji, “Nɔ Ni Esa Akɛ Ofee Kɛ́ Onu Sane Ko Ni Bɛ Mli” lɛ hu.)

¹⁷ Kaabo amalei toi. Bɔfo Paulo tsɔɔ nɔ pɔtɛɛ ni esa akɛ wɔfee kɛ́ wɔnu saji ni bɛ mli. Ekɛɛ Timoteo akɛ, ‘efã mɛi komɛi ni amɛkɛ amɛjwɛŋmɔ akaya adesãi anɔ, ni amɛtsi amɛhe kɛje adesãi ni wooo Nyɔŋmɔ hiɛ nyam lɛ ahe.’ (1 Tim. 1:​3, 4; 4:7) Susumɔ enɛ he okwɛ, gbekɛ baanyɛ akɔ nɔ ko yɛ shikpɔŋ ni ekɛwo edaaŋ, shi onukpa efeŋ nakai kɔkɔɔkɔ, ejaakɛ ele akɛ kɛ́ efee nakai lɛ, ebaawo ehe hela. Nakai nɔŋŋ wɔ hu wɔbooo saji ni bɛ mli toi, ejaakɛ wɔle mɔ ni hɔ nakai saji lɛ asɛɛ. Moŋ lɛ, wɔboɔ anɔkwale “wiemɔi ni hãa mɔ náa hewalɛ” lɛ toi.—Kanemɔ 2 Timoteo 1:13.

18. Mɛni wɔbaanyɛ wɔfee kɛtsɔɔ akɛ wɔheɔ wɔyeɔ waa akɛ Yehowa asafo lɛ nɛ?

¹⁸ Yɛ nikasemɔ nɛɛ mli lɛ, wɔbana nibii etɛ ni Yesu fee kɛ bɔ ni Yehowa asafo lɛ nyiɛɔ enanemaahei lɛ asɛɛ pɛpɛɛpɛ. Be ni okaseɔ Biblia lɛ, kwɛmɔ akɛ obaana gbɛi krokomɛi anɔ ni Yehowa asafo lɛ kaseɔ Yesu lo. Ye obua mɛi ni yɔɔ osafo lɛ mli lɛ koni amɛ hu amɛhe amɛye waa akɛ Yehowa asafo lɛ nɛ. Agbɛnɛ hu, yaa nɔ osɔmɔ Yehowa, oye lɛ anɔkwa, ni okpɛtɛ asafo ni ekɛtsuɔ nii bianɛ lɛ he. Kɛ́ ofee nibii nɛɛ, no baatsɔɔ akɛ oheɔ oyeɔ waa akɛ Yehowa asafo lɛ nɛ. (Lala 37:28) Be fɛɛ be lɛ, hã ohiɛ asɔ hegbɛ kpele ni oná akɛ ofata Yehowa webii ni yeɔ lɛ anɔkwa lɛ ahe.