Mɛi Enyɔ Ni Akɛfata Gbɛtsɔɔmɔ Kuu Lɛ He
OCTOBER 5, 2024 lɛ, atswa adafi krɛdɛɛ ko yɛ daa afi kpee lɛ shishi, akɛ, ahala Nyɛminuu Jody Jedele kɛ Nyɛminuu Jacob Rumph akɛ Yehowa Odasefoi A-Gbɛtsɔɔmɔ Kuu lɛ mli bii. Nyɛmimɛi nɛɛ kɛ afii pii esɔmɔ Yehowa.
Jody Jedele kɛ eŋa, Damaris
Afɔ Nyɛminuu Jedele yɛ Missouri, yɛ U.S.A., ni be ni afɔ lɛ lɛ, epapa kɛ emami fɛɛ yɛ anɔkwale lɛ mli momo. No mli lɛ, Odasefoi pii bɛ he ni amɛyɔɔ lɛ. No hewɔ lɛ, nyɛmimɛi jɛɔ hei srɔtoisrɔtoi amɛbayeɔ amɛbuaa koni ashiɛ sane kpakpa lɛ yɛ jɛmɛ, ni enɛ hã ebale nyɛmimɛi pii. Suɔmɔ kɛ ekomefeemɔ ni yɔɔ nyɛmimɛi nɛɛ ateŋ lɛ hã ena lɛɛlɛŋ akɛ anɔkwale lɛ nɛ. No hewɔ lɛ, yɛ October 15, 1983 lɛ, ehã abaptisi lɛ. Nyɛminuu Jedele sumɔɔ shiɛmɔ waa, no hewɔ lɛ, yɛ September 1989, be ni egbe sɛkɛndre skul naa lɛ, ebɔi sɔɔmɔ akɛ daa gbɛgbalɔ.
Be ni Nyɛminuu Jedele ji oblanyo fioo lɛ, efɔlɔi kɛ lɛ kɛ enyɛmi yoo lɛ yasharaa shi yɛ Betel. Enɛ hã ekɛ enyɛmi yoo lɛ fɛɛ shwe waa akɛ, wɔsɛɛ lɛ amɛyasɔmɔ yɛ Betel, ni amɛnyɛ amɛshɛ oti nɛɛ he. Yɛ September 1990 lɛ, afɔ̃ Nyɛminuu Jedele nine ni ebasɔmɔ yɛ Wallkill Betel. Be ni etee lɛ, ahã eyatsu nii yɛ Cleaning Department lɛ, ni sɛɛ mli lɛ, ajie lɛ kɛtee Medical Services.
Nakai beiaŋ lɛ, Spanish asafoi ni yɔɔ Wallkill kpokpaa lɛ nɔ lɛ miishwere waa, ni ehe bahia ni aná nyɛmimɛi hii ni baatsu sɔ̃i srɔtoi ahe nii yɛ asafoi lɛ amli. No hewɔ lɛ, Nyɛminuu Jedele kɛ asafoi nɛɛ ateŋ ekome bɔi sɔɔmɔ ni ebɔi Spanish kasemɔ. No sɛɛ etsɛɛɛ lɛ, ekɛ nyɛmi yoo gbɛgbalɔ ko ni atsɛɔ lɛ Damaris lɛ kpe ni amɛbatsɔmɔ nanemɛi. No mli lɛ, asafo ni Damaris yɔɔ mli lɛ kɛ asafo ni Nyɛminuu Jedele yɔɔ mli lɛ fɛɛ yɛ kpokpaa kome mli. Sɛɛ mli lɛ, amɛbote gbalashihilɛ mli, ni ahã ebafata ehe yɛ Betel.
Yɛ 2005 lɛ, ehe bahia ni amɛkɛ amɛ-Betel sɔɔmɔ lɛ akpasa shi fioo koni amɛyakwɛ amɛfɔlɔi ni egbɔlɔ lɛ. Yɛ nɛkɛ be nɛɛ mli lɛ, amɛsɔmɔ akɛ daa gbɛgbalɔi, ni Nyɛminuu Jedele ná hegbɛ etsɔɔ nii yɛ Gbɛgbamɔ Sɔɔmɔ Skul lɛ mli shii abɔ, esɔmɔ akɛ Ajinafoi Akuu Ni Kɛ Helatsamɔhei Shãraa (HLC) lɛ mli nyo, ni esɔmɔ hu akɛ ajinafoi akuu ni kwɛɔ Maŋtsɛyeli Asai amaamɔ kɛ amɛsaamɔ nɔ lɛ mli nyo.
Yɛ 2013 lɛ, afɔ̃ Nyɛminuu kɛ Nyɛmiyoo Jedele nine kɛba Betel ekoŋŋ koni amɛbaye amɛbua ni ama asafo lɛ nitsumɔhe yitso lɛ yɛ Warwick. Sɛɛ mli lɛ, ahã amɛyasɔmɔ yɛ Patterson kɛ Wallkill. Nyɛminuu Jedele tsu nii yɛ Local Design/Construction Department (LDC) lɛ, ni sɛɛ mli lɛ, etsu nii yɛ Hospital Information Services. Yɛ March 2023 lɛ, ahala lɛ akɛ yelikɛbualɔ kɛhã Sɔɔmɔ Nitsumɔ Ajinafoi Akuu lɛ. Kɛ́ Nyɛminuu Jedele kwɛ nibii srɔtoi ni etsu yɛ Yehowa asafo lɛ mli lɛ, enaa faŋŋ akɛ, Yehowa ni eye ebua lɛ. Ewie akɛ: “Bei komɛi lɛ, kɛ́ atu nitsumɔi hei awo odɛŋ lɛ, otsui fãa fioo. Shi nakai beiaŋ esa akɛ okai ni okɛ ohiɛ afɔ̃ Yehowa nɔ, ejaakɛ lɛ eyeɔ ebuaa wɔ ni wɔnyɛɔ wɔtsuɔ nɔ fɛɛ nɔ ni eesumɔ ni wɔtsu lɛ.”
Jacob Rumph kɛ eŋa, Inga
Afɔ Nyɛminuu Rumph yɛ California, yɛ U.S.A. No mli lɛ, emami pɛ ji Odasefonyo, shi ekpa asafoŋ kpeei yaa, ni eyaaa shiɛmɔ hu. Fɛɛ sɛɛ lɛ, mami nɛɛ bɔ mɔdɛŋ akɛ ebaatsɔɔ ebinuu lɛ Yehowa he nii. Agbɛnɛ hu, daa afi lɛ, Nyɛminuu Rumph yasaraa enaa, ni enaa lɛ he wa yɛ anɔkwale lɛ mli. Anɔkwa, lɛ eye ebua Nyɛminuu Rumph ni ebanya anɔkwale lɛ he. Be ni Nyɛminuu Rumph ye afii 13 lɛ, ebi ni akɛ lɛ akase Biblia lɛ. Kɛkɛ ni yɛ September 27, 1992 lɛ, ehã abaptisi lɛ. Miishɛɛ sane ji, Nyɛminuu Rumph mami bɔi asafoŋ kpeei yaa kɛ shiɛmɔyaa ekoŋŋ, ni epapa kɛ enyɛmimɛi lɛ hu tee amɛhiɛ ni abaptisi amɛ.
Yɛ September 1995, be ni Nyɛminuu Rumph gbe sɛkɛndre skul naa lɛ, ebɔi gbɛgbamɔ nitsumɔ lɛ. Nɔ kome ni tsirɛ lɛ ni efee nakai ji, ena akɛ gbɛgbalɔi lɛ yɛ miishɛɛ waa, ni eshwe ni ená nakai miishɛɛ lɛ eko. Yɛ afi 2000 lɛ, efã kɛtee Ecuador, ejaakɛ no mli lɛ hiamɔ lɛ da yɛ jɛmɛ. Be ni esɔmɔɔ yɛ jɛmɛ lɛ, ekɛ nyɛmi yoo gbɛgbalɔ ko ni jɛ Canada, ni atsɛɔ lɛ Inga lɛ kpe, ni sɛɛ mli lɛ, amɛbote gbalashihilɛ mli. Be ni amɛbote gbalashihilɛ lɛ mli lɛ sɛɛ lɛ, amɛsɔmɔ yɛ maŋ ko mli yɛ Ecuador nɔŋŋ. No mli lɛ, nyɛmimɛi fioo pɛ yɔɔ nakai maŋ lɛ mli, shi ŋmɛnɛ lɛ, aná asafo yɛ jɛmɛ.
Afii komɛi asɛɛ lɛ, ahã Nyɛminuu kɛ Nyɛmiyoo Rumph bɔi sɔɔmɔ akɛ gbɛgbalɔi krɛdɛi, ni sɛɛ mli lɛ, ahã amɛbɔi sɔɔmɔ akɛ kpokpaa nɔkwɛlɔ kɛ eŋa. Yɛ 2011 lɛ, afɔ̃ amɛ nine kɛtee Gilead Skul lɛ klas ni ji 132 lɛ. Be ni amɛgbe Gilead naa lɛ, ahã amɛyasɔmɔ yɛ maji srɔtoi anɔ, ni amɛtsu nitsumɔi srɔtoisrɔtoi. Akɛ nɔkwɛmɔnɔ lɛ, amɛsɔmɔ yɛ Betel, amɛsɔmɔ akɛ maŋsɛɛ sɔɔlɔi, ni amɛsɔmɔ hu akɛ kpokpaa nɔkwɛlɔ kɛ eŋa. Kɛfata he lɛ, Nyɛminuu Rumph ná hegbɛ etsɔɔ nii yɛ Skul Kɛhã Maŋtsɛyeli Sane Kpakpa Jajelɔi lɛ mli.
Be ni COVID-19 tsɛŋemɔ hela lɛ ba lɛ, Nyɛminuu kɛ Nyɛmiyoo Rumph ku amɛsɛɛ kɛtee United States. Be ni amɛtee lɛ, ahã amɛyasɔmɔ yɛ Wallkill Betel, ni nyɛmimɛi ni tsuɔ nii yɛ Service Department lɛ tsɔɔ Nyɛminuu Rumph nii. Sɛɛ mli lɛ, ahã amɛku amɛsɛɛ kɛtee Betel yɛ Ecuador, ni Nyɛminuu Rumph sɔmɔ akɛ Nitsumɔhe Nine Ajinafoi Akuu lɛ mli nyo. Yɛ 2023 lɛ, akɛ amɛ ba Warwick, ni yɛ January 2024 lɛ, ahã Nyɛminuu Rumph bɔi sɔɔmɔ akɛ yelikɛbualɔ kɛhã Sɔɔmɔ Nitsumɔ Ajinafoi Akuu lɛ. Nyɛminuu Rumph kɛɛ, nɔ kome ni ekase yɛ hei srɔtoi ni ená hegbɛ esɔmɔ yɛ kɛ nitsumɔi srɔtoi ni ená hegbɛ etsu lɛ mli ji, “Jeee he ni mɔ ko sɔmɔɔ yɛ lɛ ji nɔ ni he hiaa; nɔ ni he hiaa ji mɛi ni ekɛsɔmɔɔ lɛ.”
Wɔhiɛ sɔɔ nyɛmimɛi hii nɛɛ, ejaakɛ amɛtsuɔ nii waa, ni ‘wɔbuɔ amɛ akɛ mɛi ni sa woo.’—Fip. 2:29.