Mɛi Enyɔ Ni Akɛfata Gbɛtsɔɔmɔ Kuu Lɛ He
SHƆ, January 18, 2023 lɛ, atswa adafi krɛdɛɛ ko yɛ jw.org lɛ nɔ akɛ, ahala Nyɛminuu Gage Fleegle kɛ Nyɛminuu Jeffrey Winder akɛ Yehowa Odasefoi A-Gbɛtsɔɔmɔ Kuu lɛ mli bii. Nyɛmimɛi nɛɛ kɛ afii pii esɔmɔ Yehowa.
Gage Fleegle kɛ eŋa, Nadia
Nyɛminuu Fleegle da yɛ Pennsylvania anaigbɛ, yɛ U.S.A., ni efɔlɔi tsɔse lɛ yɛ anɔkwale lɛ mli. Be ni eji oblanyo lɛ, efɔlɔi fã kɛtee akrowa bibioo ko ni hiamɔ lɛ da yɛ. No sɛɛ etsɛɛɛ, yɛ November 20, 1988 lɛ, abaptisi lɛ.
Be fɛɛ be lɛ, Nyɛminuu Fleegle fɔlɔi woɔ lɛ hewalɛ ni ekɛ ehe awo be fɛɛ sɔɔmɔ nitsumɔ lɛ mli. Nɔ ko ni efɔlɔi fɔɔ feemɔ ji, amɛfɔ̃ɔ kpokpaa nɔkwɛlɔi kɛ Betel weku lɛ mli bii nine kɛbaa amɛshĩa lɛ, ni Nyɛminuu Fleegle na akɛ nyɛmimɛi nɛɛ yɛ miishɛɛ waa. Ebaptisimɔ sɛɛ etsɛɛɛ, yɛ September 1, 1989 lɛ, ebatsɔ daa gbɛgbalɔ. Afii enyɔ sɛɛ, yɛ October 1991 lɛ, enyɛ eshɛ oti ko ni ekɛma ehiɛ be ni eye afii 12 lɛ he. No ji, ebɔi sɔɔmɔ yɛ Brooklyn Betel.
Be ni Nyɛminuu Fleegle ba Betel lɛ, ahã eyatsu nii yɛ he ni awoɔ woji asɛɛ yɛ lɛ afii kpaanyɔ, ni no sɛɛ lɛ, ahã eyatsu nii yɛ Service Department lɛ. Nɛkɛ be nɛɛ mli lɛ, ekɛ afii fioo hi asafo ko ni wieɔ Russian lɛ mli. Yɛ 2006 lɛ, ekɛ nyɛmi yoo ko ni atsɛɔ lɛ Nadia lɛ bote gbalashihilɛ mli, ni ekɛ lɛ esɔmɔ yɛ Betel kɛjɛ nakai beiaŋ. Amɛsɔmɔ yɛ Portuguese asafo mli, ni amɛkɛ nɔ ni fe afii nyɔŋma sɔmɔ yɛ Spanish asafo mli. Be ni Nyɛminuu Fleegle kɛ afii pii esɔmɔ yɛ Service Department lɛ, ahã ebɔi nitsumɔ yɛ Nitsɔɔmɔ Ajinafoi Akuu Ɔfis lɛ, ni sɛɛ mli lɛ, ahã eyatsu nii yɛ Sɔɔmɔ Nitsumɔ Ajinafoi Akuu Ɔfis lɛ. Yɛ March 2022 lɛ, ahala lɛ akɛ yelikɛbualɔ kɛhã Gbɛtsɔɔmɔ Kuu lɛ Sɔɔmɔ Nitsumɔ Ajinafoi Akuu lɛ.
Jeffrey Winder kɛ eŋa, Angela
Nyɛminuu Winder da yɛ Murrieta, yɛ California, yɛ U.S.A., ni efɔlɔi tsɔse lɛ yɛ anɔkwale lɛ mli. Abaptisi lɛ March 29, 1986, ni yɛ April, ni ji nyɔɔŋ ni nyiɛ sɛɛ lɛ mli nɔŋŋ lɛ, ebɔi sɔɔmɔ akɛ gbɛgbalɔi awalɔ. Ená sɔɔmɔ lɛ he miishɛɛ aahu akɛ, ekpɛ eyiŋ akɛ ebaatsa nɔ. Be ni esɔmɔ akɛ gbɛgbalɔi awalɔ nyɔji ekpaa lɛ, ebɔi sɔɔmɔ akɛ daa gbɛgbalɔ yɛ October 1, 1986.
Be ni Nyɛminuu Winder ji oblanyo fioo lɛ, eyasara enyɛmimɛi hii onukpai enyɔ ni no mli lɛ amɛmiisɔmɔ yɛ Betel lɛ. Enɛ hã eshwe waa akɛ, kɛ́ eda lɛ, ebaayatsu nii yɛ Betel. Yɛ May 1990 lɛ, afɔ̃ lɛ nine ni ebatsu nii yɛ Wallkill Betel.
Be ni Nyɛminuu Winder ba Betel lɛ, etsu nii yɛ hei srɔtoi. Akɛ nɔkwɛmɔnɔ lɛ, ahã etsu nii yɛ Cleaning Department lɛ, Farm Department lɛ, kɛ Betel Ɔfis. Yɛ 1997 lɛ, ekɛ eŋa Angela bote gbalashihilɛ mli, ni ekɛ lɛ esɔmɔ yɛ Betel kɛjɛ nakai beiaŋ kɛbashi ŋmɛnɛ. Yɛ 2014 lɛ, akɛ amɛ tee Warwick koni Nyɛminuu Winder ayaye ebua kɛma nitsumɔhe yitso lɛ. Yɛ 2016 lɛ, akɛ amɛ tee Watchtower Educational Center lɛ yɛ Patterson, ni Nyɛminuu Winder yatsu nii yɛ Audio/Video Services. Afii ejwɛ sɛɛ lɛ, ahã amɛku amɛsɛɛ kɛba Warwick, ni ahã Nyɛminuu Winder yatsu nii yɛ Ajinafoi Akuu Ni Kwɛɔ Betel Nitsulɔi Anɔ Ɔfis lɛ. Yɛ March 2022 lɛ, ahala lɛ akɛ yelikɛbualɔ kɛhã Gbɛtsɔɔmɔ Kuu Lɛ Ajinafoi Akuu Ni Kwɛɔ Betel Nitsulɔi Anɔ lɛ.
Hii nɛɛ ji “nikeenii” ni jɛ Yehowa ŋɔɔ, ni wɔsɔlemɔ ji, Yehowa ajɔɔ amɛ waa ni amɛya nɔ amɛtsu nii waa kɛfi e-Maŋtsɛyeli lɛ sɛɛ.—Efe. 4:8.