Je Lɛŋ Edɔ Waa Fe Nine Yɛ Afi 2023 Hulutsoo Beiaŋ​—Mɛni Biblia Lɛ Kɛɔ Yɛ He?

Mɛi ni yɔɔ je lɛŋ hei srɔtoi lɛ eyɔse akɛ, je lɛŋ edɔ waa fe bei fɛɛ ni eho, ni enɛ kɛ naagbai krokomɛi eba ni eehao mɛi waa diɛŋtsɛ. Kadimɔ amaniɛbɔi ni nyiɛ sɛɛ nɛɛ:

• “Kɛjɛ afii 174 nɛ ni abɔi bɔ ni jeŋ dɔɔ loo ejɔɔ hãa lɛ he amaniɛbɔɔ lɛ, June nɛɛ ji June ko ni kɔɔyɔɔ lɛ mli dɔ waa fe bei fɛɛ ni eho.”​—National Oceanic and Atmospheric Administration, U.S. Department of Commerce, July 13, 2023.

• Kɔɔyɔɔ lɛ mli edɔ waa yɛ “Italy, Spain, France, Germany, kɛ Poland fɛɛ, ni aakpa gbɛ akɛ ebaadɔ waa kɛyashi 48°C loo [118°F] yɛ ŋshɔkpɔi ni ji Sicily kɛ Sardinia lɛ anɔ – ekolɛ no baafee be ni kɔɔyɔɔ lɛ mli dɔ fe fɛɛ yɛ Yuropabii ayinɔsane mli.”​—European Space Agency, July 13, 2023.

• “Be ni je lɛŋ dɔɔ waa lɛ, wɔmiikpa gbɛ akɛ nugbɔ baafɔ nɛmɔ waa gbeyeigbeyei ni no baahã nu aha shikpɔŋ lɛ nɔ hei srɔtoi babaoo loo nu afuai aba yɛ hei pii.”​—Mɔ ni wie ji Stefan Uhlenbrook, ni ji onukpa ni kwɛɔ nu, ais, kɛ ehe saji anɔ yɛ World Meteorological Organization lɛ, July 17, 2023.

Ani amaniɛbɔi ni kɔɔ bɔ ni jeŋ miidɔ waa fe nine loo bɔ ni ejɔɔ waa lɛ ahe lɛ hãa ohaoɔ? Susumɔ nɔ ni Biblia lɛ kɛɔ yɛ sane ni he hiaa waa nɛɛ he lɛ he okwɛ.

Ani bɔ ni jeŋ dɔɔ waa fe nine loo bɔ ni ejɔɔ waa lɛ ehã Biblia gbalɛ miibaa mli?

Hɛɛ. Bɔ ni jeŋ dɔɔ waa fe nine loo bɔ ni ejɔɔ waa lɛ kɛ nibii ni Biblia lɛ wie akɛ ebaaya nɔ yɛ wɔbei nɛɛ amli lɛ kpãa gbee. Akɛ nɔkwɛmɔnɔ lɛ, Yesu gba efɔ̃ shi akɛ wɔbaana “gbeyei nibii.” (Luka 21:11) Bɔ ni je lɛŋ kã he edɔɔ waa lɛ ehã mɛi babaoo miishe gbeyei akɛ, adesai baahã shikpɔŋ lɛ atsɔ he ko ni mɔ ko mɔ ko nyɛŋ ahi dɔŋŋ.

Ani shikpɔŋ lɛ baatsɔ he ko ni mɔ ko mɔ ko nyɛŋ ahi dɔŋŋ?

Dabi. Nyɔŋmɔ bɔ shikpɔŋ lɛ koni wɔhi nɔ kwraa loo etsɔ wɔshihilɛhe kwraa; eŋmɛŋ adesai gbɛ koni amɛkpãtã hiɛ. (Lala 115:16; Jajelɔ 1:4) Anɔkwa, ewo shi akɛ ‘ebaafite mɛi ni fiteɔ shikpɔŋ lɛ.’​—Kpojiemɔ 11:18.

Biblia lɛ hãa wɔnaa akɛ, Nyɔŋmɔ baanyɛ ebu shikpɔŋ lɛ he kɛje nibii ni fiteɔ lɛ lɛ ahe, ni ebaafee hu.

• “[Nyɔŋmɔ] jɔɔ kɔɔyɔɔ ni tswaa lɛ he; ŋshɔkei lɛ ŋmɛɔ dɛmm.” (Lala 107:29) Nyɔŋmɔ yɛ hewalɛ ni ekɛbaakudɔ adebɔɔ hewalɛi lɛ. Ebaanyɛ efo naagbai ni kɔɔyɔɔŋ tsakemɔ kɛbaa ni hãa gbɔmɛi naa nɔ lɛ asɛɛ.

• “Obaakwɛ shikpɔŋ lɛ, ni obaahã eba nii babaoo kɛ yibii kpakpai.” (Lala 65:9) Nyɔŋmɔ baajɔɔ shikpɔŋ lɛ, ni shikpɔŋ lɛ baatsɔ paradeiso.

Kɛ́ ootao ole shi ni Biblia lɛ ewo akɛ abaasaa shikpɔŋ lɛ jogbaŋŋ koni efee tamɔ bɔ ni eji be ni abɔ jeŋ lɛ, kanemɔ sane ni ji “Namɔ Baabaa Shikpɔŋ Lɛ Yi?” lɛ.