**Maŋ Onukpa Ko Ni Le Helatsamɔ Saji Amli Jogbaŋŋ Lɛ Ebɔ Kɔkɔ Akɛ Social Media Baanyɛ Aye Oblahii Kɛ Oblayei Awui Waa—Mɛni Biblia Lɛ Kɛɔ Yɛ He?**

Yɛ May 23, afi 2023 lɛ, maŋ onukpa ko ni yɔɔ United States ni le helatsamɔ saji amli jogbaŋŋ lɛ bɔ maŋbii lɛ kɔkɔ akɛ, social media miiye oblahii kɛ oblayei awui waa.

“Eyɛ mli akɛ ekolɛ, social media miiye miibua gbekɛbii kɛ oblahii kɛ oblayei moŋ, shi odaseyelii babaoo yɛ ni tsɔɔ akɛ social media baanyɛ aye gbekɛbii kɛ oblahii kɛ oblayei ajwɛŋmɔ awui, ni ebaanyɛ egba amɛgbɔmɔtso hewalɛnamɔ hu naa.”—Social Media and Youth Mental Health: The U.S. Surgeon General’s Advisory, 2023

Onukpa nɛɛ kɛ niiamlitaomɔi ni tsɔɔ nɔ hewɔ ni esa akɛ akɔ nɔ ni ewie lɛ akɛ hiɛdɔɔ sane lɛ hã.

Ewaaa kwraa akɛ gbekɛbii ni eye afii 12 kɛmiimɔ afii 15 “ni yeɔ be ni fa fe ŋmɛlɛtswai 3 yɛ social media nɔ lɛ baaná jwɛŋmɔ mli naagbai kɛ naagbai krokomɛi ni hãa mɛi haoɔ waa lɛ eko.”
Yɛ gbekɛbii ni eye afii 14 lɛ agbɛfaŋ lɛ, “kɛ́ amɛfɔ social media lɛ nɔ yaa lɛ, amɛnyɛɛɛ amɛwɔ jogbaŋŋ, atsɔɔ nɔ awoɔ amɛhe gbeyei loo anyɛɔ amɛnɔ ni amɛfeɔ nibii ni amɛsumɔɔɔ, amɛnáaa bɔ ni amɛgbɔmɔtso yɔɔ lɛ he miishɛɛ, amɛnuɔ he akɛ amɛhe bɛ sɛɛnamɔ, amɛhaoɔ waa yɛ jwɛŋmɔŋ; enɛ baa gbekɛbii yei anɔ waa fe bɔ ni ebaa gbekɛbii hii anɔ.”

Mɛni fɔlɔi baanyɛ afee kɛbu amɛbii lɛ ahe kɛje oshãrai nɛɛ ahe? Biblia lɛ kɛ ŋaawoi ni yeɔ ebuaa waa hãa.

Nɔ ni fɔlɔi baanyɛ afee

Nyɛlea nɔ ni nyɛbii lɛ feɔ. Akɛ fɔlɔi lɛ, esa akɛ nyɛsusu oshãrai ni baanyɛ ajɛ social media nɔ yaa mli kɛba lɛ ahe, koni nyɛkwɛ akɛ nyɛbaahã nyɛbii lɛ aya social media lɛ nɔ loo nyɛhãŋ amɛya nɔ.

Biblia mli shishitoo mla: “Tsɔsemɔ gbekɛ ni enyiɛ gbɛ ni esa akɛ enyiɛ nɔ lɛ nɔ.”—Abɛi 22:6.
Kɛ́ ootao ole enɛ he saji krokomɛi lɛ, kanemɔ sane ni ji Ani Esa Akɛ Mibi Lɛ Aya Social Media Lɛ Nɔ? lɛ”

Kɛ́ oŋmɛɔ obi lɛ gbɛ ni eyaa social media lɛ nɔ lɛ, hã ohiɛ ahi ohe nɔ yɛ oshãrai ni ebaanyɛ ekɛba lɛ ahe, ní ole nibii hu ni obi lɛ feɔ yɛ social media lɛ nɔ. Mɛɛ gbɛ nɔ obaatsɔ ofee nakai?

Buu obi lɛ he kɛje nibii ni baanyɛ aye lɛ awui lɛ ahe. Ye obua lɛ koni enyɛ eyɔse nibii ni baanyɛ aye lɛ awui yɛ social media lɛ nɔ ni enyɛ etsi ehe kɛje he.

Biblia mli shishitoo mla: “Ajwamaŋbɔɔ kɛ muji nii srɔtoi fɛɛ kɛ amimyeli lɛ, akatsĩ tã po yɛ nyɛteŋ, . . . ni akatsĩ hiɛgbejianifeemɔ kɛ kwashiai awiemɔ kɛ yakayaka wiemɔ ni akɛyeɔ fɛo . . . tã yɛ nyɛteŋ.”—Efesobii 5:3, 4.
Kɛ́ ootao ŋaawoi ni baanyɛ aye abua bo yɛ enɛ gbɛfaŋ lɛ, kanemɔ sane ni ji “Bɔ Ni Obaafee Oye Obua Obii Lɛ Koni Kɛ́ Amɛtee Social Media Nɔ Lɛ Amɛfee Shweshweeshwe” lɛ.

Foo husu owo he ohã lɛ. Akɛ nɔkwɛmɔnɔ lɛ, wo obi lɛ mla kɛtsɔɔ lɛ be ni ebaanyɛ eya social media lɛ nɔ, kɛ bei abɔ ni esa akɛ eye yɛ nɔ.

Biblia mli shishitoo mla: ‘Be fɛɛ be lɛ, nyɛhiɛ ahia nyɛhe nɔ jogbaŋŋ koni nyɛnyiɛ akɛ mɛi ni hiɛ kã shi, koni nyɛkɛ nyɛbe atsu nii jogbaŋŋ.’—Efesobii 5:15, 16.
Okɛ vidio ni yitso ji, Ohiɛ Akã Shi Yɛ Fesbuk Kɛ Ehenɔi Lɛ Kɛnitsumɔ Mli lɛ aye abua obi lɛ koni ena nɔ hewɔ ni owoɔ lɛ mlai nɛɛ.