Ani Olimpis Lɛ Kɛ Ekomefeemɔ Baaba Lɛɛlɛŋ?​—⁠Mɛni Biblia Lɛ Kɛɔ Yɛ He?

Afi 2024 Olimpis akaŋshii ni miiya nɔ lɛ baahã mɛi aaafee akpekpe toi akpei enumɔ akwɛ mɛi ni jɛ maji srɔtoi 206 ni kɛ amɛhe baawo Olimpis akaŋshii lɛ amli lɛ. Thomas Bach, ni eji International Olympic Committee lɛ hiɛnyiɛlɔ lɛ wie akɛ: “Wɔfata nifeemɔ ko ni hãa ekomefeemɔ kɛ toiŋjɔlɛ baa je lɛ mli lɛ he. Nyɛhãa wɔfea ekome kɛfiaa nɔ hewɔ ni ato Olimpis akaŋshii lɛ shishi lɛ sɛɛ, no ji, koni efee adesai fɛɛ ekome ni amɛhi shi yɛ toiŋjɔlɛ mli, yɛ shihilɛi srɔtoi amli kɛ maji srɔtoi anɔ ni wɔjɛ lɛ fɛɛ sɛɛ.”

Ani Olimpis akaŋshii lɛ baanyɛ ehã aná shihilɛi ni nɔ bɛ nɛɛ? Ani toiŋjɔlɛ kɛ ekomefeemɔ diɛŋtsɛ baanyɛ aba be ko kɛ̃?

Ani Olimpis akaŋshii lɛ kɛ toiŋjɔlɛ kɛ ekomefeemɔ baa?

Jeee kpɔiaŋgbɔlemɔ nifeemɔi pɛ afi nɛɛ Olimpis akaŋshii lɛ egbala mɛi ajwɛŋmɔ kɛtee nɔ. Moŋ lɛ ehã ayɔse nibii komɛi kɛ maŋkwramɔŋ saji ni kɛ mligbalamɔ baa mɛi ateŋ lɛ. Saji nɛɛ ekomɛi ji, bu ni abuuu hegbɛi ni adesai yɔɔ, hewolonɔ su mlijiemɔ, jamɔ mligbalamɔ, kɛ hiɛiaŋkwɛmɔ.

Jeŋmaji ateŋ kpɔiaŋgbɔlemɔ akaŋshii tamɔ Olimpis lɛ, hãa mɛi amii shɛɔ amɛhe. Kɛ̃lɛ, nifeemɔi nɛɛ hãa anaa bɔ ni mɛi asusumɔi kɛ amɛnifeemɔi gbálaa amɛ kɛ mɛi krokomɛi ateŋ, kɛ bɔ ni ewoɔ mɛi hewalɛ koni amɛya nɔ amɛfee nakai moŋ fe ni amɛbaafee nibii ni kɛ toiŋjɔlɛ kɛ ekomefeemɔ diɛŋtsɛ baaba.

Biblia lɛ egba efɔ̃ shi akɛ, mɛi baajie sui ni hãŋ ekomefeemɔ aba je lɛ mli lɛ akpo. (2 Timoteo 3:1-5) Kɛ́ ootao ole Biblia mli gbalɛ nɛɛ he saji krokomɛi lɛ, kanemɔ sane ni ji, “Did the Bible Predict the Way People Think and Act Today? lɛ.”

Nɔ diɛŋtsɛ ni baahã toiŋjɔlɛ kɛ ekomefeemɔ aba je lɛ mli

Biblia lɛ tsɔɔ nɔ diɛŋtsɛ ni kɛ toiŋjɔlɛ kɛ ekomefeemɔ baaba jeŋ fɛɛ. Biblia lɛ ewo shi akɛ, mɛi fɛɛ ni yɔɔ shikpɔŋ lɛ nɔ lɛ baafee ekome yɛ ŋwɛi nɔyeli ko ni atsɛɔ lɛ “Nyɔŋmɔ Maŋtsɛyeli” lɛ shishi.​—Luka 4:43; Mateo 6:10.

Yesu Kristo, ni ji nakai Maŋtsɛyeli lɛ nɔ Maŋtsɛ lɛ baahã toiŋjɔlɛ aba shikpɔŋ nɔ fɛɛ. Biblia lɛ kɛɛ:

• “Jalɔi baafa yɛ egbii lɛ amli, Ni toiŋjɔlɛ baahi he fɛɛ he”​—Lala 72:7.

• “Ebaajie ohiafo ni bolɔɔ kɛhã yelikɛbuamɔ lɛ . . . kɛje nɔnyɛɛ kɛ yiwalɛ mli.”​—Lala 72:12, 14.

Amrɔ nɛɛ po lɛ, Yesu tsɔɔmɔi lɛ efee mɛi akpekpei abɔ ni jɛ maji 239 anɔ lɛ ekome. Akɛ Kristofoi lɛ, Yehowa Odasefoi ni yɔɔ je lɛŋ hei srɔtoi fɛɛ ekase bɔ ni akɛ mɛi hiɔ shi yɛ toiŋjɔlɛ mli. Kɛ́ ootao ole nɔ ni ehã Yehowa Odasefoi enyɛ amɛ kɛ mɛi hiɔ shi yɛ toiŋjɔlɛ mli lɛ, kanemɔ Buu-Mɔɔ ni saneyitso ji, “Obaanyɛ Oye Hetsɛ̃ Nɔ” lɛ.