1 Kronika
20 Ni eba mli akɛ, afi lɛ shishijee mli* be ni maŋtsɛmɛi lɛ yaa ta lɛ, Yoab+ nyiɛ asraafoi lɛ ahiɛ ni amɛyakpãtã Amonbii lɛ ashikpɔŋ lɛ hiɛ; eba ni ebawo Raba+ he ka, shi David hi shi yɛ Yerusalem.+ Yoab tutua Raba ni ekpãtã hiɛ.+ 2 Kɛkɛ ni David jie Malkam akekere lɛ yɛ eyitso, ni ena akɛ akekere lɛ kɛ ehe ojarawatɛi lɛ fɛɛ tsiimɔ ji shika tsuru talɛnta kome;* ni akɛwo David yitso. Eloo ta mli nii babaoo hu kɛjɛ maŋ lɛ mli.+ 3 Ni eloo mɛi ni yɔɔ maŋ lɛ mli lɛ kɛtee ni ehã amɛkɛ saalai folɔ tɛi, ni amɛkɛ dadei ni naa ba kɛ lemai tsu nii.+ Nakai ji bɔ ni David fee Amonbii lɛ amaji lɛ fɛɛ. Naagbee lɛ, David kɛ asraafoi lɛ fɛɛ ku amɛsɛɛ kɛtee Yerusalem.
4 Enɛ sɛɛ lɛ, ta te shi yɛ amɛ kɛ Filistibii lɛ ateŋ yɛ Gezer. Ni yɛ nakai ta lɛ mli lɛ, Sibekai,+ Hushanyo lɛ gbe Sipai, ni ji Refaim+ shwiei lɛ ateŋ mɔ kome lɛ, ni amɛbaje amɛshishi.
5 Ni amɛkɛ Filistibii lɛ yawu ekoŋŋ, ni Elhanan, Yair binuu lɛ, gbe Lahmi ni ji Goliat,+ Gatnyo* lɛ, nyɛmi nuu lɛ, mɔ ni ekpɔlɔ sɛɛ tso da tamɔ tsɔne ni mamalolɔ kɛloɔ mama lɛ mli tso lɛ.+
6 Ta te shi ekoŋŋ yɛ Gat,+ he ni no mli lɛ, nuu ko ni kwɔ ni eti waa+ ni yɔɔ nine waobii ekpaa ekpaa kɛ nane waobii ekpaa ekpaa, ni fɛɛ feɔ 24 lɛ yɔɔ lɛ; lɛ hu eji Refaim shwiei lɛ ateŋ mɔ kome.+ 7 Etee nɔ ebɔ Israel ahora,+ no hewɔ lɛ Yonatan, David nyɛmi nuu Shimea+ binuu lɛ gbe lɛ.
8 Mɛi nɛɛ ji Refaim+ shwiei lɛ ateŋ mɛi komɛi yɛ Gat,+ ni David kɛ etsuji lɛ gbe amɛ.