Yesu Tsɔɔ Ekaselɔi Lɛ Bɔ Ni Asɔleɔ

Farisifoi lɛ fee nibii ni baahã mɛi ana amɛ ni amɛjie amɛyi. Akɛ nɔkwɛmɔnɔ lɛ, kɛ́ amɛbaafee mɛi ejurɔ lɛ, amɛfeɔ lɛ bɔ ni mɛi krokomɛi baana, ni kɛ́ amɛbaasɔle hu lɛ, amɛyadamɔɔ hei ni mɛi fɔɔ tsɔmɔ koni mɔ fɛɛ mɔ ana akɛ amɛmiisɔle. Amɛkaseɔ sɔlemɔi kakadaji amɛwoɔ amɛyitsoŋ ni amɛyakɛɔ yɛ kpeehei lɛ kɛ gbɛjegbɛi lɛ ahe koni mɛi krokomɛi anu nɔ ni amɛkɛɔ lɛ. No hewɔ lɛ, nɔ ni Yesu kɛɛ mɛi lɛ fee amɛ naakpɛɛ waa. Ekɛɛ amɛ akɛ: ‘Nyɛkasɔlea tamɔ Farisifoi lɛ. Amɛsusuɔ akɛ kɛ́ amɛwie pii lɛ, Nyɔŋmɔ baabo amɛ toi, shi ebooo amɛ toi. Kɛ́ nyɛsɔle lɛ, nyɛkɛ Yehowa miigba sane. Nyɛkawiea nɔ kome too lɛ shii abɔ. Yehowa miisumɔ ni nyɛkɛɛ lɛ nyɛtsuiŋ saji fɛɛ.

‘Nyɛsɔlea yɛ nɛkɛ gbɛ nɔ: “Wɔ-Tsɛ ni yɔɔ ŋwɛi, ogbɛ́i lɛ he atse. O-Maŋtsɛyeli lɛ aba. Afee nɔ ni osumɔɔ yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ.”’ Agbɛnɛ hu, Yesu kɛɛ amɛ ni amɛsɔle koni Nyɔŋmɔ ahã amɛ niyenii ni amɛbaaye nakai gbi lɛ, ni ekɛ amɛhe eshai ake amɛ. Amɛbaanyɛ amɛsɔle yɛ nibii krokomɛi ni he hiaa amɛ lɛ hu ahe.

Yesu kɛɛ amɛ akɛ: ‘Nyɛkakpaa sɔlemɔ. Nyɛyaa nɔ nyɛbia nyɛ-Tsɛ Yehowa nibii kpakpai. Fɔlɔ fɛɛ fɔlɔ sumɔɔ ni ehã ebi nibii kpakpai. Kɛ́ nyɛbii bi nyɛ blodo lɛ, ani nyɛbaahã amɛ tɛ? Ni kɛ́ amɛbi nyɛ ŋshɔŋloo lɛ, ani nyɛbaahã amɛ onufu?’

Kɛkɛ ni Yesu tsɔɔ mli akɛ: ‘Kɛ́ nyɛle bɔ ni nyɛfeɔ nyɛkeɔ nyɛbii nibii kpakpai lɛ, enyiɛ nɔŋŋ ni nyɛ-Tsɛ Yehowa hãŋ nyɛ mumɔ krɔŋkrɔŋ lɛ? Nɔ pɛ ni he hiaa ji ni nyɛbaabi lɛ.’ Ani okɛ Yesu ŋaawoo lɛ miitsu nii? Mɛɛ nibii osɔleɔ yɛ he?