SANEYITSO LƐ MLITSƆƆMƆ | NAMƐI JI YEHOWA ODASEFOI?
Mɛɛ gbɔmɛi nɛkɛ Yehowa Odasefoi ji?
Wɔji jamɔ kuu ni ato he gbɛjianɔ yɛ je lɛŋ fɛɛ, ni wɔkɛ jamɔ kui krokomɛi bɛ tsakpaa. Eyɛ mli akɛ wɔnitsumɔhe yitso lɛ yɛ United States moŋ, shi wɔteŋ tsiimɔ yɛ maji krokomɛi anɔ. Yɛ anɔkwale mli lɛ, wɔyi aaashɛ akpekpei kpaanyɔ tsɔɔ mɛi Biblia lɛ mli saji yɛ maji ni fa fe 230 nɔ. Wɔfeɔ nakai yɛ Yesu wiemɔi ni yɔɔ Mateo 24:14 lɛ hewɔ, jɛmɛ kɛɔ akɛ: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase.”
Maŋ fɛɛ maŋ nɔ ni wɔyɔɔ lɛ, wɔkɛ jɛmɛ mlai lɛ tsuɔ nii. Kɛ̃lɛ, wɔkɛ wɔhe wooo maŋkwramɔ kuu ko saji amli. Nɔ hewɔ ji akɛ, wɔkɛ Yesu gbɛtsɔɔmɔ akɛ esaaa akɛ Kristofoi ‘fataa je lɛ he’ lɛ tsuɔ nii. No hewɔ lɛ, wɔkɛ wɔhe wooo maŋkwramɔŋ saji loo tawuu mli. (Yohane 15:19; 17:16) Yɛ anɔkwale mli lɛ, be ni awuɔ Jeŋ Ta II lɛ, awo Yehowa Odasefoi tsuŋ ni apiŋ amɛ waa yɛ amɛhe ni amɛkɛwooo maŋkwramɔŋ saji amli lɛ hewɔ. Osɔfo ko ni jɛ Germany lɛ ŋma akɛ: “Amɛji mɛi pɛ ni baanyɛ ashi amɛtsitsi akɛ amɛfiii Hitler Nɔyeli lɛ sɛɛ.”
‘[Yehowa Odasefoi] yɛ jeŋba waa. Kɛ́ ahã mɛi ni fooo amɛ pɛ amɛnɔ mli nɛɛ maŋkwramɔŋ hegbɛi lɛ, nibii baanyɛ aya nɔ jogbaŋŋ—shi amɛkpɛlɛŋ nɔ kɔkɔɔkɔ. Eyɛ mli akɛ amɛyɛ bulɛ kɛhã nɔyeli lɛ moŋ, shi amɛheɔ amɛyeɔ akɛ Nyɔŋmɔ Maŋtsɛyeli lɛ pɛ baanyɛ atsu adesai anaagbai lɛ ahe nii.’—Nová Svoboda, Czech Republic adafitswaa wolo.
Shi no etsɔɔɔ hu akɛ wɔtse wɔhe kɛje mɛi ahe. Yesu sɔle ehã Nyɔŋmɔ yɛ ekaselɔi lɛ ahewɔ akɛ: “Mibiii akɛ ojie amɛ kɛjɛ je lɛ mli.” (Yohane 17:15) No hewɔ ni onaa wɔ yɛ akutso lɛ mli akɛ wɔmiitsu nii, wɔmiiye jara, loo wɔmiiya skul lɛ.