FÃ ENUMƆ

Nyɛkua Nyɛsɛɛ Kɛbaa “Nyɛsusumai Alɛlɔ kɛ Nɔkwɛlɔ lɛ Ŋɔɔ”

Ani okɛ naagbai ni awie he yɛ wolo nɛɛ mli lɛ eko miikpe? Kɛ́ nakai lɛ, belɛ jeee okome. Nyɔŋmɔ tsuji anɔkwafoi ni hi shi yɛ blema lɛ ateŋ mɛi babaoo kɛ naagbai ni tamɔ nakai kpe, ni etsuji ni yɔɔ ŋmɛnɛ lɛ ateŋ mɛi komɛi hu ekpee naagbai nɛɛ ekomɛi anaa. Shi Yehowa ye ebua amɛ fɛɛ ni amɛnyɛ amɛtsu amɛnaagbai lɛ ahe nii, ni ebaaye ebua bo hu.

Yehowa baaye abua bo ni onyɛ oku osɛɛ kɛba eŋɔɔ

NÁ NƆMIMAA akɛ, Yehowa baaye abua bo ni onyɛ oku osɛɛ kɛba eŋɔɔ. Ebaaye ebua bo ni okafee yeyeeye, okɛ mɛi ni efee bo dɔlɛ nii lɛ ahe ake amɛ, ni ohenilee akayi bo dɔŋŋ. Kɛkɛ lɛ, no baatsirɛ bo ni obafata Yehowa webii lɛ ahe ekoŋŋ kɛsɔmɔ lɛ. Nɔ ni bɔfo Petro kɛɛ Kristofoi komɛi ni hi shi yɛ klɛŋklɛŋ afii 100 lɛ mli lɛ baaba mli yɛ ogbɛfaŋ, akɛ: “Kulɛ nyɛtamɔ gwantɛŋi ni edu gbɛ, shi amrɔ nɛɛ, nyɛku nyɛsɛɛ kɛba tookwɛlɔ kɛ nɔkwɛlɔ ni kwɛɔ nyɛsusumai anɔ lɛ ŋɔɔ.”—1 Petro 2:25.

Nɔ ko kwraa bɛ ni hi fe ni obaaku osɛɛ kɛba Yehowa ŋɔɔ. Mɛni hewɔ? Ejaakɛ kɛ́ ofee nakai lɛ, obaahã Yehowa tsui anyɔ emli. (Abɛi 27:11) Taakɛ ole lɛ, Yehowa yɛ henumɔi, no hewɔ lɛ wɔnifeemɔi baanyɛ ahã emii ashɛ ehe loo ewerɛ aho ehe. Kɛ̃lɛ, Yehowa enyɛɛɛ wɔnɔ ni wɔsumɔ lɛ loo wɔsɔmɔ lɛ. (5 Mose 30:19, 20) Biblia he nilelɔ ko kɛ adesa tsui lɛ to shinaa he, ni ewie akɛ: “Anyɛŋ agbele kɛjɛ kponɔgbɛ. Esa akɛ agbele kɛjɛ mligbɛ.” Wɔbaanyɛ wɔgbele wɔtsui naa wɔhã Yehowa kɛ́ wɔsumɔ lɛ kɛ wɔtsui fɛɛ, wɔye lɛ anɔkwa, ni wɔjá lɛ. Kɛ́ wɔfee nakai lɛ, wɔke lɛ nɔ ko ni jara wa, ni no baahã etsui anyɔ emli waa. Yehowa sa jamɔ, ni nɔ ko nɔ ko bɛ ni wɔbaanyɛ wɔkɛto miishɛɛ ni wɔbaaná kɛ́ wɔjá lɛ lɛ he.—Bɔfoi 20:35; Kpojiemɔ 4:11.

Nyɛmi yoo ko ni kpa Yehowa sɔɔmɔ lɛ eku esɛɛ ni nyɛmimɛi lɛ miihere lɛ atuu

Kɛfata he lɛ, kɛ́ obɔi Yehowa jamɔ ekoŋŋ akɛ Kristofonyo lɛ, belɛ, ootsu ohiamɔ nii ko he nii. (Mateo 5:3) Mɛni hewɔ wɔkɛɔ nakai? Mɛi pii ni yɔɔ je lɛ mli lɛ biɔ amɛhe akɛ, ‘Mɛni hewɔ wɔyɔɔ shihilɛ mli?’ Amɛkɛ hiɛdɔɔ taoɔ sanebimɔi ni kɔɔ nɔ hewɔ ni wɔyɔɔ shihilɛ mli lɛ ahetoo. Enɛ ji hiamɔ nii ko ni Yehowa diɛŋtsɛ kɛwo adesai amli. Bɔ ni Yehowa bɔ wɔ ehã lɛ hewɔ lɛ, ja wɔsɔmɔ lɛ dani wɔtsui baanyɔ wɔmli. Nɔ ko bɛ ni baahã wɔtsui anyɔ wɔmli fe ni wɔbaajɛ wɔsuɔmɔ mli wɔjá Yehowa.—Lala 63:2-6.

Ofainɛ, hã ehi ojwɛŋmɔŋ akɛ, Yehowa miisumɔ ni oku osɛɛ kɛba eŋɔɔ. Mɛni tsɔɔ nakai? Bo lɛ, susumɔ saji ni nyiɛ sɛɛ nɛɛ ahe okwɛ: Wɔsɔle waa ni wɔto wɔtsui shi kɛtsu wolo nɛɛ he nii jogbaŋŋ. Ekolɛ asafoŋ onukpa ko loo onaanyo héyelilɔ ko ji mɔ ni hã bo wolo nɛɛ. Kɛkɛ ni nɔ ko tsirɛ bo ní okane, ní okɛ nɔ ni aŋma yɛ mli lɛ atsu nii. Enɛɛmɛi fɛɛ tsɔɔ akɛ Yehowa hiɛ kpako onɔ. Moŋ lɛ, fiofio lɛ, eeye eebua bo ni oba eŋɔɔ ekoŋŋ.—Yohane 6:44.

Le ni wɔle akɛ Yehowa hiɛ kpaaa etsuji ni edu gbɛ lɛ anɔ lɛ shɛjeɔ wɔmii. Nyɛmi yoo ko ni atsɛɔ lɛ Donna lɛ yɔse enɛ. Ewie akɛ: “Eyɛ mli akɛ no mli lɛ mikplaŋ kɛje anɔkwale lɛ he moŋ, shi yɛ be kɛ beiaŋ lɛ, misusuɔ Lala 139:23, 24 lɛ he. Jɛmɛ kɛɔ akɛ: ‘Mawu, taomɔ mimli, ni ole mitsuiŋ; kaa mi okwɛ, ni oyoo mijwɛŋmɔi! Ni okwɛ akɛ minyiɛ gbɛ fɔŋ ko nɔ lo, ni okpla mi kɛya naanɔ gbɛ lɛ nɔ!’ No mli lɛ, mile akɛ Yehowa gbɛjianɔtoo lɛ mli esa akɛ mahi, jeee je lɛ mli. Anɔkwa, mihe ejɔɔɔ mi yɛ je lɛ mli. Mibana akɛ, misane kã Yehowa tsui nɔ lolo; nɔ pɛ ni bashwɛ ji, ni mi maku misɛɛ maya eŋɔɔ. Ni eŋɔɔ minaa waa akɛ mifee nakai!”

“Mibana akɛ, misane kã Yehowa tsui nɔ lolo; nɔ pɛ ni bashwɛ ji, ni mi maku misɛɛ maya eŋɔɔ”

Wɔsɔlemɔ ji akɛ, bo hu obaaku osɛɛ kɛba Yehowa ŋɔɔ ni omii ashɛ ohe. (Lala 16:11) Kɛ́ ofee nakai lɛ, oshwaŋ ohe kɔkɔɔkɔ.

Saji Komɛi ni Mɛi ni Miitao Aku Amɛsɛɛ Kɛba Yehowa Ŋɔɔ lɛ Biɔ

MƐNI MAFEE KLƐŊKLƐŊ KWRAA?

Kɛ́ hela mɔ mɔ ko ni atsa lɛ lɛ, eheɔ be dani enyɛɔ efeɔ nibii fɛɛ ni tsutsu ko lɛ enyɛɔ efeɔ lɛ. No hewɔ lɛ, kaanu he akɛ esa akɛ ofee nɔ fɛɛ nɔ ni akpaa gbɛ akɛ Kristofoi afee lɛ amrɔ nɔŋŋ. Bɔɔ mɔdɛŋ ni oye mumɔŋ niyenii daa gbi, kɛ́ fioo ko po. No baaye abua bo ni onyɛ otsu nibii krokomɛi ni akpaa gbɛ yɛ Kristofoi adɛŋ lɛ ahe nii. Ekolɛ obaanyɛ okɛ minitii fioo ko akane Biblia lɛ loo otswa obo toi, okase asafo lɛ woji lɛ eko, oya jw.org Wɛb saiti lɛ nɔ, loo okwɛ jw.org lɛ nɔ nifeemɔi lɛ eko. Agbɛnɛ hu, bɔɔ mɔdɛŋ ni oya asafoŋ kpeei lɛ eko amrɔ nɔŋŋ. Nɔ ni fe fɛɛ lɛ, sɔlemɔ obi Yehowa dɛŋ yelikɛbuamɔ. ‘Shɛrɛmɔ oyeyeeyefeemɔi lɛ fɛɛ oshwie enɔ, ejaakɛ esusuɔ ohe.’—1 Petro 5:7.

“Be ni mikpa Yehowa sɔɔmɔ lɛ, efee mi hiɛgbele akɛ masɔle po. Be ni mimia mihiɛ misɔle lɛ, asafoŋ onukpa ko basara mi. Eye ebua mi ni mina akɛ, Yehowa kwako mi. Asafoŋ onukpa lɛ wo mi ŋaa ni mikane Biblia lɛ daa gbi. Enɛ ye bua mi ni minyɛ mibɔi asafoŋ kpeei yaa ekoŋŋ. Sɛɛ mli lɛ, mibɔi shiɛmɔyaa ekoŋŋ. Eŋɔɔ minaa waa akɛ Yehowa kwaaa mi.”—Eeva.

ANI NYƐMIMƐI LƐ BAAHERE MI HIƐMƐƐ?

Ná nɔmimaa akɛ nyɛmimɛi lɛ baahere bo hiɛmɛɛ. Amɛwieŋ ohiɛ, ni asaŋ amɛkojoŋ bo. Moŋ lɛ, amɛbaahã ona akɛ amɛsumɔɔ bo lolo, ni amɛbaafee nɔ fɛɛ nɔ ni amɛbaanyɛ kɛwo bo hewalɛ.—Hebribii 10:24, 25.

“No mli lɛ, minaaa bɔ ni mifeɔ po ni miyaa Maŋtsɛyeli Asa lɛ nɔ ekoŋŋ. Mileee bɔ ni nyɛmimɛi lɛ baahere mi amɛhã. Nyɛmi yoo onukpa ko ní le mi be ni miyɔɔ nakai asafo lɛ mli aaafee afii 30 ni eho lɛ kɛɛ mi akɛ, ‘Binuu, wɔmiihere bo atuu kɛmiiba shĩa!’ Enɛ ta mitsuiŋ waa. Minu he diɛŋtsɛ akɛ miba shĩa.”—Javier.

“Mitee Maŋtsɛyeli Asa lɛ nɔ ni miyata sɛɛ kwraa koni mɔ ko akayoo mi. Shi mɛi babaoo yoo mi—amɛkai be ni miji gbekɛ fioo ní mibaa asafoŋ kpeei lɛ. Amɛhere mi hiɛmɛɛ, ni amɛkɛ hedɔɔ fua mi, ni no hã mitsui nyɔ mimli waa. Minu he oookɛɛ miba shĩa.”—Marco.

MƐNI ASAFOŊ ONUKPAI LƐ BAAFEE KƐYE ABUA MI?

Asafoŋ onukpai lɛ kɛ bo baaye yɛ mlihilɛ naa. Amɛbaajie oyi yɛ shwelɛ ni oyɔɔ akɛ otsĩɛ “o-klɛŋklɛŋ suɔmɔ lɛ” hiɛ ekoŋŋ lɛ hewɔ. (Kpojiemɔ 2:4) Kɛ́ otɔ̃ tɔmɔi komɛi lɛ, amɛbaana bo mɔbɔ ni amɛbaajɛ “mlijɔlɛ mumɔ mli” amɛye amɛbua bo ni onyɛ ofee tsakemɔi ni he hiaa lɛ. (Galatiabii 6:1; Abɛi 28:13) Ekolɛ onukpai lɛ baato gbɛjianɔ ni mɔ ko kɛ bo akase Tsi Obɛŋkɛ Yehowa wolo lɛ, ‘Nyɛhia Nyɔŋmɔ Suɔmɔ lɛ Mli’ wolo lɛ, loo wolo kroko ni tamɔ nakai. Ná nɔmimaa akɛ, onukpai lɛ baashɛje omii ni amɛbaaye abua bo kɛyashi ohe baawa yɛ mumɔŋ ekoŋŋ.—Yesaia 32:1, 2.

“Yɛ afii kpaanyɔ ni mikɛ asafo lɛ ebɔɔɔ lɛ amli lɛ, onukpai lɛ bɔ mɔdɛŋ akɛ amɛbaaye amɛbua mi. Gbi ko lɛ, onukpa ko kɛ mfonirii komɛi ni mi kɛ lɛ sha lɛ tsɔɔ mi. Mfonirii lɛ hã mikai miishɛɛ ni miyɔɔ be ni misɔmɔɔ Yehowa lɛ, ni enɛ hã mishwe akɛ masɔmɔ Lɛ ekoŋŋ. Onukpai lɛ wa mi ni mibɔi nibii ni baahã wekukpaa ni yɔɔ mi kɛ Yehowa teŋ lɛ mli awa lɛ afeemɔ ekoŋŋ.”—Victor.

“Ebaaha Ohe Awa”

Lalai babaoo yɛ wɔlala wolo lɛ, ni ji ‘Lá Kɛ Miishɛɛ’ Ohã Yehowa lɛ mli, ni taa mɔ tsuiŋ, ni baanyɛ ashɛje omii ni ewo bo hewalɛ be ni okuɔ osɛɛ kɛbaa Yehowa ŋɔɔ lɛ. Akɛ nɔkwɛmɔnɔ lɛ, susumɔ lala 38 lɛ mli wiemɔi lɛ ahe okwɛ. Edamɔ wiemɔi ni yɔɔ 1 Petro 5:10 lɛ nɔ, ni eyitso ji, “Ebaahã Ohe Awa.”

Nɔ ko hewɔ Nyɔŋmɔ hã ona jamɔ krɔŋŋ

Ni etsɛ bo kɛba ela lɛ he.

Otsui mli tɔ̃ɔ ena akɛ oyɛ shwelɛ

Ni hãa otiuɔ Nyɔŋmɔ kɛ jalɛ sɛɛ.

Owo lɛ shi akɛ obaajá lɛ;

Ewa bo pɛŋ, ni ebaawa bo daa.
Nyɔŋmɔ kɛ esuɔmɔ Bi hã yɛ ohewɔ;

Eesumɔ ni oná naanɔ wala.

Esuɔmɔ Bi lɛ po, eŋɔhã wɔ yaka,

Hewɔ, ebaawo bo hewalɛ waa.

Ehiɛ kpaŋ osuɔmɔ deŋme nɔ kwraa;

Ebaaya nɔ ekwɛ ewebii daa.

(NƆHEREMƆ)

Akɛ Yesu lá he bo; otsɔ Nyɔŋmɔ nɔ kwraa.

Nyɔŋmɔ baawaje bo, ni ohe awa daa.

Yehowa baatsɔɔ bo gbɛ, ni ebu ohe daa.

Nyɔŋmɔ baawaje bo, ni ohe awa daa.

Kɛ́ ootao obo lala nɛɛ kɛ Maŋtsɛyeli lalai krokomɛi ni akɛ gbee ela lɛ toi lɛ, yaa jw.org/gaa.