SANEBIMƆ 5

Kɛ́ Aawa Mi Yi yɛ Skul Hu?

NƆ HEWƆ NI EHE HIAA

Bɔ ni obaafee onii ohã kɛ́ aawa bo yi lɛ baanyɛ ajɔɔ shihilɛ lɛ he—loo ehã emli awa.

MƐNI OBAAFEE?

Feemɔ shihilɛ nɛɛ he mfoniri okwɛ: Thomas efee ejwɛŋmɔ akɛ eyaaa skul ŋmɛnɛ, eyaaa wɔ hu; no ji ekpa skul lɛ kwraa. Nɔ ni kɛ enɛ ba ji, aaafee nyɔji etɛ nɛ lɛ, eskulbii komɛi fo sane ko ni bɛ mli amɛfɔ̃ enɔ, ni amɛgbɛ sane lɛ amɛshwã. No sɛɛ lɛ, amɛbɔi lɛ gbɛ́i srɔtoi tsɛmɔ. Bei komɛi lɛ, mɔ ko jeɔ gbɛ etswaa Thomas wolo yɛ edɛŋ egbeɔ shi, kɛkɛ lɛ mɔ lɛ ekwa efee tamɔ ejeee gbɛ ni efee. Bei komɛi hu lɛ, kɛ́ skulbii lɛ nyiɛ esɛɛ lɛ, amɛteŋ mɔ ko tsiɔ eyisɛɛ, kɛkɛ lɛ be ni Thomas baakɛɛ efoɔ ehe lɛ, enaaa mɔ tuuntu ni tsi lɛ lɛ. Nyɛ lɛ, yiwaa ni Thomas kɛkpeɔ lɛ mli bawo wu; atsɔ Intanɛt lɛ nɔ akɛɛ lɛ akɛ abaafee lɛ nɔ ko waa . . .

Bo ji Thomas kulɛ, mɛni obaafee?

SUSUMƆ HE JOGBAŊŊ DÃ!

Kɛ́ aawa bo yi lɛ, no etsɔɔɔ akɛ onyɛŋ nɔ ko ofee! Anɔkwa, obaanyɛ oyi yiwalɔ lɛ ni omaaa lɛ atswɛrɛ. Yɛ mɛɛ gbɛ nɔ?

KAAFO EDAAŊ. Biblia lɛ kɛɔ akɛ: “Kwashia jieɔ emlifu fɛɛ kpo; shi nilelɔ kɛtoɔ sɛɛ ni ejɔɔ he.” (Abɛi 29:11) Kɛ́ mɛi miiwa bo yi loo amɛmiiye ohe fɛo, ni ofooo amɛdaaŋ lɛ, ebaahã amɛhiɛ agboi ni amɛbaakpa onaa gbamɔ.
KAAFEE LƐ EKO OTSE. Biblia lɛ kɛɔ akɛ: “Nyɛkaŋɔa efɔŋ nyɛtoa mɔ ko mɔ ko efɔŋ najiaŋ.” (Romabii 12:17) Kɛ́ oka akɛ obaafee lɛ eko oto najiaŋ lɛ, no moŋ baafite sane lɛ kwraa.
KAAYA HEI NI ABAANYƐ AWA BO YI YƐ. Biblia lɛ kɛɔ akɛ: “Hiɛtɛ̃lɔ naa efɔŋ ní baa, ni eteɔ ehe.” (Abɛi 22:3) Bɔɔ mɔdɛŋ fɛɛ ni ooonyɛ koni otsi ohe kɛje mɛi ni baasumɔ akɛ amɛwa bo yi lɛ ahe, ni okaya hei ni abaanyɛ awa bo yi yɛ.
HÃ LƐ HETOO NI EKPAAA GBƐ. Biblia lɛ kɛɔ akɛ: “Naajɔlɛ hetoo kuɔ mlila naa.” (Abɛi 15:1) Obaanyɛ owo enaa ŋmɔlɔ po. Akɛ nɔkwɛmɔnɔ lɛ, kɛ́ eye ohe fɛo akɛ ofee obolo lɛ, obaanyɛ okɛfee fɛoyeli ni okɛɛ lɛ akɛ: “Efeɔ mi akɛ ehe baahia ni magbɔ mishwilɛ lɛ nɔ fioo!”
SHI LƐ NI OYA. Oblayoo ko ni atsɛɔ lɛ Nora ni eye afii 19 lɛ wie akɛ: “Kɛ́ mɔ ko miitsɔ̃ onaa, ni ofooo edaaŋ ni oshi lɛ, no tsɔɔ akɛ ohiɛ kã shi, ni ohiɛ wa fe lɛ. Etsɔɔ hu akɛ oyɛ henɔyeli—enɛ ji su ko ni yiwalɔ lɛ bɛ eko.”—2 Timoteo 2:24.
HÃ OHIƐ AWA, FEEMƆ EKÃA. Bei pii lɛ, yiwalɔi yɔseɔ mɛi ni bɛ hekɛnɔfɔɔ yɛ amɛmli ní kɛ́ aafee amɛ nɔ ko lɛ, amɛbaaŋmɛɛ amɛhiɛ he lɛ. Shi kɛ́ amɛyɔse akɛ ohiɛ wa ni oŋmɛɛɛ ohiɛ he lɛ, amɛbaakpa oyi waa.
KƐƐMƆ MƆ KO. Yoo ko ni tsutsu ko lɛ eji skul tsɔɔlɔ lɛ wie akɛ: “Miiwo mɔ fɛɛ mɔ ni aawa lɛ yi lɛ hewalɛ koni ebɔ mɔ ko amaniɛ. No ji nɔ ni sa akɛ afee, ni ebaabu mɛi krokomɛi ahe koni akawa amɛ yi.”

Oblanyo ko efee ekãa kɛdamɔ yiwalɔ ko hiɛ — Kɛ́ ohã ohiɛ wa ni ofee ekãa lɛ, obaaná nyɛmɔ ko ni yiwalɔ lɛ bɛ eko

ANI OLE?

Yɛ mɔ yii kɛ nibii ni tamɔ nakai lɛ asɛɛ lɛ, nibii krokomɛi hu ni akɛwaa mɔ yi ji:

Jɛmɔi kɛ fɛoyelii ni esaaa. “Mihiɛ kpaŋ gbɛ́i srɔtoi ni amɛwo mi kɛ nibii ni amɛkɛɛkɛɛ mi lɛ anɔ kɔkɔɔkɔ. Amɛhã minu he tamɔ nɔ ni mihe bɛ sɛɛnamɔ ko. Mihiŋmɛi nɔ atswɛrɛ amɛmamɔ po kulɛ, miisumɔ.”—Celine, 20.
Mɔ kpoomɔ. “Ebashɛ he ko ni miskulbii lɛ bɔi mi kpoomɔ. Kɛ́ wɔtee wɔyaaye nii shwane lɛ, amɛkwaa amɛfeɔ tamɔ gbɛ bɛ okpɔlɔ lɛ he, no hewɔ lɛ amɛhãaa mata amɛmasɛi. Afi muu fɛɛ ni mikome pɛ mitaa shi miyeɔ nii, ni enɛ hã mifó aahu.”—Haley, 18.
Intanɛt nɔ yiwaa. “Wiemɔi fioo ko pɛ ni obaataipi yɛ kɔmpiuta nɔ lɛ baanyɛ afite mɔ ko gbɛ́i—loo ekpãtã ewala hiɛ po. Enɛ tamɔ nɔ ni aawo sane he, shi ebaanyɛ eba lɛ nakai tsɔ!”—Daniel, 14.

**SANEBIMƆI KOMƐI NI KƆƆ YIWAA HE**
ANƆKWALE LOO AMALE	HETOI
1 Jeee ŋmɛnɛ kwraa abɔi mɛi ayi waa.	1 Anɔkwale. Biblia lɛ po wie mɛi komɛi ni atsɛɔ amɛ Nefilim lɛ ahe—gbɛ́i nɛɛ shishi ji, “Mɛi ni Tsirɛɔ Mɛi Tswiaa Shi.”—1 Mose 6:4, NWT.
2 Yiwaa ji hefɛoyeli ko kɛkɛ. Oshara ko bɛ he.	2 Amale. Yiwaa fata nibii ni hãa oblahii kɛ oblayei pii gbeɔ amɛhe lɛ ahe.
3 Nɔ ni sa akɛ ofee kɛku yiwalɔ naa ji, ni ofee lɛ eko otse.	3 Amale. Efɔɔ kaa akɛ, yiwalɔi lɛ ahe wala fe mɛi ni amɛwaa amɛyi lɛ, no hewɔ lɛ kɛ́ oka akɛ obaafee lɛ eko oto najiaŋ lɛ, sɛɛnamɔ ko baŋ he.
4 Kɛ́ ona akɛ aawa mɔ ko yi lɛ, esaaa akɛ ofeɔ he nɔ ko.	4 Amale. Yɛ shihilɛ nɛɛ mli lɛ, onyɛŋ okɛɛ akɛ sane lɛ kɔɔɔ ohe eko. Kɛ́ ona ni aawa mɔ ko yi ni ofeee he nɔ ko lɛ, abaanyɛ ashwa bo.
5 Yiwalɔi lɛ anaa fuu lɛ fɛɛ sɛɛ lɛ, amɛsheɔ gbeyei hu.	5 Anɔkwale. Eyɛ mli akɛ yiwalɔi komɛi woɔ amɛhe nɔ moŋ, shi amɛteŋ babaoo sheɔ gbeyei, no hewɔ lɛ amɛkɛ amɛhiɛ woɔ mɛi ahe gbeyei koni no ahã amɛtsui anyɔ amɛmli.
6 Yiwalɔi baanyɛ atsake.	6 Anɔkwale. Kɛ́ aye abua yiwalɔi lɛ, amɛbaanyɛ amɛtsake bɔ ni amɛsusuɔ nii ahe kɛ bɔ ni amɛfeɔ amɛnii amɛhãa.