Ehemɔkɛyeli lɛ Woɔ Mɛi Krokomɛi Hewalɛ
BENI afɔ́ Silvia yɛ December 1992 lɛ, no mli lɛ etamɔ nɔ ni eji gbekɛ yoo fioo ni yɔɔ gbɔmɔtsoŋ hewalɛ waa. Shi beni Silvia ná afii enyɔ lɛ, ana akɛ eeye hela ko ni anyɛɛɛ atsa ní haa mɔ náa musuŋ naagbai babaoo, ni haaa mɔ anyɛ amu jogbaŋŋ. Bɔni afee ni Silvia anyɛ adamɔ hela ni eyeɔ nɛɛ naa lɛ, daa gbi lɛ ekɔlɔɔ tsofai komekomei 36, egbalaa tsofai krokomɛi kɛtsɔɔ egugɔ mli, ni agbɔleɔ lɛ hu. Akɛni nyɛmɔ ni eflufla lɛ yɔɔ ni ekɛaatsu nii lɛ baa shi kwraa fe bɔ ni akpaa gbɛ hewɔ lɛ, esa akɛ aha kɔɔyɔɔ ni amuɔ ni ji oxygen ni yɔɔ tɔ mli ahi ehe, ni esa akɛ enɛ ahi ehe kɛ́ eeje kpo po.
Silvia nyɛ awo ni atsɛ́ɔ lɛ Teresa lɛ kɛɛ akɛ: “Bɔ ni Silvia nyɛɔ edamɔɔ hela nɛɛ naa lɛ yɛ naakpɛɛ waa. Akɛni Silvia yɛ Ŋmalɛi lɛ amli nilee hewɔ lɛ, eyɛ hemɔkɛyeli ni mli wa waa. Hemɔkɛyeli nɛɛ yeɔ ebuaa lɛ koni enyɛ edamɔ ewerɛhoyeli kɛ epiŋmɔ lɛ naa. Be fɛɛ be lɛ, ekaiɔ jeŋ hee ni Yehowa ewo he shi, he ni abaatsá mɛi fɛɛ ni he yeɔ lɛ yɛ lɛ.” (Kpojiemɔ 21:4) Bei komɛi kɛ́ Silvia weku lɛ nijiaŋ je wui lɛ, ehiɛŋmɔlɔŋmɔlɔ su ní tsɔɔ akɛ eyɛ hiɛnɔkamɔ lɛ wajeɔ eweku lɛ. Ekɛɔ efɔlɔi lɛ kɛ enyɛmi nuu lɛ akɛ: “Shihilɛ yɛ jeŋ hee lɛ mli lɛ baajie piŋmɔi ni wɔkɛkpeɔ amrɔ nɛɛ lɛ fɛɛ kɛya.”
Silvia ŋɔɔ hegbɛ lɛ ni ekɛ mɛi krokomɛi gbaa Nyɔŋmɔ Wiemɔ lɛ mli sanekpakpa lɛ he sane be fɛɛ be, ni mɛi ni ekɛgbaa sane lɛ naa akɛ eyɛ miishɛɛ kɛ mlifilimɔ. Kristofoi asafo ni yɔɔ Canary Islands ni ekɛ amɛ yaa asafoŋ kpeei lɛ mli bii lɛ hu náa esaji ahetoohamɔi kɛ ehe ni ekɛwoɔ kpeei amli lɛ he miishɛɛ waa. Ni beni akpa kpeei lɛ eko fɛɛ eko sɛɛ lɛ, Silvia sumɔɔ ni ehi Maŋtsɛyeli Asa lɛ nɔ koni ekɛ enyɛmimɛi Kristofoi hii kɛ yei lɛ agba sane. Naanyobɔɔ su ní eyɔɔ kɛ ehe ni yɔɔ miishɛɛ lɛ eha mɔ fɛɛ mɔ ni yɔɔ asafo lɛ mli lɛ sumɔɔ esane.
Etsɛ ni atsɛ́ɔ lɛ Antonio lɛ kɛɛ akɛ: “Wɔkaseɔ nɔ ko ni he hiaa waa kɛjɛɔ Silvia ŋɔɔ. Ehaa wɔnaa akɛ yɛ naagbai ni wɔkɛkpeɔ lɛ fɛɛ asɛɛ lɛ, wala ji nikeenii ko ni jɛ Nyɔŋmɔ ŋɔɔ, ni esa akɛ wɔda shi yɛ he.” Taakɛ eji yɛ Silvia gbɛfaŋ lɛ, Nyɔŋmɔ tsuji fɛɛ—gbekɛbii kɛ onukpai—kɛ miishɛɛ miimɛ be mli ni “maŋbii lɛ ateŋ mɔ ko ekɛɛŋ akɛ: ‘mihe miiye’” lɛ.—Yesaia 33:24, NW.
[Mfoniri ni yɔɔ baafa 31]
Kɛ́ Silvia miikane Biblia mli ŋmalɛ ko lɛ, enyɛ awo hiɛɔ kɔɔyɔɔ ni amuɔ ni ji “oxygen” ni yɔɔ tɔ mli lɛ mli ehaa lɛ