Mɛni Hewɔ Mɛi Feɔ Nibii Gbohii?

NƆ KO ni mɛi fioo ko pɛ baaje he ŋwane ji akɛ: Wɔ fɛɛ wɔyeee emuu ni no hewɔ lɛ, wɔtɔ̃ɔ ni wɔfeɔ nibii komɛi ni sɛɛ mli lɛ wɔshwaa wɔhe. Shi kɛlɛ, ani enɛ hewɔ mɛi feɔ nibii gbohii, ewuji kɛ bibii fɛɛ, ni wɔ diɛŋtsɛ wɔnaa loo wɔnuɔ yɛ adafitswaa saji amli daa gbi lɛ?

Yɛ emuu ni adesai yeee lɛ fɛɛ sɛɛ lɛ, mɛi komɛi susuɔ akɛ nibii fɔji komɛi yɛ ni esaaa akɛ afeɔ, ni akɛ gbɔmɛi baanyɛ atsi amɛhe kɛjɛ nifɔjianii ahe. Mɛi pii hu baakpɛlɛ nɔ akɛ, srɔtofeemɔ yɛ nɔ ko ni ejaaa ni mɔ leee ni ewie kɛ mɔ he guɔ ni ajeɔ gbɛ agbeɔ lɛ teŋ, ni nakai nɔŋŋ hu srɔtofeemɔ yɔɔ nɔ ko ni mɔ ko feɔ ni kɛ oshara baa kɛ gbɔmɔ ni ajeɔ gbɛ agbeɔ lɛ teŋ. Shi fɛɛ sɛɛ lɛ, bei pii lɛ, wɔkutsoŋbii komɛi ni wɔbuuu amɛ akɛ gbɔmɛi gbohii lɛ po feɔ nibii gbohii ni haa mɔ naa kpɛɔ ehe. Mɛni hewɔ? Mɛni hewɔ kwraa ni mɛi feɔ nibii gbohii nɛkɛ?

Biblia lɛ tsɔɔ nɔ hewɔ ni mɛi feɔ nibii gbohii lɛ. Etsɔɔ yiŋtoi titrii ahewɔ ni mɛi feɔ nibii ni amɛ diɛŋtsɛ amɛle akɛ ehiii lɛ. Susumɔ nɔ ni ekɛɔ lɛ he okwɛ.

▪ “Weiyeli hãa nilelɔ yeɔ sɛkɛ.”—JAJELƆ 7:7.

Biblia lɛ tsɔɔ akɛ, bei komɛi lɛ, shihilɛ ni mɛi yajeɔ mli lɛ ji nɔ ni nyɛɔ amɛnɔ ni amɛfeɔ nibii ni kulɛ amɛfeŋ lɛ. Mɛi komɛi po baanyɛ afee nibii fɔji kɛ jwɛŋmɔ lɛ akɛ no ji nɔ ni baaha amɛná shihilɛ ni mli wa ni amɛkɛkpeɔ kɛ jalɛ sane ni ayeee lɛ naa tsabaa. Wolo ko ni ji Urban Terrorism lɛ kɛɛ akɛ: “Yɛ shihilɛi babaoo amli lɛ, maŋkwramɔŋ, maŋ nifeemɔi, kɛ shika he naagbai ni etamɔ nɔ ni anyɛɛɛ he nɔ ko afee lɛ ahe yeyeeyefeemɔ ji nɔ titri ni haa mɛi tutuaa mɛi ni amɛyeɔ amɛ awui lɛ.”

▪ “Nibii fɔji fɛɛ ashishifã ji shika suɔmɔ.”—1 TIMOTEO 6:10.

Afɔɔ wiemɔ akɛ, kɛ́ eba lɛ shika gbɛfaŋ lɛ, gbɔmɛi kpakpai po feɔ nibii fɔji ni esaaa akɛ afeɔ. Mɛi komɛi po ni etamɔ nɔ ni amɛsumɔɔ gbɔmɔ ni amɛmli hi lɛ tsakeɔ amɛnifeemɔ kɛ́ eba lɛ shika he sane, ni amɛbafeɔ mɛi ni yitseiaŋ wala ni tseee amɛhiɛ amɛhaaa mɔ. Susumɔ awui babaoo ni hiɛjoomɔ haa mɛi yeɔ lɛ he okwɛ—ashɔ̃ɔ mɛi anii yɛ akrana naa, atswaa mɛi ojo, amɔmɔɔ mɛi atoɔ yɛ akrana naa, ni agbeɔ mɛi po.

▪ “Akɛni awooo nitsumɔ fɔŋ he nyɔmɔ amrɔ hewɔ lɛ, gbɔmɛi abii atsuii eje ekãa yɛ amɛmli kɛmiifee efɔŋ.”—JAJELƆ 8:11.

Nakai ŋmalɛ lɛ tsɔɔ akɛ adesa yɛ su ko ni haa esusuɔ akɛ ebaanyɛ efee nɔ fɛɛ nɔ ni esumɔɔ kɛji mɔ ko kwɛɛɛ lɛ. Enɛ tsɔɔ nɔ hewɔ ni mɛi woɔ lɔle foi fe nine yɛ gbɛjegbɛi anɔ, mɛi sueɔ kɛ́ amɛmiifee kaa, mɛi yeɔ maŋ shika, kɛ nibii krokomɛi ni esaaa. Kɛ́ mɛi ni aha amɛ hegbɛ lɛ kwɛɛɛ ni akɛ mlai atsu nii loo kɛ́ mɛi sheee gbeyei akɛ abaamɔ amɛ lɛ, mɛi ni abuɔ amɛ akɛ amɛyeɔ mla nɔ jogbaŋŋ lɛ po baanyɛ afee nibii komɛi ni kulɛ amɛfeŋ. Wolo ko ni ji Arguments and Facts lɛ kɛɛ akɛ, “Etamɔ nɔ ni bɔ ni kɛ́ mɛi ye awui lɛ agbalaaa amɛ toi lɛ ji nɔ ni haa maŋbii krokomɛi lɛ yeɔ awui ni mli wala waa lɛ.”

▪ “Mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ. No sɛɛ lɛ akɔnɔ lɛ, kɛ́ eŋɔ hɔ lɛ, efɔɔ esha.”—YAKOBO 1:14, 15.

Wɔ fɛɛ wɔbaanyɛ wɔná susumɔi ni ejaaa. Daa gbi lɛ, wɔkɛ nibii babaoo kpeɔ ni kaa wɔ koni wɔfee nɔ ko ni ejaaa. Yɛ Biblia beaŋ lɛ, akɛɛ Kristofoi lɛ akɛ: “Kaa ko bako nyɛnɔ ni jeee gbɔmɔ he nɔ̃.” (1 Korintobii 10:13) Shi kɛ́ nakai po lɛ, nɔ ni jɛɔ mli kɛbaa lɛ damɔ nɔ ni mɔ lɛ feɔ yɛ he lɛ nɔ—akɛ ebaajie susumɔ fɔŋ lɛ kɛjɛ ejwɛŋmɔ mli amrɔ nɔŋŋ aloo ebaaya nɔ esusu he ni eha ehe shi yɛ etsui mli. Ŋmalɛ ni akɛ mumɔ tsirɛ Yakobo ni eŋma ni atsi tã kɛtsɔ hiɛ lɛ bɔɔ wɔ kɔkɔ akɛ kɛ́ mɔ ko ŋmɛ gbɛ ni akɔnɔ fɔŋ lɛ ‘ŋɔ hɔ lɛ,’ ekã shi faŋŋ akɛ nibii fɔji baajɛ mli kɛba.

▪ “Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeena amane.”—ABƐI 13:20.

Mɛi ni wɔkɛbɔɔ lɛ baanyɛ aná wɔnɔ hewalɛ waa yɛ gbɛ kpakpa loo yɛ gbɛ gbonyo nɔ. No hewɔ lɛ, bei pii lɛ, mɛi feɔ nibii ni bako amɛjwɛŋmɔ mli pɛŋ—yɛ tipɛŋfoi anɔnyɛɛ hewɔ, loo taakɛ mɛi pii kɛɔ lɛ, akɛni amɛkɛ amɛhe yabɔ nanemɛi fɔji lɛ hewɔ, ni enɛ kɛ nibii fɔji baa. Yɛ Biblia lɛ mli lɛ, wiemɔ “kwashiai” lɛ kɔɔɔ mɛi ni leee nii ahe, shi moŋ ekɔɔ mɛi ni kpoɔ akɛ amɛkɛ Nyɔŋmɔ Wiemɔ lɛ mli ŋaawoo baatsu nii lɛ ahe. Onukpai jio, gbekɛbii jio, kɛ́ wɔjɛɛɛ nilee mli wɔhalaaa wɔnanemɛi, ni tsɔɔ akɛ kɛ́ wɔdamɔɔɔ Biblia shishitoo mlai anɔ wɔfeee nakai lɛ, wɔbaanyɛ wɔkpa gbɛ akɛ ‘wɔbaana amane.’

Ŋmalɛi nɛɛ kɛ ŋmalɛi krokomɛi ni yɔɔ Biblia lɛ mli lɛ tsɔɔ nɔ hewɔ ni mɛi—ekolɛ mɛi ni abuɔ amɛ akɛ gbɔmɛi kpakpai po lɛ—feɔ nibii gbohii kɛ nibii ni haa mɔ naa kpɛɔ ehe po lɛ mli faŋŋ. Eyɛ mli akɛ le ni wɔle nɔ ni haa mɛi feɔ nibii gbohii lɛ yeɔ ebuaa wɔ waa moŋ, shi ani hiɛnɔkamɔ ko yɛ akɛ nibii baahi jogbaŋŋ be ko? Hɛɛ, ejaakɛ jeee nɔ hewɔ ni mɛi feɔ nibii fɔji lɛ kɛkɛ Biblia lɛ tsɔɔ, shi agbɛnɛ hu, ewoɔ shi akɛ nibii fɔji nɛɛ asɛɛ baafo kwraa. Mɛni ji nakai shiwoi lɛ? Ani nibii gbohii ni yaa nɔ yɛ je lɛŋ lɛ baaba naagbee lɛɛlɛŋ? Sane ni nyiɛ sɛɛ lɛ baaha sanebimɔi nɛɛ ahetoo.