Yitso 109

Yesu Wie Eshi Mɛi ni Teɔ Shi Woɔ lɛ Lɛ

YESU eha jamɔ mli shitee-kɛ-wolɔi lɛ ayiŋ efutu waa diɛŋtsɛ akɛ amɛmiishe gbeyei akɛ amɛaabi lɛ saji. No hewɔ lɛ eŋɔ hegbɛ lɛ koni ekɛjie bɔ ni amɛleee nɔ ko nɔ ko lɛ kpo. Ebi amɛ akɛ: “Te nyɛsusuɔ yɛ Kristo lɛ hewɔŋ tɛŋŋ? Namɔ bi ji lɛ?”

Ni Farisifoi lɛ ha lɛ hetoo akɛ: “David bi ni.”

Eyɛ mli akɛ Yesu kpooo akɛ David ji Kristo, loo Mesia lɛ heloo naa blema tsɛ moŋ, shi ebi amɛ akɛ: “Mɛɛba mɔ ni David yɛ mumɔ naa [yɛ Lala 110] lɛ, etsɛɔ lɛ ‘Nuŋtsɔ’ ni ekɛɔ akɛ: ‘Nuŋtsɔ lɛ [Yehowa] kɛɛ mi-Nuŋtsɔ lɛ akɛ: “Ta mininejurɔ nɔ kɛyashi beyinɔ ni maŋɔ ohenyɛlɔi lɛ mafee onajiashi maaŋoo” ’? Agbɛnɛ kɛji David tsɛ lɛ ‘Nuŋtsɔ’ lɛ, te tɛŋŋ ni eji ebi hu?”

Farisifoi lɛ efee dioo, ejaakɛ amɛleee Kristo lɛ, aloo Mesia lɛ he anɔkwa kadimɔ nii lɛ. Mesia lɛ jeee David seshinyo adesa folo ko kɛkɛ, taakɛ bɔ ni eka shi faŋŋ akɛ Farisifoi lɛ heɔ yeɔ lɛ, shi moŋ ehi shi yɛ tsutsu ko yɛ ŋwɛi ni enɔ kwɔ fe David, ni ji akɛ eji Nuŋtsɔ.

Agbɛnɛ Yesu tsɔ ehiɛ eha gbɔmɛi asafo babaoo lɛ kɛ kaselɔi lɛ, ni ebɔ amɛ kɔkɔ yɛ woloŋmalɔi lɛ kɛ Farisifoi lɛ ahe. Akɛni mɛnɛɛmɛi tsɔɔ Nyɔŋmɔ Mla lɛ, ni “Mose sɛ̃i lɛ nɔ amɛtara lɛ” hewɔ lɛ, Yesu wo amɛ hewalɛ akɛ: “Nɔ fɛɛ nɔ ni amɛaakɛɛ nyɛ akɛ nyɛye nɔ lɛ, nyɛyea nɔ ni nyɛfea.” Shi ekɛfata he akɛ: “Shi amɛnifeemɔi lɛ, nyɛkafea; ejaakɛ amɛkɛɔ moŋ, shi amɛfeee.”

Osatofoi ji amɛ, ni Yesu wie eshi amɛ kɛ wiemɔ ni ekɛwie eshi amɛ yɛ be mli ni eyeɔ nii yɛ Farisinyo ko shia yɛ nyɔji fioo ko ni eho lɛ mli lɛ nɔŋŋ. Ekɛɛ akɛ: “Shi amɛnii fɛɛ lɛ amɛfeɔ koni mɛi ana.” Ni eha ehe nɔkwɛmɔ nii, ni ekɛɛ:

“Ejaakɛ amɛhaa amɛkaimɔ boŋi lɛ lɛɛɔ.” Aŋmala Mla lɛ mli fai ejwɛ yɛ nɛkɛ mamai bibii, ni akɛfiɔ yitso loo nineshi nɛɛ mli: 2 Mose 13:1-10, 11-16; kɛ 5 Mose 6:4-9; 11:13-21. Shi Farisifoi lɛ haa nɛkɛ mamai nɛɛ daraa bɔni afee ni amɛha mɛi asusu akɛ amɛhiɛ dɔɔ waa yɛ Mla lɛ he.

Ni Yesu tee nɔ akɛ “amɛfeɔ amɛtadei anaamuui lɛ kpelei.” Akɛ famɔ ha Israelbii lɛ yɛ 4 Mose 15:38-40 ni amɛfee naamuui yɛ amɛtadei ahe, shi Farisifoi lɛ feɔ amɛnɔ lɛ kpelei fe bɔ ni mɔ fɛɛ mɔ feɔ enɔ. Nɔ fɛɛ nɔ ni amɛfeɔ lɛ, amɛfeɔ koni mɛi ana amɛ! Yesu jaje akɛ: “Amɛsumɔɔ okpɔlɔ yitso tamɔ yɛ niyenii ashi.”

Shi mɔbɔ sane ji akɛ, lɛ diɛŋtsɛ ekaselɔi lɛ hu ekɔ nɛkɛ gbɛhe taomɔ su nɛɛ eko. No hewɔ lɛ ewo amɛ ŋaa akɛ: “Shi nyɛ lɛ, akatsɛ nyɛ Rabi, ejaakɛ mɔ kome ji nyɛtsɔɔlɔ, shi nyɛ fɛɛ lɛ, nyɛmimɛi ji nyɛ. Ni nyɛkatsɛa mɔ ko nyɛtsɛ hu yɛ shikpɔŋ lɛ nɔ, ejaakɛ mɔ kome ji nyɛ-Tsɛ, Mɔ ni yɔɔ ŋwɛi lɛ. Asaŋ akatsɛ nyɛ nuŋtsɔmɛi hu ejaakɛ mɔ kome ji nyɛ-Nuŋtsɔ, lɛ ji Kristo.” Esa akɛ kaselɔi lɛ ajie nakai henumɔ akɛ aaafee klɛŋklɛŋ mɔ lɛ kwraa yɛ amɛhe! Yesu wo amɛ ŋaa akɛ: “Shi mɔ ni ji agbo yɛ nyɛteŋ lɛ, etsɔ nyɛtsulɔ.”

Kɛkɛ ni no sɛɛ lɛ ejaje kpoo eshwie woloŋmalɔi lɛ kɛ Farisifoi lɛ anɔ, ni etsɛ amɛ osatofoi shii abɔ. Ekɛɛ akɛ “[amɛ]ŋaa ŋwɛi maŋtsɛyeli lɛ naa yɛ gbɔmɛi ahiɛ,” ni “amɛtsɔɔ sɔlemɔi kakadi ahe lakpatoo nɔ amɛmiɔ yei okulafoi ashiai lɛ.”

Yesu kɛɛ akɛ: “Kpoo ha nyɛ, gbɛtsɔɔlɔi shwilafoi!” Ebu Farisifoi lɛ fɔ yɛ mumɔŋ sui ni amɛbɛ, ni anaa faŋŋ yɛ mligbalamɔi ni amɛkɛbaa lɛ hewɔ. Akɛ nɔkwɛmɔ nɔ lɛ, amɛkɛɔ akɛ, ‘Mɔ ni aaakã sɔlemɔ tsu lɛ kita lɛ, no jeee nɔ ko; shi mɔ ni aaakã sɔlemɔ tsu lɛ he shika lɛ kita lɛ, etere sɔ̃.’ Akɛni amɛmaa shika ni yɔɔ sɔlemɔ tsu lɛ he lɛ nɔ mi moŋ fe bɔ ni he ni ajaa Nyɔŋmɔ yɛ nɛɛ he hiaa yɛ mumɔŋ lɛ hewɔ lɛ, amɛjieɔ amɛjeŋba mli shwilamɔ lɛ kpo.

Kɛkɛ ni, taakɛ efee yɛ be ko ni tsɔ hiɛ lɛ, Yesu bu Farisifoi lɛ fɔ yɛ “Mla lɛ mli nii ni he jaraa ni ji kojomɔ kɛ mɔbɔnalɛ kɛ hemɔkɛyeli” ni amɛkuɔ amɛhiɛ amɛshwieɔ nɔ, ni amɛkɛ amɛjwɛŋmɔ maa shwiebaa ni he ehiaaa lɛ po mli mlijaa nyɔŋma ni aaaha lɛ moŋ nɔ lɛ hewɔ.

Yesu tsɛ Farisifoi lɛ “gbɛtsɔɔlɔi shwilafoi, [amɛ]tsereɔ nɔ nɔ adɔdɔŋ, shi [amɛ]miɔ yooma!” Amɛtsereɔ amɛ wein nɔ adɔdɔŋ, ni jeee akɛni eji kooloo filikilɔ ko kɛkɛ lɛ hewɔ, shi moŋ akɛni ehe tseee yɛ amɛmla naa lɛ hewɔ. Shi kɛlɛ, abaanyɛ akɛ bulɛ ni amɛjieee lɛ kpo yɛ Mla lɛ mli nibii wuji lɛ ahe lɛ ato yooma, ni no hu ji kooloo ni he tseee yɛ mla naa ni amɛmiɔ lɛ he. Mateo 22:41–23:24; Marko 12:35-40; Luka 20:41-47; 3 Mose 11:4, 21-24.

▪ Mɛni hewɔ ni Farisifoi lɛ fee dioo beni Yesu bi amɛ saji yɛ nɔ ni David kɛɛ yɛ Lala 110 lɛ he lɛ?

▪ Mɛni hewɔ ni Farisifoi lɛ haa mamai bibii ni amɛŋma Ŋmalɛi amɛwo nɔ lɛ lɛɛɔ ni amɛtadei anaamuui hu feɔ kpelei lɛ?

▪ Mɛɛ ŋaawoo Yesu kɛha ekaselɔi lɛ?

▪ Mɛɛ mligbalamɔ komɛi Farisifoi lɛ kaa amɛhiɛ amɛkɛbaa, ni mɛɛ gbɛ nɔ Yesu bu amɛ fɔ yɛ amɛhiɛ ni amɛkuɔ amɛshwieɔ saji ni he hiaa waa lɛ anɔ lɛ yɛ?