Ani Biblia Lɛ Teɔ Shi Woɔ Ehe?

BIBLIA lɛ jaje akɛ, “Nyɔŋmɔ nyɛŋ emale.” (Hebribii 6:18) No hewɔ lɛ, te aaafee tɛŋŋ ni saji ni kɛ amɛhe kpaaa gbee ni jeɔ kpo faŋŋ kɛ bei aaahi nɔ ni atsɛɔ lɛ Nyɔŋmɔ Wiemɔ lɛ mli lɛ? Enyɛŋ eba lɛ nakai. Obaabi akɛ, ‘Mɛni hewɔ bei yɔɔ enɛɛmɛi ahe lɛ?’

Taakɛ abaanyɛ akpa gbɛ, yɛ wolo ni akwɛ nɔ akɛ niji ŋmala ekomɛi ashwie shi yɛ afii ohai babaoo mli ni ehe miihia hu ni atsɔɔ shishi kɛya wiemɔi ni ale jogbaŋŋ lɛ amli lɛ baaha niŋmalamɔ mli sɔrɔtofeemɔi bibii komɛi aba mli. Shi eko kwraa bɛ ni da bɔ ni aaaha yiŋkɔshikɔshifeemɔ aba mumɔ mli ni Biblia muu lɛ fɛɛ jɛ kɛ hewalɛ ni eyɔɔ lɛ he. Kɛ wɔpɛi mli jogbaŋŋ lɛ, abaanyɛ ana tsabaa yɛ anɔkwayeli mli aha nɔ ni akɛɛ eteɔ shi ewoɔ ehe lɛ. Yɛ be babaoo mli lɛ, ana akɛ mɛi ni kɛɔ akɛ Biblia lɛ teɔ shi woɔ ehe lɛ diɛŋtsɛ boteko mli jogbaŋŋ amɛ diɛŋtsɛ, shi mɛi ni sumɔɔɔ ni amɛheɔ Biblia lɛ amɛyeɔ aloo amɛsumɔɔɔ ni eye amɛnɔ lɛ ji mɛi ni kɛ nɛkɛ susumɔ nɛɛ haa amɛ. Biblia lɛ bɔ kɔkɔ yɛ Abɛi 18:13 akɛ: “Mɔ ni nuuu sane dani ehereɔ nɔ lɛ, eji buluufeemɔ kɛ hiɛgbele ha lɛ.”

Yɛ bei komɛi amli lɛ, mɛi komɛi teɔ shi ‘woɔ anɔkwale ni eji akɛ Biblia mli niŋmalɔi kɛ amɛhe kpaaa gbee yɛ be fɛɛ mli yɛ saji ni kɔɔ akɔntaabuu okadii, bɔ ni saji ba ni atoɔ naa ahaa, saji ni atsɛ lɛ amli wiemɔi kɛ ekrokomɛi lɛ ahewɔ. Shi susumɔ enɛ he: “Kɛ obi gbɔmɛi babaoo ni kɛ amɛhiŋmɛi na nɔ ko ni tee nɔ lɛ akɛ amɛŋmala nɔ ni amɛna lɛ amɛshwie shi lɛ, ani osusuɔ akɛ gbɔmɛi lɛ fɛɛ aniŋmalamɔ lɛ baaja yɛ wiemɔ kɛ bɔ ni amɛto saji anaa amɛha lɛ mli pɛpɛɛpɛ? Kɛ eba lɛ nakai lɛ, ani okɛŋ akɛ niŋmalɔi nɛɛ fee ekome ni amɛŋmala nɔ fɛɛ nɔ amɛshwie shi? Nakai nɔŋŋ hu Nyɔŋmɔ ŋmɛ Biblia mli niŋmalɔi lɛ agbɛ koni amɛkɔ niŋmalamɔ kɛ wiemɔ gbɛ ni amɛsumɔɔ lɛ amɛ diɛŋtsɛ ni amɛkɛtsu nii, yɛ be mli ni ekwɛɔ koni aŋmala lɛ diɛŋtsɛ ejwɛŋmɔ kɛ saji sɔrɔtoi ni ji anɔkwalei ni kɔɔ he lɛ ashwie shi pɛpɛɛpɛ lɛ.

Saji ni aŋmalaa kɛjɛɔ niŋmalamɔi ni etsɔ hiɛ lɛ amli lɛ baanyɛ atsake fioo kɛjɛ shishijee wiemɔi lɛ ahe bɔni afee ni ekɛ niŋmalɔ hee lɛ hiamɔ nii kɛ yiŋtoo akpa gbee, shi emli anɔkwalei lɛ fɛɛ hiɔ shi nakai nɔŋŋ. Abaanyɛ awie nakai nɔŋŋ yɛ saji komɛi ni baa yɛ be ko mli lɛ ahe. Niŋmalɔ ko baanyɛ anyiɛ be he akɔntaabuu sɛɛ yɛ enɛ mli, yɛ be mli ni mɔ kroko hu baanyɛ ato bɔ ni nibii baha lɛ anaa ni etsɔɔ mli. Nɔ ni abaajie yɛ mli hu lɛ baanyɛ afee nɔ ni damɔ niŋmalɔ lɛ jwɛŋmɔ nɔ kɛ bɔ ni emua saji lɛ anaa eha. No hewɔ lɛ, Mateo ŋma akɛ agbala shwilafoi enyɔ kɛba Yesu hiɛ, yɛ be mli ni Marko kɛ Luka tsi mɔ kome pɛ ta. (Mateo 20:​29-34; Marko 10:​46; Luka 18:35) Mateo sane lɛ eteee shi ewooo ehe. Eetsɔɔ nibii ni ba lɛ pɔtɛɛ yɛ yibɔ naa, yɛ be ni Marko kɛ Luka gbalaa jwɛŋmɔ kɛyaa gbɔmɔ kome Yesu ni kɛ lɛ gba sane lɛ nɔ.

Gbɛi sɔrɔtoi hu yɛ ni atsɔɔ nɔ abuɔ be. Yudafoi amaŋ lɛ kɛ kalandai sɔrɔtoi enyɔ tsu nii​—kalanda ni yɔɔ krɔŋkrɔŋ lɛ kɛ jeŋbii anɔ, aloo okwaayeli kalanda​—ni eko fɛɛ eko jeɔ shishi kɛjɛɔ afi lɛ mli be kroko. Niŋmalɔi ni sɔrɔtofeemɔ yɔɔ amɛniŋmalamɔi amli yɛ nyɔŋ kɛ gbi nɔ lɛ baanyɛ afee mɛi ni kɛ kalandai sɔrɔtoi enyɔ etsu nii. Akɛni Bokagbɛ niŋmalɔi kɛ mlijaai kɛ fai efɔɔɔ nitsumɔ hewɔ lɛ, abuɔ afi lɛ fai komɛi akɛ afi muu. Abuaa naa afeɔ lɛ ekome. Akɛ nɔkwɛmɔ nɔ lɛ, kadimɔ enɛ, yɛ yinɔsane he niŋmai ni anaa yɛ 1 Mose yitso 5 he lɛ mli.

Gbeekpamɔ ni Ahaa Ebaa “Nɔ ni Teɔ Shi Ewoɔ Ehe” lɛ Mli

Shi ani ŋmalɛi komɛi bɛ Biblia lɛ mli ni kɛɔ nɔ kome ni eko hu kɛɔ nɔ ko ni tamɔɔɔ nakai kwraa? Nyɛhaa wɔsusua fioo ko ni mɛi ni wieɔ shiɔ Biblia lɛ etsi ta lɛ ekomɛi ahe.

Wɔkaneɔ yɛ Yohane 3:22 akɛ Yesu “baptisiɔ,” yɛ be mli ni kɛ otee hiɛ fioo, yɛ Yohane 4:2 lɛ, nɔ ni aŋma yɛ jɛmɛ lɛ kaneɔ akɛ “Yesu . . . diɛŋtsɛ ebaptisiii.” Shi taakɛ ŋmalɛ lɛ mli saji tsɔɔ lɛ, Yesu kaselɔi lɛ ji mɛi ni baptisiɔ mɛi lɛ diɛŋtsɛ yɛ egbɛi amli yɛ egbɛtsɔɔmɔ shishi. Enɛ tamɔ sane ni kɔɔ nitsumɔtsɛ kɛ woloŋmalɔ ni haa mɛi enyɔ lɛ fɛɛ kɛɔ akɛ amɛ amɛŋma wolo pɔtɛɛ ko lɛ ahe pɛpɛɛpɛ.

Agbɛnɛ ŋmalɛi ni yɔɔ 1 Mose 2:2 ni wieɔ akɛ Nyɔŋmɔ jɔɔ ehe “kɛjɛ enitsumɔ ni etsu lɛ fɛɛ mli” lɛ. Nɔ ni feɔ tamɔ nɔ ni eteɔ shi woɔ enɛ ji Yesu wiemɔ ni yɔɔ Yohane 5:17 he ni ekɛɔ akɛ Nyɔŋmɔ “miitsu nii kɛbashi be nɛɛ” lɛ. Shi taakɛ emli saji lɛ tsɔɔ lɛ, ŋmalɛi ni yɔɔ Klɛŋklɛŋ Mose lɛ miiwie Nyɔŋmɔ nitsumɔi ni kɔɔ nibɔɔ he lɛ he pɔtɛɛ, yɛ be mli ni Yesu wie Nyɔŋmɔ nitsumɔi ni kɔɔ eŋwɛi gbɛtsɔɔmɔ kɛ kwɛmɔ kɛha adesai lɛ he.

Anaa nɔ kroko ni tamɔ nɔ ni teɔ shi woɔ ehe hu yɛ 2 Mose 34:7 kɛ Ezekiel 18:​20. Klɛŋklɛŋ ŋmalɛ lɛ tsɔɔ akɛ Nyɔŋmɔ “woɔ tsɛmɛi atɔmɔi nyɔmɔ kɛtsɔɔ bii kɛ nabii anɔ,” yɛ be mli ni sɛɛkpee ŋmalɛ lɛ jajeɔ akɛ “bi tereŋ etsɛ nishaianii, ni tse hu tereŋ ebi nishaianii” lɛ. Mɛni hewɔ etamɔ nɔ ni ŋmalɛi nɛɛ teɔ shi woɔ amɛhe lɛ? Ejaakɛ ajieɔ kɛjɛɔ emli sane lɛ diɛŋtsɛ mli. Susumɔ nɔ ni enɛ wieɔ he lɛ he diɛŋtsɛ. Kɛkɛ lɛ obaana faŋŋ akɛ beni Nyɔŋmɔ tsi toigbalamɔ ta akɛ ekɛbaaba tsɛmɛi kɛ bii kɛ nabii anɔ lɛ, ewie nɔ ni baaba Israelbii akɛ maŋ lɛ anɔ kɛji akɛ amɛfee esha amɛshi lɛ ni aŋɔ amɛ nom kɛtee. Shi yɛ gbɛ kroko nɔ lɛ, yɛ be mli ni etsiɔ ta akɛ bi tereŋ etsɛ nɔ sha lɛ, ewie mɔ diɛŋtsɛ sɔ ni eeetere lɛ he.

Abaanyɛ ana sɔrɔtofeemɔ ko, tamɔ nɔ ni “kɔɔ Yesu fɔmɔ he sane ni aŋma afɔ shi yɛ Mateo 1:​18-25 kɛ Luka 1:​26-38 lɛ. Shi ani enɛɛmɛi tsɔɔ akɛ amɛteɔ shi amɛwoɔ amɛhe?

Ani okane gbɔmɔ kome ko ni he gbɛi yɛ yinɔsane mli lɛ he yinɔsaji enyɔ pɛŋ? Kɛji nakai lɛ, oyɔse akɛ sɔrɔtofeemɔi yɛ nɛkɛ yinɔsaji enyɔ nɛɛ amli shi no etsɔɔɔ akɛ amɛteɔ shi woɔ amɛhe? Yɛ be babaoo mli lɛ, fɛɛ jɛ niŋmalɔ lɛ jwɛŋmɔ aloo he ni ena ewiemɔi lɛ kɛjɛ. Agbɛnɛ hu edamɔ nɔ ni mɔ ni ŋmaa lɛ nuɔ he akɛ ehe hiaa ni eeegba no he sane lɛ nɔ, gbɛ ni etsɔɔ nɔ eŋmaa nii, toibolɔi lɛ ni yɔɔ ejwɛŋmɔ mli ni eŋmaa ehaa amɛ lɛ hu. No hewɔ lɛ saji ni aŋmalaa ahaa jeŋmajiaŋbii nikanelɔi lɛ baafee sɔrɔto yɛ nikanelɔi ni ji Yudafoi ahe, ejaakɛ amɛ lɛ, amɛnuɔ anɔkwalei komɛi ashishi ni amɛkpɛlɛ nɔ momo.

Enɛɛmɛi ji saji fioo ko ni yɔɔ Biblia lɛ mli ni kɛ akwɛɛɛ mli jogbaŋŋ lɛ, eeefee tamɔ nɔ ni amɛteɔ shi woɔ amɛhe lɛ ahe nɔkwɛmɔ nɔ ko. Shi kɛji atao mli jogbaŋŋ, ni aha nɔ ni niŋmalɔ lɛ susuɔ kɛ saji ni ewieɔ he lɛ hi jwɛŋmɔ mli lɛ, amɛbafeɔ nɔ ni eteee shi wooo amɛhe kwraa, shi moŋ, saji krokomɛi ni ebiɔ ni atao mli lolo. Mɛi pii nyɛɛɛ abɔ enɛ feemɔ he mɔdɛŋ, shi efeɔ mlɛo moŋ kɛhaa amɛ akɛ amɛaakɛɛ akɛ: “Biblia lɛ teɔ shi woɔ ehe.”

Esa Wɔ Hekɛnɔfɔɔ ni Wɔɔna Yɛ Emli

Nyɔŋmɔ mumɔ krɔŋkrɔŋ lɛ ŋmɛ Biblia mli niŋmalɔi agbɛ fioo yɛ amɛniŋmalamɔi loo amaniɛbɔi amli. (Bɔfoi lɛ Asaji 3:21) No hewɔ lɛ, amɛnyɛ amɛŋmala nɔ ni amɛna lɛ yɛ gbɛ ni yɔɔ fɛo ni gbalaa jwɛŋmɔ nɔ. Nɔ ni akɛɛ eyɔɔ sɔrɔto yɛ amɛteŋ lɛ maa amɛmɔdɛŋbɔɔ kɛ anɔkwale nɔ mi, ni amɛŋmɛɛɛ shishiumɔ ko gbɛ. (2 Petro 1:​16-21) Yɛ be mli ni niŋmalɔi lɛ yɔɔ sɔrɔto yɛ gbɛ ni amɛtsɔɔ nɔ amɛŋmaa nii amli lɛ, amɛ fɛɛ amɛgbalaa jwɛŋmɔ kɛyaa he kome ni amɛyiŋtoo lɛ ekomeŋ: koni amɛtsɔɔ gbɔmɛi nɔ ni Yehowa Nyɔŋmɔ baafee ni baaha adesa ana miishɛɛ kɛ nɔ ni esa akɛ adesai hu afee ni amɛnine ashɛ Nyɔŋmɔ nɔkpɛlɛmɔ nɔ.​—Abɛi 2:​3-6, 9.

Biblia lɛ ji wolo ni gbalaa wɔjwɛŋmɔŋ nyɛmɔ. Ekɛ ehe kpaa gbee yɛ be fɛɛ mli. Etee shi ewooo ehe. Emli woji 66 ni hiɛ (yitsei 1,189 aloo 31,173 taakɛ King James Version) lɛ tsɔɔ lɛ sa wɔhekɛnɔfɔɔ kwraa. Hɛɛ, obaanyɛ okɛ ohe afɔ Biblia lɛ nɔ!

[Akrabatsa ni yɔɔ baafa 6]

Kɛ Ona Nɔ ko yɛ Biblia lɛ Mli “Ni Teɔ Shi Ewoɔ Ehe Lɛ,” Ani Eeenyɛ Eefee Akɛ:

◆ Oleee yinɔsane mli anɔkwalei loo blema kusumii komɛi?

◆ Ani osusuuu nɔ ni ewieɔ he lɛ fɛɛ he?

◆ Osusuuu jwɛŋmɔ ni niŋmalɔ lɛ hiɛ lɛ he?

◆ Oobɔ mɔdɛŋ ni okɛ jamɔ mli tɔmɔi komɛi ato nɔ ni Biblia lɛ diɛŋtsɛ kɛɔ Iɛ he koni ekɛ fɛɛ akpa gbee?

◆ Ani okɛ Biblia ashishitsɔɔmɔ ni esaaa aloo ebe eho miitsu nii?

[Mfonirii ni yɔɔ baafa 7]

Mateo kɛɛ Yesu tsa shwilafoi enyɔ. Marko kɛ Luka tsi mɔ kome pɛ ta. Ani enɛ teɔ shi woɔ ehe?