Bɔ Ni Yehowa Haa Enitsumɔ Lɛ Shwereɔ Ehaa

YEHOWA Odasefoi ena nɔyaa ni sa kadimɔ yɛ nyɛsɛɛ afii nyɔŋmai abɔ ni eho nɛɛ amli. Yɛ afii nyɔŋma ni ho lɛ amli lɛ, amɛtee hiɛ kɛjɛ asafoi 42,600 kɛyashɛ nɔ ni shɛɔ asafoi 60,192 yɛ shikpɔji 212 nɔ. Yɛ enɛ hewɔ lɛ, mɛi komɛi biɔ akɛ: Mɛɛ gbɛ nɔ atsɔɔ ni anaa shika ni akɛtsuɔ Yehowa Odasefoi anitsumɔ lɛ? Buu Mɔɔ Asafo lɛ yɛ he miishɛɛ akɛ amɛaaha sanebimɔ nɛɛ kɛ ekrokomɛi ni kɔɔ enɛ he lɛ ahetoo yɛ sane nɛɛ mli.

Ani Yehowa Odasefoi haa mlijaa nyɔŋma mli ekome?

Dabi. Yɛ blema Israel lɛ, akɛ mlijaa nyɔŋma mli ekome he famɔ lɛ ha yɛ Mose Mla lɛ shishi koni akɛfi Nyɔŋmɔ sɔlemɔwe nitsulɔi, ni ji Levibii kɛ osɔfoi lɛ asɛɛ. (4 Mose 18:​21, 24-29) Mɛnɛɛmɛi akutso lɛ bɛ shikpɔŋ ko akɛ amɛnɔ, ja maji komɛi kɛkɛ, no hewɔ lɛ nɛkɛ sɛɛfimɔ krɛdɛɛ nɛɛ he miihia amɛ. Kɛfata he lɛ, Israelbii anɔkwafoi lɛ yɛ hegbɛ akɛ amɛjɛɔ amɛtsuiŋ amɛkeɔ nii kɛha nitsumɔi krɛdɛɛi komɛi, tamɔ kpeebuu lɛ maa nɛkɛ, kɛ sɛɛ mli lɛ, sɔlemɔtsu lɛ hu.​—2 Mose 25:​1-8; 1 Kronika 29:​3-7.

Shi, beni Yesu gbo lɛ, Biblia lɛ kɛɔ akɛ “[e]gu kitai amla lɛ ni yɔɔ akpɔi amli lɛ.” (Efesobii 2:​15; Kolosebii 2:​13, 14) Yɛ wiemɔ kroko mli lɛ, yɛ Nyɔŋmɔ hiɛ lɛ, Mla lɛ fiii Yudafoi aloo Kristofoi hu anɔ dɔŋŋ. No hewɔ lɛ, kɛfata Mla lɛ fai krokomɛi ahe, tamɔ afɔlei ni ayashaa daa yɛ sɔlemɔwe lɛ nɛkɛ lɛ, abiii ni anɔkwafoi lɛ kɛ mlijaa nyɔŋma mli ekome abaha dɔŋŋ.

Yɛ Kristofoi ateŋ lɛ, suɔmɔ ji nɔ ni kanyaa nihamɔ, jeee mla. Bɔfo Paulo tsɔɔ shishitoo mla nɛɛ shishi beni etoɔ gbɛjianɔ koni atsu onia ni akɛyaha Kristofoi ni ehia amɛ yɛ Yudea lɛ. Ekɛɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni akajɛ ŋkɔmɔyeli aloo fimɔ mli: ejaakɛ tsuijurɔnaa halɔ Nyɔŋmɔ sumɔɔ.” (2 Korintobii 9:⁠7) Yehowa Odasefoi kɛ Ŋmalɛ naa gbɛ ni atsɔɔ ni ji tsui mli ni ajɛɔ akeɔ nii nɛɛ tsuɔ nii.

Ani nyɛtsɔɔ okpɔlɔŋmɛɛ ni akɛbaa shika, wolo kotokui ni ajaa ahaa mɛi ni amɛkɛ shika awo mli, mɛi aŋɔɔ ni ayaa ayabaa shika, kɛ gbɛi krokomɛi ni tamɔ nakai nɔ nyɛkɛnaa shika?

Dabi, ehe ehiaaa ni anyɛ Kristofoi anɔ aloo aha amɛ nyɔɔŋ nii koni amɛke nii kɛtsɔ jweremɔ nii komɛi ni akɛaamamɔ amɛhiɛ lɛ nɔ. Jamɔ kui ni kɛ asɔshwɛmɔ, sɔlemɔ ŋmaakpamɔ, atsiatsi, ajabeŋ, sɔlemɔ sɛ̃ii ni awoɔ he nyɔmɔ, aloo plɛtei ni akɛtsɔɔ mɛi ahiɛ ni akɛtsuɔ onia lɛ tsuɔ nii ni amɛkɛnaa shika lɛ tsɔɔ akɛ amɛkɛ mumɔŋ niyenii hako amɛmlibii lɛ, no hewɔ lɛ Nyɔŋmɔ mumɔ lɛ tsirɛɛɛ amɛ sɔlemɔyalɔi lɛ ni amɛjɛ amɛsuɔmɔ mli amɛkɛ shika ake. Abaanyɛ awie nakai nɔŋŋ yɛ mɛi ni kɛ mlijaa nyɔŋma mli ekome nikee ni be eho lɛ tsuɔ nii lɛ hu ahe.​—Mateo 10:⁠8.

Te nyɛfeɔ tɛŋŋ nyɛnaa shika ni nyɛkɛtsuɔ nitsumɔi komɛi tamɔ Maŋtsɛyeli Asai kɛ nitsumɔ he niji heei amaamɔ, kɛ agbɛnɛ kɛha nitsumɔ kɛ yitso ni yɔɔ Brooklyn kɛ Patterson, yɛ New York lɛ mlilɛɛmɔ?

Yehowa fɔseɔ emumɔ krɔŋkrɔŋ lɛ eshwieɔ e-Dasefoi lɛ anɔ, ni eyeɔ ebuaa amɛ “ni amɛfee ejurɔ, ni amɛtsɔmɔ niiatsɛmɛi yɛ ejurɔfeemɔi agbɛfaŋ, amɛsumɔ nihamɔ, amɛnine akpɔ, amɛbɔ jwetri amɛha amɛhe, ni efee shishitoo kpakpa eha be ni baaba lɛ, koni amɛmɔ anɔkwa wala lɛ mli.” (1 Timoteo 6:​18, 19) Nɛkɛ mumɔ nɛɛ kanyaa Yehowa Odasefoi koni amɛfi Maŋtsɛyeli nitsumɔ lɛ sɛɛ yɛ gbɛ fɛɛ gbɛ nɔ.

Akɛ nɔkwɛmɔ nɔ lɛ, yɛ 1989 mli lɛ, Odasefoi 3,787,188 kɛ ŋmɛlɛtswai 835,426,538 tsu nii ni amɛkɛtsɔɔ mɛi krokomɛi Nyɔŋmɔ Wiemɔ lɛ yɛ maji 212 nɔ. Ni amɛkɛ mɛi ni yɔɔ wiemɔ lɛ he miishɛɛ lɛ fee daa shia Biblia mli nikasemɔi 3,419,745. Mɛi aŋkroaŋkroi ni tsu nitsumɔ nɛɛ ji mɛi ni wo nyɔmɔ fɛɛ ni amɛbɔ yɛ nitsumɔ nɛɛ mli lɛ. Yehowa wo nɛkɛ nitsumɔ ni amɛjɛ suɔmɔ mli amɛtsu nɛɛ he nyɔmɔ kɛ nɔyaa ni ji Odasefoi heei 263,855 ni abaptisi amɛ.

Mumɔ ni tamɔ nakai nɔŋŋ hu tsirɛɔ Odasefoi kɛ mɛi ni yɔɔ wiemɔ lɛ he miishɛɛ lɛ hu fɛɛ koni amɛkɛ shika afi nitsumɔ lɛ sɛɛ. Kɛfata yelikɛbuamɔ ni amɛkɛhaa koni akɛwo amɛ asafoi lɛ anyɔji lɛ ahe hu lɛ, amɛyeɔ amɛbuaa yɛ tsumaa nitsumɔi ni ehe hiaa ni aye abua lɛ agbɛfaŋ, tamɔ Maŋtsɛyeli Asa aloo kpee Asa momo ni asaa loo alɛɛɔ mli lɛ aloo ehee ni emamɔɔ lɛ nɛkɛ. Akɛni amɛyi miifa oyayaayai hewɔ lɛ, daa afi lɛ, ehe bahiaa ni amamɔ Maŋtsɛyeli Asai babaoo diɛŋtsɛ, ni ekomɛi ajara po miihe ashɛ Amerika shika dɔlai akpei ohai abɔ. Odasefoi ni yɔɔ nakai maji lɛ anɔ lɛ ji mɛi ni woɔ nɛkɛ nyɔmɔ nɛɛ kɛtsɔ onia ni amɛjɛɔ amɛtsuiŋ amɛtsuɔ kɛ amɛhe ni amɛkɛhaa kɛha nitsumɔ lɛ nɔ.

Kɛfata he lɛ, yɛ maji pii anɔ lɛ, ehe bahiaa ni alɛɛ woji akalamɔ hei kɛ ɔfis kɛ wɔɔhe tsui lɛ amli​—aloo ni amamɔ ehee po​—koni ana tsui aha nitsulɔi ni yifalɛ yaa hiɛ kɛ nibii ni akɛtsuɔ nii ni he hiaa asafo ni yaa nɔ eshwereɔ lɛ. Ni akɛ nikee ni jɛɔ tsuiŋ kɛ be kɛ hewalɛ ni akɛtsuɔ nii fiɔ enɛ hu sɛɛ, taakɛ afeɔ yɛ tsui heei ni amamɔɔ loo ememeji ni asaa yɛ Brooklyn kɛ Patterson lɛ agbɛfaŋ, yɛ New York lɛ. Yɛ hei ni ehiɔ nakai feemɔ lɛ, Odasefoi ni yɔɔ nakai maji lɛ anɔ lɛ kɛ shika haa ni akɛmaa tsu lɛ. Yɛ hei komɛi lɛ, Buu Mɔɔ Asafo lɛ toɔ gbɛjianɔ ni nitsumɔi hei komɛi anine shɛɔ yelikɛbuamɔ nɔ​—yɛ shika gbɛfaŋ kɛ agbɛnɛ yɛ ninenaa nitsulɔi agbɛfaŋ hu​—kɛjɛɔ maji krokomɛi anɔ. Enɛ hewɔ lɛ, nɔ fɛɛ nɔ yeɔ “egbɔ pɛpɛɛpɛ,” yɛ Asafo lɛ gbɛtsɔɔmɔ shishi.​—2 Korintobii 8:⁠14.

Mɛni hewɔ nyɛmamɔɔɔ helatsamɔ hei ni nyɛkɛ nyɛhe wooo nitsumɔi ni akɛyeɔ abuaa mɛi ni ehia amɛ lɛ kɛ nibii krokomɛi ni afeɔ akeɔ maŋbii lɛ amli tamɔ jamɔ kui krokomɛi lɛ feɔ lɛ?

Yehowa Odasefoi kɛ oyaiyeli yayeɔ amɛbuaa yɛ hei ni fimɔ baa yɛ, yɛ tai loo adebɔɔ mli osharai krokomɛi ahewɔ bɔ ni amɛaanyɛ. Yɛ anɔkwale mli lɛ, yɛ bei babaoo mli lɛ, amɛfataa mɛi ni kɛ niyenii kɛ atadei yashɛɔ jɛmɛ klɛŋklɛŋ, kɛ mɛi ni kɛ amɛhe eha koni akɛmamɔ shihilɛ hei aha mɛi lɛ ahe. Shi kɛlɛ, Yehowa Odasefoi mamɔɔɔ helatsamɔ hei, tamɔ bɔ ni amɛfeee nitsumɔi hei ni gbeɔ la loo polisifoi anitsumɔ hei, ni akɛ nomɛi hu baa wala yi lɛ.

Sanekpakpa lɛ he sɔɔlɔi ni ejɔɔ amɛhe nɔ ji amɛ, ni amɛnitsumɔ ji ni amɛshiɛ ni amɛtsɔɔ mɛi Nyɔŋmɔ Maŋtsɛyeli lɛ he sanekpakpa lɛ yɛ je lɛŋ fɛɛ ni amɛkɛye odase dani naagbee lɛ aba. (Mateo 24:14) Taakɛ Yesu kɛɛ lɛ, ŋmaakpamɔ lɛ da shi nitsulɔi lɛ ayi faaa. Ni aaashi nɛkɛ nitsumɔ ni he hiaa waa nɛɛ afɔ shi ni ayatsu nitsumɔi krokomɛi, kɛ́ nitsumɔi ni abuɔ akɛ amɛsa yijiemɔ po lɛ ji nɔ ko ni anyɛŋ akɛke amɛ.​—Mateo 9:​37, 38.

Taakɛ bɔ ni ebaalɛ lɛ, Yehowa Odasefoi lɛ ateŋ mɛi pii ji datrɛfoi, helatsɛmɛi akwɛlɔi, kɛ helatsamɔ he nitsulɔi. Shi amɛbuɔ nitsumɔ nɛɛ akɛ nitsumɔ ko ni fata amɛnitsumɔ oti, ni ji Kristofoi asɔɔmɔ nitsumɔ lɛ he kɛkɛ.

Ani Buu Mɔɔ Asafo lɛ onukpai lɛ aloo amɛmlibii lɛ ateŋ mɔ ko naa shika kɛjɛɔ nyɛ woji ni amɛkalaa babaoo lɛ amli?

Dabi, kɛ nɔmimaa! Yɛ mla naa lɛ, Asafo lɛ jeee nitsumɔ he ko ni naa sɛɛ. Abɛ mɛi yɛ mli ni amɛji nitsumɔtsɛmɛi, ni ajaaa sɛɛnamɔi, ni nyɔmɔwoo po bɛ mli. Sɔɔlɔi ni yɔɔ nitsumɔ he yitso, ni Asafo lɛ sɛinɔtalɔ kɛ nɔkwɛlɔi lɛ hu fata he lɛ ekã ohiayeli he mla naa kita. Enaa niyenii, wɔɔhe, kɛ tsofafeemɔ ni he hiaa, kɛ agbɛnɛ hu shika fioo ko koni ekɛtsu nyɔji bibii ni he hiaa lɛ ahe nii. Kɛji Odasefonyo ko fa gbɛ kɛyatsu Asafo lɛ nitsumɔ ko lɛ, yɛ bei babaoo mli lɛ awoɔ egbɛfaa nyɔmɔ lɛ.

Kɛfata he lɛ, he ko he ko bɛ yɛ je nɛŋ ni wɔsɔɔlɔi lɛ heɔ shika yɛ yookpeemɔi, baptisimɔi, aloo yarafeemɔi ni amɛkwɛɔ nɔ lɛ he. Ni aheee shika loo abiii eko yɛ amɛmaŋshiɛmɔi loo kpeei wuji ashishi.

Akɛni akɛ plɛtei ni akɛtsuɔ onia tsɔɔɔ mɛi ahiɛ hewɔ lɛ, te asafoi lɛ feɔ tɛŋŋ ni amɛnaa shika ni amɛkɛtsuɔ amɛhiamɔ nii ahe nii?

Akɛ tooyeli adekai mamɔɔ Maŋtsɛyeli Asai lɛ anɔ koni aŋkroaŋkroi anyɛ amɛkɛ amɛnikee ni jɛ amɛtsuiŋ lɛ awo mli kɛ amɛmiisumɔ ni amɛfee nakai. (2 Maŋtsɛmɛi 12:⁠9) Nɔ fɛɛ nɔ ni akɛkeɔ lɛ, agbo jio, bibioo jio lɛ, hiɛ sɔɔ he. (Marko 12:​42-44) Daa nyɔŋ nɔ lɛ, sɔɔlɔ ni kwɛɔ asafo lɛ shikatoo nɔ lɛ babuɔ shika lɛ he akɔntaa etsɔɔ asafo lɛ shikome, ni etsɔɔ amɛ shika fɛɛ ni nine shɛ nɔ yɛ nyɔŋ lɛ mli, bɔ ni afite, kɛ nɔ ni asafo lɛ kɛyake Buu Mɔɔ Asafo lɛ koni akɛtsi jeŋ muu fɛɛ shiɛmɔ nitsumɔ lɛ sɛɛ loo ni akɛfi nitsumɔi krokomɛi asɛɛ lɛ fɛɛ.

Kɛ aŋkroaŋkroi nu nɛkɛ gbɛjianɔtoo nɛɛ shishi lɛ, amɛyɛ hegbɛ ni amɛkɛ amɛhe woɔ mli kɛ amɛmiisumɔ, ni mɔ fɛɛ mɔ feɔ enɛ yɛ “bɔ ni enaa lɛ naa.” (1 Korintobii 16:⁠2) Nɛkɛ ji bɔ ni afeɔ yɛ asafoi fe 60,000 ni yɔɔ jeŋ fɛɛ lɛ eko fɛɛ eko mli.

Yɛ Pentekoste lɛ, mra be mli Kristofoi lɛ ŋɔ amɛnibii fɛɛ amɛfee lɛ ekome. Ani Yehowa Odasefoi feɔ nakai?

Hiamɔ shihilɛ ko bate shi yɛ Pentekoste afi 33 Ŋ.B. sɛɛ beni Yudafoi ni atsake amɛ kɛba Kristo jamɔ mli etsɛko lɛ jɛ shɔŋŋ amɛba ni amɛhi shi yɛ Yerusalem koni amɛna mumɔŋ niiashishinumɔ babaoo lɛ. Wɔɔhe kɛ niyenii he bahia amɛ yɛ be kukuoo ko mli; no hewɔ lɛ, Kristofoi ni yɔɔ nakai maŋ lɛ mli lɛ to gbɛjianɔ ni amɛjɛ amɛtsuiŋ amɛhɔ̃ɔhɔ̃ɔ amɛnibii ni amɛja shika ni ana yɛ mli lɛ amɛha mɛi lɛ fɛɛ koni amɛnyɛ amɛhi shi be kakadaŋŋ. (Bɔfoi lɛ Asaji 2:​1, 38-47; 4:​32-37) Anyɛɛɛ mɔ ko mɔ ko nɔ akɛ ehɔ̃ɔ enibii aloo ekɛ nɔ ko abake. (Bɔfoi lɛ Asaji 5:​1-4) Amɛ nɔ fɛɛ nɔ ni amɛfee lɛ ekome nɛɛ jeee komunist loo kwamaŋ nifeemɔ, taakɛ mɛi komɛi susuɔ lɛ. Eji gbɛjianɔtoo ni akɛtsu nii yɛ be kukuoo ko mli kɛkɛ. Beni Kristofoi lɛ ku amɛsɛɛ amɛteeŋ amɛ diɛŋtsɛ amɛmaji amli lɛ, esɛɛ fo.

Ani nyɛtsɔɔ akɛ heloonaa nihamɔ ji gbɛ ko ni atsɔɔ nɔ akpataa ahaa eshai?

Dabi kwraa! Biblia lɛ kɛɔ akɛ: “Ejaakɛ nyɛle akɛ jeee nibii ni fiteɔ, taakɛ jwiɛtɛi loo shika aŋɔkpɔ̃ nyɛ kɛjɛ nyɛ yaka jeŋba ni nyɛna kɛjɛ nyɛtsɛmɛi lɛ aŋɔɔ lɛ mli, shi moŋ, kɛ Kristo, mɔ ni tamɔ toobi ni he bɛ kpa ko loo ŋmamɔ̃ nɔ ko lɛ la ni jara wa lɛ.”​—1 Petro 1:​18, 19.

Yehowa Odasefoi jieɔ hemɔkɛyeli kpo yɛ Yesu kpɔmɔ afɔleshaa lɛ mli kɛha yiwalaheremɔ. Amɛjɛɔ amɛtsui mli amɛkeɔ nii shi amɛkpaaa gbɛ akɛ no kɛ yiwalaheremɔ baaha amɛ. Shi kɛlɛ, amɛle akɛ shika ni fa bɔ ni sa he miihia bɔni afee ni anyɛ agbɛ Nyɔŋmɔ jalɛ jeŋ hee lɛ he sanekpakpa lɛ ashwa. (2 Petro 3:13) Ni amɛnuɔ he akɛ ni amɛaatsu onia ni amɛkɛye amɛbua nɛkɛ sane jajemɔ nitsumɔ nɛɛ ji hegbɛ ko ni Yehowa kɛha amɛ.

Beni Maŋtsɛ David kɛ nikeenii babaoo baha kɛha Yehowa sɔlemɔtsu ni ebi Salomo baama lɛ, esɔle akɛ: “Bo, Yehowa, onɔ ji dalɛ kɛ hewalɛ kɛ anunyam kɛ kunimyeli kɛ agbojee; ejaakɛ nɔ fɛɛ nɔ ni yɔɔ ŋwɛi kɛ shikpɔŋ lɛ nɔ lɛ onɔ ni. . . . Shi namɔ ji mi, ni namɛi ji mimaŋbii lɛ, ni kulɛ wɔɔnyɛ wɔha tsuijurɔ naa tamɔ nɛkɛ? Ejaakɛ oŋɔɔ fɛɛ jɛ, ni odɛŋ wɔna kɛjɛ ni wɔŋɔhaao nɛɛ.”​—1 Kronika 29:​11, 14.

Ŋmɛnɛ, Yehowa Odasefoi kɛ mɛi krokomɛi fɛɛ hu ni sumɔɔ jalɛ nifeemɔ lɛ nuɔ he nakai nɔŋŋ taakɛ David nu he lɛ. Amɛyɛ he miishɛɛ akɛ amɛaana hegbɛ akɛ amɛaatsu onia ni amɛkɛfi nitsumɔ ni akɛjieɔ Yehowa yi lɛ sɛɛ, ni amɛyooɔ akɛ nɔ fɛɛ nɔ ni amɛkɛhaa kɛha esɔɔmɔ lɛ jɛ lɛ nɔŋŋ edɛŋ yɛ gbɛ fɛɛ gbɛ nɔ. Yehowa jɔɔ nɛkɛ mumɔ nɛɛ nɔ, ni nɛkɛ ji bɔ ni efeɔ ni ehaa enitsumɔ lɛ shwereɔ.

[Akrabatsa ni yɔɔ baafa 23]

GBƐI Nl MƐI KOMƐI TSƆƆ NƆ AMƐTSUƆ ONIA KƐHA MAŊTSƐYELI NITSUMƆ LƐ

◻ NIKEE NII: Abaanyɛ akɛ shika ni ataoɔ akɛke lɛ amaje tɛɛ kɛbaha Watch Tower Bible and Tract Society of Pennsylvania, 25 Columbia Heights, Brooklyn, New York 11201, aloo abaanyɛ akɛya Asafo lɛ nitsumɔ he nine ni yɔɔ maŋ nɔ he ni oyɔɔ Iɛ. Abaanyɛ akɛ nibii tamɔ shikpɔji kɛ tsui, kɛ jwetrii kɛ nibii krokomɛi ni jara wa hu ake. Esa akɛ aŋma wolo fioo ko afata nɛkɛ nikee nii nɛɛ ahe ni akɛtsɔɔ mli akɛ amɛji nibii ni akɛmiike kwraa.

◻ NIBII NI AKƐHA SHI AKƐKEKO LƐ HE GBƐJIANƆTOO: Abaanyɛ akɛ shika aha Buu Mɔɔ Asafo Iɛ ni aha ehi edɛ, kɛ gbɛjianɔtoo akɛ kɛ ehe miihia mɔ ni kɛ ha Iɛ, abaaku sɛɛ akɛha Iɛ.

◻ INSURANCE: Abaanyɛ aŋma Buu Mɔɔ Asafo lɛ gbɛi akɛ mɛi ni baana insurance gbɛjianɔtoo ko he sɛɛ lɛ ateŋ mɔ ko aloo yɛ nitsumɔ hejɔɔmɔ mli shika gbɛjianɔtoo hu mli. Esa akɛ atswa Asafo lɛ adafi yɛ gbɛjianɔtoo ni tamɔ nakai he.

◻ NII NI AHAA MƆ KROKO GBƐI KAA NƆ: Abaanyɛ aha Asafo lɛ gbɛi aka shika ni akɛyato shikatoo he ko lɛ adafi. Kɛ afee nakai lɛ, nyɛfainɛ esa akɛ atswa Asafo lɛ adafi. Abaanyɛ akɛ gbɛfaŋnɔ ni ayɔɔ yɛ nitsumɔi amli, shika ni akɛfa ni abaaku sɛɛ abawo ekoŋŋ kɛ nibii ni ayɔɔ hu lɛ aha yɛ gbɛjianɔtoo ni he baaba sɛɛnamɔ kɛha mɔ ni kɛhaa lɛ yɛ ewala be mli lɛ naa. Nɛkɛ gbɛ ni atsɔɔ nɔ nɛɛ jieɔ nyɔmɔbɔɔ kɛ naagbai ni baa yɛ shamaŋsheo he nɔmimaa he lɛ kɛjɛɔ jɛmɛ, ni emaa nɔ mi hu akɛ Asafo lɛ nine shɛɔ nibii nɛɛ anɔ yɛ mɔ lɛ gbele sɛɛ.

◻ SHAMAŊSHEO: Abaanyɛ akɛ nibii ni ayɔɔ loo shika ake Buu Mɔɔ Asafo lɛ kɛtsɔ shamaŋsheo ni aŋma yɛ mla naa nɔ. Esa akɛ afee wolo lɛ ekome amaje Asafo lɛ.

◻ Kɛji ootao nibii amli babaoo lolo Ioo ŋaawoo ko lɛ, ŋmaa wolo kɛya Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, aloo kɛya Asafo lɛ nitsumɔ he nine ni yɔɔ maŋ nɔ ni oyɔɔ lɛ.

[Mfoniri ni yɔɔ baafa 24]

Yehowa Odasefoi a-Biblia mli tsɔsemɔ he ni amaa yɛ Patterson, New York Iɛ fa

[Mfonirii ni yɔɔ baafa 25]

Yehowa haa tsumaa nitsumɔ lɛ shwereɔ kɛtsɔɔ ewebii ni jɛɔ amɛtsuiŋ amɛkeɔ nii Iɛ nɔ