April—Be ni ‘Wɔkɛaatsu Nii Jogbaŋŋ Kɛmɔ Shi’
1 Kaimɔ be lɛ mli otsii lɛ ji be ni Yehowa webii kɛaajwɛŋ nii anɔ. Nɛkɛ be nɛɛ mli wɔbaajwɛŋ nɔ ni Kristo gbele lɛ tsu lɛ nɔ, ní wɔkɛsusu hiɛnɔkamɔ ni Nyɔŋmɔ kɛha wɔ kɛtsɔ Yesu lá ni afɔse ashwie shi lɛ nɔ lɛ he. Yɛ be mli ni osusuɔ nyɛsɛɛ afi ni ho lɛ mli April gbi ni ji 19 lɛ he lɛ, mɛni baa ojwɛŋmɔ mli? Ani obaanyɛ okai mɛi ni ona nakai gbɛkɛ lɛ? mumɔŋ shihilɛ kpakpa ni yɔɔ Kaimɔ lɛ shishi lɛ? hiɛdɔɔ ni akɛgbaa Biblia mli sane kɛ sɔlemɔi ni jɛ tsuiŋ lɛ? Ekolɛ otswa ofai shi akɛ obaatsɔɔ bɔ ni odaa shi babaoo ohaa yɛ suɔmɔ ni Yehowa kɛ Yesu jie kpo etsɔɔ bo lɛ hewɔ. Te sane nɔjwɛŋmɔ ni tamɔ nɛkɛ saa ohe amrɔ nɛɛ tɛŋŋ?
2 Eyɛ faŋŋ akɛ Yehowa webii kɛ nɔ ni fe wiemɔi kɛkɛ jieɔ shidaa kpo amɛtsɔɔ. (Kol. 3:15, 17) Yɛ nyɛsɛɛ afi lɛ April mli titri lɛ, wɔtee hiɛ koni wɔtsɔɔ hiɛsɔɔ ni wɔyɔɔ kɛha gbɛjianɔ ni Yehowa eto kɛha yiwalaheremɔ lɛ kɛtsɔ wɔhe ni wɔkɛwo Kristofoi asɔɔmɔ nitsumɔ lɛ mli babaoo lɛ nɔ. Gbɛgbalɔi awalɔi yashɛ 7117, ni enɛ kɛ yibɔ ni ji oha mlijaa 80 tee hiɛ fe nyɛsɛɛ afi lɛ yibɔ ni fa fe fɛɛ lɛ. Mɔdɛŋ ni amɛbɔ kɛfata Maŋtsɛyeli jajelɔi krokomɛi fɛɛ anɔ̃ lɛ he lɛ ha aná yibɔi heei ni fe fɛɛ yɛ ŋmɛlɛtswai, sɛɛsaramɔi, kɛ shia Biblia mli nikasemɔi amli. Wɔmiishɛɛ lɛ tee hiɛ babaoo yɛ Biblia mli nikasemɔi heei akpei abɔ ni aje shishi lɛ kɛ mɛi ayifalɛ hee ni fe fɛɛ eko ni aná yɛ Kaimɔ lɛ shishi lɛ hewɔ!
3 Yɛ anɔkwale mli lɛ, wɔhiɛnɔkamɔ ni baaba mli kɛ̃ lɛ tsirɛɔ wɔ koni wɔfee nii. Etamɔ bɔ pɛ ni bɔfo Paulo ŋma akɛ: “Enɛ hewɔ wɔgboɔ deŋme ni wɔhaa ajɛ́ɔ wɔ lɛ, ejaakɛ wɔŋɔ wɔhiɛ wɔfɔ̃ Nyɔŋmɔ hiɛkãlɔ lɛ nɔ, mɔ ni ji gbɔmɛi fɛɛ ayiwalaherelɔ, titri lɛ mɛi ni heɔ yeɔ lɛ.”—1 Tim. 4:10.
4 Te obaafee tɛŋŋ otsɔɔ bɔ ni ohemɔkɛyeli yɔɔ ha yɛ gbɛjianɔ ni Yehowa eto kɛha wala yɛ Kaimɔ be nɛɛ mli lɛ? Nyɛsɛɛ afi lɛ April mli lɛ, wɔná Maŋtsɛyeli jajelɔi ni fá fe fɛɛ, nɔ ni fe fɛɛ eko ni ji srɔtoi ejwɛ ni tsa nɔ yɛ Ghana. Ani wɔbaanyɛ wɔteke nakai yibɔ lɛ April nɛɛ? Wɔbaanyɛ wɔtsu he nii koni wɔshɛ he. Shi ehe baahia ni shiɛlɔ fɛɛ shiɛlɔ ni abaptisi lɛ kɛ mɔ ni abaptisiko lɛ lɛ kɛ ehe awo mli. Mɛi heei babaoo hu he baanyɛ asa akɛ amɛkɛ amɛhe aaawo mli. No hewɔ lɛ, yɛ be mli ni otoɔ gbɛjianɔ koni otsu nii jogbaŋŋ kɛmɔ shi yɛ April nyɔŋ nɛɛ mli lɛ, susumɔ gbɛ̀i ni oootsɔ nɔ okanya mɛi krokomɛi ni mɛi heei kɛ mɛi ni he esako fata he lɛ koni amɛbafata ohe.
5 Mɛi Krokomɛi ni Aaaye Abua Amɛ Koni Amɛje Amɛnitsumɔ Shishi Ekoŋŋ: Kɛ ole mɛi komɛi ni kɛ amɛhe woko shiɛmɔ nitsumɔ lɛ mli nyɔŋ kome loo enyɔ lɛ, ekolɛ obaanyɛ owo amɛ hewalɛ ni ofɔ̃ amɛ nine koni amɛfata ohe kɛya shiɛmɔ. Kɛ asafo lɛ mli bii komɛi ekpa shiɛmɔyaa lɛ, onukpai lɛ baabɔ mɔdɛŋ jogbaŋŋ ni amɛyasara amɛ ni amɛwo amɛ hewalɛ koni amɛje shishi ekoŋŋ yɛ April mli.
6 Esa akɛ wɔ fɛɛ wɔya nɔ wɔbi Yehowa mumɔ lɛ koni ewo wɔ hewalɛ yɛ esɔɔmɔ lɛ mli. (Luka 11:13) Mɛni esa akɛ wɔfee koni wɔnine ashɛ nakai mumɔ lɛ nɔ? Kanemɔ Nyɔŋmɔ Wiemɔ ni jɛ mumɔŋ lɛ. (2 Tim. 3:16, 17) Esa akɛ ‘wɔnu nɔ ni mumɔ lɛ kɛɔ asafoi lɛ’ hu kɛtsɔ kpeei enumɔ lɛ fɛɛ ni wɔɔya daa otsi lɛ nɔ. (Kpoj. 3:6) Be ni hi jogbaŋŋ ni wɔkɛaaye wɔbua mɛi ni folɔɔ shiɛmɔyaa mli nyɔŋ muu kɛ mɛi ni ekpa shiɛmɔyaa koni amɛya hiɛ yɛ amɛnikasemɔ sui amli ni amɛya kpeei daa lɛ nɛ. (Lala 50:23) Wɔfeɔ enɛ yɛ be mli ni wɔkwɛɔ wɔ diɛŋtsɛ wɔmumɔŋ hilɛ-kɛhamɔ lɛ nɔ jogbaŋŋ. Ni kɛlɛ, nɔ kroko hu he miihia.
7 Bɔfo Petro tsɔɔ mli akɛ Nyɔŋmɔ kɛ emumɔ krɔŋkrɔŋ lɛ haa “mɛi ni boɔ lɛ toi lɛ.” (Bɔf. 5:32) Nɔ ni fata toiboo ni tamɔ nakai lɛ he ji famɔ ni ji “wɔshiɛ wɔtsɔɔ maŋ lɛ ni wɔye odase” lɛ toi ni wɔɔbo. (Bɔf. 1:8; 10:42) No hewɔ lɛ, eyɛ mli akɛ Nyɔŋmɔ mumɔ lɛ he miihia koni ewaje wɔ kɛha shiɛmɔ moŋ, shi eji anɔkwale hu akɛ yɛ be mli ni wɔjeɔ shishi koni wɔtsɔɔ suɔmɔ ni wɔyɔɔ akɛ wɔɔsa Yehowa hiɛ lɛ, eyeɔ ebuaa wɔ babaoo lolo. Eba akɛ wɔbuŋ bɔ ni ehe hiaa akɛ wɔkɛ nakai shishijee nifeemɔ gbɛ̀i ni tsɔɔ suɔmɔ toiboo lɛ aaatsu nii lɛ kɔkɔɔkɔ ákɛ nɔ ko bibioo!
8 Gbekɛbii ni Aaaye Abua Amɛ: Fɔlɔi, ani nyɛna odaseyeli ni tsɔɔ akɛ nyɛbii lɛ miisumɔ ni amɛgba mɛi krokomɛi anɔkwale lɛ he sane? Ani amɛfataa nyɛhe kɛyaa shiɛmɔ? Ani amɛfeɔ nɔkwɛmɔnɔ kpakpa yɛ amɛjeŋba mli? Kɛ nakai ni lɛ, mɛni hewɔ nyɛshashaoɔ shi? Nyɛyanaa Asafoŋ Sɔɔmɔ Ajinafoi Akuu lɛ mli bii ateŋ mɔ ko, ni okwɛ kɛji obi lɛ sa akɛ mɔ ni abaanyɛ abu lɛ akɛ shiɛlɔ yɛ April nyɔŋ nɛɛ mli lo. (Kwɛmɔ Our Ministry wolo lɛ baafa 99-100.) Ná ole akɛ obii lɛ baanyɛ atsu amɛgbɛfaŋnɔ jogbaŋŋ diɛŋtsɛ koni amɛkɛ yijiemɔ ni naa wa ajie Yehowa yi yɛ Kaimɔ be nɛɛ mli.—Mat. 21:15, 16.
9 Kristofonyo nyɛ ko ni yɔɔ Georgia, U.S.A. lɛ wo ebiyoo fioo lɛ hewalɛ be fɛɛ be koni egba mɛi krokomɛi Yehowa he sane. Nyɛsɛɛ afi lɛ, beni gbekɛ yoo lɛ kɛ enyɛ kɛ amɛhe woɔ shiɛmɔ nitsumɔ lɛ mli lɛ, eha nuu ko Taoɔ wolo bibioo lɛ eko ni etsɔɔ emli saji ni ato naa lɛ mli kuku. Ebi lɛ akɛ: “Afii enyiɛ oye?” Ekɛɛ akɛ: “Afii kpawo.” Nuu lɛ naa kpɛ ehe akɛ ekɛ shiɛmɔ wiemɔ ni shishinumɔ tamɔ nɛkɛ yɔɔ mli lɛ ha. Aná ale yɛ sɛɛ mli akɛ atsɔse lɛ yɛ anɔkwale lɛ mli, shi ekɛ hiɛdɔɔ tsuuu he nii kwraa akɛ shihilɛ gbɛ. Etsɛɛɛ ni akɛ nuu lɛ, eŋa, kɛ ebiyoo bɔi Biblia lɛ kasemɔ.
10 Amrɔ nɛɛ gbekɛbii pii ji shiɛlɔi, ni wɔnáa miishɛɛ akɛ wɔkɛ amɛ bɔɔ yɛ be mli ni amɛfataa wɔhe kɛtsuɔ nii yɛ sɔɔmɔ lɛ mli. Nɛkɛ oblahii kɛ oblayei bibii nɛɛ baanyɛ akanya mɛi krokomɛi ni ji amɛ diɛŋtsɛ amɛtipɛŋfoi lɛ ni amɛwo amɛ hewalɛ. Shi April hu ji be ni sa kɛha wekui srɔtoi lɛ koni amɛha wekukpaa ni kã amɛteŋ lɛ mli awa ni amɛtswa amɛmumɔŋ shidaamɔ lɛ amɛma shi kɛtsɔ sɔɔmɔ krɔŋkrɔŋ lɛ ni amɛkɛ ekomefeemɔ aaatsu lɛ nɔ. Esa akɛ weku yitsei anyiɛ hiɛ yɛ enɛ mli.—Abɛi 24:27.
11 Mɛi Heei ni Aaaye Abua Amɛ: Ni mɛi heei ni okɛ amɛ kaseɔ Biblia lɛ hu? Ani amɛaatsu amɛgbɛfaŋnɔ yɛ nitsumɔ krɛdɛɛ lɛ mli April nɛɛ? Ekolɛ amɛtsɔɔ suɔmɔ ni amɛyɔɔ akɛ amɛaagba mɛi krokomɛi nɔ ni amɛkaseɔ lɛ yɛ be mli ni oshɛ yitso 2 lɛ mli kuku 22, loo yitso 11 lɛ mli kuku 14 lɛ yɛ Nilee wolo lɛ mli. Kɛ ooshɛ wolo lɛ naagbee gbɛ lɛ, saamɔ ohe koni ogba sane nɛɛ mli saji yɛ faŋŋ mli be mli ni nyɛkaseɔ yitso 18 lɛ mli kuku 8 ni kɛɔ akɛ: “Ekolɛ ooshwe ni ogba owekumɛi, nanemɛi, kɛ mɛi krokomɛi nɔ ni okaseɔ lɛ he sane. Yɛ anɔkwale mli lɛ, ekolɛ oje enɛ feemɔ shishi momo, taakɛ bɔ ni Yesu gba mɛi krokomɛi sanekpakpa lɛ yɛ trukaa gbɛi anɔ lɛ. (Luka 10:38, 39; Yohane 4:6-15) Agbɛnɛ obaasumɔ ni ofee babaoo.” Ani enɛ ji anɔkwale yɛ mɛi ni okɛ amɛ kaseɔ nii lɛ ahe?
12 Ani mɔ ni okɛ kaseɔ nii lɛ heɔ Nyɔŋmɔ Wiemɔ lɛ eyeɔ? Ani ekɛ Biblia mli shishitoo mlai tsuɔ nii? Ani ehaa eshihilɛ kɛ ŋwɛi tɛi ni afolɔ ashwie shi lɛ kpãa gbee? Ani eyaa asafoŋ kpeei? Ani eesumɔ ni esɔmɔ Yehowa Nyɔŋmɔ? Belɛ mɛni hewɔ owooo lɛ hewalɛ koni ekɛ onukpai lɛ agba sane bɔni afee ni amɛkwɛ akɛ esa akɛ eeetsɔ shiɛlɔ ni abaptisiko lɛ lo, ní efata ohe kɛtsu nii yɛ April mli? (Kwɛmɔ Our Ministry wolo lɛ baafa 97-99.) Yɛ nɛkɛ gbɛ nɔ lɛ ebaanyɛ ele bɔ ni Yehowa gbɛjianɔtoo lɛ baafĩ esɛɛ tɛ̃ɛ yɛ be mli ni ebɔɔ mɔdɛŋ koni esɔmɔ Yehowa lɛ.
13 Eji anɔkwale akɛ, nikaselɔi lɛ ateŋ mɛi komɛi yaa hiɛ oyayaayai fe mɛi krokomɛi. No hewɔ lɛ, yɛ gbɛtsɔɔmɔ ni akɛha yɛ June 2000 Wɔ Maŋtsɛyeli Sɔɔmɔ lɛ mli lɛ baafa 8 lɛ kuku 5-6 lɛ hewɔ lɛ, mɛi babaoo kɛ mɛi ni jie miishɛɛ kpo klɛŋklɛŋ kwraa ni yelikɛbuamɔ he hiaa amɛ lolo koni amɛkɛ wɔ abɔ waa lɛ miikase wolo ni ji enyɔ. Wɔŋmɛŋ hiɛnɔkamɔ ni wɔyɔɔ akɛ nɛkɛ mɛi ni hiɛ tsui ni ja nɛɛ baatsɔmɔ Kristo anɔkwa kaselɔi lɛ he kɔkɔɔkɔ, kɛ́ ‘esɛɛ etsɛŋ jio, esɛɛ baatsɛ jio.’ (Bɔf. 26:29) Ni kɛlɛ, kɛ́ abaanyɛ awie nyɔji abɔ ni okɛ aŋkroaŋkroi ni tamɔ mɛnɛɛmɛi kaseɔ nii lɛ he jogbaŋŋ akɛ ‘esɛɛ etsɛ jio,’ ani Kaimɔ be nɛɛ baafee hegbɛ ni hi ni onikaselɔ lɛ aaaje shishi akɛ eeetsɔɔ bɔ ni hiɛsɔɔ ni eyɔɔ kɛha Kristo kpɔmɔnɔ lɛ mli kwɔ waa ha?
14 Bɔ ni Aaafee Aye Abua Amɛ ni Amɛkɛ Amɛhe Awo Mli: Wɔkaseɔ babaoo yɛ bɔ ni aaafee aye abua mɛi ni sa lɛ koni amɛbɔi shiɛmɔyaa lɛ mli kɛtsɔ gbɛ ni Yesu tsɔ nɔ etsɔse mɛi krokomɛi lɛ mlipɛimɔ nɔ. Jeee akɛ ena mɛi babaoo ni ekɛɛ ebɔfoi lɛ koni amɛbɔi wiemɔ kɛkɛ. Klɛŋklɛŋ lɛ, ema bɔ ni ehe hiaa ni akɛ he awo shiɛmɔ nitsumɔ lɛ mli lɛ nɔ mi, ni ewo hewalɛ koni aná sɔlemɔ su, kɛkɛ ni eha amɛ nibii etɛ komɛi ni he hiaa: hefatalɔ ni akɛaatsu nii, shikpɔŋkuku mli nitsumɔ, kɛ shɛɛ sane. (Mat. 9:35-38; 10:5-7; Mar. 6:7; Luka 9:2, 6) Obaanyɛ ofee nakai nɔŋŋ. Kɛ obaaye obua bo diɛŋtsɛ obi jio, nikaselɔ hee ko jio, loo mɔ kroko ni ebuko eshiɛmɔ nitsumɔ lɛ he akɔntaa kɛyashi be ko jio, ebaafee nɔ ni sa akɛ aaabɔ mɔdɛŋ jogbaŋŋ koni akɛ gbɛtsɔɔmɔi ni nyiɛ sɛɛ nɛɛ atsu nii.
15 Maa Hiamɔ ni Yɔɔ He lɛ Nɔ Mi: Maa bɔ ni shiɛmɔ nitsumɔ lɛ he hiaa ha lɛ nɔ mi oha mɔ lɛ. Okɛ miishɛɛ awie he. Gbaa niiashikpamɔi ni tsɔɔ nɔ ni asafo lɛ tsuɔ yɛ shiɛmɔ nitsumɔ lɛ mli. Jiemɔ nifeemɔ su ni Yesu etsɔɔ mli yɛ Mateo 9:36-38 lɛ kpo otsɔɔ. Wó mɔ ni baatsɔ shiɛlɔ wɔsɛɛ ko loo mɔ ni ekpa shiɛmɔyaa lɛ hewalɛ koni esɔle yɛ ehe ni ekɛaawo shiɛmɔ nitsumɔ lɛ mli lɛ he kɛ agbɛnɛ kɛha nitsumɔ lɛ omanyeyeli yɛ jeŋ fɛɛ.
16 Ha Mɔ lɛ Asusu Hegbɛi Babaoo ni Yɔɔ ni Akɛaaye Odase lɛ He: Tsĩi bɔ ni eeenyɛ eba lɛ akɛ akɛ woloŋ nikasemɔ kuu lɛ aaakpe kɛha shia kɛ shia odaseyeli lɛ tã. Wiemɔ sane ni ekɛ wekumɛi kɛ nanemɛi aaagba loo nanemɛi nitsulɔi loo skulbii ni ekɛ amɛ aaagba sane beni akpa kɛha shwane niyeli lɛ he. Bei pii kɛ́ atá maŋbii agbɛfãa tsɔne mli lɛ, abaanyɛ aje sanegbaa ko shishi kɛtsɔ miishɛɛ diɛŋtsɛ ni aaaná yɛ nanemɛi gbɛfalɔi ahe lɛ nɔ. Bei pii kɛ́ wɔfee nii kɛtsɔ hiɛ lɛ, enɛ haa anáa hegbɛ ni akɛaaye odase jogbaŋŋ. Eji anɔkwale akɛ bei babaoo yɛ ni wɔɔtsɔ nɔ wɔgba mɛi krokomɛi wɔ hiɛnɔkamɔ lɛ he sane “gbi fɛɛ gbi!”—Lala 96:2, 3.
17 Shi kɛlɛ, eeefee nɔ ni sa akɛ bo kɛ shiɛlɔ hee lɛ aaafee ekome kɛtsu nii yɛ shia kɛ shia amrɔ nɔŋŋ bɔ ni nyɛaanyɛ. Kɛ okɛfee oti ni ma ohiɛ akɛ okɛ ohe aaawo shiɛmɔ nitsumɔ lɛ mli babaoo yɛ April mli lɛ, bi sɔɔlɔ ni kwɛɔ shikpɔŋkuku nɔ lɛ kɛ́ shikpɔŋkuku kpakpa ko yɛ. Kɛ nakai ni lɛ, enɛ baaha oná hegbɛi ni okɛaatsu he nii jogbaŋŋ. Ákɛ nɔkwɛmɔnɔ lɛ, beni okpaa shiɛmɔ loo oyaa kpeei loo oyaa hei krokomɛi lɛ, ekolɛ obaana akɛ mɔ ko yɛ shia ko mli yɛ he ko, he ni be ko lɛ onaaa mɔ ko yɛ jɛmɛ loo he ni ajie miishɛɛ kpo atsɔɔ yɛ lɛ. Kɛ eji nɔ ni sa lɛ, yaasara lɛ fioo be mli ni ebaafee nɔ ni mɔɔ shi jogbaŋŋ lɛ. Yɛ enɛ feemɔ mli lɛ, ebaaha onu he akɛ otsu nitsumɔ ko ogbe naa ni oyɛ miishɛɛ yɛ shiɛmɔ nitsumɔ lɛ mli.
18 Saamɔ Ohe kɛ Shɛɛ Sane ko ni Yɔɔ Miishɛɛ: Eji nɔ kome akɛ mɔ ko baasumɔ ni egba mɛi Maŋtsɛyeli he shɛɛ sane lɛ, shi eji nɔ kroko kwraa hu akɛ eeená nɔmimaa yɛ gbɛ ni etsɔɔ nɔ egbaa sane lɛ ehaa lɛ mli, titri lɛ kɛ́ eji mɔ hee loo ekpa shiɛmɔyaa etsɛ lɛ. Mɛi heei kɛ mɛi ni ekpa shiɛmɔyaa ni aaaye abua amɛ koni amɛsaa amɛhe lɛ he yɛ sɛɛnamɔ babaoo. Sɔɔmɔ Kpeei kɛ kpeei kɛha shiɛmɔyaa baanyɛ ekɛ susumɔi ni yeɔ ebuaa aha, shi nɔ kroko kwraa bɛ ni mɔ kɛaaye lɛ diɛŋtsɛ ehesaamɔ lɛ najiaŋ.
19 Te ooofee tɛŋŋ oye obua mɛi heei lɛ koni amɛsaa amɛhe kɛha shiɛmɔyaa? Okɛ wolo tɛtrɛɛ he shiɛmɔ wiemɔ aje shishi, ní oha efee mlɛo ni efee kuku! Bi koni amɛsusu nibii ni eba yɛ adafitswaa mli ni baakɔ mɛi ni yɔɔ shikpɔŋkuku lɛ mli lɛ ahe, koni agbɛnɛ otao sane oti ko yɛ woji tɛtrɛbii heei lɛ ekome mli ni kɔɔ he. Nyɛfea ekome kɛfea shiɛmɔ wiemɔ lɛ he nɔkwɛmɔnɔ, ní nyɛkɛtsu nii yɛ shiɛmɔ nitsumɔ lɛ mli mra bɔ ni nyɛaanyɛ.
20 Tsu Nyɛmɔ ni Wɔkɛaaya Hiɛ Wɔsɛɛ ko lɛ He Nii: Nyɛsɛɛ afi lɛ, mɛi ni yi fa fe akpe toi akpei 14.8 ji mɛi ni ba Kaimɔ lɛ yɛ jeŋ fɛɛ. Mɛi abɔ ni buɔ akɔntaa akɛ shiɛlɔi lɛ ayi fá fioo fe akpekpei ekpaa. Enɛ tsɔɔ akɛ aaafee mɛi akpekpei 8.8 yɛ wiemɔ lɛ he miishɛɛ bɔ ni sa akɛ amɛba kpee krɛdɛɛ nɛɛ ni amɛbabo Biblia mli tsɔɔmɔi wuji lɛ ateŋ ekome ni agbálaa mli atsɔɔ lɛ toi. Amɛná amɛbale wɔteŋ mɛi komɛi diɛŋtsɛ, ni ekolɛ no ha amɛná miishɛɛ waa. Amɛteŋ mɛi babaoo wieɔ wɔhe ekpakpa, ni amɛyeɔ amɛbuaa koni wɔ jeŋ muu fɛɛ nitsumɔ lɛ aya hiɛ, ni amɛfãa wɔhe yɛ mɛi krokomɛi ahiɛ. Nɛkɛ kuu babaoo nɛɛ bafeɔ mɛi babaoo ni baanyɛ aha wɔyi afa wɔsɛɛ ko. Mɛni wɔbaanyɛ wɔfee ni wɔkɛye wɔbua amɛ koni amɛya hiɛ babaoo?
21 Mɛi heei ni baa Kaimɔ lɛ ateŋ mɛi babaoo feɔ nakai yɛ nine ni wɔteŋ mɔ ko fɔ̃ lɛ lɛ hewɔ. Bei pii lɛ enɛ tsɔɔ akɛ, kɛ hoo lɛ amɛyɛ mɔ kome ni amɛ diɛŋtsɛ amɛle lɛ yɛ toibolɔi lɛ ateŋ. Kɛ mɔ ko ba yɛ nine ni wɔfɔ̃ lɛ lɛ hewɔ lɛ, no lɛ gbɛnaa nii kã wɔnɔ akɛ wɔha ehiɛ amɛ ni wɔye wɔbua lɛ koni ená kpee lɛ he sɛɛ jogbaŋŋ. Akɛni asa lɛ nɔ baayi hewɔ lɛ, ye obua lɛ koni ená sɛi eta nɔ. Maa lɛ Biblia, ni oha ekɛ bo akwɛ olalawolo lɛ mli. Ha saji fɛɛ ni eeebi lɛ hetoo. Ohiɛ ni oooha ehi enɔ jogbaŋŋ kɛ miishɛɛ lɛ baanyɛ afee nɔ̃ diɛŋtsɛ ni baatee emiishɛɛ shi. Shi kɛlɛ, gbɛnaa nii nɛɛ kã wɔ fɛɛ wɔnɔ—kɛ́ wɔna mɔ ko ni wɔleee lɛ lɛ, okɛ miishɛɛ ahere lɛ, ni okɛ lɛ agba sane fioo koni ele bo.
22 Kaimɔ lɛ ni aaaba lɛ baanyɛ aná hewalɛ diɛŋtsɛ yɛ mɔ susumɔ nɔ. Anɔkwale ni eji akɛ eba kpee lɛ shishi lɛ, baanyɛ atsɔɔ akɛ enáko nɔ ni etaoɔ lɛ yɛ he kroko, ni ákɛ wɔji mɛi ni kɛ nɔ ni esusuɔ akɛ ehe miihia ni epɛi mli jogbaŋŋ ekwɛ lɛ haa. Kpɔmɔnɔ he gbɛjianɔtoo ni yɔɔ naakpɛɛ lɛ mlitsɔɔmɔ baanyɛ afee nilee ni mli kwɔ ni ajieɔ lɛ kpo atsɔɔ mɔ ni leee Yehowa suɔmɔ ni fa babaoo lɛ he nɔ ko nɔ ko lɛ. Ebaanyɛ ena amrɔ nɔŋŋ akɛ esoro wɔ—mɛi ni yeɔ anɔkwa, ní yɔɔ naanyobɔɔ su, ní yɔɔ suɔmɔ, ní yɔɔ bulɛ kɛhaa mɔ. Wɔ asa lɛ tamɔɔɔ nɔ ni ekolɛ ebaana yɛ sɔlemɔi lɛ amli ni tsɔɔ mfonirii kɛ kusumii ni sɛɛnamɔ ko bɛ he lɛ kwraa. Mɛi heei lɛ kadiɔ jogbaŋŋ akɛ mɛi ni yɔɔ toibolɔi lɛ ateŋ lɛ ji gbɔmɛi srɔtoi ni jɛ shihilɛi srɔtoi amli ni ákɛ aheee shika kɛjɛɛɛ mɔ ko dɛŋ. Nɛkɛ nifeemɔ ni yɔɔ faŋŋ nɛɛ baanyɛ afee nɔ ko ni baakanya amɛ waa koni amɛba ekoŋŋ.
23 Kɛ agbe Kaimɔ lɛ naa lɛ, esa akɛ mɔ ko akwɛ koni eye ebua mɔ hee fɛɛ mɔ hee ni ba lɛ. Kɛ ofɔ̃ nine otsɛ́ mɛi heei komɛi lɛ, gbɛnaa nii krɛdɛɛ ko kã onɔ. Dani amɛaashĩ kɛya lɛ, nyɛkwɛa koni amɛlea kpeei krokomɛi ni afeɔ yɛ Maŋtsɛyeli Asa lɛ nɔ lɛ. Tsɔɔmɔ maŋshiɛmɔ ni abaaha be kroko ni baanyiɛ sɛɛ lɛ saneyitso. Ha amɛle he ni abaafee Asafo Woloŋ Nikasemɔ ni bɛŋkɛ amɛshia fe fɛɛ lɛ yɛ kɛ be ni akɛfeɔ. No sɛɛ lɛ, ha amɛ nine ashɛ Weku Miishɛɛ loo Creator wolo (emli nɔ ni sa) lɛ nɔ, ni oha amɛle nɔ ni abaasusu he April 30 otsi lɛ. Tsɔɔmɔ nɔ hewɔ ni asafo muu lɛ fɛɛ toɔ gbɛjianɔ koni aya kpokpaa nɔ kpee ni bɛŋkɛ ni ato he gbɛjianɔ yɛ be ni etsɛŋ ni baa lɛ mli lɛ.
24 Too gbɛjianɔ koni okɛ miishɛɛ ayasara amɛ yɛ shia. Kwɛmɔ koni amɛná Taoɔ wolo bibioo lɛ kɛ Nilee wolo ni haa amɛnáa Biblia mli shishijee tsɔɔmɔi lɛ. Kɛ amɛjeko nikasemɔ shishi lolo lɛ, ha amɛle akɛ okɛ amɛ baakase Biblia lɛ. Tsɔɔmɔ mli oha amɛ akɛ amɛkane Yehowa Odasefoi wolo bibioo ni kɛ bɔ ni wɔtsuɔ nii wɔhaa akɛ gbɛjianɔtoo lɛ he sane ni yɔɔ faŋŋ haa lɛ. Fɔ̃ɔ nine otsɛ amɛ koni amɛkwɛ wɔ vidioi lɛ, tamɔ Our Whole Association of Brothers. Too gbɛjianɔ oha amɛ koni amɛkɛ asafo lɛŋ bii krokomɛi akpe. Yɛ nyɔji ni baa lɛ amli lɛ, yaa nɔ okɛ mɛi heei aná sanegbaa; fɔ̃ɔ amɛ nine koni amɛba kpeei lɛ kɛ́ kpokpaa nɔkwɛlɔ lɛ basara nyɛ loo kɛ́ nyɛbaaya kpokpaa nɔ kpee loo gbi kome kpee krɛdɛɛ. Ha amɛná hegbɛ fɛɛ hegbɛ ni amɛkɛaatsɔɔ akɛ ‘ajie amɛ ato naanɔ wala’!—Bɔf. 13:48.
25 Nɔ ni Onukpai lɛ Baanyɛ Afee: Kɛ nitsumɔ ni abaatsu waa yɛ shiɛmɔ nitsumɔ lɛ mli yɛ April nɛɛ baaye omanye lɛ, belɛ ebaadamɔ onukpai lɛ anɔ waa diɛŋtsɛ. Kɛ woloŋ nikasemɔ nɔkwɛlɔ ji bo lɛ, too saji komɛi ni obaanyɛ okɛye obua mɔ fɛɛ mɔ ni yɔɔ owoloŋ nikasemɔ kuu lɛ mli lɛ ni amɛkɛ amɛhe awo nitsumɔi krɛdɛɛi nɛɛ amli. Ani mɛi komɛi yɛ okuu lɛ mli ni darako, mɛi heei, mɛi ni efolɔ shiɛmɔyaa mli nyɔŋ muu, loo mɛi ni ekpa shiɛmɔyaa? Kwɛmɔ kɛji fɔlɔi lɛ, gbɛgbalɔi, loo shiɛlɔi krokomɛi lɛ kɛ amɛhe eha akɛ amɛbaaye amɛbua amɛ. Okɛ yelikɛbuamɔ fɛɛ ni bo diɛŋtsɛ obaanyɛ okɛha lɛ aha. Nyɛmi yoo ko ni folɔ shiɛmɔyaa mli nyɔŋ muu loo nɔ̃ afii enyɔ lɛ kɛ nɔ ni fa fe ŋmɛlɛtswai 50 tsu nii yɛ shiɛmɔ nitsumɔ lɛ mli nyɛsɛɛ April lɛ mli. Mɛni ha enyɛ efee enɛ? Ekɛɛ enɛ jɛ onukpai lɛ ni saraa lɛ ni amɛkɛtswa lɛ amɛma shi lɛ hewɔ.
26 Esa akɛ onukpai kɛ asafoŋ sɔɔlɔi afee ekome koni amɛkwɛ koni aná shikpɔŋkuku, woji tɛtrɛbii, kɛ woji ni fa saŋŋ kɛha nyɔŋ ni baa lɛ. Ani abaanyɛ ato gbɛjianɔ kroko kɛha kpeei kɛha shiɛmɔyaa? Kɛ nakai ni lɛ, nyɛhaa alea gbɛjianɔi krɛdɛɛi ni ato lɛ. Nɔ ni fe fɛɛ lɛ, nyɛbia Yehowa dɛŋ jɔɔmɔ nyɛshwiea nyɔŋ nɛɛ nɔ Maŋtsɛyeli nitsumɔ ni wɔbaatsu kɛya hiɛ waa lɛ nɔ yɛ sɔlemɔ ni nyɛsɔleɔ yɛ mɛi ahiɛ kɛ teemɔŋ lɛ fɛɛ mli.—Rom. 15:30, 31; 2 Tes. 3:1.
27 Nyɛsɛɛ April yɛ asafo ko ni yɔɔ North Carolina lɛ mli lɛ, onukpai lɛ je gbɛ amɛwo hewalɛ kɛha sɔɔmɔ nitsumɔ ni yaa hiɛ babaoo lɛ. Amɛfɔ̃ shiɛlɔi lɛ anine koni amɛkɛ sɔlemɔ asusu kɛji amɛbaanyɛ amɛkɛ amɛhe awo gbɛgbalɔi awalɔ nitsumɔ lɛ mli lɛ he yɛ kpeei lɛ ashishi daa otsi. Onukpai kɛ asafoŋ sɔɔlɔi fɛɛ kɛ miishɛɛ wieɔ April ni amɛkɛaafee nyɔŋ ni fe fɛɛ lɛ he yɛ hegbɛ fɛɛ hegbɛ ni amɛnáa lɛ mli. Nɔ ni jɛ mli ba ji akɛ, shiɛlɔi lɛ mli oha mlijaa 58 ní onukpai kɛ asafoŋ sɔɔlɔi lɛ fɛɛ fata he lɛ kɛ amɛhe wo gbɛgbalɔi awalɔ nitsumɔ lɛ mli nakai nyɔŋ lɛ!
28 Miishɛɛ ni Akɛaaná Mli Gbɛfaŋnɔ Kɛmɔ Shi: Mɛni ji jɔɔmɔi ni jɛɔ ‘nii ni wɔtsuɔ jogbaŋŋ kɛmɔɔ shi’ yɛ shiɛmɔ nitsumɔ lɛ mli lɛ kɛbaa? (1 Tim. 4:10) Yɛ onukpai ni atsĩ amɛ tã lɛ asafo lɛŋ nitsumɔ ni akɛ ekãa tsu yɛ nyɛsɛɛ April lɛ hewɔ lɛ, amɛŋma akɛ: “Bei pii lɛ nyɛmimɛi hii kɛ yei lɛ wieɔ suɔmɔ babaoo kɛ naanyobɔɔ ni mli wa ni amɛnáa amɛhaa amɛhe kɛjɛ beni amɛbɔi nitsumɔ babaoo yɛ shiɛmɔ nitsumɔ lɛ mli lɛ he.”
29 Nyɛmi nuu fioo ko ni nyɛɛɛ anyiɛ pii lɛ shwe akɛ ekɛ ehe aaawo nitsumɔ krɛdɛɛ lɛ mli yɛ nyɛsɛɛ April nyɔŋ lɛ mli. Akɛni eto gbɛjianɔ jogbaŋŋ ni enyɛ kɛ mumɔŋ nyɛmimɛi hii kɛ yei lɛ ye amɛbua lɛ hewɔ lɛ, ená nyɔŋ ko ni woɔ yibii babaoo lɛ mli ŋɔɔmɔ ákɛ gbɛgbalɔi awalɔ. Te enu niiashikpamɔ lɛ he eha tɛŋŋ? Ekɛɛ akɛ: “Enɛ ji klɛŋklɛŋ kwraa yɛ mishihilɛ mli ni minu he akɛ miyɛ gbɔmɔtsoŋ hewalɛ waa diɛŋtsɛ.”
30 Ŋwanejee ko kwraa bɛ he akɛ, Yehowa kɛ jɔɔmɔi babaoo haa mɛi ni jieɔ bulɛ babaoo kpo yɛ hegbɛ ni amɛná akɛ amɛaagba emaŋtsɛyeli lɛ he sane lɛ. (Lala 145:11, 12) Yɛ be mli ni wɔkaiɔ wɔ Nuntsɔ lɛ gbele lɛ, wɔnuɔ shishi akɛ jɔɔmɔi ni wɔbaaná kɛha Nyɔŋmɔ jamɔ hetuu-kɛhamɔ lɛ baafá babaoo diɛŋtsɛ yɛ wɔsɛɛ be mli. Bɔfo Paulo ná he miishɛɛ waa akɛ eeená naanɔ wala he nyɔmɔwoo lɛ. Ni kɛlɛ, ele akɛ enɛ jeee nɔ ko ni ebaatá shi kɛkɛ ni ekɛ ehiɛ afɔ̃ nɔ. Eŋma akɛ: “No he deŋme migboɔ ni mipeleɔ yɛ nitsumɔ ni akɛ hewalɛ tsuɔ yɛ mimli lɛ naa.” (Kol. 1:29) Yehowa tsɔ Yesu nɔ eha Paulo fee mɔ ni he wa ni ekɛaatsu sɔɔmɔ ni hereɔ mɔ yiwala lɛ he nii, ni E-baanyɛ efee nakai nɔŋŋ eha wɔ ŋmɛnɛ. Ani no baafee niiashikpamɔ ni bo diɛŋtsɛ obaaná yɛ April mli?
[Akrabatsa ni yɔɔ baafa 1]
Namɔ Obaanyɛ Owo Lɛ Hewalɛ Koni Etsɔ Shiɛlɔ yɛ April Mli?
Obi? Biblia mli nikaselɔ?
Mɔ ko ni etsɔ mɔ ni ekpa shiɛmɔyaa?