“Shiɛmɔ Nyɔŋmɔ Wiemɔ lɛ Kɛmɔ Shi”
1 Kɛ́ ohiɛ sɔ nɔ ko kpakpa ni onine eshɛ nɔ lɛ, ani ojieee enɛ ekpo kɛtsɔ onifeemɔ nɔ? Eka shi faŋŋ akɛ ojieɔ lɛ kpo! Yɛ nɔ ni kɔɔ ejurɔfeemɔ kɛ mlihilɛ ni Yehowa kpãa mli ehaa adesai lɛ ahe lɛ, kadimɔ bɔ ni bɔfo Paulo fee enii yɛ he lɛ he okwɛ. Ejaje akɛ: “Shi shidaa aha Nyɔŋmɔ yɛ enikeenii ni anyɛŋ agba lɛ hewɔ!” Mɛni ji nɔ ni fata nakai ‘nikeenii’ lɛ he? ‘Nyɔŋmɔ duromɔ ni yɔɔ wɔnɔ kɛteke nɔ’ ni ajie kpo atsɔɔ wɔ lɛ, ni emli nɔ ni fe fɛɛ lɛ ji lɛ diɛŋtsɛ e-Bi lɛ wala akɛ kpɔmɔ nɔ ni ekɛha akɛ nikeenii yɛ wɔhe eshai lɛ ahewɔ lɛ.—2 Kor. 9:14, 15; Yoh. 3:16.
2 Ani Paulo shidaa wiemɔi lɛ ji wiemɔi foji komɛi kɛkɛ yɛ egbɛfaŋ? Dabida! Ejie hiɛsɔɔ ni mli kwɔ ni eyɔɔ lɛ kpo yɛ gbɛ̀i srɔtoi anɔ. No mli lɛ, eesusu enanemɛi Kristofoi lɛ amumɔŋ hilɛ-kɛ-hamɔ he ni eesumɔ ni efee nɔ fɛɛ nɔ ni eeenyɛ koni eye ebua amɛ ni amɛná Nyɔŋmɔ mlihilɛ lɛ he sɛɛ kɛmɔ shi. Paulo wie yɛ nakai gbɔmɛi lɛ ahe akɛ: “Akɛni wɔsumɔɔ nyɛ jogbaŋŋ nɛkɛ hewɔ lɛ, wɔyɛ he tsui akɛ jeee Nyɔŋmɔ sanekpakpa lɛ kɛkɛ wɔkɛaaha nyɛ, shi moŋ wɔ diɛŋtsɛ wɔwala tete, ejaakɛ wɔmiisumɔ nyɛ naakpa.” (1 Tes. 2:8) Kɛfata yelikɛbuamɔ ni ekɛha mɛi ni no mli lɛ, amɛji asafo lɛ mli bii lɛ he koni amɛna yiwalaheremɔ lɛ, Paulo shiɛ sanekpakpa lɛ ní etɔɔɔ lɛ, ni efa gbɛ kilomitai akpei abɔ yɛ shikpɔŋ kɛ ŋshɔ hiɛ koni etao “mɛi abɔ ní ajie ato naanɔ wala lɛ.” (Bɔf. 13:48) Hiɛsɔɔ ni mli kwɔ ni Paulo ná kɛha nibii fɛɛ ni Yehowa efee kɛha lɛ lɛ tsirɛ lɛ ni ‘eshiɛ Nyɔŋmɔ wiemɔ lɛ kɛmɔ shi.’—Kol. 1:25.
3 Ani hiɛsɔɔ ni wɔyɔɔ kɛha nibii fɛɛ ni Yehowa efee kɛha wɔ lɛ tsirɛɛɛ wɔ koni wɔye wɔbua mɛi ni mumɔŋ yelikɛbuamɔ he hiaa amɛ yɛ wɔ asafo lɛ mli lɛ? (Gal. 6:10) Ni ani no tsirɛɛɛ wɔ koni wɔkɛ wɔhe awo Maŋtsɛyeli lɛ he sanekpakpa shiɛmɔ nitsumɔ lɛ mli bɔ ni wɔɔnyɛ kɛmɔ shi yɛ wɔshikpɔŋkuku lɛ mli?—Mat. 24:14.
4 Hegbɛ ni Aná ni Akɛaajie Hiɛsɔɔ Kpo: Daa afi lɛ, Kristo gbele lɛ Kaimɔ haa wɔnáa hegbɛ krɛdɛɛ ni wɔkɛaajie hiɛsɔɔ ni wɔyɔɔ kɛha nɔ ni Yehowa kɛ Yesu efee kɛha wɔ lɛ kpo. Enɛ jeee kpee kroko loo kaimɔ nifeemɔ ko kɛkɛ. Yesu kɛɛ akɛ: “Nyɛfea enɛ ni nyɛŋɔkai mi.” (Luka 22:19, wɔma efã ko nɔ mi.) Kristo gbele lɛ Kaimɔ lɛ ji be ni akɛkaiɔ nɔ gbɔmɔ ni Yesu ji. Eji be ni esa akɛ wɔyɔse akɛ eyɛ wala mli, ni eyɛ hewalɛ ŋmɛnɛ, ni eyɛ anunyam kɛ maŋtsɛyeli ni akɛha lɛ yɛ anɔkwa shihilɛ kɛ afɔleshaa gbɛ ni ekɔ lɛ hewɔ lɛ mli. Nɛkɛ gbi jurɔ nɛɛ hu ji hegbɛ ni wɔkɛtsɔɔ wɔhe shi ni wɔbaa wɔhaa Kristo nɔyeli lɛ yɛ be mli ni ekudɔɔ nibii kɛ nitsumɔi ni yɔɔ Kristofoi asafo lɛ mli lɛ. (Kol. 1:17-20) Esa akɛ Nyɔŋmɔ webii fɛɛ kɛ bulɛ ahi Kristo gbele lɛ Kaimɔ lɛ shishi. Afi nɛɛ, abaafee yɛ Soo, March 28, 2002 beni hulu lɛ enyɔ shi sɛɛ.
5 Yɛ mɔdɛŋ ni wɔbɔ dani wɔkɛye Kaimɔ lɛ nyɛsɛɛ afi lɛ hewɔ lɛ, wɔna yifalɛ ni fe fɛɛ ni ji 236,088 yɛ Ghana. Mɛi enyiɛ baaba afi nɛɛ? Babaoo baadamɔ ‘deŋme ni wɔɔgbo,’ ni wɔye wɔbua mɛi babaoo bɔ ni wɔɔnyɛ ni amɛba lɛ nɔ.—1 Tim. 4:10.
6 Kɛfata ya ni wɔɔya Nuntsɔ lɛ Gbɛkɛnaashi Niyenii lɛ shishi lɛ he lɛ, wɔbaanyɛ wɔwo wɔshiɛmɔ nitsumɔ lɛ mli hewalɛ. Ŋwanejee ko bɛ he akɛ, nyɛmimɛi hii kɛ yei akpei nyɔŋmai abɔ kɛ amɛhe baawo gbɛgbalɔi awamɔ nitsumɔ lɛ mli nyɔŋ kome loo nyɔji babaoo. Kɛjɛ afii enumɔ ni eho lɛ, daa afi lɛ kɛ́ aja mli lɛ wɔnáa gbɛgbalɔi awalɔi 2,990 yɛ Kaimɔ be lɛ mli, kɛjɛ March kɛyashi May. Ani obaanyɛ oto oshihilɛ he gbɛjianɔ koni oná hegbɛ ni yɔɔ gbɛgbalɔi awamɔ nitsumɔ lɛ mli ŋɔɔmɔ afi nɛɛ? Ebaafee gbɛ ni hi ní oootsɔ nɔ ojie hiɛsɔɔ ni oyɔɔ kɛha Nyɔŋmɔ nikeenii ni suɔmɔ yɔɔ mli ni ji Kristo afɔleshaa lɛ kpo. Obaanyɛ ona nɔmimaa akɛ Yehowa baajɔɔ bo, taakɛ niiashikpamɔi ni nyiɛ sɛɛ nɛɛ baatsɔɔ lɛ.
7 Nyɛmi yoo ko ni kɛ be-fɛɛ tsuɔ heloonaa nii lɛ ŋma eniiashikpamɔ yɛ nyɛsɛɛ March gbɛgbalɔi awamɔ nitsumɔ ni ekɛ ehe wo mli lɛ he akɛ: “February 2001 Wɔ Maŋtsɛyeli Sɔɔmɔ lɛ wo mɔ fɛɛ mɔ ní shihilɛ baaŋmɛ lɛ gbɛ lɛ hewalɛ koni ekɛ ehe awo gbɛgbalɔi awamɔ nitsumɔ lɛ mli yɛ Kaimɔ be lɛ mli. Akɛni Hɔɔ enumɔ yɔɔ March mli hewɔ lɛ, enɛ sa migbɛjianɔtoo lɛ jogbaŋŋ. No hewɔ lɛ, mikɛ migbɛbimɔ wolo yaha.” Beni eje nyɔŋ lɛ shishi lɛ, ekɛ oti ko ma ehiɛ akɛ ebaabɔ mɔdɛŋ ni eje shia Biblia mli nikasemɔ shishi. Ani eye omanye? Hɛɛ, kɛ ŋmɛlɛtswai 52 ye odase yɛ nakai nyɔŋ lɛ mli! Te emu naa eha tɛŋŋ? “Kɛ́ wɔbɔ mɔdɛŋ babaoo lɛ, wɔbaaná jɔɔmɔi babaoo.”
8 Kɛ́ weku ko fee ekome ni amɛkɛ amɛhe wo gbɛgbamɔ lɛ mli lɛ, mɛɛ sɛɛnamɔi amɛnaa? Weku ko ni mli bii feɔ ejwɛ ní fee nakai nyɛsɛɛ April lɛ na akɛ eji nyɔŋ ko ni amɛhiɛ kpaŋ nɔ kɔkɔɔkɔ. Nyɛ lɛ kɛɛ akɛ: “Mɛɛ jwɛŋmɔ kpakpa wɔna kɛha gbi fɛɛ gbi nɛkɛ, akɛni wɔfee ekome yɛ shiɛmɔ nitsumɔ lɛ mli lɛ hewɔ! Nibii ni wɔtsu daa gbi yɛ shiɛmɔ nitsumɔ lɛ mli lɛ hesusumɔ ha niyeli be lɛ bafee nɔ ni yɔɔ miishɛɛ waa.” Bi nuu lɛ kɛɛ akɛ: “Miná miishɛɛ akɛ mikɛ Ataa aaatsu nii yɛ shiɛmɔ nitsumɔ lɛ mli yɛ otsi lɛ mli, be mli ni kulɛ ekɛaatsu heloonaa nii lɛ.” Tsɛ lɛ kɛfata he akɛ: “Ákɛ weku yitso lɛ, mitsui nyɔ mimli akɛ mina akɛ wɔfee ekome kɛmiitsu nitsumɔ ni he hiaa fe fɛɛ yɛ wɔbe nɛɛ mli.” Ani oweku lɛ baanyɛ afee ekome kɛfee gbɛgbamɔ? Mɛni hewɔ okɛ weku lɛ egbaaa he sane, ni okwɛ akɛ shiabii lɛ fɛɛ baanyɛ amɛkɛ amɛhe awo gbɛgbalɔi awamɔ nitsumɔ lɛ mli yɛ Kaimɔ be nɛɛ mli?
9 Ani Wɔbaanyɛ Wɔha March Afee Nyɔŋ ni Hi Fe Fɛɛ? Yɛ afi 2002 shishijee mli lɛ, Wɔ Maŋtsɛyeli Sɔɔmɔ lɛ bi sane akɛ: “Ani Wɔbaanyɛ Wɔha April 2000 Afee Nyɔŋ ni Hi Fe Fɛɛ?” Te ahere nɔ aha tɛŋŋ? Aná yifalɛ heei ni fe fɛɛ. Aná gbɛgbalɔi awalɔi ayifalɛ ni fe fɛɛ ni ji 7,117. Kɛfata he lɛ, wɔná yifalɛ ni fe fɛɛ yɛ ŋmɛlɛtswai amli, shiɛlɔi amli, daa gbɛgbalɔi amli, kɛ Biblia mli nikasemɔi amli. Ani okaiɔ miishɛɛ ni mumɔŋ nitsumɔi ni atsu yɛ nakai nyɔŋ krɛdɛɛ lɛ mli lɛ kɛba osafo lɛ mli lɛ? Ani wɔbaanyɛ wɔkɛ nɔ ni wɔnyɛ wɔtsu yɛ nakai afi lɛ mli lɛ aye hegbɔ loo wɔho he po? Kɛ́ wɔ fɛɛ wɔbɔ mɔdɛŋ lɛ, March 2002 baanyɛ afee “Nyɔŋ ni Hi Fe Fɛɛ.” Mɛni hewɔ March?
10 Wɔyɛ yiŋtoi enyɔ hewɔ ni esa akɛ March afee nyɔŋ krɛdɛɛ kɛha nitsumɔ lɛ. Klɛŋklɛŋ lɛ, abaafee Kaimɔ lɛ yɛ March naagbee gbɛ, ni ebaaha wɔna hegbɛ mra yɛ nyɔŋ lɛ mli koni wɔkɛfɔ̃ mɛi babaoo nine bɔ ni wɔɔnyɛ kɛba shishi. Nɔ ni ji enyɔ lɛ, afi nɛɛ March hiɛ otsii anaagbee enumɔ, ni ebaaha efee mlɛo kɛha mɛi ni tsuɔ heloonaa nii kɛ mɛi ni yaa skul lɛ akɛ amɛaatsu gbɛgbalɔi awamɔ nitsumɔ lɛ. Mɛni hewɔ otaaa shi bianɛ, ni oto gbɛjianɔ ni obaanyɛ otsu he nii, ni okɛ kalanda ni akɛha yɛ nɔ ni hɔ mli lɛ nɛɛ mli lɛ atsu nii? Gbɛgbalɔi awamɔ nitsumɔ lɛ baanyɛ afee nɔ ni yɔɔ mlɛo fe bɔ ni osusuɔ. Ákɛ nɔkwɛmɔnɔ lɛ, kɛ́ oto ŋmɛlɛtswai 8 yɛ shiɛmɔ nitsumɔ lɛ mli daa gbi yɛ otsii anaagbee enumɔ lɛ mli lɛ he gbɛjianɔ lɛ, ehe baahia ni oto ŋmɛlɛtswai 10 he gbɛjianɔ kroko ofata he yɛ nyɔŋ lɛ mli gbii ni eshwɛ lɛ mli koni oshɛ ŋmɛlɛtswai 50 ni ataoɔ lɛ he.
11 Mɛni onukpai lɛ baanyɛ afee koni amɛye amɛbua mɛi fɛɛ ni yɔɔ asafo lɛ mli lɛ koni ‘amɛshiɛ Nyɔŋmɔ wiemɔ lɛ kɛmɔ shi’? Nyɛtsɔa kpeei mli nibii ni afeɔ kɛ sane ni nyɛgbaa lɛ nɔ nyɛtswaa miishɛɛ nyɛmaa shi. Asafo Woloŋ Nikasemɔ nɔkwɛlɔi kɛ amɛsɛɛkwɛlɔi lɛ baanyɛ aŋɔ hegbɛ lɛ koni amɛkɛ mɔ fɛɛ mɔ ni yɔɔ amɛkuu lɛ mli lɛ agba sane ni amɛye amɛbua lɛ. Hewalɛwoo wiemɔi fioo loo ŋaawoo ni anyɛɔ atsuɔ he nii lɛ baanyɛ afee nɔ pɛ ni he hiaa. (Abɛi 25:11) Mɛi babaoo baana akɛ kɛ́ amɛfee tsakemɔi fioo ko yɛ amɛgbɛjianɔtoo mli lɛ, amɛbaanyɛ amɛná miishɛɛ ni yɔɔ hegbɛ akɛ aaasɔmɔ akɛ gbɛgbalɔi awalɔ lɛ mli. Yɛ asafoi babaoo mli, kɛ́ jeee fɛɛ mli po lɛ, onukpai kɛ asafoŋ sɔɔlɔi kɛ amɛŋamɛi feɔ nɔkwɛmɔnɔ kpakpa amɛfɔɔ shi kɛtsɔ gbɛgbalɔi awamɔ nitsumɔ lɛ ni amɛkɛ amɛhe woɔ mli kutuu yɛ Kaimɔ be lɛ mli lɛ nɔ. Enɛ eye ebua shiɛlɔi babaoo ni amɛbafata amɛhe. Yɛ gbɔmɔtsoŋ gbɔjɔmɔi komɛi loo shihilɛi krokomɛi ahewɔ lɛ, shiɛlɔi komɛi nyɛŋ amɛkɛ amɛhe awo gbɛgbamɔ nitsumɔ lɛ mli, shi abaanyɛ awo amɛ hewalɛ koni amɛjie hiɛsɔɔ ni amɛyɔɔ lɛ kpo kɛtsɔ mɔdɛŋ ní amɛaabɔ akɛ amɛaafata mɛi ni eshwɛ yɛ asafo lɛ mli lɛ ahe kɛtsu bɔ fɛɛ bɔ ni amɛaanyɛ yɛ shiɛmɔ nitsumɔ lɛ mli lɛ nɔ.
12 Omanyeyeli damɔ gbɛjianɔtoo kpakpa ni onukpai lɛ baato lɛ nɔ. Esa akɛ ato shiɛmɔ he gbɛjianɔ yɛ be ni baahi yɛ otsi lɛ mli fɛɛ. Kɛ́ eeehi lɛ, shiɛmɔ nɔkwɛlɔ lɛ baatsɔ hiɛ ni ekɛ nitsumɔ awo nyɛmimɛi hii ni he esa lɛ adɛŋ koni amɛkwɛ kpee kɛha shiɛmɔyaa fɛɛ nɔ. Ebaabi ni ato gbɛjianɔ ojogbaŋŋ bɔni afee ni akaye fe minitii 10 kɛyashi 15, ni kui lɛ ahe gbɛjianɔtoo, shikpɔŋkuku lɛ jaa, kɛ sɔlemɔ fata he. (Kwɛmɔ Sanebimɔ He ni yɔɔ September 2001 Wɔ Maŋtsɛyeli Sɔɔmɔ lɛ mli.) Esa akɛ agbála shiɛmɔ he gbɛjianɔtoo kɛha nyɔŋ lɛ mli faŋŋ atsɔɔ asafo lɛ koni akɛkpɛtɛ adafitswaa tao lɛ nɔ.
13 Esa akɛ ana shikpɔŋkuku ni da bɔ ni sa. Esa akɛ shiɛmɔ nɔkwɛlɔ lɛ kɛ nyɛmi nuu ni kwɛɔ shikpɔŋkukuji lɛ anɔ lɛ akpe koni amɛto gbɛjianɔ ni atsu nii yɛ he ni afɔɔɔ mli nitsumɔ lɛ. Esa akɛ ama mɛi ni bɛ shia ni aaatsu amɛhe nii, gbɛjegbɛi anɔ odaseyeli kɛ shwapo kɛ shwapo, kɛ gbɛkɛnaashi odaseyeli nɔ mi. Yɛ hei ni sa lɛ, abaanyɛ aye abua shiɛlɔi komɛi koni amɛye odase yɛ tɛlifoŋ nɔ.
14 Ye Obua Amɛ ni Amɛsɔmɔ Ekoŋŋ: Ani mɔ ko ni yɔɔ nyɛ asafo lɛ shikpɔŋkuku lɛ mli lɛ bɛ ekãa yɛ sanekpakpa shiɛmɔ lɛ mli dɔŋŋ? Nakai gbɔmɛi lɛ kã he amɛji asafo lɛ fã ni yelikɛbuamɔ he miihia amɛ. (Lala 119:176) Akɛni jeŋ momo nɛɛ naagbee ebɛŋkɛ kpaakpa, ni jeŋ hee lɛ kã wɔhiɛ hewɔ lɛ, wɔyɛ yiŋtoo kpakpa ni wɔɔdamɔ nɔ wɔbɔ mɔdɛŋ waa koni wɔye wɔbua mɛi ni efee kpɔkee lɛ. (Rom. 13:11, 12) Yɛ afii enumɔ ni eho lɛ mli lɛ, daa afi lɛ gbɔmɛi ni fa fe 570 kpɛlɛɔ yelikɛbuamɔ lɛ nɔ ni ámɛnáa ekãa ekoŋŋ. Mɛni wɔbaanyɛ wɔfee koni wɔye wɔbua mɛi babaoo lolo ni amɛkanya suɔmɔ kɛ hekɛnɔfɔɔ ni amɛyɔɔ tsutsu ko lɛ ekoŋŋ?—Heb. 3:12-14.
15 Onukpai akuu lɛ baasumɔ ni amɛsusu bɔ ni amɛaafee ni amɛye amɛbua mɛi ni efee kpɔkee yɛ afii fioo ni eho lɛ mli lɛ ahe. (Mat. 18:12-14) Esa akɛ woloŋmalɔ lɛ akwɛ “Congregation’s Publisher Record” woji lɛ amli koni ekadi mɛi fɛɛ ni efee kpɔkee lɛ. Esa akɛ atsɔ nyɛmimɛi asaramɔ nitsumɔ lɛ nɔ ni abɔ mɔdɛŋ waa koni ato gbɛjianɔ ni akɛye abua amɛ. Onukpa ko baanyɛ aya shiɛlɔ ko ŋɔɔ akɛni ele lɛ kɛtsɔ hiɛ ni ekɛ lɛ bɔɔ lɛ hewɔ, loo abaanyɛ aha shiɛlɔi krokomɛi aye abua. Ekolɛ, shiɛlɔi lɛ kɛ mɔ ni efee kpɔkee lɛ kase nii ni ebaasumɔ ni ekpɛlɛ hegbɛ ni egbele akɛ akɛ yelikɛbuamɔ ni he hiaa yɛ hiamɔ be lɛ mli lɛ aha lɛ nɔ. Hiɛnɔkamɔ yɛ akɛ, no baatsirɛ mɛi babaoo ni efee kpɔkee lɛ koni amɛje Nyɔŋmɔ wiemɔ lɛ shiɛmɔ shishi ekoŋŋ. Kɛ́ amɛsa lɛ, be ko bɛ ni sa ni amɛkɛaaje shishi fe yɛ Kaimɔ be lɛ mli!—Kɛha emlitsɔɔmɔ fitsofitso lɛ, kwɛmɔ Sanebimɔ He ni yɔɔ November 2000 Wɔ Maŋtsɛyeli Sɔɔmɔ lɛ mli.
16 Ani Mɛi Krokomɛi Ahe Esa ni Amɛaashiɛ? Yehowa yaa nɔ ejɔɔ ewebii lɛ kɛtsɔ “jeŋmaji lɛ fɛɛ anii ni jara wa” lɛ ní ekɛbaa lɛ nɔ. (Hag. 2:7) Daa afi lɛ, mɛi akpei abɔ he saa akɛ shiɛlɔi ni abaptisiko amɛ. Namɛi ni? Yehowa Odasefoi abii kɛ agbɛnɛ hu Biblia mli nikaselɔi. Te wɔfeɔ tɛŋŋ wɔleɔ kɛ́ amɛhe esa akɛ sanekpakpa lɛ he shiɛlɔi?
17 Yehowa Odasefoi Abii: Gbekɛbii babaoo efata amɛfɔlɔi ahe kɛtee shia kɛ shia afii babaoo, eyɛ mli akɛ amɛbɔiko sɔɔmɔ akɛ shiɛlɔi ni abaptisiko amɛ. Ekolɛ, March baanyɛ afee be kpakpa ni abaanyɛ aha amɛje shishi. Te ooofee tɛŋŋ ole kɛji obi lɛ he esa lɛ? Organized to Accomplish Our Ministry wolo lɛ baafa 100 lɛ kɛɔ akɛ, “kɛ́ gbekɛ ko feɔ nɔkwɛmɔnɔ kpakpa yɛ ejeŋba gbɛfaŋ ni enyɛɔ ejajeɔ ehemɔkɛyeli lɛ etsɔɔ kɛtsɔ mɛi krokomɛi ni eshiɛɔ sanekpakpa lɛ etsɔɔ amɛ lɛ nɔ, ní etsui tsirɛɔ lɛ ni efeɔ nakai lɛ.” Kɛ́ onuɔ he akɛ obi lɛ he esa lɛ, no lɛ okɛ onukpai ni yɔɔ Asafoŋ Sɔɔmɔ Ajinafoi Akuu lɛ mli lɛ ateŋ mɔ kome agba he sane.
18 Biblia Mli Nikaselɔi ni He Esa: Be ni Biblia mli nikaselɔ ko ena nilee, ni etee kpeei be saŋŋ lɛ, ekolɛ ebaasumɔ ni ebatsɔ Maŋtsɛyeli shiɛlɔ. Kɛ́ okɛ nikaselɔ ko ni tamɔ nɛkɛ kaseɔ nii lɛ, susumɔ sanebimɔi nɛɛ ahe: Ani eeya ehiɛ, bɔ ni ekɛ afii abɔ ni eye kɛ enyɛmɔ kpãa gbee? Ani eje shishi eegba mɛi krokomɛi ehemɔkɛyeli he sane? Ani ‘eewo gbɔmɔ hee’ lɛ? (Kol. 3:10) Ani eshɛɔ taomɔ nii kɛha shiɛlɔi ni abaptisiko amɛ, ni atsĩ tã yɛ Our Ministry wolo lɛ mli yɛ baafai 97-99 lɛ ahe? Kɛ́ nakai ni lɛ, no lɛ esa akɛ oya Asafoŋ Sɔɔmɔ Ajinafoi Akuu lɛ ŋɔɔ bɔni afee ni ato gbɛjianɔ koni onukpai enyɔ kɛ bo kɛ nikaselɔ lɛ akpe. Kɛ́ ehe esa lɛ, onukpai enyɔ lɛ baakɛɛ lɛ akɛ ebaanyɛ ekɛ ehe awo maŋ shiɛmɔ nitsumɔ lɛ mli.
19 Ni April kɛ May Hu? Enɛɛmɛi hu baafee nyɔji krɛdɛɛ kɛha nitsumɔ babaoo yɛ shiɛmɔ nitsumɔ lɛ mli. Mɛi babaoo ni kɛ amɛhe wo gbɛgbalɔi awamɔ nitsumɔ lɛ mli yɛ March lɛ baanyɛ afee nakai ekoŋŋ yɛ April kɛ/loo May mli. Yɛ April kɛ May mli lɛ, wɔbaagbala wɔjwɛŋmɔ titri kɛba Buu-Mɔɔ kɛ Awake! woji tɛtrɛbii ajaa nɔ yɛ shiɛmɔ nitsumɔ lɛ mli. Kwɛ bɔ ni ehe eba sɛɛnamɔ yɛ mɛi ni kaneɔ lɛ ashihilɛ mli! Nɛkɛ woji tɛtrɛbii nɛɛ etsu gbɛfaŋ nɔ ko ni he hiaa waa he nii ni eha ana shweremɔ babaoo yɛ jeŋ fɛɛ. Abaabɔ mɔdɛŋ waa yɛ April kɛ May mli koni akɛ woji tɛtrɛbii lɛ aha gbɔmɛi babaoo bɔ ni aaanyɛ. Too gbɛjianɔ bianɛ koni okɛ ohe awo mli kɛmɔ shi.
20 Yɛ shiɛmɔ nitsumɔ babaoo he gbɛjianɔ ni ato lɛ hewɔ lɛ, ani ehe miihia ni oha woji tɛtrɛbii ni onine shɛɔ nɔ kɛtsɔ asafo lɛ nɔ lɛ afa? Yɛ sɔɔmɔ afi lɛ mli fɛɛ lɛ, wɔkɛ Buu-Mɔɔ kɛ Awake! lɛ tsu nii daa Hɔɔ, ni ji wɔgbi ni wɔto akɛ Woji Tɛtrɛbii Ajaa Gbi lɛ. Shi kɛlɛ, akɛni mɛi babaoo kɛ amɛhe baawo gbɛgbalɔi awamɔ nitsumɔ lɛ mli, ni wɔ fɛɛ wɔkɛ woji tɛtrɛbii lɛ baatsu nii nyɔji enyɔ lɛ fɛɛ hewɔ lɛ, ebaahi akɛ oha owoji tɛtrɛbii ni onine shɛɔ nɔ yɛ asafo lɛ mli lɛ afa. Kɛ́ nakai ni lɛ, ofainɛ, ha sɔɔlɔ ni kwɛɔ woji tɛtrɛbii anɔ yɛ osafo lɛ mli lɛ ale amrɔ nɔŋŋ. Nakai beaŋ nɔŋŋ lɛ, esa akɛ sɔɔlɔ ni kwɛɔ woji wuji anɔ lɛ akwɛ akɛ dɛhiɛmɔ wolo ni ji Ani Obaasumɔ ni Ole Biblia lɛ Mli Saji Babaoo? lɛ abɔ ni fa yɛ ni mɔ fɛɛ mɔ kɛbaatsu nii.
21 Mɛi babaoo etsɔɔ akɛ amɛná nɔ ni akɛwo Wɔ Maŋtsɛyeli Sɔɔmɔ lɛ mli, ni eyitso ji “Nɔ ni Esa akɛ Owie yɛ Woji Tɛtrɛbii lɛ Ahe” lɛ he miishɛɛ. Ani okɛ nɛkɛ gbɛjianɔtoo nɛɛ miitsu nii kɛtsɔ kasemɔ ni oookase woji tɛtrɛbii kɛhamɔ he nɔkwɛmɔnɔ lɛ nɔ? Mɛni hewɔ okɛ oweku lɛ Biblia mli nikasemɔ be lɛ fã ko tsuuu nii ni nyɛkɛ kase shiɛmɔ wiemɔi nɛɛ?
22 Okɛ Kaimɔ Be Nɛɛ Atsu Nii Jogbaŋŋ Kɛmɔ Shi: Taakɛ bɔfo Paulo ji lɛ, nyɛhaa wɔtsɔɔa Yehowa bɔ ni wɔhiɛ sɔɔ ‘eduromɔ ni yɔɔ wɔnɔ kɛteke nɔ lɛ’ kɛtsɔ wɔhe ni wɔkɛaawo mumɔŋ nitsumɔ ni ato he gbɛjianɔ kɛha Kaimɔ be nɛɛ mli lɛ nɔ kɛmɔ shi. Nɔ ni fata enɛɛmɛi ahe ji (1) ni wɔɔya nifeemɔ ni he hiaa fe fɛɛ afi nɛɛ, ni ji Nuntsɔ lɛ Gbɛkɛnaashi Niyenii lɛ shishi Soo, March 28, 2002; (2) ni wɔɔye wɔbua mɛi ni efee kpɔkee lɛ koni amɛkanya ‘amɛ klɛŋklɛŋ suɔmɔ lɛ’ (Kpoj. 2:4; Rom. 12:11); (3) ni wɔɔye wɔbua wɔbii kɛ Biblia mli nikaselɔi fɛɛ ni he esa akɛ amɛaatsɔmɔ shiɛlɔi ni abaptisiko amɛ lɛ; kɛ (4) ni wɔkɛ wɔhe awo sanekpakpa shiɛmɔ nitsumɔ lɛ mli kɛmɔ shi bɔ ni wɔɔnyɛ, ní wɔtsu gbɛgbalɔi awamɔ nitsumɔ lɛ yɛ March kɛ no sɛɛ po.—2 Tim. 4:5.
23 Wɔsɔlemɔ kɛ hiɛdɔɔ ji akɛ, wɔ fɛɛ wɔkɛ wɔhe baawo Maŋtsɛyeli lɛ he sanekpakpa shiɛmɔ nitsumɔ lɛ mli kɛmɔ shi yɛ Kaimɔ be nɛɛ mli, koni wɔkɛtsɔɔ bɔ ni hiɛsɔɔ ni wɔyɔɔ kɛha nɔ fɛɛ nɔ ni Yehowa efee eha wɔ lɛ mli kwɔ ha.
[Caption on page 6]
Aŋkro Shiɛmɔ He Gbɛjianɔtoo Kɛha March 2002
Hɔgbaa Ju Jufɔ Shɔ Soo Sohaa Hɔɔ
1 2
Woji Tɛtrɛbii Ajaa Gbi
3 4 5 6 7 8 9
Woji Tɛtrɛbii Ajaa Gbi
10 11 12 13 14 15 16
Woji Tɛtrɛbii Ajaa Gbi
17 18 19 20 21 22 23
Woji Tɛtrɛbii Ajaa Gbi
24 25 26 27 28 29 30
KAIMƆ LƐ Woji Tɛtrɛbii Ajaa Gbi
BENI HULU
31 ENYƆ SHI SƐƐ
Ani obaanyɛ oto gbɛjianɔ koni oná ŋmɛlɛtswai 50 kɛha gbɛgbalɔi awalɔ feemɔ yɛ March?