Ye Obua Obii Iɛ Ni Amɛbɛŋkɛ Nyɔŋmɔ He Kpaakpo

BIBLIA ŋmalɔi kɛ wiemɔi komekomei ni shɛɛɛ akpe tsɔɔ Yesu shihilɛ yɛ klɛŋklɛŋ afii 30 lɛ mli lɛ mli. Shi amɛkɛ wiemɔi akpei nyɔŋmai abɔ tsɔɔ enaagbee afii etɛ kɛ fa lɛ mli. Nɔ hewɔ lɛ ji akɛ, Yesu Kristo maŋ sɔɔmɔ nitsumɔ lɛ​—jeee efɔmɔ, egbekɛbiiashi aloo be ni eji obalanyo fioo lɛ​—ji sane titri ni Sanekpakpai lɛ wieɔ he. Shi kɛlɛ, bɔ ni Biblia lɛ wie Yesu gbekɛbiiashi afii lɛ ahe kuku lɛ haa efeɔ faŋŋ akɛ gbekɛbii po baanyɛ abɛŋkɛ Nyɔŋmɔ he kpaakpa.

Kɛ wɔgbele wɔ Biblia kɛtee Luka sane lɛ yitso 2 lɛ, wɔnaa Yesu ni eye afii 12 lɛ ni “eta shi yɛ [Nyɔŋmɔ mla lɛ] tsɔɔlɔi lɛ ateŋ.” “Eebo amɛ toi ni eebibii amɛ nii,” ni ehe hu miifee amɛ naakpɛɛ “yɛ enilee kɛ ehetooi ni ehaa lɛ ahewɔ.” (Luka 2:​46, 47) Agbɛnɛ hu wɔkaneɔ akɛ eda yɛ gbɔmɔtsoŋ ni etee hiɛ yɛ nilee kɛ shishinumɔ mli.​—Luka 2:​40, 52.

Te wɔɔfee tɛŋŋ wɔtsɔɔ bɔ ni fee ni Yesu jwɛŋmɔ tee mumɔŋ nibii anɔ nɛkɛ lɛ mli? Kɛ hoo lɛ, akɛ yijiemɔ lɛ eko baaha efɔlɔi lɛ. Yudafoi lɛ yɛ gbɛnaa nii ashishi akɛ amɛnyiɛ Yehowa ŋaawoo yɛ bii atsɔsemɔ he lɛ sɛɛ. Nyɔŋmɔ gbalɔ Mose ekɛɛ akɛ: “Ni nɛkɛ wiemɔi nɛɛ ni miwoɔo he kita ŋmɛnɛ gbi nɛɛ aka otsui nɔ, ni ojwɛŋ nɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni oka shi, kɛ beni ote shi.” (5 Mose 6:​6, 7) Eka shi faŋŋ akɛ Nyɔŋmɔ kwɛ koni afɔ e-Bi lɛ yɛ weku ni baatsu ŋaawoo nɛɛ he nii lɛ mli. Esa akɛ fɔlɔi ni yɔɔ ŋmɛnɛ lɛ ajie miishɛɛ ni tamɔ nɛkɛ nɔŋŋ kpo yɛ amɛbii ahe. Ani ooye oobua amɛ ni amɛle Yehowa, ni amɛsumɔ akɛ amɛaasɔmɔ lɛ?

“Kɛjɛ Gbekɛbiiashi”

Mumɔŋ tsɔsemɔ jeee nii ni abaatsi ato sɛɛ kɛyashi be mli ni gbekɛbii aaadara da. Akɛ nɔkwɛmɔ nɔ lɛ, Timoteo da ni ebatsɔ Kristofonyo ni ekaaa. Atsɔse lɛ yɛ Ŋmalɛi Krɔŋkrɔŋi lɛ amli “kɛjɛ gbekɛbiiashi.” (2 Timoteo 3:​15, NW) Yɛ enɛ kɛ gbeekpamɔ naa lɛ, anaa ni yeifɔyei komɛi miisɔle kɛmiibi Yehowa dɛŋ jɔɔmɔ yɛ faŋŋ mli dani amɛha amɛbii lɛ fufɔ. Ŋwanejee ko kwraa bɛ he akɛ etsɛŋ ni fufɔobii nɛɛ aaakɛɛ akɛ “amen” yɛ sɔlemɔi ni tamɔ nɛkɛ sɛɛ! Enɛ ji gbɛ bibioo ko ni atsɔɔ nɔ ayeɔ abuaa amɛ koni amɛna hiɛsɔɔ amɛha mumɔŋ nibii kɛ heloo gbɛfaŋ nikee fɛɛ ni amɛnine shɛɔ nɔ kɛjɛɔ Nyɔŋmɔ ŋɔɔ lɛ.

Michael kɛ Sephorah (ni amɛye afii kpawo kɛ afii kpaanyɔ) jie nɔ ni jɛɔ fɔlɔi atsɔsemɔ kpakpa mli baa lɛ kpo. Gbi ko lɛ, amɛkɛ amɛfɔlɔi fa gbɛ, ni amɛŋɔ hegbɛ lɛ akɛ amɛaabi Nyɔŋmɔ kɛha gbɛtsɔɔmɔ kɛ hebuu yɛ sɔlemɔ mli. Beni amɛyashɛ lɛ, gbekɛbii lɛ kai ni amɛda Yehowa shi akɛ eha amɛshɛ shweshweeshwe.

Christian kɛ Eric (ni amɛye afii etɛ kɛ afii ekpaa) kɛ amɛfɔlɔi je kpo ni amɛaajie amɛhiɛtserɛ yɛ abɔɔ ko mli. Taakɛ ehaa gbekɛbii bibii anɔ lɛ, amɛlaaje. Mɛɛ be mli amɛfɔlɔi na amɛ? Yɛ be mli ni gbekɛbii hii nɛɛ esɔle koni Yehowa aye abua amɛ lɛ sɛɛ pɛ.

Abaanyɛ atsɔ gbɛi sɔrɔtoi anɔ atsɔse gbekɛbii yɛ omanyeyeli mli be mli ni amɛdarako kwraa. Afee kpee wulu ko yɛ Belgium ni akɛ Gino ni no mli lɛ eye afii etɛ pɛ lɛ tee wielɔi akpoku lɛ nɔ, ni akɛ lɛ ta sɛi ko ni kwɔ gojoo nɔ. Wielɔ lɛ kɛɛ lɛ akɛ eti Biblia mli woji 66 lɛ fɛɛ mli etsɔɔ. Ani obaanyɛ ofee? Ojogbaŋŋ, Gino baanyɛ afee! Etee nɔ eda yɛ efɔlɔi atsɔsemɔ shishi ni ŋmɛnɛ, eesɔmɔ akɛ Yehowa Odasefoi anɔkwɛlɔ gbɛfalɔ. Eyɛ mli akɛ jeee gbekɛbii fɛɛ yɔɔ nakai nyɛmɔ lɛ nɔŋŋ yɛ nikasemɔ mli moŋ, shi enɛ tsɔɔ sɛɛnamɔ ni yɔɔ mumɔŋ tsɔsemɔ ni akɛaaha amɛ lɛ he.

Gbekɛbii po baanyɛ anu Biblia mli tsɔɔmɔi ashishi. Skul ko yɛ Grand Duchy yɛ Luxembourg, ni akwɛɔ gbekɛbii yɛ jɛmɛ, ni Kai ni eye afii ejwɛ lɛ kpoo akɛ ekɛ gbekɛbii krokomɛi lɛ aaasɔle. Beni abi lɛ nɔ hewɔ lɛ, eha hetoo akɛ: “Wɔheee nyɔŋmɔ ni yɔɔ koji etɛ wɔyeee!” Eyɛ mli akɛ jwɛŋmɔ ni Kai hiɛ yɛ Katolek nyɔŋmɔi etɛ ni feɔ ekome lɛ he lɛ ejaaa kɛmɔɔɔ shi moŋ, shi ele jogbaŋŋ akɛ esaaa akɛ esɔleɔ ehaa nɔ ko ni tamɔ nɛkɛ!​—Marko 12:⁠29.

Nyɔŋmɔ Ni Ooofee Lɛ Amɛshihilɛ Lɛ Fa

Gbekɛbii kɛ naagbai kpeɔ yɛ bei komɛi amli. Ní amɛ pɛ amɛaahao yɛ enɛ he lɛ, esa akɛ amɛha amɛfɔlɔi ale, ni esa akɛ awo gbekɛbii lɛ ahewalɛ ni ‘amɛshɛ amɛjatsu amɛfɔ Yehowa nɔ.’ (Lala 55:23) Abaanyɛ aye abua amɛ ni amɛle akɛ Yehowa ekuŋ ehiɛ eshwieŋ amɛ nibimɔi lɛ anɔ, ejaakɛ e-Bi Yesu Kristo kɛɛ: “Nyɛhaa gbekɛbii lɛ abaa miŋɔɔ, ni nyɛkatsia amɛ gbɛ.” (Marko 10:14) Esa akɛ atsɔɔ gbekɛbii ni amɛsɔle amɛha Nyɔŋmɔ kɛtsɔ Yesu Kristo nɔ.​—Yohane 14:⁠6.

Kɛ gbekɛbii kase bɔ ni amɛaafee ni amɛkɛ amɛhe afɔ Yehowa nɔ kɛha yelikɛbuamɔ ni amɛna nɔ ni jɛɔ mli baa yɛ nakai feemɔ mli lɛ, enɛ saa amɛhemɔkɛyeli he yɛ naakpɛɛ gbɛ nɔ. Jacquy, ni ji obalanyo ko ni miisɔmɔ bianɛ yɛ Buu Mɔɔ Asafo lɛ nitsumɔ he niji lɛ ekome mli lɛ gba niiashikpamɔ ko ni ba yɛ be mli ni eye afii 14 lɛ: “Yɛ nakai afi lɛ mli lɛ, wɔbaaya kpokpaa nɔ kpee yɛ otsi lɛ naagbee dani wɔbaafee wɔnaagbee kaa lɛ. Shi naagba lɛ ji akɛ, wɔtsɔɔlɔ lɛ kɛ nibii ni wɔbaakase ni wɔti mli lɛ haaa wɔ aahu kɛyashi Sohaa. Yɛ be mli ni mikɛ mifɔlɔi esusu sane lɛ he lɛ, wɔto wɔyiŋ akɛ esaaa akɛ kpokpaa nɔ kpee lɛ jeɔ misɛɛ, eyɛ mli akɛ no tsɔɔ akɛ be fioo ko pɛ maná ni mikɛkase nii. [Hebribii 10:​24, 25] Misɔle miha Yehowa koni eye ebua mi ni manyɛ masaa mihe jogbaŋŋ bɔ ni sa kɛha kaai lɛ.

Kɛkɛ ni Ju leebi shɛ, ni nikaselɔi lɛ fɛɛ he miikpokpo ejaakɛ enɛ ji klɛŋklɛŋ be mli ni akɛ naabu baaha kaai ahetoo. Misɔle ekoŋŋ miha Yehowa koni eye ebua mi. Mɛni jɛ mli ba? Mi ji mɔ ni ho nikaselɔi lɛ fɛɛ he yɛ kaa ni afee yɛ nakai gbi lɛ nɔ lɛ mli. Tsɔɔlɔi ni kaa wɔ lɛ ateŋ mɔ kome bi sane, ni etee nɔ ekɛɛ akɛ, ‘miitao male he ni ebaanyɛ eya kɛyashɛ.’ Ni kɛlɛ minyɛ miha esanebimɔi lɛ fɛɛ hetoo.”

Mɛni ji nɔ ni Jacquy kase kɛjɛ nɔ kpakpa ni jɛ mli ba nɛɛ mli? “Yehowa yelikɛbuamɔ ni miná lɛ ha mibɛŋkɛ lɛ kpaakpa. Mikase akɛ esaaa akɛ wɔhaoɔ wɔhe yɛ nɔ ko he, shi yɛ nɔ fɛɛ nɔ mli lɛ esa akɛ wɔtsɔ wɔhe kɛya Yehowa Nyɔŋmɔ ŋɔɔ, kɛ sɔlemɔ kɛ faikpamɔ fɛɛ.”​—Filipibii 4:​6, 7.

Hɛɛ, ehe miihia ni wɔye wɔbua wɔbii ni ‘amɛle’ Yehowa, ni amɛfee lɛ amɛ daa gbi shihilɛ lɛ fa. Kɛ amɛyoo akɛ Yehowa kɛ amɛ yɛ yɛ amɛ nifeemɔi amli lɛ, ani enɛ woŋ amɛ hewalɛ ni amɛya nɔ amɛsɔmɔ lɛ yɛ anɔkwayeli mli fe ní amɛaabo ehe nikanemɔ kɛ wiemɔ toi kɛkɛ? Tsɔsemɔ yɛ nɛkɛ gbɛ nɔ lɛ efeŋ mlɛo moŋ, shi gbekɛbii lɛ ahiɛ kpaŋ miishɛɛ kɛ hiɛdɔɔ ni amɛfɔlɔi kɛ Yehowa nilee ni ji mumɔŋ gboshinii lɛ kɛhaa amɛ lɛ nɔ oya. Nakai nɔŋŋ hu Yehowa hiɛ kpaŋ amɛ mɔdɛŋbɔɔ yɛ anɔkwayeli mli lɛ anɔ. (Hebribii 6:​10-12) Eba akɛ wɔ mɛi ni wɔji fɔlɔi lɛ aaatsu nii ni wɔkɛye wɔbua wɔbii lɛ ni amɛnine ashɛ nyɔmɔwoo ni wɔ ŋwɛi Tsɛ lɛ yɔɔ kɛha mɛi ni le lɛ ni ele amɛ lɛ nɔ​—“naanɔ wala.”​—Yohane 17:⁠3.

[Akrabatsa ni yɔɔ baafa 7]

“Nyɛbaa nyɛhe shi nyɛhaa Nyɔŋmɔ; nyɛtea shi nyɛwoa Abonsam, ni eeejo nyɛnaa foi. Nyɛtsia nyɛbɛŋkɛa Nyɔŋmɔ, ni eeetsi ebɛŋkɛnyɛ. Nyɛtsuua nyɛniji ahe, nyɛ eshafeelɔi, ni nyɛhaa nyɛtsuii ahe atsea, nyɛ jwɛŋmɔi enyɔnyɔtsɛmɛi. Nyɛwerɛ ahoa nyɛhe ni nyɛyeɔ ŋkɔmɔ ni nyɛfoa; nyɛŋmlɔ lɛ atsɔ ŋkɔmɔyeli, ni nyɛmiishɛɛ hu atsɔ hiɛshishwiemɔ. Nyɛbaa nyɛhe shi yɛ Nuŋtsɔ lɛ hiɛ, ni eeewo nyɛnɔ.”​—Yakobo 4:​7-10.