Nyɛboa Nyɔŋmɔ Gbalɛ Wiemɔ lɛ Toi!
Petro Wolo ni Ji Enyɔ lɛ Mli Saji Otii
YEHOWA gbalɛ wiemɔ, aloo eshɛɛ sane lɛ tamɔ kane ni tsoɔ yɛ he ko ni ewo duŋ, ni ehe miihia ni anɔkwa Kristofoi abo enɛ toi jogbaŋŋ. Enɛ feemɔ bɛ mlɛo yɛ be mli ni apasa tsɔɔlɔi bɔɔ mɔdɛŋ ni amɛha hemɔkɛyeli kwamɔ ashwere lɛ. Shi abaanyɛ afee nakai yɛ ŋwɛi yelikɛbuamɔ naa. Ni kɛji akɛ wɔɔje Yehowa gbi ni baa kɛ foi lɛ mli lɛ, belɛ esa akɛ wɔkɛ wɔhe akpɛtɛ Nyɔŋmɔ wiemɔ lɛ he gbagbalii.
Bɔfo Petro wolo ni ji enyɔ ni jɛ mumɔŋ lɛ baaye abua wɔ ni wɔbo Nyɔŋmɔ gbalɛ wiemɔ lɛ toi. Ekolɛ Petro ŋma ewolo lɛ kɛjɛ Babilon aaafee afi 64 Ŋ.B. Efi Nyɔŋmɔ anɔkwale lɛ sɛɛ yɛ ewolo lɛ mli ni ebɔ nanemɛi heyelilɔi lɛ kɔkɔ yɛ Yehowa gbi ni baaba tamɔ julɔ lɛ he, ni eye ebua mɛi ni kaneɔ ewolo lɛ koni mlakwalɔi lɛ atɔmɔi lɛ akagbala amɛ kɛmiiya. Akɛni Yehowa gbi lɛ miibɛŋkɛ wɔ nɔ hewɔ lɛ, Petro wiemɔi ni jɛ mumɔŋ lɛ he baaba sɛɛnamɔ babaoo aha wɔ.
Okɛ Ohe Afɔ Gbalɛ Wiemɔ lɛ Nɔ
Akɛ Kristofoi lɛ, ehe miihia ni wɔmia wɔhiɛ waa ni wɔjie Nyɔŋmɔ gbeyeishemɔ sui akpo ni wɔbo gbalɛ wiemɔ lɛ toi. ((2Pe 1:1-21) Bɔni afee ni wɔkwa mɛi ni eyaaa shiɛmɔ loo mɛi ni wooo yibii ni wɔɔfee lɛ, ehe miihia ni wɔkɛ ‘jeŋba kpakpa, nilee, henɔyeli, tsuishiŋmɛɛ, Nyɔŋmɔjamɔ hetuukɛhamɔ, nyɛmimɛi ahedɔɔ kɛ suɔmɔ’ afata wɔhemɔkɛyeli lɛ he. Beni Petro na bɔ ni atsake Kristo, ni enu ni Nyɔŋmɔ miiwie Kristo he yɛ nakai be lɛ mli lɛ, ama gbalɛ wiemɔ lɛ nɔ mi babaoo. (Marko 9:1-8) Ehe miihia ni wɔbo nakai wiemɔ ni ajɛ ŋwɛi aŋma lɛ toi.
Kwɛmɔ Ohe Jogbaŋŋ yɛ Hemɔkɛyeli Kwalɔi Ahe
Kɛ wɔbo Nyɔŋmɔ gbalɛ wiemɔ lɛ toi jogbaŋŋ lɛ, wɔbaabu wɔhe kɛjɛ hemɔkeyeli kwalɔi kɛ aŋkroaŋkroi ni efite lɛ ahe. (2:1-22) Petro bɔ kɔkɔ akɛ apasa tsɔɔlɔi baaba asafo lɛ mli nigii. Kɛlɛ Yehowa kɛ fɔbuu kojomɔ baaba nɛkɛ hemɔkɛyeli kwalɔi nɛɛ anɔ, taakɛ ekojo ŋwɛibɔfoi toigbolɔi lɛ, Noa gbii lɛ amli gbɔmɛi ni kwa Nyɔŋmɔ lɛ, kɛ Sodom kɛ Gomora maŋtiasei lɛ. Apasa tsɔɔlɔi lɛ hiɔ hegbɛ ni Nyɔŋmɔ kɛha lɛ, ni amɛlakaa mɛi ni egbɔjɔ lɛ ni amɛbafata amɛhe yɛ amɛ nɔ fɔŋ feemɔ lɛ mli. Faŋ nɔ ni hemɔkɛyeli kwalɔi lɛ “naaa amɛle jalɛ gbɛ lɛ, fe nɔ ni amɛle, ni kɛlɛ amɛkpale kɛje kita krɔŋkrɔŋ ni atuu awo amɛdɛŋ lɛ he.’
Yehowa Gbi lɛ Miiba!
Akɛ mɛi ni boɔ gbalɛ wiemɔ lɛ toi yɛ naagbee gbii nɛɛ amli lɛ, wɔkaŋmɛ gbɛ ni hefɛoyelɔi ni yeɔ ba ni Yesu eba lɛ he fɛo lɛ miina wɔnɔ hewalɛ. (3:1-18) Amɛhiɛ ekpa nɔ akɛ Nyɔŋmɔ ni eto eyiŋ akɛ ebaakpata nibii agbɛjianɔtoo nɛɛ hiɛ lɛ kpata jeŋ ni tsɔ Nu Afua lɛ hiɛ lɛ hiɛ. Esaaa akɛ asusuɔ Yehowa tsuishitoo lɛ he akɛ eyɛ shɔɔ, ejaakɛ eesumɔ ni gbɔmɛi atsake amɛtsui. Abaakpata gbɛjianɔtoo nɛɛ hiɛ yɛ “Yehowa gbi” lɛ nɔ, ni akɛ ‘ŋwɛi hee kɛ shikpɔŋ hee ni jalɛ hiɔ mli’ baato najiaŋ. No hewɔ lɛ esa akɛ wɔfee bɔ fɛɛ bɔ ni wɔɔnyɛ ni ‘ana wɔ akɛ mɛi ni muji loo kpa ko bɛ amɛhe yɛ hejɔlɛ mli.’ Ni wɔɔha apasai tsɔɔlɔi alaka wɔ moŋ lɛ, nyɛhaa wɔdaa yɛ Yesu Kristo he nilee mli.
Nyɛhaa wɔkɛ Petro wiemɔi lɛ atoɔ wɔtsui mli. Nyɛhiɛ akajea nyɛhe nɔ yɛ apasa tsɔɔlɔi lɛ ahewɔ. Nyɛhia shi akɛ mɛi ni hiɛ yɔɔ amɛhe nɔ be fɛɛ be akɛ Yehowa gbi lɛ miiba nɔŋŋ. Ni nyɛboa Nyɔŋmɔ gbalɛ wiemɔ lɛ toi be fɛɛ be.
[Akrabatsa/Mfoniri ni yɔɔ baafa 31]
Ashɛrɛ amɛ Ashwie Tartarus: Yehowa “eŋɔɔɔ bɔfoi ni fee esha lɛ ahe ekeee amɛ, shi moŋ ekɛ duŋ kpii kpai fimɔ amɛ ewo gbohiiaje bu (Tartarus) lɛ mli, ni eŋɔ amɛ akɛ ekɛ amɛ ato aha kojomɔ.”(2 Petro 2:4) Enɛ jeee adesai loo blemasaji amli Tartarus ni afee he mfoniri yɛ Homer Iliad lɛ mli akɛ shikpɔŋ shishi he ko ni awo apasa nyɔŋmɔi bibii ni ji Cronus kɛ Titan mumɔi krokomɛi atsuŋ yɛ lɛ. Biblia mli Tartarus lɛ ji shihilɛ ni eba shi tamɔ gboklɛfoi atsu ni Nyɔŋmɔ shɛrɛ ŋwɛibɔfoi toigbolɔi lɛ ewo jɛmɛ yɛ Noa gbii lɛ amli lɛ. (1 Mose 6:1-8; 1 Petro 3:19, 20; Yuda 6) “Duŋ kpii” lɛ ba yɛ mumɔŋ la ni Nyɔŋmɔ efo amɛ kɛjɛ he akɛ mɛi ni ashwie amɛ kɛjɛ eweku lɛ mli lɛ hewɔ. Akɛ mɛi ni efɔbuu kojomɔ mɛɔ amɛ lɛ, nɔ ni ka amɛhiɛ pɛ ji gbɛkpamɔ ni hiɛnɔkamɔ bɛ mli. Tartarus ji okadi ko ni baatsɔ Satan kɛ edaimonioi lɛ atsuŋwoo lɛ hiɛ dani Kristo Afii Akpe Nɔyeli aje shishi. Amɛ hiɛkpatamɔ lɛ baaba yɛ Kristo Afii Akpe Nɔyeli lɛ sɛɛ.—Mateo 25:41; Kpojiemɔ 20:1-3, 7-10, 14.
[Mfoniri]
Dio shɛrɛ nyɔŋmɔi bibii lɛ ewo adesai amli Tartarus
[He ni Sane lɛ Jɛ]
National Archaeological Museum, Athens, Greece