Feemɔ Mɔ ni Bɔɔ Sɔɔmɔ Nitsumɔ He Mɔdɛŋ
1 Maŋtsɛyeli lɛ he sane lɛ shiɛmɔ kɛ kaselɔi afeemɔ ji nitsumɔ kpakpa diɛŋtsɛ. Esa akɛ wɔkɛ wɔsusuma muu fɛɛ awo mli. Ani okɛ ekaa miibɔ he mɔdɛŋ?
2 Ehe miihia ni bo diɛŋtsɛ lɛ osusu nakai sanebimɔ lɛ he. Kwɛmɔ March sɔɔmɔ akɔntaabuu ni jeɔ kpo yɛ Wɔ Maŋtsɛyeli Sɔɔmɔ nɛɛ mli yɛ baafa 4 lɛ. Yɛ be mli ni osusuɔ emlijai lɛ ahe lɛ, ha ahi ojwɛŋmɔ mli akɛ gbɛgbalɔi krɛdɛɛ lɛ yɛ ŋmɛlɛtswaa oti ni ma amɛhiɛ ni ji 140 daa nyɔŋ nɔ, daa gbɛgbalɔi 90 kɛ gbɛgbalɔi awalɔi hu ŋmɛlɛtswai 60. Amaniɛbɔɔ lɛ tsɔɔ akɛ ehe miihia ni wɔ gbɛgbalɔi lɛ ateŋ mɛi pii atsu nii waa fioo bɔni afee ni amɛnine ashɛ oti ni ma amɛhiɛ lɛ nɔ daa nyɔŋ nɔ, aloo jeee nakai?
3 Asafoŋ shiɛlɔi na ŋmɛlɛtswai 11.9 yɛ March mli kɛ aja mli. Enɛ hi. Shi, enɛ baa shi kɛ akɛto ŋmɛlɛtswai 13 ni wɔna yɛ afii etɛ ko ni eho nɛɛ nɔ lɛ he lɛ. Afii fioo ko ni eho nɛ lɛ, kpokpaa nɔkwɛlɔi bɔɔ amaniɛ akɛ asafoi pii yɛ ni amɛshiɛlɔi lɛ fɛɛ yaa shiɛmɔ daa nyɔŋ nɔ. Agbɛnɛ asafoi pii ena shiɛlɔi babaoo ni amɛyaaa shiɛmɔ yɛ daa nyɔŋ nɔ. No hewɔ lɛ, sanebimɔ lɛ ekoŋŋ ji akɛ, Ani okɛ ekaa miifi shiɛmɔ nitsumɔ lɛ sɛɛ lo?
EKAA LOO MƆDƐŊBƆƆ Nl WƆƆNA
4 Yudafoi komɛi ni hi shi yɛ klɛŋklɛŋ afii oha lɛ mli lɛ ‘ahiɛ dɔɔ yɛ Nyɔŋmɔ he; shi jeee yɛ nilee naa.’ (Rom. 10:2) Amɛ hiɛdɔɔ lɛ gba afa, taakɛ bɔ ni mɛi pii ni yɔɔ Kristendom lɛ ji ŋmɛnɛ lɛ. Shi wɔ lɛ, esa akɛ wɔna ekaa loo mɔdɛŋbɔɔ ni damɔ anɔkwale nilee nɔ. Kɛji akɛ anɔkwa Kristofonyo ko fo be ni ekɛkaseɔ nii yɛ teemɔŋ lɛ nɔ ejaakɛ ebɛ deka yɛ ‘je lɛ ni ekɛtsuɔ nii kɛmɔɔ shi’ lɛ hewɔ lɛ, sane baaba ekaa ni efeɔ lɛ he. Ebaafɔɔ kpeebaa ni ebaatsɔ shiɛlɔ ni eyaaa shiɛmɔ yɛ daa nyɔŋ nɔ. Nɔ ni baajɛ enɛ mli aba po ji shiɛmɔ ni eeekpa yaa kwraa.—1 Kor.7:29-31.
5 Kɛ ekaa ni wɔyɔɔ lɛ nɔ miigbɔ lɛ, esa akɛ wɔkai akɛ: Yehowa kɛ ekaa baawaje wɔ kɛji akɛ wɔha hiɛsɔɔ ni wɔyɔɔ kɛha lɛ lɛ tee hiɛ lɛ. Esa akɛ wɔsɔle ni wɔbi eyelikɛbuamɔ, wɔkase nii, ni wɔya kpeei daa ni wɔbɔ mɔdɛŋ akɛ wɔkɛ wɔhe aaawo shiɛmɔ kɛ kaselɔ-feemɔ nitsumɔ lɛ mli. Nɛkɛ nitsumɔi nɛɛ baatswa nilee ni wɔyɔɔ, hemɔkɛyeli, kɛ tsuishiŋmɛɛ kɛ Nyɔŋmɔ jamɔ hetuu-kɛ-hamɔ kɛ suɔmɔ ama shi. Taakɛ bɔfo Petro wie he lɛ, “kɛji nɛkɛ nii nɛɛ yɛ nyɛmli ni efa lɛ, ehaŋ nyɛfee hejɔlɔi aloo mɛi ni wooo yibii.” Shi moŋ, wɔbaatamɔ Yeremia, mɔ ni ekaa ni yɔɔ emli lɛ ha etsu nitsumɔ ni akɛwo edɛŋ lɛ he nii kɛmɔ shi yɛ shitee-kɛ-woo babaoo ni ekɛkpe lɛ fɛɛ sɛɛ lɛ.—2 Pet. 1:6-8: Yer. 20:9.
6 Kaimɔ akɛ ekaa ni oyɔɔ lɛ baanyɛ ana hewalɛ kpakpa yɛ onyɛmimɛi Kristofoi lɛ anɔ. Paulo kɛɛ Korinto Kristofoi lɛ akɛ: ‘Ekaa ni nyɛyɔɔ lɛ ekanya nyɛmimɛi ni yɔɔ Akaia lɛ ateŋ mɛi pii.’ (2 Kor. 9:2) Wɔnyɛmimɛi hii kɛ yei ni yɔɔ ŋmɛnɛ lɛ ateŋ mɛi pii jieɔ ekaa ni woɔ mɔ hewalɛ nɛɛ nɔŋŋ eko kpo.
7 Akɛ nɔkwɛmɔ nɔ lɛ, susumɔ asafo bibioo ni yɔɔ Brong Ahafo ni atsɛɔ lɛ Seekwa lɛ he okwɛ. Shiɛlɔi ni ji nyɛmimɛi hii kɛ yei 28 yɔɔ mli, shi amɛteŋ mɛi 14 ji daa gbɛgbalɔi! Agbɛnɛ susumɔ Mataheko asafo ni yɔɔ Accra lɛ he. Yɛ nyɛsɛɛ March nyɔŋ lɛ nɔ lɛ, amɛbɔ daa gbɛgbalɔi 38 kɛ gbɛgbalɔi awalɔi 19 he amaniɛ. Shiɛlɔi 107 ni eshwɛ lɛ na ŋmɛlɛtswai 19.8 yɛ sɔɔmɔ nitsumɔ lɛ mli. Nakai nɔŋŋ hu Srodae asafo ni yɔɔ Koforidua lɛ bɔ daa gbɛgbalɔi 10 he amaniɛ yɛ March ni ho lɛ mli. Mɛi nyɔŋmai enyɔ bɔ amaniɛ akɛ gbɛgbalɔi awalɔi, ni amɛteŋ mɔ fɛɛ mɔ na ŋmɛlɛtswai 65.2. Shiɛlɔi 72 ni eshwɛ lɛ na ŋmɛlɛtswai 20.8 mɔ fɛɛ mɔ yɛ sɔomɔ nitsumɔ lɛ mli. Nyɛsɛɛ nɛɛ, amaniɛbɔɔ ko ni jɛ nitsumɔ he nine lɛ nitsumɔ he ni kwɛɔ sɔɔmɔ nitsumɔ lɛ nɔ lɛ bɔ amaniɛ akɛ: “Yɛ amɛnitsumɔ ni wa ni be bɛ he lɛ fɛɛ sɛɛ lɛ. Accra Betel weku lɛ mlibii 14 kɛ amɛhe wo gbɛgbalɔi awamɔ sɔɔmɔ nitsumɔ lɛ mli yɛ April nyɔŋ lɛ nɔ.” Ekaa ni tamɔ nɛkɛ woɔ wɔ hewalɛ, aloo jeee nakai?
GBƐI ANƆ Nl AAATSƆ AJIE EKAAFEEMƆ KPO YƐ
8 Ekaafeemɔ baakanya wɔ koni wɔtao hegbɛ fɛɛ hegbɛ ni wɔɔna ni wɔshiɛ sanekpakpa lɛ, ni wɔbu wɔsɔɔmɔ nitsumɔ lɛ he akɔntaa yɛ anɔkwayeli mli. Kɛfata wɔhe ni wɔkɛaabɔ asafo lɛ he daa yɛ kui odaseyeli mli lɛ, wɔbaaha wɔhiɛ aba wɔhe nɔ ni wɔye odase trukaa, ni wɔkɛtsɔɔ akɛ wɔhiɛ yɛ anɔkwale lɛ nɔ. Ekaa ni ooofee lɛ baakanya bo koni okadi mɛi ni yɔɔ wiemɔ Iɛ he miishɛɛ lɛ fɛɛ koni oku sɛɛ oyasara amɛ kɛ yiŋtoo akɛ okɛ amɛ aaaje shia Biblia mli nikasemɔi ashishi. Gbɛ kroko ni oootsɔ nɔ ojie ekaa loo mɔdɛŋ ni obɔɔ lɛ kpo ji hewalɛ ni ooowo mɛi ni efɔɔɔ shiɛmɔyaa loo amɛkpa shiɛmɔyaa kwraa lɛ koni amɛbafata wɔhe yɛ sɔɔmɔ nitsumɔ lɛ mli. Kɛ oto obe he gbɛjianɔ lɛ enɛ hu baatsɔɔ akɛ oji mɔ ni bɔɔ ekaafeemɔ he mɔdɛŋ. Kɛ oyɛ ekaa lɛ, jeee akɛ okɛ be babaoo baawo sɔɔmɔ nitsumɔ lɛ mli kɛkɛ shi moŋ obaanyɛ otsu babaoo yɛ hesaamɔ kpakpa hewɔ.
9 Naagbai kɛ nɔnyɛɛ baaya nɔ afa yɛ be mli ni naagbee lɛ bɛŋkɛɔ lɛ. Shi wɔŋmɛŋ gbɛ koni “je nɛŋ he naagbamɔ kɛ ninamɔ he lakamɔ kɛ nibii krokomɛi ahe akɔnɔ” abote mli koni egbe ekaa ni wɔyɔɔ lɛ. (Marko 4:19) Taomɔ osɔɔmɔ nitsumɔ lɛ mli okwɛ yɛ be kɛ bei amli. Ani obaanyɛ ofee babaoo? Ha ekaa ni ofeɔ lɛ aje kpo. Kaimɔ akɛ, ekaafeemɔ tsɛŋeɔ mɔ. Ha onɔ lɛ akanya mɛi krokomɛi kɛya Maŋtsɛyeli nitsumɔ kpakpa mli.