Sanekpakpa lɛ kɛhamɔ—Kɛ True Peace Wolo Lɛ
1 Yɛ be mli ni wɔnaa bɔ ni nibii baa haa ni haa gbalɛ ni yɔɔ 1 Tesalonikabii 5:2. 3 baa mli lɛ, wɔtswaa wɔfai shi akɛ wɔbaaya nɔ ni wɔkɛ ekaa babaoo abɔ gbɔmɛi kɔkɔ yɛ nɔ ni baa nɛɛ he. No hewɔ lɛ, yɛ wɔsɔɔmɔ nitsumɔ lɛ mli yɛ July mli lɛ, wɔkɛ True Peace and Security—How Can You Find It? wolo lɛ baatsu nii. Nɛkɛ wolo fɛfɛo nɛɛ wieɔ nɔ ni gbɔmɛi lɛ susuɔ lɛ he ni ekɛ nɔdaamɔ nɔ kpakpa kɛha hiɛnɔkamɔ haa.
NƆ HEWƆ NI EBA YƐ EBE NAA PƐPƐƐPƐ
2 Gbɔmɛi pii miisusu kɛji akɛ toiŋjɔlɛ he mɔdɛŋbɔɔ ni yaa nɔ amrɔ nɛɛ yɛ jeŋ hewalɛi lɛ teŋ lɛ baaye omanye aloo kɛji akɛ eyeee omanye lɛ, ani ekɛ jeŋmaji lɛ fɛɛ baawo nuklea tawuu mli lo lɛ he. True Peace wolo lɛ baashɛje amɛmii kɛ nilee ni tsɔɔ akɛ Nyɔŋmɔ kɛ naanɔ toiŋjɔlɛ baaba abaha adesai. Eyiŋtoo kɛha shikpɔŋ lɛ eŋmɛɛɛ gbɛ ni gbɔmɛi akpata hiɛ. Hɔmɔ, ohia futaa, kɛ shiai ni anaaa awɔ mli lɛ ji daa gbi naagba ni ka gbɔmɛi akpekpei abɔ hiɛ. True Peace wolo lɛ tsɔɔ haomɔi ni egba adesai anaa lɛ anaa tsabaa kome pɛ ni yɔɔ. Gbɔmɔ diɛŋtsɛ teemɔŋ shweshweeshwe ni bɛ yɛ awuiyeli hewɔ lɛ haa mɛi pii nuɔ he akɛ amɛtsɔmɔ nyɔji po yɛ amɛ diɛŋtsɛ amɛshiai amli. True Peace wolo lɛ kɛ Ŋmalɛ mlitsɔɔmɔ baa yɛ enaa tsabaa lɛ he. Ŋmɛnɛŋmɛnɛ beaŋ shihilɛi, nɔ fɔŋ feemɔ kɛ bɔlɛnamɔ mli hewalɛi ni Nyɔŋmɔ kɛba ni akɛtsuɔ nii yɛ gbɛ fɔŋ nɔ lɛ ekpata gbɔmɛi babaoo ni anyɛŋ akane amɛ lɛ awala kɛ wekui ahiɛ. True Peace wolo lɛ tsɔɔ tɛi ni Nyɔŋmɔ efolɔ eshwie shi kɛ hebuu nɔ ni akɛhaa mɛi ni hiɔ shi yɛ naa lɛ.
OSHIƐMƆ WIEMƆ LƐ
3 “Anɔkwale Toiŋjɔlɛ kɛ Shweshweeshwe Shihilɛ Jɛɛhe” lɛ baafee Saneyitso Kɛha Sanegbaa hee ni baaje shishi yɛ July mli lɛ yitso. Ŋmalɛi ni akɛbaatsu nii lɛji 1 Tesalonikabii 5:3 kɛ Mika 4:3, 4. Obaanyɛ ona akɛ hiɛkpamɔ wiemɔi pii ni awo he ŋaa yɛ Reasoning wolo lɛ baafai 9-15 lɛ ji nɔ ko ni abaanyɛ akɛtsu nii yɛ nɛkɛ saneyitso nɛɛ mli ni akɛto wɔshikpɔŋkuku lɛ mli hiamɔ nii ahe.
4 Okɛ ŋmalɛi enyɔ lɛ atsu nii yɛ osanegbaa lɛ mli ni okɛtsɔɔ akɛ toiŋjɔlɛ ni adesa kɛbaa lɛ sɛɛ etsɛŋ shi moŋ Nyɔŋmɔ toiŋjɔlɛ ji nɔ ni sɛɛ tsɛɔ. Yɛ be mli ni okane ni owie Mika 5:3,4 he kuku lɛ obaanyɛ ni ogbala shiatsɛ lɛ jwɛŋmɔ kɛya sanegbaa mli kɛtsɔ bi ni ooobi lɛ nɔ ni esusuɔ yɛ nɔ ni nakai gbalɛ lɛ baatsɔɔ aha adesai ni naa nɔ lɛ he lɛ he. Ani ebaana miishɛɛ akɛ nɛkɛ gbalɛ nɛɛ aaaba mli yɛ wɔbe nɛɛ mli? Kɛkɛ lɛ obaanyɛ ogbala ejwɛŋmɔ kɛya mfoniri ni yɔɔ True Peace wolo lɛ baafa 99 lɛ nɔ, ni owie he, ni ogbala ejwɛŋmɔ kɛya emli wiemɔ kome loo enyɔ ni yɔɔ baafa ni tsara nɔ lɛ amli ni tsɔɔ hiɛnɔkamɔ diɛŋtsɛ ni kɛ jeŋ muu fɛɛ toiŋjɔlɛ kɛ shweshweeshwe shihilɛ baaba lɛ nɔ. Fɔ̃ɔ shiatsɛ lɛ nine ni okɛɛ lɛ akɛ etao nɛkɛ sane nɛɛ mli ekoŋŋ kɛtsɔ yelikɛbuamɔ ni True Peace wolo lɛ kɛhaa lɛ nɔ. Shi, obaasumɔ ni ogbala ejwɛŋmɔ kɛya wolo lɛ mli nɔ kroko nɔ yɛ sane ni okɛ shiatsɛ kroko baagba lɛ mli.
5 Kɛ nyɛbɛ True Peace wolo lɛ eko yɛ nyɛ asafo lɛ mli lɛ, nyɛbaanyɛ ni nyɛkɛ wolo ni hiɛ baafai 192 lɛ eko ni yɔɔ atsu nii. Wɔyɛ True Peace momo lɛ yɛ Twi kɛ Ewe mli. Nyɛbaanyɛ ni nyɛkɛ enɛ atsu nii yɛ jara ni atse nɔ ni ji ¢125.00 naa. Wɔmiisumɔ ni wɔkɛ woji ni wɔyɔɔ lɛ fɛɛ aha yɛ nɛkɛ tafaa be nɛɛ mli bɔni afee ni wɔnyɛ wɔkala ehee lɛ yɛ Twi kɛ Ewe mli. No hewɔ lɛ nyɛbɔa mɔdɛŋ krɛdɛɛ ni nyɛkɛ nɔ ni yɔɔ nyɛ asafo lɛ mli lɛ fɛɛ aha. Kɛ nyɛbɛ eko lɛ yɛ baanyɛ nyɛshɛ eko kɛjɛ Asafo lɛ ŋɔɔ. Kɛji nyɛyɛ emomo lɛ eko yɛ Ŋleshi wiemɔ mli lɛ, nyɛbaanyɛ ni nyɛkɛ enɛ hu aha yɛ jara ni atse nɔ ni ji ¢125.00 lɛ naa.
6 Anɔkwa toiŋjɔlɛ etsɔɔɔ tawuu kɛkɛ ni bɛ, shi moŋ nɔ ni fata he ji gbɔmɔtsoŋ hewalɛnamɔ kpakpa, shweshweeshwe shihilɛ, kɛ adesa hilɛ-kɛ-hamɔ. Yehowa ni ji “toiŋjɔlɛ Nyɔŋmɔ” lɛ kɛ e-bi Yesu Kristo, “Toiŋjɔlɛ Lumɔ” lɛ pɛ baanyɛ ni amɛkɛ naanɔ jɔɔmɔi aha mɛi ni kɛ amɛ baa toiŋjɔlɛ gbeekpamɔ mli lɛ. (1 Tes. 5:23: Yes. 9:6) Wɔbaanyɛ wɔye wɔbua wɔ akutseiaŋbii ni toiŋjɔlɛ aba amɛkɛ Nyɔŋmɔ kɛ e-Bi lɛ teŋ bianɛ ni amɛna miishɛjemɔ yɛ jeŋ muu fɛɛ toiŋjɔlɛ ni etsɛŋ ni ebaaba lɛ he hiɛnɔkamɔ lɛ mli. Wɔbaanyɛ wɔfee enɛ kɛ wɔkɛ ‘hejɔlɛ sanekpakpa lɛ he saamɔ-kɛ-too wo wɔnaji,’ kɛtsɔ True Peace wolo lɛ ni wɔkɛaaha yɛ July mli lɛ nɔ.—Efe. 6:15.