Jajemɔ Anɔkwa Toiŋjɔlɛ kɛ Shweshweeshwe Shihilɛ
1 Anɔkwa toiŋjɔlɛ kɛ shweshweeshwe shihilɛ baanyɛ aba kɛjɛ jɛɛhe kome pɛ. Yehowa Nyɔŋmɔ ŋɔɔ. Mika kɛɔ wɔ akɛ Yehowa “eeekojo maji pii ateŋ, ni eeeka jeŋmaji agboi ahiɛ kɛaatee shɔŋŋ.” Mɛni baajɛ mli aba? “Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!”—Mika 4:3.
2 Akɛni Yehowa pɛ ji anɔkwa toiŋjɔlɛ jɛɛhe hewɔ lɛ, ehe miihia ni gbɔmɛi ‘ayakwɔ Yehowa gɔŋ lɛ’ ni atsɔɔ amɛ egbɛi lɛ bɔni afee ni amɛnyiɛ etempɔŋi lɛ anɔ. (Mika 4:2) Amɛbaakase akɛ Yehowa Nyɔŋmɔ baatsɔ e-Maŋtsɛyeli lɛ nɔ ekɛ anɔkwa toiŋjɔlɛ aba shikpɔŋ nɛɛ nɔ. Shi te wɔɔfee tɛŋŋ ni wɔye wɔbua gbɔmɛi pii ni amɛkase anɔkwa toiŋjɔlɛ kɛ shweshweeshwe shihilɛ Jɛɛhe lɛ he nii?
Nyɛjaa True Peace Wolo Lɛ
3 Saji ni he hiaa jogbaŋŋ yɛ True Peace wolo lɛ mli kɛha gbɔmɛi ni sumɔɔ ni amɛyakwɔ “Yehowa we gɔŋ” lɛ. Datrɛfonyo ko ni yɔɔ Finland nine shɛ True Peace wolo lɛ ekome nɔ. Klɛŋklɛŋ lɛ ekaneee shi ekɛyahɔ ewoji atoohe. Yɛ sɛɛ mli lɛ eŋa kai akɛ amɛyɛ wolo ko ni tamɔ nakai ni eyakɔ ni ekane. Kɛkɛ ni yoo nɛɛ he ye amrɔ nɔŋŋ akɛ ena anɔkwale lɛ. Eje nikasemɔ shishi ni yɛ sɛɛ mli lɛ ewu bafata ehe. Amrɔ nɛɛ abaptisi amɛ ni amɛbii hu etsɔmɔ sanekpakpa lɛ he shiɛlɔi. Nɛkɛ niiashikpamɔ nɛɛ feɔ bɔ ni ehe hiaa akɛ wɔkɛ True Peace wolo lɛ aaaha yɛ shiai babaoo mli bɔ ni wɔɔnyɛ lɛ he nɔkwɛmɔ nɔ.
4 Esa akɛ wolo lɛ mli saji ni ato naa lɛ amlitii kɛ wolo lɛ mli yitsei ni wɔsusuɔ akɛ eeeŋɔɔ gbɔmɛi lɛ anaa lɛ akwɛmɔ afata wɔhesaamɔ kɛha shiɛmɔyaa lɛ he. Wɔbaanyɛ wɔhala saji otii pɔtɛɛ kɛjɛ wolo lɛ mli ni wɔkɛtsu nii yɛ be mli ni wɔkɛ shiatsɛmɛi gbaa sane lɛ.
5 Obaanyɛ oka ŋaawoo ni nyiɛ sɛɛ nɛɛ okwɛ. Beni okane ni okɛ lɛ egba ŋmalɛi ni yɔɔ Saneyitso Kɛha Sanegbaa lɛ he sane lɛ, gbalamɔ shiatsɛ lɛ jwɛŋmɔ kɛya baafa 8 yɛ True Peace wolo lɛ mli. Kɛ be yɛ lɛ, nyɛkanea emli ŋmalɛi lɛ ekomɛi ni nyɛkɛtsɔɔ sɔrɔtofeemɔ ni ka nɔ ni Nyɔŋmɔ Maŋtsɛyeli lɛ baafee lɛ kɛ nɔ ni adesai hiɛnyiɛlɔi nyɛŋ afee lɛ teŋ. Kɛkɛ lɛ akane kuku 13. Yɛ no sɛɛ lɛ, obaanyɛ obi shiatsɛ lɛ kɛji akɛ ebaasumɔ ni esusu saji otii ni yɔɔ yitso ni nyiɛ sɛɛ lɛ mli lɛ ekomɛi ahe. Yɛ nɛkɛ gbɛ nɔ lɛ, belɛ obaanyɛ oje Biblia mli nikasemɔ shishi yɛ jɛmɛ nɔŋŋ. Kɛ jeee nakai lɛ, bɔɔ mɔdɛŋ ni oje nikasemɔ shishi beni oku osɛɛ otee jɛmɛ.
6 Eka shi faŋŋ akɛ adesa ni yeee emuu lɛ nyɛŋ ekɛ anɔkwa toiŋjɔlɛ kɛ shweshweeshwe shihilɛ aba. Bɔni afee ni gbɔmɛi ana wɔsɛɛ be he hiɛnɔkamɔ ni ma shi shiŋŋ lɛ, esa akɛ amɛna Nyɔŋmɔ mli hemɔkɛyeli. Shi, “te amɛaafee tɛŋŋ ni amɛaahe mɔ ni amɛnuko ehe sane lɛ amɛyeŋ? Ni asaŋ te aaafee tɛŋŋ ni amɛaanu kɛ shiɛlɔ ko bɛ lɛ?” (Rom. 10:14) Be lɛ miifa kɛmiiha gbɔmɛi lɛ akɛ amɛaana hegbɛ ni amɛtsɔ amɛhe kɛba anɔkwa toiŋjɔlɛ kɛ shweshweeshwe shihilɛ Jɛɛhe diɛŋtsɛ lɛ ŋɔɔ. Eba akɛ wɔɔfee nɔ fɛɛ nɔ ni wɔɔnyɛ yɛ July nyɔŋ lɛ mli koni wɔkɛjaje anɔkwa toiŋjɔlɛ sane lɛ wɔtsɔɔ gbɔmɛi babaoo ni yɔɔ tsuijurɔ yɛ wɔshikpɔŋkuku lɛ mli lɛ.