Sanekpakpa Lɛ Kɛhamɔ—Kɛtsɔ Woji Tɛtrɛbii Ashɛɛ ni Akɛaaha yɛ Ekaa Naa Iɛ Nɔ
1 Ŋwanejee ko bɛ he akɛ Buu-Mɔɔ wolo tɛtrɛɛ lɛ ji Biblia kasemɔ he wolo tɛtrɛɛ ni hi fe fɛɛ yɛ shikpɔŋ nɔ ŋmɛnɛ! Ahi oheɔ oyeɔ akɛ sane nɛɛ ji anɔkwale? Kɛji nakai ni lɛ, ani esaaa akɛ wɔhaa mɔ fɛɛ mɔ naa hegbɛ koni eshɛ eko?
2 Mɛɛ gbɛ nɔ Buu-Mɔɔ lɛ kanemɔ eye ebua bo diɛŋtsɛ yɛ? Eka shi faŋŋ akɛ wɔbaanyɛ wɔtsɔɔ gbɛi sɔrɔtoi anɔ ni woji tɛtrɛbii lɛ eye ebua wɔ yɛ. Mɛi komɛi baanyɛ akɛɛ akɛ efee nɔ titri ni hɛleɔ wɔ shi yɛ nɔ ni be ni wɔyɔɔ mli nɛɛ tsɔɔ lɛ he. Aloo eye ebua wɔ ni wɔkase nɔ ni “yinɔi lɛ ahe okadi” ni haoɔ adesai ŋmɛnɛ lɛ shishinumɔ diɛŋtsɛ ji. (Mat. 16:3) Mɛi krokomɛi hu baakɛɛ akɛ Nyɔŋmɔ Maŋtsɛyeli ni etsɛŋ ni ebaakpata mɛi ni waa amɛnanemɛi gbɔmɛi ayi lɛ he sanekpakpa lɛ eshɛje amɛmii. Buu-Mɔɔ lɛ efi nakai susumɔ lɛ sɛɛ kɛjɛ eshishijee be mli fe afii 110 ni eho nɛ. Ŋwanejee ko bɛ he akɛ wɔ fɛɛ wɔbaakɛɛ akɛ nɛkɛ Biblia kasemɔ he wolo ni ekaaa nɛɛ eye ebua wɔ ni etswa wɔhemɔkɛyeli yɛ kpɔmɔ nɔ gbɛjianɔtoo ni haa adesai ni yeee emuu naa hegbɛ koni amɛna naanɔ wala lɛ mli. Ehe miihia ni mɛi krokomɛi hu akase nɛkɛ anɔkwalei nɛɛ.
Na Jwɛŋmɔ Kpakpa Yɛ Ekɛhamɔ Mli
3 Nɔ ni amaa nɔ mi yɛ Buu-Mɔɔ lɛ mli ji Nyɔŋmɔ nilee shi jeee gbɔmɔ susumɔ. (Yes. 55:8, 9) Nilee ni tamɔ nɛkɛ he miihia mɔ fɛɛ mɔ ŋmɛnɛ waa. Ebaanyɛ eha shihilɛ aya hiɛ ni eye ebua ni ana kanyamɔi ni sa. Enɛ he miihia koni “wɔya nɔ wɔhi shi.” (Abɛi 9:1-6) Akɛni wɔyɔɔ hekɛnɔfɔɔ ni tamɔ nɛkɛ hewɔ lɛ, wɔkɛ eshɛɛ lɛ baaha kɛ jwɛŋmɔ kpakpa, ni wɔyɔse akɛ wɔyɛ nɔ ni he hiaa gbɔmɛi lɛ. Bɔɔ mɔdɛŋ ni okwɛ eko fɛɛ eko ni baaba lɛ mli jogbaŋŋ ni ona wiemɔi ni oheɔ oyeɔ akɛ ebaanyɛ eye ebua shiatsɛmɛi lɛ. Hesaamɔ ni tsɔɔ hiɛ nɛɛ baaye abua bo ni okɛ jwɛŋmɔ kpakpa atsu nii yɛ be mli ni okɛ woji tɛtrɛbii nɛɛ tsuɔ ni yɛ sɔɔmɔ lɛ mli lɛ.
4 Mɛi komɛi kɛ jwɛŋmɔ kpakpa tsuŋ nii yɛ eshɛɛ lɛ kɛhamɔ mli. Amɛbaanyɛ amɛkɛ shiatsɛ lɛ ana sanegbaa, ni amɛwie Saneyitso Kɛha Sanegbaa lɛ po he, ni amɛkɛ woji tɛtrɛbii enyɔ aha kɛha 200 moŋ fe ni amɛkɛ eshɛɛ lɛ aaaha. Mɛni hewɔ? Ejara lɛ? Kɛji nakai ni lɛ, belɛ enɛ jeee susumɔ kpakpa. Yɛ be mli ni eshɛɛ lɛ jara lɛ edaaa kwraa kɛ akɛto je lɛŋ woji ahe lɛ, eji nɔ ko ni sɛɛnamɔ yɔɔ he fe fɛɛ kɛha ekanelɔ lɛ. No hewɔ lɛ na jwɛŋmɔ kpakpa ni okɛ Buu-Mɔɔ lɛ shɛɛ lɛ aha kɛha ₵1,800 pɛ aloo okɛ ehefatalɔ ni ji Awake! lɛ afata he kɛha ₵3,600 pɛ.
5 Nyɛmiyoo ko tswa efai shi akɛ ebaaha mɛi pii ashɛ eko, no hewɔ lɛ, ekɛ 50 ni eeena yɛ nyɔji enyɔ mli lɛ ma ehiɛ. Eha ashɛ 31 yɛ klɛŋklɛŋ nyɔŋ lɛ nɔ ni ena 50 lɛ yɛ nyɔji enyɔ lɛ mli. Ekɛɛ akɛ kɛji akɛ mɛi komɛi bɛ shika ni kɛlɛ amɛmiisumɔ ni amɛshɛ lɛ, enyɛɔ eyaa shiatsɛ lɛ ŋɔɔ aaafee shii etɛ loo shii ejwɛ dani shiatsɛ lɛ nyɛɔ ebuaa shika lɛ fɛɛ naa. (yb89, bf. 60-1; agbɛnɛ hu kwɛmɔ 1990 Yearbook, baafai 47-9.) Yɛ Japan, he ni afi shɛɛ feɔ aaafee ₵4,900 lɛ, nyɛmimɛi lɛ ha ashɛ nɔ ni fe ₵71,600 yɛ October mli, ni efee yifalɛ ni fe fɛɛ eko ni ashɛ kɛ oha mlijaa 57 nɔyaa fe nyɛsɛɛ afi lɛ nɔ yɛ nakai nyɔŋ lɛ nɔŋŋ mli.
Nyɛkɛ Ekaafeemɔ Ayaa Nɔ
6 Wɔyɛ yiŋtoo ni wɔɔdamɔ nɔ ni wɔfee ekaa yɛ wɔsɔɔmɔ lɛ mli—wɔyɛ Yehowa akɛ mɔ ni fiɔ wɔsɛɛ. (Bɔfoi 14:3) Dɛŋdadei titrii ni Yehowa kɛtsuɔ nii ŋmɛnɛ koni ekɛgbɛ sanekpakpa lɛ eshwa lɛ ateŋ ekome ji Buu-Mɔɔ lɛ. Kɛ wɔha ashɛ ni wɔdi sɛɛ kɛ hewalɛwoo koni akane woji tɛtrɛbii lɛ, wɔ mɔdɛŋbɔɔ yɛ nɛkɛ gbɛ nɔ lɛ baanyɛ ahere gbɔmɛi ayiwala. No hewɔ lɛ nyɛhaa wɔkɛ miishɛɛ kɛ ekaa fɛɛ awoɔ eshɛɛ lɛ mli koni wɔha mɛi fɛɛ ni wɔle amɛ kɛ mɛi ni wɔkɛ amɛ kpeɔ yɛ sɔɔmɔ nitsumɔ lɛ mli lɛ ashɛ eko.