Ni Wɔɔtswa Weku Shihilɛ ni Bɛŋkɛ Kpaakpa Wɔma Shi
1 Akɛni nibii pii heɔ wɔbe hewɔ lɛ, fɔlɔi kɛ kaa kpeɔ yɛ bɔ ni amɛaafee amɛtswa amɛweku amɛma shi shiŋŋ yɛ anɔkwa jamɔ mli lɛ he. Ehe miihia ni Kristofoi awekui ana wekukpaa ni mli wa ni baanyɛ ekɛ sɛɛfimɔ aha yɛ amrɔ nɛɛ jaramɔ bei nɛɛ amli. (Jaj. 4:9-12; 2 Tim. 3:1-5) Yɛ be mli ni mumɔŋ dalɛ yaa hiɛ lɛ, weku lɛ bafeɔ ekome ni ewoɔ amɛ hewalɛ bɔni afee ni amɛnyɛ amɛdamɔ Satan tutuamɔi kɛ enibii agbɛjianɔtoo nɛɛ naa.
BƆ NI AAAFEE ATSWA MUMƆŊ SUI AMA SHI
2 Asafoŋ kpeei kɛ weku Biblia mli nikasemɔ ji nibii ni he hiaa yɛ weku lɛ gbɛjianɔtoo kɛha otsi lɛ mli. (5 Mose 6:6, 7; Heb. 10:23-25; wGA 4/87 bf. 23-6) Ni kɛlɛ, babaoo he miihia. Kɛji mumɔŋ tsɔsemɔ ni gbekɛbii naa lɛ fɛɛ nɛ lɛ, no lɛ jɔɔ agbo ko ka shi lolo.
3 Kɛ fɔlɔi na amɛbii lɛ amumɔŋ hilɛ he miishɛɛ diɛŋtsɛ lɛ, ehaa weku shihilɛ ni hi jogbaŋŋ kɛmɔ shi baa. Yɛ Israel lɛ, fɔlɔi ji mɛi ni gbɛnaa nii ka amɛnɔ akɛ amɛtsɔɔ amɛbii lɛ anii ni amɛtsɔse amɛ, ni amɛtsɔse amɛ kɛtsɔ wiemɔ kɛ nɔkwɛmɔ nɔ nɔ. Nɔ ni fata Israelbii lɛ anitsɔɔmɔ gbɛjianɔtoo lɛ he hu ji tsɔsemɔ kɛha shihilɛ akɛ onukpa, koni atsɔɔ amɛ nikanemɔ kɛ niŋmaa mli shishijee nibii, kɛ tsɔsemɔ ni aaaha ena mumɔŋ sui. Yɛ be mli ni amɛtsɔseɔ gbekɛbii lɛ. amaa bɔ ni ehe hiaa ni atsɔɔ amɛ ni amɛna gbeyeishemɔ amɛha Yehowa, Mla lɛ, kɛ bulɛ ni amɛaana amɛha fɔlɔi kɛ mɛi ni edara yɛ afii amli, kɛ bɔ ni toiboo he hiaa lɛ hu nɔ mi.
4 Bɔɔ mɔdɛŋ akɛ ooona be kpakpa oha oweku lɛ daa gbi. Nyɛbaanyɛ nyɛsusu mumɔŋ saji ahe yɛ trukaa shihilɛ mli, tamɔ yɛ niyeli shishi nɛkɛ. Fɔlɔ ko kɛ nilee yoo akɛ: “Fɔlɔi naa be amɛhaa amɛbii—ni amɛnyɛɔ amɛkɛtswaa mumɔŋ sui amɛwoɔ amɛmli aloo amɛkɛyeɔ amɛbuaa amɛ bɔni afee ni amɛje naagbai ni amɛnaa yɛ be kɛ bei amli lɛ mli.” Kwɛ bɔ ni ehi jogbaŋŋ kwraa akɛ aaatswa mumɔŋ sui ni he hiaa lɛ yɛ gbekɛbii lɛ amli bɔni afee ni amɛtsi amɛhe kɛjɛ tsɔnei ni je lɛ tsɔɔ lɛ ahe!—1 Kor. 3:10-15.
SƆƆMƆ NITSUMƆ LƐ MLI MIISHƐƐ NI AAANA
5 Miishɛɛnamɔ ji henumɔ ko ni nɔ kpakpa namɔ aloo ehe gbɛkpamɔ kɛbaa. Kɛ mɔ ko saa ehe jogbaŋŋ kɛha shiɛmɔyaa lɛ, no lɛ ebaanyɛ ekpa nibii kpakpai ni baajɛ mli aba lɛ hu gbɛ yɛ gbɛ kpakpa nɔ. No hewɔ lɛ, hesaamɔ ji nɔ titri ni he hiaa kɛha shiɛmɔ nitsumɔ mli miishɛɛ namɔ. Ni kɛ ati nɔ ni abaakɛɛ yɛ shiɛmɔ mli lɛ mli kutuu akɛ weku, daa gbi, dani aje kpo kɛtee shiɛmɔ lɛ, ehaa ekaa ni amɛyɔɔ lɛ mli waa. (Okɛto Tito 3:1b he.) Mɔ fɛɛ mɔ baanyɛ aha oti ko ahi ejwɛŋmɔ mli. Abaanyɛ afee shiɛmɔ wiemɔ kuku he nɔkwɛmɔ nɔ aha gbekɛbii bibii lɛ aloo mɛi ni kpaako amɛjeɔ shiɛmɔ shishi lɛ.
6 Kɛ fɔlɔi kɛ amɛbii lɛ tsuɔ nii yɛ Kristofoi asɔɔmɔ nitsumɔ lɛ mli lɛ, no lɛ amɛbaanyɛ amɛye amɛbua amɛ ni amɛna gbɔmɛi ahe miishɛɛ diɛŋtsɛ taakɛ Yehowa kɛ Yesu fee he nɔkwɛmɔ nɔ lɛ. Sɔɔmɔ nitsumɔ lɛ hu yeɔ ebuaa wɔ bɔni afee ni wɔkɛ Yehowa ana wekukpaa ni bɛŋkɛ kpaakpa. (wGA 8/82 bf. 12-18) Wekui lɛ ekomɛi toɔ gbi muu fɛɛ he gbɛjianɔ kutuu, ni amɛnaa hiɛtserɛjiemɔ ni tswaa mɔ emaa shi mli gbɛfaŋnɔ yɛ shiɛmɔ sɛɛ. Enɛ haa anaa be kɛhaa sanegbaa ni miishɛɛ yɔɔ mli ni ehaa fɔlɔi kɛ amɛbii feɔ ekome.
7 Tswaa ofai shi akɛ oooha sanegbaa gbɛi ni he hiaa lɛ aya hiɛ bɔni afee ni okɛ obii lɛ ana wekukpaa ni bɛŋkɛ kpaakpa be fɛɛ be. Kaaŋmɛ nɔ ko nɔ ko gbɛ ni etsi onaa yɛ be ni he hiaa ni okɛaatswa oweku lɛ yɛ mumɔŋ lɛ naa kɔkɔɔkɔ. Sɔlemɔ oha obii lɛ ni okɛ amɛ asɔle hu, kɛ hiɛnɔkamɔ akɛ Yehowa baaha mɔdɛŋ ni obɔɔ koni okɛtswa amɛ oma shi lɛ aye omanye.—Lala 127:1; Abɛi 24:3.