Bɔ ni Ooofee Ona Nanemɛi Kpakpai

EMERSON, Amerikanyo lalafolɔ lɛ ŋma akɛ, “Gbɛ kome pɛ ni oootsɔ nɔ ona naanyo ji ni bo diɛŋtsɛ lɛ ofee naanyo.” Naanyobɔɔ baa yɛ afai enyɔ lɛ fɛɛ ni ekɔɔ nihamɔ mumɔ he. Mɛi ni susuɔ amɛ pɛ amɛhe kɛ mɛi ni yɔɔ pɛsɛmkunya sui lɛ naa akɛ ewa akɛ amɛaana nanemɛi kpakpai. Ni kɛlɛ, amɛbaanyɛ amɛye omanye taakɛ wɔbaana lɛ.

Naanyobɔɔ kpakpa daa kɛjɛɔ suɔmɔ mli, ejaakɛ suɔmɔ gbalaa gbɔmɛi. Ni kɛlɛ ewa akɛ mɛi komɛi aaana nanemɛi. Te aaafee tɛŋŋ ni mɔ ko aaaye enɛ nɔ kunim?

Dale Carnegie wo ŋaa akɛ: “Feemɔ toibolɔ kpakpa. Wo mɛi krokomɛi hewalɛ ni amɛwie amɛ diɛŋtsɛ amɛhe amɛtsɔɔ. Kɛ gbɔi kpe lɛ, ekolɛ yɛ hiɛtserɛjiemɔ ko shishi lɛ, namɛi ji mɛi ni naa nanemɛi lɛ? Jeee mɛi ni wieɔ babaoo lɛ ni, shi moŋ mɛi ni naa mɛi krokomɛi ahe miishɛɛ lɛ, mɛi ni biɔ amɛ saji ni amɛboɔ amɛtoi diɛŋtsɛ lɛ. Gbɛi ni aaakai kɛ anɔkwalei komɛi ni yɔɔ miishɛɛ ni kɔɔ mɛi heei ahe Iɛ hu baanyɛ aye abua ni ana nanemɛi.

Kim Giffin kɛ Bobby R. Patton jie bɔ ni esa akɛ mɔ diɛŋtsɛ atsɔɔ mɔ ni eji kɛ anɔkwayeli diɛŋtsɛ lɛ yi yɛ wolo ni ji Fundamentals of Interpersonal Communication lɛ mli. Amɛkɛɛ: “Kɛ mɔ ko aaafee mɔ ni he hiaa kɛha bo lɛ, esa akɛ ole nɔ ko ni he hiaa bo yɛ nakai mɔ lɛ he . . . Feemɔ mɔ ni yɔɔ faŋŋ yɛ be fɛɛ mli . . . Esa akɛ bɔ ni ohaa mɔ kroko hetoo ohaa lɛ afee nɔ ni okɛ anɔkwayeli feɔ.”

Jeee akɛ nanemɛi kpakpai yeɔ anɔkwale kɛkɛ, shi moŋ amɛsusuɔ mɛi krokomɛi ahe, amɛnyɛɛɛ mɛi krokomɛi aloo ni amɛaaye mɛi krokomɛi anɔ. Amɛnuɔ amɛhe shishi, amɛnuɔ jwɛŋmɔ ni mɛi krokomɛi hiɛ lɛ shishi, no hewɔ lɛ amɛnuɔ he amɛhaa mɔ. Yɛ be mli ni wekukpaa ni ka amɛteŋ lɛ yaa hiɛ lɛ, amɛgbeleɔ amɛtsui mli amɛhaa mɛi, ni jeee akɛ amɛbatsɔmɔɔ nanemɛi kpakpai kɛkɛ shi moŋ nanemɛi ni bɛŋkɛ kpaakpa. Jeee nanemɛi kpakpai fɛɛ ji nanemɛi ni bɛŋkɛ amɛhe. Yesu Kristo, naanyo kpakpa ni fe mɔ fɛɛ mɔ yɛ shikpɔŋ nɔ lɛ na nanemɛi pii, shi amɛteŋ mɛi fioo ko pɛ ji nanemɛi ni bɛŋkɛ diɛŋtsɛ.​—Marko 9:​1-10; Luka 8:⁠51.

Naanyobɔɔ Kpakpa he Wolo Lɛ

Biblia lɛ, ni eji wolo ni hi fe fɛɛ yɛ naanyobɔɔ he sane lɛ he lɛ kɛɔ akɛ: “Naanyo sumɔɔ be fɛɛ mli, ni afɔ lɛ akɛ nyɛmi ha haomɔ be.” (Abɛi 17:17) Nanemɛi kpakpai yɛ mlihilɛ ni amɛfee klalo akɛ amɛkɛ yelikɛbuamɔ baaha kɛ naagbai te shi. Naa enɛ he nɔkwɛmɔ nɔ fɛfɛo ko​—sane ko ni ba kɛjɛ blema lsrael.

Yɛ hɔmɔ hewɔ lɛ, nuu ko ni jɛ Yuda efa kɛyahi Moab kɛ eŋa ni atsɛɔ lɛ Naomi. Be bashɛ ni nuu lɛ gbo. Yɛ sɛɛ mli lɛ, ebihii enyɔ kɛ Moab yei, Rut kɛ Orpa hi shi. Kɛkɛ ni bihii lɛ hu gboi, ni amɛshi okulafoi etɛ lɛ. Naomi, ni ji nyɛ lɛ to eyiŋ akɛ ebaaku esɛɛ eya Yuda, ni eshaayei enyɔ lɛ kɛ lɛ je gbɛfaa lɛ shishi. Shi beni amɛyaa lɛ, Naomi wo obalayei lɛ hewalɛ ni amɛku amɛsɛɛ amɛyatao wumɛi heei yɛ amɛ diɛŋtsɛ amɛwebii ateŋ. Orpa fee nakai, shi Rut ma nɔ mi akɛ ekɛ Naomi baaya. Mɛni hewɔ? Ejaakɛ eji mɔ ko ni fe shaayoo pɛ kɛkɛ; eji naanyo kpakpa hu. Nɔ kome ji akɛ, emɔbɔnalɛ su lɛ eŋmɛɛɛ lɛ gbɛ koni eha okulafo ni egbɔ nɛɛ, ni eweku fɛɛ eje ehe nɛɛ pɛ aya.​—Rut 1:​1-17.

Rut jie henumɔ, mlihilɛ, anɔkwayeli kɛ suɔmɔ diɛŋtsɛ kpo. Nakai sui lɛ ji shishitoo nii ni ma shi shiŋŋ kɛha naanyobɔɔ kpakpa. Shi, nɔ kroko hu yɛ sane lɛ mli ni kɔɔ wekukpaa ni ka Rut kɛ Naomi teŋ lɛ he.

Naanyobɔɔ ni Kwɔ

Beni Naomi wo Rut hewalɛ ni eku esɛɛ eya lɛ, Rut kɛɛ: “Kaahiɛ mi doo akɛ mishio . . . shi he fɛɛ he ni oyaa lɛ matee . . . omaŋ ji mimaŋ, ni o-Nyɔŋmɔ ji mi hu mi-Nyɔŋmɔ.” (Rut 1:16) Naomi eye ebua Rut, tsutsu wɔŋjalɔ lɛ ebale ni ebasumɔ anɔkwale Nyɔŋmɔ lɛ ni ji Yehowa. Hemɔkɛyeli ni amɛ fɛɛ amɛyɔɔ lɛ bafee mumɔŋ kpaa ni yɔɔ hewalɛ ni fimɔɔ yei enyɔ lɛ efeɔ amɛ ekome akɛ nanemɛi kpakpai. Yehowa kɛ weku hee ko jɔɔ amɛ. Yɛ be ni sa mli lɛ, Rut kɛ Boaz, niiatsɛ ko ni eshwere yɛ Yuda lɛ bote gbalashihilɛ mli, ni amɛfɔ binuu ni amɛtsɛ egbɛi Obed, ni lɛ ebafee Maŋtsɛ David nii.​—Rut 4:​13-22; Mateo 1:​5, 6.

Mumɔŋ shihilɛ ni tamɔ nɛkɛ haa naanyobɔɔ bafeɔ nɔ ni nɔ kwɔ. Yɛ mɛɛ gbɛ nɔ? Yɛ Rut kɛ Naomi gbɛfaŋ lɛ, amɛyi enyɔ lɛ fɛɛ ji Yehowa, “Nyɔŋmɔ musuŋtsɔlɔ kɛ durolɔ ni toɔ etsui shi ni mɔbɔnalɛ kɛ anɔkwale fa pii” lɛ jalɔi. (2 Mose 34:⁠6) “Nyɔŋmɔ lɛ suɔmɔ ni” ni kɛji akɛ wɔkɛ anɔkwayeli ja lɛ yɛ mumɔ kɛ anɔkwale mli lɛ, wɔbaada yɛ suɔmɔ mli kɛha lɛ kɛ nanemɛi bɔɔ nii krokomɛi. (1 Yohane 4:8; Yohane 4:24) No hewɔ lɛ, wɔtsakeɔ. Wɔnyaa mɛi krokomɛi ahe tamɔ nanemɛi, titri lɛ mɛi ni he jɔ, wekui fɛɛ amli mɛi ni naa nɔ. Mɛi ni susuɔ amɛ pɛ amɛhe lɛ batsɔɔ mɛi ni efeee nakai dɔŋŋ. Pɛsɛmkunyatsɛmɛi tsɔɔ mɛi ni susuɔ mɛi krokomɛi ahe. Wɔjeɔ shishi wɔjieɔ Nyɔŋmɔ mumɔ lɛ yibii lɛ kpo​—“suɔmɔ, miishɛɛ, toiŋjɔlɛ, tsuishiŋmɛɛ, mlihilɛ, ekpakpafeemɔ, hemɔkɛyeli, mlijɔlɛ, henɔyeli.”​—Galatabii 5:​22, 23.

Nɛkɛ sui nɛɛ hu yeɔ ebuaa wɔ koni wɔna nyɛmɔ ni he hiaa ni baaha wɔnyɛ wɔkɛ mɛi krokomɛi agbɔjɔmɔi kɛ fatɔɔi ake amɛ​—“jeee kɛyashi shii kpawo, shi, kɛyashi shii nyɔŋmai kpawo kɛ kpawo,” taakɛ Yesu kɛɛ lɛ. (Mateo 18:​21, 22, New World Translation) Naanyobɔɔ fiteɔ yɛ nɛkɛ sane nɛɛ hewɔ. Shi Yesu Kristo shiɛ ni etsu nɔ ni eshiɛ lɛ he nii hu. Kwɛ shii abɔ ni ekɛ sane ke ekaselɔi ni fatɔɔi yɔɔ amɛhe lɛ yɛ amɛnɔtɔmɔi ahewɔ, kɛ Petro po ni kɛ hiɛgbele kwa e-Nuŋtsɔ lɛ!​—Mateo 26:​69-75.

Yɛ nɛkɛ mumɔŋ nɔyaa nɛɛ fɛɛ hewɔ lɛ, mɛi ni wɔkɛ amɛ bɔɔ naanyo lɛ ayi bafaa. Yɛ naagbee lɛ wɔbanaa akɛ wɔbatsɔmɔ nanemɛi aweku agbo ni ebɔle je muu fɛɛ! Wɔnaa hu akɛ wɔnanemɛi nɛɛ asu kɛ baŋ nɔ kwɔlɔ. Akɛ nɔkwɛmɔ nɔ lɛ, Brian ni kpaako eje Yehowa sɔɔmɔ shishi lɛ kaiɔ akɛ etsutsu nanemɛi lɛ ha etsɔ daatɔlɔ, eku ehiɛ eshwie eŋa kɛ ebii anɔ, shi amrɔ nɛɛ lɛ etu ehe eha eweku lɛ kwraa. Ewieɔ enanemɛi heei pii ni yɔɔ hemɔkɛyeli kome lɛ nɔŋŋ yɛ Yehowa mli lɛ ahe akɛ: “Kɛ nɔ ko miigba minaa lɛ, mile akɛ manyɛ matswa amɛteŋ mɔ ko telefon koni eba ni ebaye ebua mi, ni amɛkɛ miishɛɛ yeɔ buaa.”

Kulɛ Alan yɛ nanemɛi ni nɔ ni amɛgbaa he sane nɔŋŋ ji kar kɛ yei. Shi ena akɛ nɛkɛ saji nɛɛ ji “saji ni nɔ ko nɔ ko bɛ mli.” Yɛ be mli ni ebana nanemɛi heei pii lɛ, nanemɛi ni sumɔɔ Yehowa lɛ, bɔ ni amɛjɛɔ amɛsuɔmɔ mli amɛkɛ amɛhe haa diɛŋtsɛ lɛ ha Alan naa kpɛ ehe.

Wɔnanemɛi Kpakpai ni Fe Fɛɛ

Aŋkroaŋkroi nɛɛ kɛ akpekpei abɔ ni yɔɔ jeŋ muu lɛ fɛɛ lɛ feɔ nanemɛi aweku kome ni yeee maŋkwramɔŋ sane, ni nɛkɛ naanyobɔɔ nɛɛ nɔ kwɔ ni etekeɔ maŋ, weku kɛ kwasafoŋ husui​—anɔkwale adesai anyɛmifeemɔ diɛŋtsɛ, taakɛ bɔ ni mra be mli Kristofoi lɛ ji lɛ. (3 Yohane 14) Nakai ekomefeemɔ kpaa lɛ ni gbala Rut kɛ Naomi efee amɛ ekome lɛ hu feɔ nɛkɛ weku nɛɛ ekome, ni no ji Yehowa Nyɔŋmɔ jamɔ krɔŋŋ lɛ. Amɛ fɛɛ amɛkɛ heshibaa kɛ shidaa yɔseɔ akɛ Yehowa kɛ Yesu Kristo ji amɛnanemɛi ni fe fɛɛ.

Shi obaabi akɛ ‘Nyɔŋmɔ kɛ e-Bi lɛ akɛ nanemɛi? Te aaafee tɛŋŋ ni manyɛ mafee enɛ? Ani enɛ jeee henɔwomɔ?’ Ojogbaŋŋ, shi Biblia lɛ kɛɔ akɛ: “Abraham he Nyɔŋmɔ eye, . . . ni atsɛ lɛ akɛ Nyɔŋmɔ shieŋtsɛ.” Mlihilɛ ni esaaa diɛŋtsɛ nɛ. Ni kɛlɛ Yehowa Wiemɔ lɛ kɛɔ akɛ: “Nyɔŋmɔ lɛ ekuɔ hewolɔi anaa, shi heshibalɔi eduroɔ.”​—Yakobo 2:​23; 4:⁠6.

Ekolɛ mɛi komɛi nuɔ he akɛ amɛji eshafeelɔi tsɔ fe bɔ ni hegbɛ ni tamɔ nɛkɛ aaanyɛ atsɔ amɛnɔ. Shi Yakobo yaa nɔ ekɛɔ akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ. Nyɛtsuua nyɛniji ahe, nyɛ eshafeelɔi, ni nyɛha nyɛtsuii ahe atsea, nyɛ jwɛŋmɔ enyɔnyɔtsɛmɛi Nyɛbaa nyɛhe shi yɛ Nuŋtsɔ lɛ hiɛ, ni eeewo nyɛnɔ.”​—Yakobo 4:​8, 10.

Yesu kɛɛ: “Kɛji nyɛfee nii ni miwoɔ nyɛhe kita lɛ, no lɛ mishieŋtsɛmɛi ji nyɛ.” Ni etsɔɔ hu akɛ kitai lɛ ateŋ nɔ ni da fe fɛɛ ji ni wɔkɛ wɔtsui, susuma kɛ jwɛŋmɔ fɛɛ asumɔ Yehowa Nyɔŋmɔ kɛ wɔnanemɛi tamɔ wɔ diɛŋtsɛ wɔhe. (Yohane 15:​14; Mateo 22:​37-40) Kɛ wɔfee nakai lɛ, wɔbaana nanemɛi kpakpai babaoo. Agbɛnɛ wɔhe baasa kɛha hegbɛ kroko ni da​—naanɔ wala yɛ shikpɔŋ ni atsuu nɔ lɛ nɔ yɛ Maŋtsɛyeli lɛ shishi. (Mateo 6:​9, 10) Taakɛ Yesu kɛɛ lɛ: “[Yehowa] ekita lɛ naanɔ wala ni.”​—Yohane 12:⁠50.

Ani obaaŋmɛ gbɛ ni Yehowa Odasefoi aye abua bo? Akɛ gbɔmɛi ni ji nanemɛi kpakpai diɛŋtsɛ lɛ, amɛmiisumɔ ni amɛbasara bo ni amɛkɛ bo asusu sane ni he hiaa nɛɛ he yaka ni amɛheee bo nɔ ko. Amɛbaanyɛ amɛye amɛbua bo ni ona nanemɛi kpakpai babaoo.

[Akrabatsa ni yɔɔ baafa 6]

Gbɛtsɔɔmɔi Komɛi Kɛha Naanyobɔɔ Kpakpa

Halamɔ mɛi ni okɛ amɛ bɔɔ Iɛ amli.

Na mɛi krokomɛi ahe miishɛɛ, ni feemɔ toibolɔ kpakpa.

Nyɛfea nii kutuu yɛ ekomefeemɔ mli​—niiashikpamɔi ni agbaa atsɔɔ Iɛ wajeɔ naanyobɔɔ.

Ha onɔ fɛɛ nɔ afee faŋŋ, ni oye anɔkwale yɛ be fɛɛ mli.

Na henumɔ kɛ mɔbɔnalɛ kɛ haomɔ ba mɛi krokomɛi anɔ.

Kɛ nanemɛi tɔ aloo amɛha ohao lɛ, okɛ sane ake​—kɛyashi “shii nyɔŋmai kpawo kɛ kpawo.”​—Mateo 18:⁠22.

Kɛ agbe nanemɛi ahe guɔ aloo akɛ amɛ yeee yɛ gbɛ ni ja nɔ lɛ, ye anɔkwale ni ofa amɛhe.

Yehowa jamɔ ni nyɛ fɛɛ nyɛkɛ nyɛhe woɔ mli Iɛ wajeɔ naanyobɔɔ.

[Mfoniri ni yɔɔ baafa 7]

Rut shiŋ Naomi ejaakɛ amɛnaayobɔɔ lɛ damɔ mumɔŋ shishitoo nɔ. Ani oyɛ nanemɛi kpakpai ni tamɔ nɛkɛ?