Wɔ Diɛŋtsɛ Wɔgbɛnaa Nii lɛ He Jatsu lɛ ni Wɔɔtere
1 Gbɛnaa nii he susumɔ lɛ bafeɔ tamɔ jatsu ko ni tsii ni ka gbɔmɛi anɔ ŋmɛnɛ. Mɛi pii kuɔ amɛhiɛ amɛshwieɔ nɔ. Nɔ ni jɛɔ mli baa ji akɛ, wumɛi shiɔ amɛŋamɛi, nyɛmɛi kwaa amɛbii, obalaŋtai kpaa skulyaa, ni maŋbii joɔ toowoo naa foi. Kɛ wɔɔto gbɛnaa nii ni atsuuu he nii nɛɛ naa lɛ wɔɔya nɔ babaoo. Mɔ ni tsuɔ egbɛnaa nii ahe nii ji mɔ ko ni anyɛɔ akɛ he fɔɔ enɔ. ni esumɔɔ ni enyɛɔ ejieɔ enaa hu yɛ nibii ni efeɔ lɛ ahe. No hewɔ lɛ, Nyɔŋmɔ Wiemɔ lɛ jajeɔ faŋŋ yɛ Kristofoi ahe akɛ “mɔ fɛɛ mɔ aaatere lɛ diɛŋtsɛ ejatsu.” (Gal. 6:5) Kwɛ bɔ ni esa jogbaŋŋ akɛ kpokpaa nɔ kpee ni abaafee yɛ 1992 sɔɔmɔ afi lɛ mli lɛ yitso ji “Wɔ Diɛŋtsɛ Wɔgbɛnaa Nii lɛ He Jatsu lɛ ni Wɔɔtere”! Akɛ ehe otii ni he hiaa lɛ baaha yɛ sɛɛ mli. Esa akɛ mɔ fɛɛ mɔ ato egbɛjianɔ jogbaŋŋ ni eya.
2 Nɛkɛ kpokpaa nɔ kpee he gbɛjianɔtoo fɛfɛo nɛɛ baatsɔɔ gbɛnaa nii sɔrɔtoi ni wɔteŋ mɔ fɛɛ mɔ yɔɔ akɛ Kristofoi lɛ mli faŋŋ kɛtsɔ wiemɔi, nɔkwɛmɔ nii, niiashikpamɔi, kɛ sanegbaai anɔ. Gbɛjianɔtoo lɛ hu kɛ wiemɔi ejwɛ ni tsara nɔ baaha ni ebaatsɔɔ bɔ ni wɔɔfee wɔkɛ miishɛɛ atsu wɔgbɛnaa nii lɛ ahe nii. Gbɛnaa nii ka wɔ obalaŋtai lɛ anɔ ni sa akɛ amɛtsu he nii, ni ato wiemɔi lɛ ateŋ ekome he gbɛjianɔ pɔtɛɛ aha amɛ. Taakɛ afɔɔ feemɔ lɛ, abaaha mɛi heei ni ejɔɔ amɛhe nɔ lɛ hegbɛ koni amɛkɛna baptisimɔ. Esa akɛ mɛi fɛɛ ni toɔ amɛgbɛjianɔ ni abaptisi amɛ yɛ kpokpaa nɔ kpee lɛ shishi lɛ aha onukpai asɛinɔtalɔ lɛ ale kɛtsɔ hiɛ bɔni afee ni anyɛ ato he gbɛjianɔ.
3 Agbenɛ wiemɔi ejwɛ kroko hu ni tsara nɔ baawie wɔ Kristofoi agbɛnaa nii ni ka wɔnɔ akɛ wɔshiɛ lɛ he. Kɛkɛ lɛ, maŋshiɛmɔ ni yitso ji “Nyɔŋmɔ Jeŋ Hee Lɛ—Namɛi Abaakpɛlɛ Amɛnɔ ni Amɛbote Mli?” lɛ hu yɛ. Ha ohiɛ ahi ohe nɔ ni ofɔ mɛi fɛɛ ni yɔɔ he miishɛɛ yɛ anɔkwale mli lɛ anine ni amɛbabo wiemɔ nɛɛ toi.
4 Wɔ fɛɛ wɔbaasumɔ ni wɔto wɔ gbɛjianɔ ni wɔnyɛ wɔya koni wɔna nɛkɛ kpokpaa nɔ kpee he gbɛjianɔtoo fɛfɛo nɛɛ he sɛɛ. Onukpai lɛ baatswa nyɛ adafi yɛ ehe otii krokomɛi ni eshwɛ lɛ ahe. Bɔɔ mɔdɛŋ waa ni onyɛ oya.