Ani Okɛ Ohe Baawo Trukaa Odaseyeli Mli Yɛ Hegbɛ Fɛɛ Hegbɛ Ni Sa Mli?
1 Nɔ ni fata wɔ daa gbi shihilɛ mli nifeemɔi ahe hu ji bei pɔtɛɛ kɛha Yehowa he sane ni wɔkɛ mɛi krokomɛi gbaa. Wɔtoɔ be ni wɔkɛyeɔ odase fɛɛ kɛjɛɔ shia kɛyaa shia, ni wɔyaa sɛɛsaramɔi ni wɔfeɔ Biblia mli nikasemɔi. Shi kɛlɛ, bei krokomɛi babaoo yɛ ni wɔbaanyɛ wɔkɛ gbɔmɛi agba anɔkwale lɛ he sane trukaa. Wɔtsɛɔ nɛkɛ shiɛmɔ nɛɛ akɛ trukaa odaseyeli.
2 Shiɛlɔi komɛi taoɔ hegbɛi babaoo koni amɛkɛ amɛhe awo nɛkɛ sɔɔmɔ nitsumɔ nɛɛ mli. Wɔ fɛɛ wɔbaanyɛ wɔbɔ mɔdɛŋ ni wɔhiɛ ahi wɔhe nɔ yɛ bei ni tamɔ nɛkɛ he, akɛ nɔkwɛmɔ nɔ lɛ, yɛ nugbɔnɛmɔ be lɛ mli, beni wɔfaa gbɛ, loo wɔtee hejɔɔmɔ, kɛ beni wɔtee wɔwekumɛi asaramɔ. Ani obaatsu hegbɛi ni onaa kɛhaa trukaa odaseyeli lɛ he nii be fɛɛ be?
3 Tsɔ Hiɛ Osaa Ohe: Hesaamɔ kɛ nibii ahe ni wɔɔtsɔ hiɛ wɔsusu lɛ baaye abua wɔ ni wɔye odase trukaa ni emɔ shi. Yɛ enɛ gbɛfaŋ lɛ, awaje wɔ jogbaŋŋ kɛ woji sɔrɔtoi babaoo koni eye ebua wɔ ni wɔnyɛ wɔfee enɛ. Kɛfata Buu-Mɔɔ kɛ Awake! lɛ he lɛ, wɔyɛ dɛhiɛmɔ woji babaoo ni kɔɔ saji otii ni kanyaa niiahesusumɔ he, ni abaana he miishɛɛ. Woji bibii yɛ ni gbɔmɛi ni jɛ shihilɛi kɛ jamɔi sɔrɔtoi fɛɛ amli naa he miishɛɛ. Wɔyɛ woji bibii hu ni anyɛɔ akɛwoɔ kotoku mli ni wieɔ saji babaoo ni afɔɔ hesusumɔ ŋmɛnɛ lɛ ahe. Mɛɛ woji kɛ nitsumɔ yɔɔ mlɛo kɛha nyɛ? Nyɛsusua enɛ he akɛ weku. Kɛkɛ lɛ nyɛtia nɔ ni nyɛbaakɛɛ kɛji hegbɛ ba lɛ mli nyɛkwɛa.
4 Beni Otee Hejɔɔmɔ: Be ni hi jogbaŋŋ kɛha trukaa odaseyeli ji beni wɔtee hejɔɔmɔ. Ani ooto gbɛjianɔ ni okɛ kɔɔyɔŋ lɛlɛ, oketeke, aloo bɔs afa gbɛ? No lɛ okɛ Biblia kɛ woji ni wɔtsi ta yɛ yiteŋgbɛ lɛ eko aya. Kɛji wɔmiikane woji nɛɛ ekomɛi yɛ tsɔne mli beni wɔkɛ mɛi krokomɛi faa gbɛ lɛ, bei pii lɛ eteɔ sanegbaa shi. Kɛji okɛ tsɔne miifa gbɛ lɛ, susumɔ he akɛ mɛni obaanyɛ okɛɛ kɛji oyawa yɛ he ni ahɔɔ pɛtrol yɛ aloo niyeli he aloo beni oyato hotel ko lɛ. Obaanyɛ ohiɛ dɛhiɛmɔ woji fioo ko yɛ odɛŋ kɛha nɛkɛ bei nɛɛ, koni okɛha mɛi ni yɔɔ wiemɔ lɛ he miishɛɛ. Kɛji oyɛ gbɛjegbɛ wulu nɔ hejɔɔmɔ he ko ni jɛmɛ yɔɔ fɛo jogbaŋŋ lɛ, ekolɛ obaanyɛ oje odaseyeli shishi kɛtsɔ sanebimɔ nɛɛ nɔ, akɛ: “Ani efeŋ miishɛɛ diɛŋtsɛ kɛji jeŋ muu lɛ fɛɛ tamɔ biɛ?” Ni kɛji ŋshɔnaa loo hiɛtserɛjiemɔ he fɛfɛo ko hu nyɛyɔɔ lɛ, obaanyɛ okɛ hiɛkpamɔ wiemɔ ni tamɔ enɛ atsu nii.
5 Yɛ Be Fɛɛ Be Mli: Kɛji wɔhiɛ yɛ wɔhe nɔ yɛ trukaa odaseyeli he lɛ, wɔbaana akɛ hegbɛi pii gbeleɔ ehaa wɔ beni wɔnanemɛi basaraa wɔ yɛ shia, aloo beni wɔyasaraa amɛ, beni wɔkɛ wɔkuuŋbii gbaa sane, beni wɔjɔɔ wɔhe yɛ nitsumɔ he, dani wɔɔje nitsumɔ shishi aloo yɛ nitsumɔ kpamɔ sɛɛ, yɛ jara nɔ, yɛ skul, kɛ hei krokomɛi. Kɛji wɔtee kpokpaa nɔ kpeei loo gbi kome kpeei lɛ, wɔnaa hegbɛi babaoo hu kɛhaa trukaa odaseyeli yɛ bɔs kɛ tsɔne shidaamɔ hei, niyeli hei kɛ shwapoi amli, kɛ hei ni tamɔ nakai.
6 Ekolɛ nugbɔnɛmɔ be lɛ kɛ naagbai pɔtɛɛ komɛi baaba yɛ wɔ odaseyeli yɛ gbɛ tɛɛ nɔ lɛ gbɛfaŋ. No hewɔ lɛ, nyɛkahaa wɔkua wɔhiɛ wɔshwiea hegbɛi ni wɔnaa ni wɔkɛaaye odase trukaa lɛ anɔ. Nɛkɛ shiɛmɔ gbɛ nɛɛ woɔ yibii babaoo, ni esa akɛ Yehowa webii kɛ amɛhe awo mli. Taakɛ eji yɛ Yesu gbɛfaŋ lɛ, eba akɛ suɔmɔ ni wɔyɔɔ wɔhaa wɔnanemɛi adesai lɛ baatsirɛ wɔ ni wɔwie yɛ be fɛɛ be ni sa mli!—Mat. 5:14-16.