Yaa Nɔ Otsɔse Ohe Kɛ Nyɔŋmɔ Jamɔ Hetuu-Kɛhamɔ Akɛ Oti Ni Ma Ohiɛ
1. Teokrase Sɔɔmɔ Skul lɛ yaa nɔ etsɔseɔ wɔ daa koni ‘wɔnyɛ wɔja anɔkwale wiemɔ lɛ mli pɛpɛɛpɛ.’ (2 Tim. 2:15) Ani oŋma ogbɛi yɛ mli? Kɛ ofeko nakai, ni ohe esa hu lɛ, mɛni hewɔ onaaa nɛkɛ gbɛjianɔtoo fɛfɛo nɛɛ he sɛɛ kɛtsɔ ogbɛi ni oooŋma amrɔ nɛɛ nɔ?
2 Skul lɛ mli nifeemɔ titri ko ji daa otsi Biblia kanemɔ he gbɛjianɔ ni ato lɛ. Esa akɛ akɛ Biblia yitsei ni ato akɛ wɔkane lɛ afata bo diɛŋtsɛ onikasemɔ gbɛjianɔtoo he koni yɛ be ni sa mli lɛ onyɛ okane Biblia muu lɛ lɛɛ ogbe naa.
3 Kɛjɛ 1993 skul gbɛjianɔtoo lɛ nɔ kɛyaa lɛ, abaakane Biblia ŋmalɛ kanemɔ ni akɛha Wielɔ 2 lɛ fɛɛ, ni awieŋ kɛfolɔŋ teŋ beni nikanemɔ lɛ bako enaagbee. Enɛ tsɔɔ akɛ nikaselɔ ni tsuɔ nɛkɛ wiemɔ nɛɛ he nii lɛ kɛ esane mligbalamɔi lɛ baaha yɛ ehiɛkpamɔ loo enaamuu wiemɔi lɛ pɛ mli. Esa akɛ nyɛminuu ni akɛ Biblia kanemɔ lɛ mli otii ahesusumɔ eha lɛ lɛ awie kukuji ni akɛha Wielɔ 2 lɛ be kuku kɛkɛ, bɔni afee ni wielɔ ni baatsu enɛ he nii lɛ anyɛ awie otii ni ehala yɛ Biblia kanemɔ lɛ mli lɛ ahe jogbaŋŋ.
4 Skul nɔkwɛlɔ lɛ baakadi Wiemɔ He Ŋaawoo wolo lɛ nɔ yɛ mɛi ni haa Wiemɔi 2, 3, kɛ 4 lɛ agbɛfaŋ. Akpaaa gbɛ akɛ ebaanyiɛ bɔ ni ato naa yɛ ŋaawoo wolo lɛ nɔ lɛ sɛɛ pɛpɛɛpɛ, shi ebaanyɛ ekɛ ŋaawoo aha yɛ otii pɔtɛɛ komɛi ni ehe hiaa ni nikaselɔ lɛ aya hiɛ yɛ mli lɛ ahe. (Kwɛmɔ Theocratic Ministry School Guidebook hee lɛ, baafa 100, kuku 4.) KADIMƆ: Ehe ehiaaa ni akadi wielɔ ni tsuɔ Nifeemɔ 1 he nii lɛ ŋaawoo wolo lɛ nɔ, shi kɛlɛ abaanyɛ akɛ ŋaawoo aha yɛ teemɔŋ kɛ ehe mihia.
5 Esa akɛ mɛi fɛɛ ni he esa lɛ aŋɔ hegbɛ lɛ ni amɛkɛ mumɔŋ nibii fɛɛ ni Yehowa eto he gbɛjianɔ, ni Teokrase Sɔɔmɔ Skul lɛ mli tsɔsemɔ fata he lɛ atsu nii kɛmɔ shi. Tsɔsemɔ ni tamɔ nɛkɛ baanyɛ aha wɔsɔɔmɔ lɛ awo yibii babaoo.—1 Tim. 4:7.