Kpeeyaa—Eji Gbɛnaa Nii ni Hiɛdɔɔ Yɔɔ Mli
1 Te okɛ hiɛdɔɔ susuɔ kpeeyaa he ohaa tɛŋŋ? Enɛ ji sanebimɔ ko ni akɛpɛiɔ sane mli akwɛɔ, aloo jeee nakai? Ŋwanejee ko bɛ he akɛ wɔteŋ mɛi pii nuɔ he akɛ wɔhiɛ sɔɔ kpeei sɔrɔtoi lɛ jogbaŋŋ. Shi kɛlɛ, amaniɛbɔi sɔrɔtoi tsɔɔ akɛ kpeeyaa eba shi yɛ asafoi babaoo mli nyɛsɛɛ nɛɛ. Mɛni baanyɛ afee nɔ ni kɛ enɛ ba? Ani wɔteŋ mɛi komɛi miiŋmɛɛ amɛhe kɛmiiha nii ni atsuɔ beni akpa nitsumɔ sɛɛ lɛ he kaa lɛ daa, aloo wɔhaa tɔlɛ, shi̇̃a nitsumɔ, gbɔmɔtsoŋ hela fioo, loo kɔɔyɔŋ tsakemɔ ni woɔ wɔhe gbeyei fioo ko lɛ bajeɔ gbɛnaa nii ni ka wɔnɔ akɛ wɔya kpeei sɔrɔtoi daa lɛ mli? (5 Mose 31:12) Akɛni enɛ ji Ŋmalɛ mli taomɔ nii hewɔ lɛ, esa akɛ wɔteŋ mɔ fɛɛ mɔ kɛ sɔlemɔ asusu sanebimɔ nɛɛ he akɛ, Te Mikɛ hiɛdɔɔ susuɔ kpeeyaa ni Asafo Woloŋ Nikasemɔ fata he lɛ he mihaa tɛŋŋ?
2 Wɔnyɛmimɛi lɛ ateŋ mɛi komɛi kɛ ŋmɛlɛtswai abɔ nyiɛɔ gbɛjegbɛi kɛ amɛnɔ mului babaoo lɛ anɔ ni amɛfoɔ faai ni baai hiɔ mli lɛ bɔni afee ni amɛya kpeei sɔrɔtoi lɛ. Ekolɛ anɔkwafoi komɛi yɛ asafo ni oyɔɔ mli lɛ mli “ni anaa amɛ daa” yɛ gbɔmɔtsoŋ helai ni mli wawai, kpá ni aje, nitsumɔ mli gbɛnaa nii ni tsii yɛ amɛnitsumɔ he, loo nitsumɔ ni heɔ be babaoo yɛ skul lɛ fɛɛ sɛɛ. (Luka 2:37, NW) Mɛni hewɔ amɛbɔɔ mɔdɛŋ amɛyaa lɛ? Ejaakɛ amɛle akɛ amɛnyɛŋ amɛye naagbai ni yaa nɔ yɛ jeŋ ni nɔnyɛɛ eyi mli obɔ nɛɛ mli lɛ anɔ kunim yɛ amɛ diɛŋtsɛ amɛ hewalɛ naa. Esa akɛ amɛkɛ amɛhe afɔ hewalɛ ni Nyɔŋmɔ kɛhaa lɛ nɔ.—2 Kor. 12:9, 10.
3 Ŋmɛnɛ, wɔnyiɛ okadi ni mra be mli Kristofoi ni kpeɔ daa amɛsɔleɔ, amɛgbaa niiashikpamɔi, ni amɛkaseɔ Nyɔŋmɔ Wiemɔ lɛ to amɛfɔ shi lɛ sɛɛ pɛpɛɛpɛ. (Bɔf. 4:23-30; 11:4-18; Kol. 4:16) Wɔ nine shɛɔ tsɔsemɔ ni jɛɔ Biblia gbalɛ kɛ tsɔɔmɔ mli lɛ nɔ, kɛ agbɛnɛ tsɔsemɔ ni kɔɔ nyɔŋmɔjamɔ mli subaŋ kɛ Kristofoi ajeŋba he lɛ nɔ, kɛfata ŋaawoo ni yɔɔ ebe naa pɛpɛɛpɛ ni tsɔɔ bɔ ni wɔɔfee wɔha wɔshihilɛi aya hiɛ amrɔ nɛɛ lɛ he kɛtsɔ Ŋmalɛ mli shishitoo mlai ni akɛaatsu nii jogbaŋŋ lɛ nɔ. (1 Tim. 4:8) Kɛfata he lɛ, akaiɔ wɔ daa yɛ wɔ hiɛnɔkamɔ lɛ he akɛ abaajie naagbai kɛ nɔnaa fɛɛ kɛya gbi ko. Ehe miihia ni wɔha hiɛnɔkamɔ nɛɛ afee ehee be fɛɛ be.—Heb. 6:19.
4 Te oweku lɛ kɛ hiɛdɔɔ susuɔ kpeeyaa he amɛhaa tɛŋŋ? Ani eji nyɛ gbɛjianɔtoo lɛ fa taakɛ eji kɛha niyeli be loo je lɛ mli nitsumɔ ko lɛ pɛpɛɛpɛ? Kɛ shɛ kpeeyaa gbii lɛ, ani onaa akɛ osusuɔ saji he akɛ oya loo okaya kpee lɛ, aloo kɛha nyɛ shiabii lɛ nyɛnyɛmimɛi ni nyɛkɛ amɛ aaabɔ daa lɛ ji nɔ ni ahalaa efeemɔ kɛji aasumɔ? Shiɛlɔi babaoo kaiɔ amɛfɔlɔi ni amɛjɔɔ amɛhe nɔ lɛ anɔkwɛmɔ nii yɛ be mli ni amɛdaraa lɛ. Onukpa ko jɛɔ suɔmɔ mli ekaiɔ nɛkɛ akɛ, “Nɔ kome ni Dada feɔ ji akɛ ebɔɔ mɔdɛŋ ekwɛɔ be fɛɛ be koni weku lɛ mlibii aya kpeei sɔrɔtoi lɛ. Kɛ mɔ ko he miiye lɛ, wɔteŋ mɔ kome kɛ lɛ hiɔ shia, shi mɛi krokomɛi lɛ yaa kpee lɛ!”
5 Wɔbaasusu sɛɛnamɔ ni yɔɔ asafoŋ kpee lɛ fɛɛ eko he yɛ Wɔ Maŋtsɛyeli Sɔɔmɔ sɔrɔtoi ni baanyiɛ sɛɛ aba lɛ amli bɔni afee ni wɔkɛye wɔbua ni wɔtswa hiɛsɔɔ ni aaana yɛ mumɔŋ niyenii sɔrɔtoi nɛɛ ahe lɛ wɔma shi. Nɔ ni baafata nikasemɔi lɛ ahe ji kaimɔi ni yeɔ buaa kɛha mɛi ni kwɛɔ kpeei sɔrɔtoi lɛ anɔ lɛ, kɛ ŋaawoi hu ni wɔ fɛɛ wɔbaanyɛ wɔkɛtsu nii yɛ be mli ni wɔsaa wɔhe kɛhaa kpee lɛ ni wɔkɛ wɔhe woɔ mli lɛ hu. Mɛni hewɔ ni nyɛtaaa shi akɛ weku koni nyɛkɛ sɔlemɔ asusu bɔ ni nyɛ gbɛjianɔtoo ji kɛha kpeeyaa lɛ he? No sɛɛ lɛ nyɛfea tsakemɔi fɛɛ ni he baahia yɛ gbɛjianɔ ni nyɛto lɛ mli. Kpeeyaa daa lɛ ji wɔ teokrase tsɔsemɔ lɛ fa ko ni he hiaa waa ni esa akɛ akɛ hiɛdɔɔ babaoo atsu enɛ he nii diɛŋtsɛ.