Skulkpamɔ Sɛɛ Nifeemɔi

Yehowa Odasefoi heɔ yeɔ akɛ babaoo yɛ shihilɛ mli fe nikasemɔ kɛ nitsumɔ kɛkɛ. Kpɔiaŋgbɔlemɔ ko kɛ hejɔɔmɔ ko yɛ skul haa mɔ naa mumɔ kɛ hewalɛ hee ni he hiaa lɛ. Shi, ekolɛ obaana akɛ Odasefoi obalaŋtai pii kɛ amɛhe wooo skulkpamɔ sɛɛ nifeemɔi ni skul sɔrɔtoi toɔ he gbɛjianɔ lɛ amli. Enɛ mligbalamɔ kuku baaye abua bo ni onu bɔ ni wɔkwɛɔ enɛ wɔhaa lɛ shishi jogbaŋŋ.

Odasefoi awekui miitiu nifeemɔ he gbɛjianɔtoo ko ni kɔɔ amɛjamɔ he lɛ sɛɛ. Ni awoɔ fɔlɔi ahewalɛ akɛ amɛkɛ amɛhejɔɔmɔ awo gbɛjianɔ ni ato aha weku lɛ mli. Kɛ fɔlɔi to amɛbii ahejɔɔmɔ kɛ amɛhiɛtserɛjiemɔ he gbɛjianɔ ni amɛkɛ amɛ fɛɛ na mli gbɛfaŋnɔ kutuu lɛ, amɛkwɛɔ amɛ jogbaŋŋ.

Yɛ bei komɛi amli lɛ, Odasefoi awekui komɛi buaa amɛhe naa kutuu amɛnaa hiɛtserɛjiemɔi sɔrɔtoi amli ŋɔɔmɔ. Agbɛnɛ amɛfaa gbɛ shii abɔ yɛ afi fɛɛ afi mli amɛyaa henaabuamɔi wuji ni atsɛɔ amɛ akɛ kpokpai bibii kɛ kpokpai wuji anɔ kpeei ashishi. Nɛkɛ gbɛfai nɛɛ kɛ amɛ yaa blema nibii atoohei, yinɔsane mli maji kɛ hei krokomɛi ni anaa kusum nibii yɛ lɛ yɛ bei komɛi amli. Yɛ nɛkɛ henaabuamɔi nɛɛ ashishi lɛ, Odasefoi obalaŋtai kɛ obalaŋtai krokomɛi ni jɛ maŋ lɛŋ hei sɔrɔtoi ni hiɛ yiŋtoo kome kɛha amɛ-Nyɔŋmɔ, Yehowa sɔɔmɔ lɛ kpeɔ ni amɛnaa naanyobɔɔ mli ŋɔɔmɔ.

Wɔbuɔ enɛ akɛ ehe hiaa ni wɔ obalaŋtai lɛ ana naanyobɔɔ kpakpa nɛɛ mli ŋɔɔmɔ ni titri lɛ, yɛ bɔ ni adesa jeŋba mli tɛi ni afolɔ ashwie shi lɛ fiteɔ ŋmɛnɛ lɛ hewɔ. Yehowa Odasefoi kɛ hiɛdɔɔ boɔ Biblia mli kɔkɔbɔɔ nɛɛ toi: “Naanyobɔɔ fɔŋ fiteɔ jeŋba kpakpa.” Ni taakɛ bɔ ni wɔle momo lɛ, wɔbɔɔ mɔdɛŋ koni wɔye Kristo wiemɔ ni ewie etsɔɔ esɛɛnyiɛlɔi nɛɛ nɔ: “Nyɛjɛɛɛ je lɛŋ.” (1 Korintobii 15:33; Yohane 15:19) Nakai shishitoo mlai lɛ kudɔɔ Odasefoi awekui asusumɔ yɛ skulkpamɔ sɛɛ nifeemɔi ni nyiɛ sɛɛ nɛɛ amli:

Kpɔiaŋgbɔlemɔ: Gbɔmɔtso lɛ he mɔdɛŋbɔɔ tamɔ wɔhe ni wɔkɛwoɔ kpɔiaŋgbɔlemɔ mli lɛ hi kɛha wɔ. Shi Biblia lɛ kɛ sane nɛɛ to gbɛhe ni ja beni ekɛɛ akɛ: “Okɛ hetuu kɛ Nyɔŋmɔjamɔ hamɔ atsɔse ohe akɛ oti ni ma ohiɛ. Ejaakɛ gbɔmɔtso lɛ he mɔdɛŋbɔɔ he sɛɛnamɔ faaa; shi hetuu kɛ Nyɔŋmɔjamɔ hamɔ he yɛ sɛɛnamɔ yɛ nibii fɛɛ mli. (1 Timoteo 4:7, 8, New World Translation) Yɛ ŋaawoo nɛɛ nɔ yeli mli lɛ, Yehowa Odasefoi ahiɛ sɔɔ sɛɛnamɔ ni yɔɔ gbɔmɔtso lɛ he mɔdɛŋbɔɔ mli nikasemɔi ni afeɔ yɛ skul lɛ.

Shi yɛ nakai beaŋ nɔŋŋ lɛ, fɔlɔi ni ji Odasefoi nuɔ he akɛ skul sɔrɔtoi maa kpɔiaŋgbɔlemɔ nɔ mi babaoo tsɔ. No hewɔ lɛ, yɛ amɛbii lɛ atsɔsemɔ mli lɛ, amɛhaa amɛbii lɛ kɛ hiɛshikamɔ tsuɔ nii yɛ akaŋshii mli kunimyeli ni amaa nɔ mi babaoo lɛ mli. Amɛhiɛ ka nɔ akɛ amɛ obalaŋtai lɛ baasumɔ ni amɛtiu nitsumɔ ko sɛɛ wɔsɛɛ, jeee akɛ akaŋshilɔi, shi moŋ, akɛ Nyɔŋmɔ sɔɔlɔi. No hewɔ lɛ, Odasefoi fɔlɔi woɔ amɛbii aŋaa ni amɛkɛ be ni amɛyeɔ yɛ skulkpamɔ sɛɛ lɛ atiu mumɔŋ nibii asɛɛ titri moŋ fe nɔ ni amɛaabɔ mɔdɛŋ yɛ kpɔiaŋgbɔlemɔ ko mli.

Wɔheɔ wɔyeɔ akɛ, he ni akɛaawo kpɔiaŋgbɔlemɔ ni ato he gbɛjianɔ mli lɛ baagbala Odasefoi obalaŋtai awo naanyobɔɔ fɔŋ mli. Agbɛnɛ wɔnuɔ he akɛ akaŋshii mumɔ ni yɔɔ ŋmɛnɛŋmɛnɛ beaŋ kpɔiaŋgbɔlemɔ mli—jwɛŋmɔ ni ahiɛ akɛ ‘kunim ni aaaye lɛ jeee nɔ fɛɛ nɔ, shi moŋ, NO JI NƆ KOME PƐ’—lɛ yeɔ awui. No hewɔ lɛ, kɛ Odasefoi obalaŋtai nuɔ he akɛ esa ni amɛna hejɔɔmɔ ni fa lɛ, amɛfɔlɔi woɔ amɛ ŋaa ni amɛtao enɛ yɛ amɛnanemɛi heyelilɔi ateŋ, hɛɛ, “mɛi ni tsɛɔ Nuŋtsɔ lɛ kɛjɛɔ tsui ni mli tse mli lɛ.”—2 Timoteo 2:22.

MIISHƐJELƆ HIƐNYIƐLƆ KƐ MAŊNYƐ NI BAA SHIA: Yɛ akaŋshii nifeemɔi amli lɛ, gbɛnaa nii ka hiɛtserɛjielɔi lɛ anɔ akɛ amɛwo nikwɛlɔi lɛ ayiŋ ni amɛwo skul lɛ hewalɛ. Agbɛnɛ amɛwoɔ gbɔmɛi ekaa ni aja mɛi ni eye kunim lɛ ni amɛnyiɛɔ amɛhiɛ kɛdamɔɔ shi ahaa skul lala ni alaa lɛ. Yehowa Odasefoi buɔ enɛ akɛ esaaa. Nakai nɔŋŋ hu, wɔnuɔ he akɛ ni Odasefonyo obalaŋta aaafee hiɛtserɛjiemɔ aloo hefɛo maŋnyɛ lɛ kuɔ Biblia mli shishitoo mla ni tsɔɔ akɛ esaaa akɛ awoɔ adesa hiɛ nyam bɔ ni esaaa lɛ mli.—Romabii 1:25; Bɔfoi lɛ Asaji 12:21-23.

Skul Jooi: Taakɛ eji yɛ kpɔiaŋgbɔlemɔ he lɛ, joo baanyɛ afee nifeemɔ ni ŋɔɔ ni haa hewalɛ. Eka shi faŋŋ akɛ Yesu Kristo kpɛlɛ nɔ, ni etsi joo ta akɛ nifeemɔ ni fata hiɛtserɛjiemɔi kpakpai ahe yɛ ebɛbua ni kɔɔ bi nyenyeŋtswi lɛ he lɛ mli. (Luka 15:25) Shi, ekolɛ obaakadi akɛ Odasefoi obalaŋtai efɔɔɔ jooi ni skulbii tsɛɔ tamɔ skul gbekɛbii kɛ onukpai ajoo nɛkɛ lɛ ashishi yaa. Mɛni hewɔ?

Nɔ hewɔ titri ji nifeemɔi ni ehiii ni afeɔ yɛ skul jooi ashishi lɛ. Nibii ni afeɔ nɛɛ ekomɛi ji zigaret shɛremɔ, daatɔɔ, tsofai fɔji kɛ bɔlɛnamɔ mli jeŋba shara. No hewɔ lɛ, mɔ ni yaa jooi nɛɛ ashishi lɛ kɛ ehe yawoɔ naanyobɔɔ ni ehiii kwraa mli. Yɛ ŋaawoo akɛ wɔkɛ “mɛi ni tsɛɔ Nuŋtsɔ lɛ kɛjɛɔ tsui ni mli tse mli’’ abɔ lɛ he nitsumɔ mli lɛ, Yehowa Odasefoi kɛfee amɛsubaŋ akɛ amɛaatsi amɛhe kwraa kɛaajɛ skul jooi ahe.

Nuu kɛ Yoo Kpojee ni Tsɔɔ Gbalashihilɛ Hiɛ: Yɛ nyɛsɛɛ nɛɛ, gbɛjianɔ ni nuu kɛ yoo toɔ amɛjeɔ kpo lɛ etsɔ hiɛtserɛjiemɔ yɛ hei sɔrɔtoi pii. Gbekɛbii ni eye aaafee afii nyɔŋma kɛ enumɔ lɛ po kɛ gbekɛbii yei jeɔ kpo. Anaa amɛ yɛ skul ni amɛhiɛ amɛniji amli, amɛshɔɔ amɛnaa, aloo amɛfeɔ nɔ ni fe enɛɛmɛi po. Fɔlɔi ni ji Odasefoi heee yeee akɛ eja gbɛ akɛ amɛbii ni shɛko gbalashihilɛ mlibotemɔ lɛ aaatse amɛhe banee ni amɛkɛ gbekɛbii yei loo hii afee nibii ni yaa nɔ beni nuu kɛ yoo eje kpo lɛ.

Skul Shwɛmɔ Kui: Nikaselɔi ni nyaa nibii komɛi ahe lɛ sumɔɔ ni amɛkɛ amɛhe abɔ akɛ skul shwɛmɔ kui amli bii. Shi efɔɔ kaa akɛ, nɛkɛ shwɛmɔ kui nɛɛ kɛ amɛhe woɔ hiɛtserɛjiemɔi amli titri. Agbɛnɛ ana akɛ nɔ ni jɛɔ shwɛmɔ kui ni akɛ he woɔ mli nɛɛ mli baa ji jeŋba shara. Yɛ nɔ ni baajɛ mli aba nɛɛ hewɔ lɛ, wɔnuɔ he akɛ esa akɛ asusu he jogbaŋŋ dani akɛ he awo skul shwɛmɔ kuu ko mli.

Sanebimɔi ni he hiaa jogbaŋŋ ni Odasefoi obalaŋtai kɛ amɛfɔlɔi baasusu he ji: Ani shwɛmɔ kuu lɛ nifeemɔi yɛ kɛha skul be lɛ pɛ? Ani skul nɔkwɛlɔi lɛ ji mɛi ni kwɛɔ nɔ? Ani shwɛmɔ kuu ni akɛ he woɔ mli nɛɛ baahe skulkpamɔ sɛɛ be ni akɛ weku yeɔ aloo akɛtsuɔ asafo mli nitsumɔi lɛ? Yɛ naagbee lɛ, eji gbɛnaa nii ni ka fɔlɔi ni ji Odasefoi anɔ akɛ amɛto amɛyiŋ yɛ shwɛmɔ kuu aloo skul gbɛjianɔtoo ni amɛsumɔɔ ni amɛbii kɛ amɛhe awo mli lɛ he.

Skul Shwɛmɔi: Yehowa Odasefoi eteee shi amɛwooo enɛ ni mɔ ko aaafee. Biblia drama fata wɔ kpokpaa wulu nɔ kpee he gbɛjianɔtoo lɛ he. Shi fɔlɔi ni ji Odasefoi baasusu nibii sɔrɔtoi komɛi ahe dani amɛto amɛyiŋ akɛ amɛbaaŋmɛ amɛbii agbɛ ni amɛkɛ amɛhe awo skul shwɛmɔ ko mli. Akɛ nɔkwɛmɔ nɔ lɛ, Ani nɔ ni afeɔ yɛ shwɛmɔ lɛ mli lɛ kɛ Biblia shishitoo mlai kpaa gbee? Obalaŋtai ni ji Odasefoi kɛ amɛhe woŋ shwɛmɔ ni kuɔ ehiɛ eshwieɔ jeŋba mli tɛi ni afolɔ ashwie shi ni Biblia guɔ lɛ nɔ lɛ mli. Agbɛnɛ, be ni afiteɔ akɛkaseɔ lɛ hu yɛ kɛ naanyobɔɔ fɔŋ ni enɛ baanyɛ ekɛba lɛ hu. No hewɔ lɛ, beni fɔlɔi toɔ amɛyiŋ yɛ Odasefoi obalaŋtai ni baanyɛ amɛkɛ amɛhe awo shwɛmɔ ko mli aloo dabi lɛ he lɛ, amɛbaasusu saji otii nɛɛ ahe jogbaŋŋ.

La kɛ Nibii Krokomɛi ni Akɛhaa: Yɛ be kɛ bei amli lɛ, abiɔ skul sɔrɔtoi amli nikaselɔi ni amɛkɛ nibii sɔrɔtoi komɛi abaha. Yɛ bei komɛi amli lɛ, abiɔ la ni abaagbala awo mɛi krokomɛi agbɔmɔtso mli. Shi, wɔnuɔ Biblia famɔ akɛ ‘ahi la’ lɛ shishi akɛ esaaa akɛ ayeɔ aloo akɛtsuɔ nii yɛ gbɛ ko nɔ. No hewɔ lɛ, yɛ henilee hewɔ lɛ, wɔkɛ wɔla haaa aloo wɔheee la.—1 Mose 9:4-6; 3 Mose 17:10-14; Bɔfoi lɛ Asaji 15:19, 20, 28, 29.

Yɛ yiŋtoo ni wɔtsɔ hiɛ wɔtsɔɔ mli yɛ wolo bibioo nɛɛ mli hewɔ lɛ, kɛ aabi ni atsu shika ni akɛtsi maŋkwramɔŋ nitsumɔ ko sɛɛ aloo akɛtsu jamɔŋ gbijurɔyeli ko he nii lɛ, Yehowa Odasefoi tsuŋ eko. Wɔkɛ wɔhe wooo loto tsimɔ loo etsemɔ, shade shwɛmɔ aloo asɔshwɛmɔ mli. Shi, hei komɛi yɛ ni mɔ lɛ diɛŋtsɛ baato eyiŋ aha ehe yɛ shihilɛ ni akɛkpe lɛ naa. Akɛ nɔkwɛmɔ nɔ lɛ, kɛ naanyo nikaselɔ ko pila aloo ehe miiye ni aatsu shika ni akɛhe fɔfɔi aloo nikee nii ko aha lɛ lɛ, amɛbaasumɔ ni amɛye amɛbua yɛ enɛ mli bɔ ni amɛbaanyɛ.—Bɔfoi lɛ Asaji 20:35.

[Wiemɔ ni akɔ ni akɛmiitsu nii ni yɔɔ baafa 22]

“Naanyobɔɔ fɔŋ fiteɔ jeŋba kpakpa.”—1 Korintobii 15:33