Ani Ooye Oobua Obi lɛ ni Ehala Yehowa?

“MINU he akɛ Biblia lɛ kasemɔ jeɔ mɔ tsine ni eyɛ tɔlɛ waa hu. Mikpɛ miyiŋ yɛ mitsui mli, yɛ teemɔŋ akɛ kɛ mida lɛ, mifeŋ Yehowa Odasefoi ateŋ mɔ ko,” nɛkɛ ji bɔ ni obalanyo ko wie. Eyɛ mli akɛ wɔhiɛ ka nɔ akɛ yɛ naagbee lɛ, gbekɛbii ni yɔɔ Kristofoi ashiai amli lɛ pii baahala akɛ amɛbaadamɔ Yehowa masɛi moŋ, shi ekolɛ gbekɛbii ni tamɔ lɛ lɛ kɛ shihilɛ ni mli wa baakpe beni amɛhalaa Yehowa akɛ amɛ-Nyɔŋmɔ lɛ.

Bei komɛi lɛ, fɔlɔi naaa nɔmimaa kɛmɔɔɔ shi yɛ bɔ ni amɛaafee amɛkudɔ amɛbii jogbaŋŋ kɛmɔ shi lɛ he. Amɛkɛ amɛhe woɔ susumɔi amlitaomɔ mli waa tamɔ tsɛ ko ni efee yeyeeye, ni wie be ko akɛ: “Yɛ anɔkwale mli lɛ, eshɛɔ bei komɛi ni mikwɛɔ mibii lɛ ahiɛ ni amɛkɛwɔ, beni nijiaŋwujee yaafo nui jwere amɛhiɛ lolo lɛ, ni misusuɔ akɛ ani kulɛ minyɛŋ mana amɛ mɔbɔ fioo fe nɛkɛ.” Ebihii enyɔ lɛ dara ni amɛhala akɛ amɛaasɔmɔ Yehowa.

Shi, gbekɛbii lɛ ekomɛi hu yɛ ni kwaa Yehowa ni amɛshiɔ Kristofoi lɛ ateŋ kɛyaa Satan je lɛ mli. No hewɔ lɛ te fɔlɔi feɔ tɛŋŋ amɛyeɔ omanye yɛ amɛbii lɛ ayelikɛbuamɔ mli koni amɛhala Yehowa? Kɛ wɔɔha nakai sane lɛ hetoo lɛ, klɛŋklɛŋ lɛ, nyɛhaa wɔtaoɔ nɔ hewɔ ni gbekɛbii lɛ ekomɛi shiɔ Yehowa, beni amɛfɔlɔi sumɔɔ waa ni amɛhi emasɛi lɛ.

Nɔ Hewɔ ni Gbekɛbii lɛ Ekomɛi Shiɔ Yehowa Lɛ

Otii titrii lɛ ateŋ ekome hewɔ ji akɛ gbekɛbii lɛ ekomɛi leee Yehowa aloo egbɛ̀i lɛ jogbaŋŋ. Eyɛ mli akɛ akɛ lɛ etee Kristofoi akpeei aahu kɛjɛ egbekɛbiiashi tɔɔ moŋ, shi amɛyaa kɛkɛ akɛ nɔ ko ni aatao ni amɛfee, ni Yehowa taomɔ diɛŋtsɛ ko bɛ mli. (Yesaia 55:6; Bɔfoi lɛ Asaji 17:27) Kristofoi akpeeiyaa jeɔ gbekɛ nuu ni atsi eta kɛje shishi lɛ tsine ejaakɛ enuuu nɔ ni wielɔi ni damɔ wiemɔ kpoku lɛ nɔ lɛ wieɔ lɛ shishi.

Aduɔ anɔkwale dumɔ wui lɛ yɛ mɛi komɛi amli, shi amɛŋmɛɔ gbɛ ni Satan je lɛŋ shihilɛ ni tamɔ nɔ ni ŋmɛɔ nɔ fɛɛ nɔ feemɔ gbɛ, kɛ ninamɔ shihilɛ ni yaa nɔ lɛ lakaa amɛtsuii. Mɛi komɛi nyɛɛɛ amɛkpee henumɔ kɛ suɔmɔ ni mli wa waa, ni amɛnaa akɛ amɛfata amɛtipɛŋfoi lɛ ahe, ni amɛtamɔ amɛ hu lɛ naa kwraa.—1 Kronika 28:9; Luka 8:12-14; 1 Korintobii 15:33.

Shi, gbekɛbii ni yɔɔ Kristofoi ashiai amli yɛ je lɛŋ he fɛɛ he lɛ ateŋ mɛi pii ehala akɛ amɛaadamɔ Yehowa masɛi. Ani nɔ ko yɛ ni abaanyɛ akase kɛjɛ gbɛ kpakpa ni amɛfɔlɔi kɛtsu nii lɛ mli?

Jee Shishi Mra

Gbɛ titri ni oootsɔ nɔ oye obua obii lɛ ni amɛhala Yehowa ji ni oje shishi mra. Yɛ shihilɛi pii amli lɛ, susumɔi ni amɛnaa kɛ nibii ni amɛkaseɔ beni tsui lɛ yɔɔ bibioo lolo ni eheɔ nii ewoɔ mli lɛ baahi shi ewala bei abɔ fɛɛ. (Abɛi 22:6) No hewɔ lɛ jee shishi mra ni ogba gbekɛbii lɛ Yehowa mlihilɛ lɛ, kɛ esuɔmɔ kɛ bɔ ni ehe yɔɔ naakpɛɛ lɛ he sane, ni obɔ mɔdɛŋ akɛ oooha amɛna suɔmɔ amɛha Yehowa kɛ hiɛsɔɔ kɛha nɔ ni Yehowa efee kɛha amɛ lɛ yɛ amɛtsuii amli. Kɛha enɛ feemɔ lɛ, fɔlɔi pii kɛ saji babaoo ni aŋmala ni kɔɔ Yehowa adebɔɔ he, ni anaa yɛ Buu Mɔɔ Asafo lɛ woji lɛ amli lɛ etsu nii yɛ omanyeyeli mli.

Toiboo kɛ bulɛ kɛha Yehowa kɛ ejamɔ lɛ fata sui ni sa akɛ adũ awo amɛmli mra yɛ amɛgbekɛbiiashi lɛ he. Ehaa mɔ tsui nyaa waa akɛ aaana gbekɛbii ni bɔiko skulyaa lɛ yɛ Kristofoi akpeei ashishi ni amɛmiibɔ mɔdɛŋ ni amɛŋmala wiemɔi kukuji yɛ amɛwoji amli, ni amɛkwɛ ŋmalɛi ni atsɛɔ lɛ yɛ amɛ diɛŋtsɛ amɛ Bibliai amli, aloo amɛkɛ amɛfɔlɔi jeɔ kpo kɛyaa ni amɛyafɔɔ amɛhiɛ kɛ nu hɔlɔ kɛji amɛna akɛ wɔ miitao aye amɛ lɛ. Nibii bibii ji enɛɛmɛi, shi kwɛ bɔ ni amɛhe hiaa waa koni amɛha oti nɛɛ aka gbekɛ lɛ jwɛŋmɔ mli akɛ esa akɛ ajie bulɛ kɛ toiboo kpo aha Yehowa!

Esa akɛ aje Biblia mli tsɔsemɔ ni hiɛdɔɔ yɔɔ mli lɛ hu shishi mra. Beni amɛbihii lɛ na afii enyɔ lɛ, gbalashihilɛ mli hefatalɔi komɛi kɛ amɛ bɔi Tsɔɔlɔ Kple lɛ Toibooa wolo lɛ kanemɔ. Sɛɛ mli, beni gbekɛbii lɛ bɔi skulyaa lɛ, amɛteɔ shi mra ni amɛkɛ amɛmami kaseɔ nii daa leebi, kɛjɛɔ My Book of Bible Stories kɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ* woji lɛ amli. Nɔ ni nyiɛɔ enɛ sɛɛ ji gbi lɛ ŋmalɛ lɛ hu hesusumɔ, ni tsɛ lɛ kwɛɔ nɔ, ni amɛfeɔ dani amɛyeɔ nii leebi. Fɔlɔi lɛ amɔdɛŋbɔɔ lɛ he ba sɛɛnamɔ babaoo beni amɛbihii lɛ hala nyɛsɛɛ nɛɛ akɛ amɛaasɔmɔ Yehowa, ni amɛfee amɛhenɔjɔɔmɔ lɛ he okadi kɛ nu mli baptisimɔ beni amɛye afii 10 kɛ 11 lɛ.

Obalanyo fɛfɛo ko ni miisɔmɔ yɛ Buu Mɔɔ Asafo lɛ nitsumɔ he nine ni yɔɔ Japan lɛ kaiɔ akɛ beni eji gbekɛ bibioo lɛ, emami taa emasɛi daa gbɛkɛ, ni eyeɔ ebuaa lɛ ni esɔleɔ, ni etsɔ nakai feemɔ nɔ eye ebua lɛ ni ena ekɛ Yehowa teŋ wekukpaa. Ehiɛ kpaaa nii ni ekase yɛ mli lɛ nɔ kɔkɔɔkɔ, akɛ—he fɛɛ he ni eeeya aloo nɔ fɛɛ nɔ ni eeefee lɛ, Yehowa bɛŋkɛ lɛ be fɛɛ be ni efee klalo akɛ ebaaye ebua lɛ.

Fɔlɔi ni yeɔ omanye lɛ kaseɔ bɔ ni amɛaafee amɛyoo henumɔi ni ejaaa, ni jɛɔ emuu ni amɛbii lɛ yeee ni amɛna kɛjɛ amɛfɔmɔ mli lɛ, ni fɔlɔi lɛ jeɔ shishi mra ni amɛyeɔ amɛbuaa amɛbii lɛ ni amɛjaje enɛɛmɛi. (Abɛi 22:15) Esa akɛ atsu henumɔi ni anaa kɛhaa hiɛjoomɔ, tsuiwalɛ, henɔwomɔ, kɛ mɛi krokomɛi ni awieɔ ashiɔ be fɛɛ be lɛ he nii mra. Kɛ jeee nakai lɛ, nɛkɛ wui nɛɛ baadara ni ebaatsɔ Nyɔŋmɔ kɛ egbɛ̀i ahiɛ atuatsemɔ yɛ sɛɛ mli. Akɛ nɔkwɛmɔ nɔ lɛ, fɔlɔi ni hiɛ jwɛŋmɔ kpakpa, shi ekolɛ amɛŋmɛɛɔ amɛbii lɛ ahe ni amɛfeɔ nɔ ni amɛsumɔɔ lɛ haa amɛbii lɛ naa hiɛjoomɔ kɛ henɔwomɔ henumɔi. Ewaa waa kɛhaa nɛkɛ gbekɛbii nɛɛ akɛ amɛaana bulɛ amɛha amɛfɔlɔi aloo Yehowa, ni amɛbatsɔmɔɔ tamɔ ‘mɛi ni ebuuu nɔ’ ni awie amɛhe yɛ Biblia lɛ mli lɛ. (Abɛi 29:21) Shi yɛ gbɛ kroko nɔ lɛ, gbekɛbii ni ahaa amɛ shia nitsumɔi ni atsɔseɔ amɛ hu ní amɛhiɛ ahi amɛhe nɔ yɛ mɛi krokomɛi ahiamɔ nii ahe lɛ bafeɔ mɛi ni jieɔ shidaa kɛ hiɛsɔɔ kpo amɛtsɔɔ amɛfɔlɔi kɛ Yehowa.

Nɔ kroko hu ni he hiaa ji ni aje shishi mra akɛ teokrase otii ni gbekɛ lɛ baanyɛ ashɛ he lɛ amamɔ ehiɛ. Kɛ afeee enɛ mra ni ahaaa etsara nɔ hu lɛ, no lɛ mɛi krokomɛi kɛ otii krokomɛi baawo ejwɛŋmɔ kɛ etsui mli obɔ. Esa akɛ Biblia muu lɛ fɛɛ kanemɔ, kɛ kasemɔ ni lɛ diɛŋtsɛ eeekase Buu Mɔɔ Asafo lɛ woji lɛ ekome yɛ teemɔŋ, ehe ni ekɛaawo Teokrase Sɔɔmɔ Skul lɛ mli, kɛ sanekpakpa jajelɔ ni eeetsɔ, kɛ baptisimɔ ni eeeha abaptisi lɛ lɛ afata nɛkɛ otii nɛɛ ahe.

Takafumi kaiɔ akɛ emami ŋmalaa sanebimɔi ni hetoo waaa kwraa eshwieɔ kpatashi okpɔlɔ lɛ nɔ koni ebatao kɛji ejɛ skul eba shia, ni etsɔ nakai feemɔ nɔ eha ena su ni ji Buu-Mɔɔ kɛ Awake! woji tɛtrɛbii lɛ akanemɔ daa nɛɛ. Yuri kaiɔ akɛ gbii fioo ko ni ekɛ gbɛgbalɔib lɛ yeɔ, ni amɛsɔmɔɔ yɛ he ni Kristofoi sɔɔlɔi ahe hiaa waa yɛ, amɛhe ni efataa yɛ sɔɔmɔ nitsumɔ lɛ mli, kɛ na ni enaa ni amɛhoɔ niyenii kpakpai, kɛ bɔ ni enaa ni amɛyɔɔ miishɛɛ kɛ ekaa babaoo lɛ ná suɔmɔ ni eyɔɔ akɛ lɛ hu ebaasɔmɔ Yehowa yɛ nakai gbɛ nɔ lɛ nɔ hewalɛ waa. Gbekɛbii pii kaiɔ akɛ amɛfɔlɔi kɛ amɛ baa Betel be fɛɛ be, taakɛ atsɛɔ Buu Mɔɔ Asafo lɛ nitsumɔ he yitso kɛ nitsumɔ he niji krokomɛi lɛ, ni amɛ diɛŋtsɛ amɛnaa obalahii kɛ obalayei babaoo ni kɛ miishɛɛ miisɔmɔ Yehowa. Mɛi ni bakwɛ jɛmɛ beni amɛji gbekɛbii lɛ ateŋ mɛi pii miisɔmɔ yɛ Betel shiai amli yɛ je lɛŋ fɛɛ.

Na Be Oha Obii Lɛ

Be falɛ ni onaa ohaa obii lɛ, kɛ bɔ ni eji be kpakpa eha hu lɛ baanyɛ ana hewalɛ tɛɛ yɛ amɛnɔ, kɛji amɛhala akɛ amɛaasɔmɔ Yehowa loo amɛfeee nakai. Amɛhe feɔ oya ni amɛyooɔ be falɛ ni otuɔ ohaa Biblia mli nikasemɔ ni okɛ amɛ feɔ lɛ, kɛ bɔ ni osaa ohe jogbaŋŋ hu ohaa. Kɛ onyɛɛɛ okai he ni nyɛkase nii lɛ kɛbashi, beni nyɛkase nyɛsɛɛ lɛ, aloo otsi nikasemɔ lɛ oto yɛ yiŋtoo ko ni he ehiaaa hewɔ lɛ, no lɛ ootsɔɔ amɛ akɛ nikasemɔ lɛ he ehiaaa tsɔ̃ ko. Shi, kɛ amɛna akɛ fɔlɔi lɛ kɛ nibii shaa afɔle kɛhaa nikasemɔ lɛ, ni amɛsaa amɛhe jogbaŋŋ ni amɛfeɔ nikasemɔ lɛ hu, ni nibii krokomɛi ni gbalaa mɔ jwɛŋmɔ lɛ eko kwraa kɔɔɔ he eko lɛ, no lɛ ehaa amɛnaa susumɔ ni yɔɔ sɔrɔto kwraa yɛ he. Eyɛ mli akɛ ejeee taomɔ nii moŋ, shi nyɛmɛi lɛ ekomɛi saa amɛhe kɛhaa amɛbii lɛ kɛ nikasemɔ, tamɔ bɔ ni amɛsaa amɛhe kɛ amɛmiiya kpeei aloo amɛkɛ akutso lɛ mli nyo ko yaafee shia Biblia mli nikasemɔ lɛ. Shishinumɔ ni ehaa amɛnaa ji akɛ, Yehowa jamɔ he hiaa waa.

Be kɛ mɔdɛŋbɔɔ babaoo he baahia ni okɛha obii lɛ a-Biblia mli tsɔsemɔ lɛ afee miishɛɛ, ni eshɛ amɛtsui he. Gbekɛbii bibii lɛ titri naa miishɛɛ waa kɛji amɛna akɛ aafee nibii ni amɛkaseɔ lɛ ahe nɔkwɛmɔ nii yɛ amɛ diɛŋtsɛ amɛhiɛ. Akɛ nɔkwɛmɔ nɔ lɛ, tsɛ ko fee Biblia mli sane ni kɔɔ Lazaro gbohiiashitee lɛ he lɛ he mfoniri koni ekɛye ebua ebii lɛ ni amɛfee gbohiiashitee lɛ he mfoniri yɛ amɛjwɛŋmɔi amli. Ebote tsu bibioo ni amɛkɛ atadei toɔ mli lɛ mli ni eje kpo akɛ Lazaro ni atee lɛ shi.—Yohane 11:17-44.

Beni gbekɛbii lɛ daraa kɛtsɔmɔɔ onukpai lɛ, ebiɔ be kɛ ŋaalee babaoo ni akɛtsu henumɔi, yiŋkɔshikɔshi-feemɔi, kɛ yeyeeye-feemɔi babaoo ni amɛkɛkpeɔ lɛ ahe nii. Be ni fɔlɔi ni yɔɔ suɔmɔ, ni yooɔ nii hu lɛ toɔ amɛhaa amɛ yɛ nɛkɛ be nɛɛ mli lɛ he miihia waa, kɛji gbekɛbii lɛ baadara ni amɛkɛ amɛhe afɔ Yehowa nɔ. Tsɛ ko ni hiɛ bii ejwɛ, ni ye omanye lɛ gba akɛ kɛ ebii lɛ kɛ naagbai sɔrɔtoi miikpe lɛ, etaoɔ saji ni tamɔ nɔ ni amɛkɛkpeɔ lɛ kɛjɛɔ Buu Mɔɔ Asafo lɛ woji amli ni ekɛ amɛ susuɔ he daa gbi, ni efeɔ nakai aahu kɛyashi be mli ni amɛbaaye naagba lɛ nɔ kwraa.

Gbɛgbalɔ ko ni tsuɔ nii waa, ni hiɛ bii enyɔ lɛ kadi akɛ ebiyoo lɛ miigbala ehe shi fiofio, ni enaaa teokrase nitsumɔi ahe miishɛɛ. No hewɔ lɛ nyɛ lɛ tswa efai shi akɛ ebaahi shia be fɛɛ be ni ebi lɛ baajɛ skul kɛba shia daa shwane, ni efeɔ tii ni ekɛ ebiyoo lɛ taraa shi amɛnuɔ be mli ni amɛgbaa sane lɛ. Kɛtsɔ nɛkɛ nyɛ-kɛ-biyoo tsakpaa ni bɛŋkɛ kpaakpa nɛɛ nɔ lɛ, gbekɛyoo lɛ nine shɛ yelikɛbuamɔ ni he hiaa lɛ lɛ nɔ. Amrɔ nɛɛ, kɛjɛ be mli ni egbe nɔtsamɔ skul lɛ naa kɛbaa nɛɛ, eyafata emami he yɛ gbɛgbamɔ sɔɔmɔ lɛ mli.—Abɛi 20:5.

Naanyobɔɔ kɛ Nɔkwɛmɔ nɔ Kpakpa

Kɛfata be ni amɛaana amɛha amɛ lɛ he lɛ, esa akɛ fɔlɔi lɛ afee nanemɛi kpakpai hu amɛha amɛshwiei lɛ. Abɛi 13:20 kɛɔ akɛ: “Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeena amane.”

Fɔlɔi ni eye omanye lɛ ateŋ mɛi pii eyoo bɔ ni nakai abɛbua lɛ ji anɔkwale ha. Tsɛ ko ni hiɛ bii ejwɛ, wie akɛ: “Kɛ misusu be ni eho lɛ he lɛ, misusuɔ akɛ bɔ ni wɔbii lɛ na nanemɛi babaoo yɛ anɔkwale lɛ mli lɛ ji nɔ ni ye bua ni etsirɛ amɛ koni amɛsɔmɔ Yehowa lɛ. Miwo amɛ hewalɛ ni amɛkɛ asafoi krokomɛi kɛ wɔ asafo lɛ mlibii lɛ hu fɛɛ abɔ nanemɛi, koni amɛha nakai naanyobɔɔ lɛ aya hiɛ jogbaŋŋ.” Kristofonyo onukpa ko ni kɛ afii babaoo esɔmɔ yɛ Betel lɛ kaiɔ akɛ: “Beni miji gbekɛ lɛ, no mli lɛ wɔyɛ shia bibioo ko mli, shi akɛhaa kpokpaa nɔkwɛlɔ lɛ be fɛɛ be akɛ eshihilɛ he. Kɛfata he lɛ, gbɛgbalɔi krɛdɛɛi ni yɔɔ wɔ asafo lɛ mli lɛ kɛ wɔ bayeɔ nii daa gbɛkɛ. Amɛwoɔ amɛhe nu yɛ wɔshia lɛ mli ni amɛkɛ wɔ bɔɔ naanyo hu. Amɛniiashikpamɔ ni minu kɛ amɛmiishɛɛ ni mina lɛ ye ebua mi ni mina hiɛsɔɔ kɛha be-fɛɛ sɔɔmɔ lɛ.”

Naanyobɔɔ kpakpa yeɔ ebuaa mɛi ni kɛ jaramɔ shihilɛi kpeɔ lɛ. Nyɛ ko ni binuu kɛ jaramɔ bei miikpe lɛ kɛ Yehowa Odasefoi anɔkwɛlɔ gbɛfalɔ ko susu sane lɛ he. Nyɛminuu lɛ wo lɛ ŋaa akɛ eha ebinuu lɛ afata ehe yɛ shiɛmɔ nitsumɔ lɛ mli. Nɔkwɛlɔ lɛ kɛɛ lɛ akɛ: “Kɛ ofee nakai lɛ, ebaaha emumɔŋ shidaamɔ kɛ enibii krokomɛi fɛɛ ni eshwɛ lɛ aya hiɛ waa.” Nyɛmiyoo lɛ bɔ amaniɛ akɛ: “Ato gbɛjianɔ yɛ wɔ asafo lɛ mli kɛha gbɛkɛnaashi odaseyeli, ni gbekɛbii ni yaa skul lɛ ateŋ mɛi babaoo, kɛ daa gbɛgbalɔi hu saŋŋ, kɛ agbɛnɛ, kɛ hoo lɛ, onukpa kome kɛ ehe woɔ mli. Kɛjɛ shishijee lɛ, kulɛ bɔ ni maafee ni maha eya shiɛmɔ daa lɛ wa waa diɛŋtsɛ, shi etsɛɛɛ tsɔ̃ ni enɛ tsake, ejaakɛ ebaa shia be fɛɛ be kɛ miishɛɛ babaoo, ni naanyobɔɔ kpakpa ni enaa lɛ woɔ lɛ hewalɛ waa. Beni ekaseɔ nii lolo yɛ nɔtsamɔ skul lɛ, abaptisi lɛ, ni esɔmɔɔ akɛ gbɛgbalɔi awalɔ daa nyɔŋ nɔ, ni beni egbe skul lɛ naa kwraa lɛ, ebatsɔ daa gbɛgbalɔ.” Naanyobɔɔ kpakpa ni ena, kɛfata Yehowa suɔmɔnaa nifeemɔ he lɛ wo yibii kpakpai.

Ekolɛ gbekɛbii bɛ nyɛ asafo lɛ mli ni baanyɛ ana hewalɛ kpakpa yɛ obi lɛ nɔ, shi niiashikpamɔ ko ni gbekɛbii ni ehala akɛ amɛaasɔmɔ Yehowa lɛ ateŋ mɛi pii ena ni amɛwieɔ he lɛ kɔɔ amɛfɔlɔi anɔkwɛmɔ nii he. Gbekɛbii lɛ ateŋ mɛi pii naa amɛfɔlɔi ahe miishɛɛ ni amɛsumɔɔ ni amɛkase amɛ. Yuri kaiɔ bɔ ni emami feɔ mɛi gbɔ kɛ bɔ ni esusuɔ mɛi krokomɛi ahe, ni etswaa amɛ tɛlifon ni ehoɔ niyenii ehaa helatsɛmɛi lɛ waa. Tatsuo, ni jɛ weku ko ni hiɛ gbekɛbii hii ejwɛ mli, ni amrɔ nɛɛ amɛ fɛɛ amɛdara ni amɛmiisɔmɔ Yehowa lɛ, wie akɛ: “Awo nyɛɛɛ ekɛ wɔ akase nii daa ejaakɛ Ataa heee yeee, ni wɔmami naa shitee-kɛ-woo babaoo kɛjɛɔ wekumɛi lɛ aŋɔɔ. Shi eshidaamɔ kɛha anɔkwale lɛ ni mina kɛ miishɛɛ ni eyɔɔ yɛ Yehowa sɔɔmɔ mli lɛ na minɔ hewalɛ waa diɛŋtsɛ. Enaa he miishɛɛ hu akɛ eeeshi kpe aahu kɛyashi jetsɛremɔ beaŋ tɔ̃ɔ koni eye ebua wɔ kɛ wɔnaagbai lɛ.” Fɔlɔi awiemɔi ni nilee yɔɔ mli lɛ naa hewalɛ waa kɛ akɛ nitsumɔi kɛ anɔkwayeli fi sɛɛ. Yoichiro wie yɛ efɔlɔi ahe akɛ: “Mikaiii akɛ amɛwie mɛi krokomɛi ni yɔɔ asafo lɛ mli lɛ ateŋ mɔ ko he wiemɔ fɔŋ ko dã; nakai nɔŋŋ amɛŋmɛɛɛ wɔ gbekɛbii lɛ hu gbɛ ni wɔwie mɛi krokomɛi atɔmɔi ahe huhuuhu.”—Luka 6:40-42.

Miishɛɛ ni Anaa Beni Gbekɛbii Halaa Yehowa Lɛ

Gbɛ titri ko bɛ, ni ama nɔ mi kɛmɔ shi, ni baaye abua obii lɛ ni amɛhala Yehowa. Yeyeeye-feemɔ bei babaoo baaba. Shi tsɛ ko ni hao, ni atsĩ etã kɛtsɔ hiɛ lɛ wie akɛ: “Akɛ fɔlɔi lɛ, wɔkɛ anɔkwayeli bɔɔ mɔdɛŋ be fɛɛ be akɛ wɔɔnyiɛ Yehowa gbɛjianɔtoo ni anaa lɛ ŋaawoi asɛɛ. Enɛ fee yelikɛbuamɔ kpele yɛ naagbai lɛ anɔ yeli mli.” Amɛmɔdɛŋbɔi lɛ ye omanye.

Hɛɛ, kɛ ofee bɔ fɛɛ bɔ ni ooonyɛ akɛ obaanyiɛ Biblia gbɛtsɔɔmɔi asɛɛ, ni oha obii lɛ na yiŋtoi kpakpai kɛha suɔmɔ ni amɛaana amɛha Yehowa, ni okɛ onɔkwɛmɔ nɔ ni anaa anɔkwayeli yɛ mli lɛ fi sɛɛ, kɛ mɔdɛŋbɔɔ diɛŋtsɛ hu akɛ oooye obua amɛ lɛ, no lɛ bo hu yɛ naagbee lɛ, obaana akɛ omanyeyeli baawo omɔdɛŋbɔi lɛ obɔ. Ani okai gbekɛ nuu ko ni atsĩ etã kɛtsɔ hiɛ, ni tswa efai shi be ko akɛ etsɔŋ Yehowa Odasefonyo kɔkɔɔkɔ lɛ? Ojogbaŋŋ, yɛ be mli ni emami eye ebua lɛ kɛtsɔ ejaramɔ afii lɛ amli yɛ omanyeyeli mli lɛ sɛɛ lɛ, agbɛnɛ ewie akɛ: “Eŋɔɔ minaa waa akɛ enijiaŋ ejeee wui!” Bo hu nɔ ko tamɔ nakai baanyɛ aba yɛ obii lɛ agbɛfaŋ.—Galatabii 6:9.

[Shishigbɛ niŋmai]

[Mfoniri ni yɔɔ baafa 30]

Ani obaanyɛ osusu be ni otsɔseɔ obii lɛ he kɛ bei komɛi ni okaiɔ ni yɔɔ miishɛɛ?