Mɛɛ Otii Okɛmamɔ Obii Ahiɛ?
1 Omanye ni aaaye yɛ shihilɛ mli lɛ damɔ otii ni he yɔɔ sɛɛnamɔ ni akɛaamamɔ shi ni ashɛ he lɛ nɔ. Mɛi ni tiuɔ otii ni sɛɛnamɔ fioo pɛ yɔɔ he loo eko kwraa bɛ he lɛ anijiaŋ jeɔ wui yɛ naagbee ni amɛnaa akɛ otii lɛ baaa mli. Ebiɔ nilee koni ayoo otii ni sa akɛ atiu sɛɛ lɛ, bɔni afee ni “[a]mɔ anɔkwa wala lɛ mli.” (1 Tim. 6:19) Kwɛ bɔ ni wɔdaa shi akɛ Yehowa tsɔɔ e-Wiemɔ kɛ egbɛjianɔtoo lɛ nɔ etsɔɔ gbɛ pɔtɛɛ ni sa akɛ wɔtsɔ nɔ lɛ!—Yes. 30:21.
2 Yehowa toɔ okadi kpakpa efɔɔ shi kɛhaa fɔlɔi yɛ be mli ni ekɛ gbɛtsɔɔmɔ ni suɔmɔ yɔɔ mli nɛɛ haa. Ni amɛaashi amɛha amɛbii ni bɛ niiashikpamɔ lɛ koni amɛhala gbɛ ni hi fe fɛɛ lɛ, fɔlɔi ni le nii lɛ tsɔseɔ amɛ yɛ gbɛ ni esa akɛ amɛnyiɛ nɔ lɛ nɔ, ni kɛ amɛgbɔ lɛ, ‘amɛjeŋ nɔ.’ (Abɛi 22:6) Fɔlɔi Kristofoi le kɛtsɔ niiashikpamɔ nɔ akɛ, amɛnyɛŋ amɛkɛ amɛhiɛ afɔ amɛ diɛŋtsɛ amɛsusumɔ nɔ; esa akɛ amɛkɛ amɛhe afɔ Yehowa nɔ. (Abɛi 3:5, 6) Hiamɔ nii nɛɛ da po yɛ gbekɛbii ni amɛnilee kɛ niiashikpamɔ faaa lɛ agbɛfaŋ.
3 Fɔlɔi baanyɛ amɛkɛ otii ni he yɔɔ sɛɛnamɔ ni baaye abua koni amɛkɛ amɛjwɛŋmɔ amamɔ “nii ni hi titri lɛ” anɔ lɛ amamɔ amɛbii ahiɛ. (Fil. 1:10) Amɛbaanyɛ amɛkɛ weku nikasemɔ lɛ aje shishi, ni amɛwo gbekɛbii lɛ ahewalɛ koni amɛle bɔ ni ehe hiaa ha, ni amɛkase nii kɛjɛ mli. Ehi akɛ gbekɛbii aaaná su ni tsɔɔ nii ni akaseɔ kɛtsɔɔ asafoŋ kpeei ahiɛ lɛ, koni amɛsaa amɛhe kɛha hetoohamɔi yɛ amɛ diɛŋtsɛ amɛwiemɔi amli. Shiɛmɔ nitsumɔ lɛ ni akɛ he aaawo mli daa lɛ he miihia. Gbekɛbii bibii baanyɛ amɛkɛ amɛhe awo mli kɛtsɔ dɛhiɛmɔ woji kɛhamɔ, ŋmalɛi akanemɔ, loo woji tɛtrɛbii kɛhamɔ nɔ. Kɛ amɛnyɛɔ amɛkaneɔ nii lɛ, no lɛ amɛgbɛi ni akɛaawo Teokrase Sɔɔmɔ Skul lɛ mli lɛ baanyɛ aha amɛya hiɛ oyayaayai yɛ mumɔŋ. Ní ehe aaasa akɛ shiɛlɔ ni abaptisiko lɛ loo ni aaakpɛlɛ enɔ kɛha baptisimɔ lɛ ji hiɛyaa wulu ko.
4 Yɛ be mli amɛbii lɛ shɛɔ afii nyɔŋma kɛ etɛ kɛmiimɔ nyɔŋma kɛ nɛɛhu, loo dani nakai be aaashɛ po lɛ, esa akɛ fɔlɔi kɛ amɛ awie otii ni amɛkɛmamɔ amɛhiɛ kɛha nitsumɔ lɛ he kɛ nɔmimaa. Skul he ŋaawolɔi kɛ klasbii baanyɛ ana amɛnɔ hewalɛ yɛ gbɛ ni waaa kwraa nɔ, koni amɛtiu je lɛŋ heloonaa nibii asɛɛ. Esa akɛ fɔlɔi aye abua amɛbii koni amɛhala skul nikasemɔi ni kɛ nibii afeemɔ he nitsumɔ mli tsɔsemɔ haa, koni no awaje amɛ ni amɛtsu amɛ heloonaa hiamɔ nii ahe nii, yɛ be mli ni amɛkɛ nomɛi hu yeŋ Maŋtsɛyeli nitsumɔi lɛ anajiaŋ. (1 Tim. 6:6-10) Abaanyɛ awo amɛ hewalɛ koni amɛtiu oshijayeli he ‘nikeenii’ lɛ sɛɛ koni kɛ sɛɛ mli lɛ, amɛkpɛ amɛyiŋ akɛ amɛaabote gbalashihilɛ mli lɛ, amɛnyɛ amɛtsu gbalashihilɛ mli gbɛnaa nii ni tsii lɛ ahe nii. (Mat. 19:10, 11; 1 Kor. 7:36-38) Ni akɛ amɛ aaawie gbɛgbamɔ he ekpakpa, ni aaasɔmɔ yɛ he ni hiamɔ lɛ da yɛ, Betel sɔɔmɔ, loo maŋsɛɛ sanekpakpa shiɛmɔ nitsumɔ lɛ he yɛ gbɛ ni ja nɔ, yɛ be mli ni amɛdarako kwraa lɛ, baanyɛ aha gbekɛbii lɛ ana suɔmɔ akɛ amɛkɛ amɛshihilɛi aaatsu nii yɛ gbɛ ni saa Yehowa hiɛ, ní he baa sɛɛnamɔ kɛhaa mɛi krokomɛi, ní kɛ jɔɔmɔi bahaa amɛ lɛ nɔ.
5 Jeee nɔ ko ni ba lɛ trukaa nɔ tsɔ ni wɔyɔɔ obalahii kɛ obalayei bibii pii ni fiɔ Kristofoi asui ni nɔ kwɔlɔ lɛ asɛɛ, ní tiuɔ teokrase otii asɛɛ yɛ gbɛjianɔtoo lɛ mli ŋmɛnɛ lɛ. Abaanyɛ akɛɛ akɛ omanye ni amɛye lɛ babaoo jɛ fɔlɔi ni yɔɔ suɔmɔ lɛ. Kɛ fɔlɔ ji bo lɛ, mɛni obii lɛ kɛmaa amɛhiɛ? Ani amɛmiiya amɛhiɛ fiofio kɛmiibɛŋkɛ shihilɛ ni kɛ mɔ jwɛŋmɔ maa Maŋtsɛyeli nitsumɔi lɛ anɔ lɛ he? Kaimɔ akɛ, nii ni he hiaa fe fɛɛ ni obaanyɛ ofee lɛ eko ji ni ooodu anɔkwale lɛ owo obii amli ni owie he daa gbi. Abaajɔɔ bo kɛ shiabii ni kɛ anɔkwayeli sɔmɔɔ Yehowa lɛ.—5 Mose 6:6, 7; Yosh. 24:15.