Tsɔsemɔ Obii lɛ ni Amɛtsɔmɔ Shiɛlɔi
1. Mɛni Lala 148:12, 13 lɛ tsirɛɔ fɔlɔi ni ji Kristofoi lɛ ni amɛfee?
1 Yehowa miisumɔ ni gbekɛbii ajie eyi. (Lala 148:12, 13) No hewɔ lɛ, fɔlɔi ni ji Kristofoi lɛ feɔ babaoo fe Biblia mli anɔkwalei lɛ kɛ Nyɔŋmɔ mlai ni kɔɔ jeŋba he lɛ ni amɛaatsɔɔ amɛbii lɛ. Amɛtsɔseɔ amɛ hu ni amɛbatsɔmɔ sanekpakpa lɛ he shiɛlɔi. Te aaafee tɛŋŋ aye abua gbekɛbii lɛ ni amɛya amɛhiɛ kɛshɛ enɛ he lɛ?
2. Mɛɛ gbɛ nɔ nɔkwɛmɔnɔ kpakpa ni fɔlɔ ko aaafee lɛ baanyɛ aná ebii lɛ anɔ hewalɛ?
2 Nɔkwɛmɔnɔ Kpakpa: Kojolɔ Gideon kɛɛ ehii 300 lɛ akɛ: “Nyɛkwɛa mi ni nyɛfea bɔ ni mafee lɛ.” (Koj. 7:17) Gbekɛbii sumɔɔ ni amɛkwɛ nɔ ni amɛfɔlɔi feɔ lɛ ni amɛkase amɛ. Tsɛ ko yaa nitsumɔ gbɛkɛ, shi kɛ́ ejɛ nitsumɔ eba shĩa Hɔɔ leebi lɛ, yɛ nɔ najiaŋ ni eeeyawɔ lɛ, ekɛ ebii lɛ yaa shiɛmɔ yɛ bɔ ni etɔ lɛ waa lɛ fɛɛ sɛɛ. Eetsɔ enifeemɔ nɔ eekɛɛ amɛ akɛ, esa akɛ akɛ shiɛmɔ nitsumɔ lɛ aye klɛŋklɛŋ gbɛhe. (Mat. 6:33) Ani obii lɛ naa bɔ ni okɛ ohe woɔ Nyɔŋmɔjamɔ nifeemɔi srɔtoi tamɔ sɔlemɔ, Biblia kanemɔ, sanehetoohamɔ, kɛ shiɛmɔ nitsumɔ lɛ mli kɛ miishɛɛ lɛ? Eji anɔkwale akɛ onyɛŋ ofee nɔkwɛmɔnɔ ni hi kɛwula shi. Shi kɛ́ obii lɛ naa bɔ ni obɔɔ mɔdɛŋ kɛ Yehowa sɔɔmɔ lɛ, ewaaa kɛhaaa amɛ akɛ amɛkɛ nɔ ni otsɔɔ amɛ yɛ Yehowa jamɔ he lɛ aaatsu nii. —5 Mose 6:6, 7; Rom. 2:21, 22.
3. Mɛɛ mumɔŋ otii ni haa ayaa hiɛ esa akɛ fɔlɔi aye abua amɛbii lɛ ni amɛkɛmamɔ amɛhiɛ ni amɛshɛ he?
3 Otii ni Haa Ayaa Hiɛ: Fɔlɔi kɛ mɔdɛŋbɔɔ tsɔɔ amɛbii lɛ bɔ ni anyiɛɔ, awieɔ, asaa he, kɛ ekrokomɛi. Beni gbekɛbii lɛ daraa ni amɛleɔ nibii komɛi afeemɔ lɛ, akɛ otii krokomɛi mamɔɔ amɛhiɛ. Kɛ́ fɔlɔi lɛ ji Kristofoi lɛ, amɛyeɔ amɛbuaa amɛbii lɛ hu koni amɛkɛ mumɔŋ otii amamɔ amɛhiɛ yɛ afii ni amɛye kɛ amɛnyɛmɔ naa, ni amɛyeɔ amɛbua amɛ koni amɛshɛ he. (1 Kor. 9:26) Ani ootsɔɔ obii lɛ bɔ ni amɛbaaha saji ahetoo yɛ amɛ diɛŋtsɛ amɛwiemɔi amli, kɛ bɔ ni amɛ diɛŋtsɛ amɛaasaa amɛhe kɛ́ amɛná nifeemɔi yɛ Teokrase Sɔɔmɔ Skul lɛ mli lɛ? (Lala 35:18) Ani ootsɔse amɛ koni amɛnyɛ amɛkɛ amɛhe awo shiɛmɔ nitsumɔ lɛ fãi srɔtoi lɛ amli? Ani ooye oobua amɛ ni amɛkɛ baptisimɔ kɛ be fɛɛ sɔɔmɔ nitsumɔ lɛ amamɔ amɛhiɛ? Ani ooha amɛkɛ shiɛlɔi ni yɔɔ miishɛɛ kɛ ekãa ni baawo amɛ hewalɛ lɛ miibɔ?—Abɛi 13:20.
4. Kɛ́ fɔlɔi kɛ shiɛmɔ nitsumɔ lɛ tsɔse amɛbii lɛ kɛjɛ amɛbibii amli tɔ̃ɔ lɛ, te gbekɛbii lɛ náa he sɛɛ amɛhaa tɛŋŋ?
4 Lalatsɛ lɛ kɛɛ akɛ: “Nyɔŋmɔ, otsɔɔ mi nii kɛjɛ miblahiaŋ, ni miijaje onaakpɛɛ nitsumɔi lɛ kɛbashi ŋmɛnɛ.” (Lala 71:17) Tsɔsemɔ obii lɛ kɛjɛ amɛbibii amli tɔ̃ɔ koni amɛbatsɔmɔ shiɛlɔi. Ŋwanejee ko bɛ he akɛ kɛ́ oye obua amɛ ni amɛná mumɔŋ shishitoo kpakpa lɛ, amɛbaaná he sɛɛ jogbaŋŋ kɛ́ amɛdara!—Abɛi 22:6.