Asafo lɛ He Miihia Wɔ
1 Be ko lɛ Kora bii lɛ tsɔɔ bɔ ni amɛhiɛ sɔɔ Yehowa asafo lɛ amɛhaa yɛ nɛkɛ gbɛ nɔ: “Gbi kome too ni aaaye yɛ okpoi lɛ anɔ lɛ ehi fe gbii akpe.” (Lala 84:11) Kɛha amɛ lɛ, je lɛ bɛ nɔ̃ kpakpa ko ni ekɛaaha ni tamɔ enɛ. Kɛ onuɔ he nakai lɛ, esa akɛ oha asafo lɛ afee hé ni he hiaa bo titri yɛ oshihilɛ mli.
2 Kɛjɛ eshishijee tɔ̃ɔ ni Kristofoi asafo lɛ ejie ehe kpo akɛ Yehowa jɔɔmɔ yɛ enɔ. (Bɔf. 16:4, 5) Esaaa akɛ wɔteŋ mɔ ko feɔ Kristofoi asafo lɛ nɔ trumu, aloo ni wɔɔnu he akɛ eji nɔ ko kɛkɛ ni atsɔɔ nɔ abuaa wɔnaa. Asafo lɛ ji henaabuamɔ he pɔtɛɛ kɛha Yehowa Odasefoi ni yɔɔ akutso fɛɛ akutso mli. Ekɛ naanyobɔɔ yɛ ekomefeemɔ mli haa koni Yehowa atsɔɔ wɔ nii, ni ato wɔhe gbɛjianɔ kɛha Maŋtsɛyeli nitsumɔ.—Yes. 2:2.
3 Kristofoi asafo lɛ ji gbɛ titri ni atsɔɔ nɔ atsɔɔ wɔ anɔkwale lɛ. (1 Tim. 3:15) Esa akɛ Yesu sɛɛnyiɛlɔi lɛ ‘fɛɛ afee ekome,’—ni amɛkɛ Nyɔŋmɔ, kɛ Kristo, kɛ amɛhe afee ekome. (Yoh. 17:20, 21; okɛto Yesaia 54:13 he.) He fɛɛ he ni wɔɔya yɛ je lɛŋ lɛ, wɔnyɛmimɛi lɛ heɔ Biblia mli tsɔɔmɔi kɛ shishitoo mlai amɛyeɔ, ni amɛbaa amɛjeŋ yɛ nomɛi kɛ gbeekpamɔ naa.
4 Atsɔse wɔ ni awula wɔ koni wɔtsu nitsumɔ ni akɛwo wɔdɛŋ akɛ wɔfee kaselɔi lɛ he nii. Daa nyɔŋ nɔ lɛ, Buu-Mɔɔ, Awake!, kɛ Wɔ Maŋtsɛyeli Sɔɔmɔ lɛ kɛ saji ni yeɔ ebuaa haa wɔ koni ewa wɔ ni wɔje Ŋmalɛ naa sanegbaai ashishi. Ato kpeei lɛ ahe gbɛjianɔ koni etsɔɔ wɔ gbɛ ni wɔɔtsɔ nɔ wɔna ni wɔtee miishɛɛ shi. Yifalɛ ni wɔnaa yɛ jeŋ fɛɛ lɛ yeɔ odase akɛ wɔyɛ ŋwɛi sɛɛfimɔ yɛ nitsumɔ nɛɛ nɔ.—Mat. 28:18-20.
5 Wɔnine shɛɔ hewalɛwoo ‘ni kanyaa wɔ kɛyaa suɔmɔ kɛ nitsumɔi kpakpai ahe’ lɛ nɔ daa gbi kɛtsɔɔ asafo lɛ nɔ. (Heb. 10:24, 25) Awoɔ wɔ hewalɛ ni wɔŋmɛ wɔtsui shi yɛ kaai amli yɛ anɔkwayeli mli. Nɔkwɛlɔi ni yɔɔ suɔmɔ yeɔ buaa wɔ koni wɔdamɔ nɔnyɛɛi kɛ yeyeeye-feemɔi anaa. (Jaj. 4:9-12) Akɛ ŋaawoo ni he hiaa haa wɔ kɛ wɔyɛ oshara ni baaha wɔkpalaŋ kɛya lɛ mli. Mɛɛ gbɛjianɔtoo kroko yɔɔ ni kɛ kwɛmɔ ni suɔmɔ yɔɔ mli nɛkɛ haa?—1 Tes. 5:14.
6 Eji Yehowa suɔmɔnaa nii akɛ wɔhi shi kɛbɛŋkɛ egbɛjianɔtoo lɛ he kpaakpa koni wɔkɛbaa wɔ ekomefeemɔ lɛ yi. (Yoh. 10:16) Gbɛ kome ni asafo lɛ yeɔ buaa wɔ yɛ nɔ koni wɔkɛ tsulɔ anɔkwafo kuu lɛ aye sharamɔ be fɛɛ be ji nɔkwɛlɔi gbɛfalɔi ni etsuɔ amɛ kɛbaa kɛhaa wɔ hewalɛwoo lɛ. Toiboo ni wɔfeɔ wɔhaa gbɛtsɔɔmɔ ni suɔmɔ yɔɔ mli lɛ gbalaa wɔ kɛbɛŋkɛɔ wɔhe yɛ ekomefeemɔ ni yeɔ buaa ni haa wɔhe waa yɛ mumɔŋ lɛ mli.
7 Asafo lɛ he miihia kɛha wɔ mumɔŋ yibaamɔ. Anyɛŋ asɔmɔ Yehowa yɛ nɔkpɛlɛmɔ mli ni no bɛ mli. Belɛ, nyɛhaa wɔkɛ wɔhe akpɛtɛa nɔ ni Yehowa kɛha lɛ he. Eba akɛ wɔɔtsu nii yɛ otii ni mamɔ ehiɛ lɛ kɛ gbeekpamɔ naa, koni wɔkɛ anɔkwayeli atsu ŋaawoo ni wɔnine shɛɔ nɔ kɛjɛɔ jɛmɛ lɛ he nii. Nɛkɛ gbɛ nɔ pɛ wɔɔtsɔ wɔjie bɔ ni asafo lɛ jara wa waa kɛha wɔ lɛ kpo.—Lala 27:4.