Kpokpaa nɔ Kpee He Gbɛjianɔtoo Hee

¹ Kɛjɛ February 1996 kɛyaa lɛ, kpokpaa nɔ kpeei lɛ saneyitso lɛ baafee “Bo Nyɔŋmɔ Wiemɔ Toi ni Okase Bɔ ni Okɛbaatsu Nii.” Saneyitso ni damɔ 5 Mose 31:12, 13 nɔ nɛɛ kɛ nɔ ni hi jogbaŋŋ ni nifeemɔ muu lɛ baadamɔ nɔ lɛ haa, ni ekɛmaa nibii ni he hiaa ni wɔkase ni wɔkɛtsu nii lɛ nɔ mi.

² Eyɛ mli akɛ ŋmɛnɛ mɛi babaoo boɔ wiemɔ ni jɛɔ mumɔ ni lakaa mɔ lɛ mli lɛ toi moŋ, shi ehe miihia ni wɔteŋ mɔ fɛɛ mɔ abo Nyɔŋmɔ Wiemɔ toi ni wɔkase bɔ ni wɔkɛbaatsu nii. (Luka 11:28; 1 Tim. 4:1) Akɛni enɛ yɛ wɔ jwɛŋmɔ mli hewɔ lɛ, ato kpokpaa nɔ kpeei lɛ ahe gbɛjianɔ koni ekɛ hewalɛwoo kɛ yelikɛbuamɔ aha shiɛlɔi, wekui, onukpai, kɛ gbɛgbalɔi. Yɛ Hɔɔ lɛ, abaaha wiemɔ ni tsaraa nɔ ni hiɛ fãi ejwɛ ni hiɛ saneyitso, “Ní Wɔɔdamɔ Wɔ Naagbai Anaa—Kɛtsɔ Nyɔŋmɔ Wiemɔ Toiboo Nɔ.” Ni Hɔgbaa leebi lɛ, abaaha wiemɔ ni tsara nɔ ni yitso ji “Gbɛ ni Ŋmalɛi lɛ Tsɔɔ nɔ Etsɔseɔ Mɔ yɛ Jalɛ Mli.” Gbɛjianɔtoo muu lɛ fɛɛ kɛ mumɔŋ hewalɛwoo ni esaaa akɛ ejeɔ bo kɛ oweku lɛ sɛɛ lɛ baaha.

³ Yɛ Hɔɔ kɛ Hɔgbaa fɛɛ lɛ, akɛ shiɛmɔyaa he ŋaawoi kpakpai baaha ni afee he nɔkwɛmɔ nɔ. Akɛ niiashikpamɔi ni woɔ mɔ hewalɛ ni tsɔɔ mɔ nii kɛ saji ni abaabibii hu baaha. No hewɔ lɛ, kɛ ohi jɛmɛ ni obo sane toi kɛ yiŋtoo akɛ oootsu nɔ ni okaseɔ lɛ he nii lɛ, ebaanyɛ eha okɛ Nyɔŋmɔ Wiemɔ lɛ he kitai lɛ atsu nii jogbaŋŋ kɛmɔ shi.

⁴ Kpokpaa nɔ kpee lɛ mli nifeemɔi titrii lɛ ateŋ ekome baafee nyɛmimɛi hii kɛ yei heei lɛ abaptisimɔ. Dani amɛ henɔjɔɔmɔ he nifeemɔ yɛ faŋŋ mli baashɛ kwraa lɛ, esa akɛ mɛi ni sumɔɔ ni abaptisi amɛ lɛ atsɔɔ bɔ ni amɛshweɔ enɛ lɛ amɛtsɔɔ onukpai asɛinɔtalɔ lɛ, koni enyɛ eto gbɛjianɔ ni onukpai lɛ kɛ amɛ akpe.

⁵ Maŋshiɛmɔ ni abaaha yɛ kpokpaa nɔ kpeei sɔrɔtoi lɛ ashishi lɛ yitso ji “Mɛni Hewɔ Esa akɛ Biblia lɛ Akudɔ Bo?” Fɔɔ nine otsɛ mɛi ni yɔɔ wiemɔ lɛ he miishɛɛ lɛ koni amɛba. Akɛni wɔmiikpa gbɛ akɛ bo kɛ oweku lɛ nine baashɛ hewalɛwoo kɛ yelikɛbuamɔ ni he hiaa nɔ hewɔ lɛ, too gbɛjianɔ kpakpa ni oya eko kɛha gbɛjianɔtoo muu lɛ fɛɛ mli gbɛfaŋnɔ namɔ.