Ani Biblia lɛ He Miihia Wɔ?

OXANA, ni ji Russia obalayoo lɛ na miishɛɛ waa beni ena Biblia ni mɔ ko kɛwo jara ni eehɔ̃ɔ yɛ gbɛjegbɛ ko he yɛ Moscow lɛ. Ehefatalɔ John, ni jɛ maŋ ko ni ewaaa kwraa akɛ nine aaashɛ Biblia lɛ nɔ lɛ hiɛ sɔ miishɛɛ ni Oxana jie lɛ kpo lɛ waa. Nuu lɛ kpɛlɛ nɔ akɛ: “Mi​—mɔ ni heee yeee akɛ Nyɔŋmɔ yɛ lɛ​—miitao mahe maha lɛ.” Eyɛ mli akɛ kɛjɛ shishijee lɛ Oxana ekpɛlɛɛɛ nɔ moŋ, shi yɛ naagbee lɛ, ekpɛlɛ John nikeenii lɛ nɔ.

Mɛi pii miitao waa akɛ amɛaana Biblia lɛ eko, tamɔ Oxana pɛpɛɛpɛ. Eji anɔkwale, titri lɛ yɛ maji ni akɛ afii babaoo etsi naa aahu lɛ amli. Akɛ nɔkwɛmɔ nɔ lɛ, mɛi ní ŋma nɛkɛ wolo tɛtrɛɛ nɛɛ miibɔ mɔdɛŋ fɛɛ ni amɛaanyɛ ni amɛha mɛi anine ashɛ Biblia falɛ ni ataoɔ yɛ tsutsu Soviet kwasafo nɔyeli maji amli, kɛ agbɛnɛ yɛ je lɛŋ hei krokomɛi hu lɛ fɛɛ nɔ. Enɛ ji klɛŋklɛŋ kwraa ni gbɔmɛi ni yɔɔ nɛkɛ hei nɛɛ ateŋ mɛi pii naa hegbɛ amɛkɛpɛiɔ Biblia lɛ mli jogbaŋŋ amɛhaa amɛhe​—ni eshɛɛ sane ni yɔɔ hewalɛ babaoo lɛ miigbala mɛi pii kɛmiiba he.

Mɛi ni Wieɔ Shiɔ kɛ Mɛi ni Jeɔ Ŋwane

Nifeemɔ ko ni teɔ shi woɔ bɔ ni wɔtsɔ hiɛ wɔtsɔɔ nɛɛ, ni anaa yɛ Europa kooyigbɛ titri ji, bɔ ni aha Biblia lɛ etsɔ wolo folo ko ni mulu etswa eshwie he yɛ woji atoohe lɛ. Mɛi komɛi tsɛɔ lɛ “yinɔsane ni egbo!” ni amɛkɛfataa he akɛ, “Yinɔ kroko aŋma aha. Ekɛ ŋmɛnɛŋmɛnɛ beaŋ gbɔmɔ bɛ nɔ ko feemɔ kwraa.” Ni osɔfoi ni ale amɛ waa po ewie wiemɔi ni gbeɔ Biblia lɛ he guɔ yɛ faŋŋ mli. Awieɔ akɛ Anglikan osɔfonukpa Desmond Tutu wie yɛ The Star, ni ji South Africa adafitswaa wolo lɛ mli akɛ: “Biblia lɛ fai komɛi yɛ ni amɛhe sɛɛnamɔ ehiii shi daa.” Wiemɔi tamɔ enɛɛmɛi eha mɛi pii ayiŋ miifee amɛ enyɔnyɔ akɛ ani esa akɛ amɛkɛ hiɛdɔɔ asusu Biblia lɛ he lo.

Bɔ ni Ehe Hiaa ni Ana Gbɛtsɔɔmɔ

Esa akɛ mɛi ni wieɔ shiɔ kɛ mɛi ni heɔ yeɔ lɛ fɛɛ akpɛlɛ nɔ, fe bei fɛɛ ni eho, akɛ tsabaa ni nyɛɔ nii etsuɔ he miihia je lɛ. Alvin Toffler ŋma yɛ ewolo Future Shock lɛ mli akɛ: “Ja adesa kwɛ ni ekase bɔ ni eeefee ekudɔ bɔ ni tsakemɔ baa oyayaayai yɛ lɛ diɛŋtsɛ eshihilɛ mli nibii kɛ adesai fɛɛ ashihilɛ gbɛfaŋ oya, kɛ jeee nakai lɛ, no lɛ wɔbaabote fitemɔ . . . kpele diɛŋtsɛ mli.” Akɛ nakai kɔkɔbɔɔ lɛ ha fe afii 20 ni eho nɛ. Etamɔ nɔ ni fitemɔ ni Toffler wie he lɛ miiya nɔ bianɛ.

Beni afii oha nɛɛ bɛŋkɛɔ enaagbee lɛ, tsɔnei ahe nitsumɔ mli hiɛyaa, kɛ adesai ajeŋ nilee nyɛko ekɛ shihilɛ ni yɔɔ shiŋŋ aba je lɛ mli. Jeŋ gbɛjianɔtoo hee he hiɛnɔkamɔ ni ana nyɛsɛɛ nɛɛ elaaje kwraa ni ebatsɔ yiŋfutumɔ moŋ, ni aha mɛi pii ashihilɛ eba shi kwraa kɛbatsɔ daa gbi deŋmegbomɔ kɛha wala mli hilɛ.

Akɔntaabuu tsɔɔ akɛ mligbalamɔ ni ka shikatsɛmɛi kɛ ohiafoi ateŋ lɛ ebatsɔ jɔɔ voo diɛŋtsɛ. Niiamlitaomɔ ko ni afee nyɛsɛɛ nɛɛ tsɔɔ akɛ je lɛ nii fɛɛ ni eyɔɔ lɛ mlijaa 82.7 eyaje emli gbɔmɛi fɛɛ ayifalɛ lɛ mlijaa oha mli 20 pɛ dɛŋ. Ani eyɛ naakpɛɛ akɛ ta, hɔmɔ, helai, basabasa-feemɔi, kɛ mlakwamɔ miiya nɔ waa yɛ maji pii anɔ? Bɔ ni shihilɛ ni yaa nɔ efiteɔ daa nɛɛ nyɛɔ mɔ nɔ koni enyɛ ekpee naa lɛ eha haomɔ eba mɛi pii ahenumɔi anɔ. Nɔ ni ejɛ mli eba lɛ eha adesai ashihilɛ shishijee kuu, ni ji weku lɛ po miifite kwraa.

Eyɛ mli akɛ mɛi pii, tamɔ Toffler, woɔ ŋaa akɛ eji sɔ̃ ni ka adesa nɔ akɛ “etao gbɛi heei kwraa ni ekɛaaha eshihilɛ ahi aha lɛ” moŋ, shi odaseyeli tsɔɔ akɛ adesai nyɛŋ amɛkɛ amɛ diɛŋtsɛ amɛtsabaa aha kɔkɔɔkɔ.

Gbɛ Koome Pɛ ni Yɔɔ

Biblia, loo Ŋmalɛ Krɔŋkrɔŋ lɛ ni aje eŋmaa shishi aaafee afii 3,500 ni eho nɛ lɛ tsakeko yɛ afii ohai abɔ lɛ mli. Eshishitoo mlai lɛ kã he amɛyɛ nakai nɔŋŋ. Akɛ nɔkwɛmɔ nɔ lɛ, wiemɔi ni yɔɔ Yeremia 10:23 lɛ efee anɔkwale ŋmɛnɛ fe bei fɛɛ ni eho, akɛ: “Gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” Kɛ adesai nyɛŋ ajaje amɛ diɛŋtsɛ amɛ gbɛ lɛ, belɛ namɔ baanyɛ nakai afee mɔ? Biblia lɛ tsɔɔ anɔkwa Jɛɛhe koome pɛ ni yɔɔ kɛha gbɛtsɔɔmɔ: “Miji Yehowa, o-Nyɔŋmɔ lɛ, Mɔ ni tsɔɔo nii ni hi hao, Mɔ ni tsɔɔo gbɛ ni onyiɛ nɔ lɛ.”​—Yesaia 48:⁠17.

Yehowa tsɔɔ Biblia lɛ nɔ etsɔɔ wɔ nii koni wɔnyɛ wɔye wɔbua wɔhe. Eyi obɔ kɛ ŋaawoo ni tsɔɔ wɔ gbɛ ni sa akɛ wɔnyiɛ nɔ. Eŋaawoo lɛ he hiaa waa ŋmɛnɛ tamɔ bɔ ni eji beni aŋma lɛ pɛpɛɛpɛ. Sane ni nyiɛ enɛ sɛɛ lɛ baasusu bɔ ni anyɛɔ akɛ Biblia lɛ tsuɔ nii ahaa diɛŋtsɛ yɛ wɔ ŋmɛnɛŋmɛnɛ yinɔ nɛɛ mli lɛ he. Obaana yɛ saji sɔrɔtoi amli, kɛjɛ hewalɛnamɔ nɔ kɛmiiya ninamɔ, weku shihilɛ, kɛ aŋkroaŋkroi asubaŋ hu nɔ akɛ lɛlɛŋ, Biblia lɛ ji tɛsaa ko ni ma shi shiŋŋ yɛ ŋmɛnɛŋmɛnɛ je nɛŋ shihilɛ ni hosoɔ kɛyaa kɛbaa nɛɛ mli.

[Mfoniri ni yɔɔ baafa 4]

Biblia lɛ ji sɛkɛ kɛha shiŋŋ-feemɔ yɛ ŋmɛnɛ jeŋ ni efee basabasa nɛɛ mli.