Nikasemɔ 6
Mɛni Ji Nyɔŋmɔ Maŋtsɛyeli Lɛ?
Nɛgbɛ Nyɔŋmɔ Maŋtsɛyeli lɛ yɔɔ? (1) Namɔ ji enɔ Maŋtsɛ? (2)
Ani mɛi krokomɛi kɛ Maŋtsɛ lɛ yeɔ nɔ? Kɛ nakai lɛ, mɛi enyiɛ? (3)
Mɛni tsɔɔ akɛ wɔyɛ naagbee gbii lɛ amli? (4)
Mɛni Nyɔŋmɔ Maŋtsɛyeli lɛ baafee eha adesai yɛ wɔsɛɛ be mli? (5-7)
1. Beni Yesu yɔɔ shikpɔŋ nɔ lɛ, etsɔɔ ekaselɔi lɛ ni amɛsɔle amɛbi ni Nyɔŋmɔ Maŋtsɛyeli lɛ aba. Maŋtsɛyeli ji nɔyeli ni maŋtsɛ nyiɛɔ hiɛ. Nyɔŋmɔ Maŋtsɛyeli lɛ ji nɔyeli krɛdɛɛ ko. Ato shishi yɛ ŋwɛi ni ebaaye shikpɔŋ nɛɛ nɔ. Ebaatse Nyɔŋmɔ gbɛi he, loo efee lɛ krɔŋkrɔŋ. Ebaaha afee Nyɔŋmɔ suɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ.—Mat. 6:9, 10.
2. Nyɔŋmɔ wo shi akɛ Yesu baatsɔ E-Maŋtsɛyeli lɛ nɔ Maŋtsɛ. (Luka 1:30-33) Beni Yesu yɔɔ shikpɔŋ nɔ lɛ, etsɔɔ akɛ ebaafee Nɔyelɔ ni mli hi, ni yeɔ jalɛ sane, ni yeɔ emuu. Beni eku esɛɛ kɛtee ŋwɛi lɛ, awooo lɛ Nyɔŋmɔ Maŋtsɛyeli lɛ nɔ Maŋtsɛ amrɔ nɔŋŋ. (Heb. 10:12, 13) Yɛ 1914 lɛ, Yehowa kɛ hegbɛ ni E-kɛwo Yesu shi lɛ ha lɛ. Kɛjɛ no nɔ kɛbaa nɛɛ, Yesu eye nɔ yɛ ŋwɛi akɛ Maŋtsɛ ni Yehowa ehala lɛ.—Dan. 7:13, 14.
3. Yehowa ehala hii kɛ yei anɔkwafoi komɛi hu kɛjɛ shikpɔŋ nɔ koni amɛya ŋwɛi. Amɛkɛ Yesu baaye adesai anɔ akɛ maŋtsɛmɛi, kojolɔi, kɛ osɔfoi. (Luka 22:28-30; Kpoj. 5:9, 10) Yesu tsɛ hefatalɔi nɔyelɔi yɛ e-Maŋtsɛyeli lɛ mli lɛ akɛ “asafoku bibioo.” Amɛyibɔ ji 144,000.—Luka 12:32; Kpoj. 14:1-3.
4. Beni Yesu batsɔ Maŋtsɛ nɔŋŋ pɛ lɛ, eshɛrɛ Satan kɛ ebɔfoi fɔji lɛ kɛjɛ ŋwɛi eshwie kɛba shikpɔŋ lɛ niiaŋ. No hewɔ ni nibii efite kwraa yɛ biɛ yɛ shikpɔŋ nɔ kɛjɛ 1914 kɛbaa nɛɛ. (Kpoj. 12:9, 12) Tai, hɔmɔ, tsɛŋemɔ helai, mlakwamɔ ni faa babaoo—enɛɛmɛi fɛɛ feɔ “okadi” lɛ fa ni tsɔɔ akɛ Yesu miiye nɔ, ni nibii agbɛjianɔtoo nɛɛ yɛ enaagbee gbii amli.—Mat. 24:3, 7, 8, 12; Luka 21:10, 11; 2 Tim. 3:1-5.
5. Etsɛŋ ni Yesu baakojo mɛi, ni egbala amɛmli taakɛ tookwɛlɔ gbalaa gwantɛŋi kɛ abotiai amli lɛ. “Gwantɛŋi” lɛ ji mɛi ni ejie amɛhe kpo akɛ eshishibii ni yeɔ anɔkwa lɛ. Amɛbaaná naanɔ wala yɛ shikpɔŋ nɔ. “Abotiai” lɛ ji mɛi ni ekpoo Nyɔŋmɔ Maŋtsɛyeli lɛ. (Mat. 25:31-34, 46) Yɛ wɔsɛɛ be ni ebɛŋkɛ lɛ mli lɛ, Yesu baakpata mɛi fɛɛ ni tamɔ abotiai lɛ ahiɛ. (2 Tes. 1:6-9) Kɛ ootao ofee Yesu “gwantɛŋi” lɛ ateŋ ekome lɛ, esa akɛ obo Maŋtsɛyeli shɛɛ sane lɛ toi ni okɛ nɔ ni okaseɔ lɛ atsu nii.—Mat. 24:14.
6. Amrɔ nɛɛ ajara shikpɔŋ lɛ mli awo maji babaoo mli. Eko fɛɛ eko yɛ lɛ diɛŋtsɛ enɔyeli. Bei pii lɛ, maji nɛɛ kɛ amɛhe wuɔ ta. Shi Nyɔŋmɔ Maŋtsɛyeli lɛ baaye adesai anɔyelii fɛɛ najiaŋ. Ebaaye nɔ akɛ shikpɔŋ muu lɛ fɛɛ nɔ nɔyeli kome pɛ. (Dan. 2:44) Kɛkɛ lɛ ta, awuiyeli, kɛ yiwalɛ nifeemɔ ehiŋ shi dɔŋŋ. Gbɔmɛi fɛɛ baahi shi yɛ toiŋjɔlɛ kɛ ekomefeemɔ mli.—Mika 4:3, 4.
7. Yɛ Yesu Afii Akpe Nɔyeli lɛ mli lɛ, adesai anɔkwafoi baaye emuu, ni shikpɔŋ muu lɛ fɛɛ baatsɔ paradeiso. Beni afii akpe lɛ baaba naagbee lɛ, no mli lɛ Yesu efee nɔ fɛɛ nɔ ni Nyɔŋmɔ biɔ ni efee lɛ. No sɛɛ lɛ ekɛ Maŋtsɛyeli lɛ baaha e-Tsɛ ekoŋŋ. (1 Kor. 15:24) Mɛni hewɔ ogbaaa onanemɛi kɛ osuɔlɔi nɔ ni Nyɔŋmɔ Maŋtsɛyeli lɛ baafee lɛ he sane?
[Mfonirii ni yɔɔ baafa 13]
Hetsɛ loo nyɛ̃ɛ ehiŋ shi dɔŋŋ yɛ Yesu nɔyeli lɛ shishi