Ani Oji Be-Fɛɛ Odasefonyo?
1 Ani obaaha sanebimɔ nɛɛ hetoo akɛ hɛɛ? Eyɛ mli akɛ jeee Yehowa tsuji fɛɛ ni ejɔɔ amɛhe nɔ lɛ baanyɛ amɛkɛ amɛhe awo be-fɛɛ sɔɔmɔ lɛ mli moŋ, shi kɛlɛ ani ejeee nɔ ni nilee yɔɔ mli akɛ wɔ fɛɛ wɔɔbu wɔhe akɛ ebe-fɛɛ Odasefoi? Lɛɛlɛŋ esa nakai.
2 Nɔ ko tamɔ be-fã Kristofonyo ko bɛ. Yesu kɛɛ yɛ e-Tsɛ lɛ he akɛ: “Nɔ ni sa ehiɛ mifeɔ daa.” (Yoh. 8:29) Paulo, ní nu he yɛ nakai gbɛ nɔ nɔŋŋ lɛ, wo wɔ hewalɛ koni ‘wɔfee nii fɛɛ ni wɔkɛwo Nyɔŋmɔ hiɛ nyam.’ (1 Kor. 10:31) No hewɔ lɛ, esa akɛ wɔ fɛɛ wɔbu wɔhe akɛ Yehowa be-fɛɛ Odasefoi. Nii ahe ni wɔɔsusu yɛ nɛkɛ gbɛ nɔ lɛ, baaná wɔnɔ hewalɛ yɛ gbɛ kpakpa nɔ yɛ nɔ fɛɛ nɔ ni wɔɔtiu sɛɛ lɛ mli.
3 Susumɔ Odaseyeli lɛ He: Wɔ hesaamɔ, wiemɔ, kɛ jeŋba baanyɛ atsɔɔ mɛi krokomɛi akɛ wɔji Yehowa Odasefoi lɛɛlɛŋ. Wɔhiɛ hiɔ wɔhe nɔ yɛ hiamɔ ni ehe ehiaa akɛ wɔkɛ hiɛshikamɔ asaa wɔhe, wɔwie wiemɔi ni sa, wɔjie jeŋba kpakpa kpo be fɛɛ be ni wɔkɛ wɔhe woɔ shiɛmɔ nitsumɔ lɛ mli loo wɔyaa Kristofoi akpeei lɛ he. Ni kɛlɛ, kɛji wɔmiiya skul jio, wɔmiitsu wɔheloonaa nitsumɔ jio, loo wɔmiijie wɔhiɛtserɛ jio lɛ, esa akɛ nɔ fɛɛ nɔ ni kɔɔ wɔhe lɛ atsɔɔ akɛ wɔhiɔ shi yɛ Yehowa jalɛ mlai anaa.
4 Yesu kɛɛ: ‘Maŋ ni ma gɔŋ nɔ lɛ, anyɛŋ aŋɔ-tee. . . . Nyɛhaa nyɛla atsoa yɛ gbɔmɛi ahiɛ, koni amɛna nyɛnifeemɔ nii kpakpai lɛ, ni amɛwo nyɛ-Tsɛ ni yɔɔ ŋwɛi lɛ hiɛ nyam.’ (Mat. 5:14-16) Esa akɛ enɛ afee anɔkwale yɛ nɔ fɛɛ nɔ ni wɔfeɔ, kɛ bei fɛɛ mli. Kɛ wɔna akɛ wɔmiishashao shi akɛ wɔɔye odase yɛ heni wɔyɔɔ lɛ loo nɔ ni wɔfeɔ lɛ hewɔ lɛ, ehe miihia ni wɔbi wɔhe akɛ, ‘Ani mikɛ be-fã loo be-fɛɛ miisɔmɔ Yehowa?’ Eba akɛ wɔhaŋ hegbɛ ko aho wɔhe ni wɔwieŋ Nyɔŋmɔ Maŋtsɛyeli lɛ he sanekpakpa lɛ he sane wɔtsɔŋ mɛi krokomɛi.
5 Kaimɔ akɛ wɔwoɔ Yehowa hiɛ nyam ni wɔsaa ehiɛ kɛji wɔnyɛ wɔha sanebimɔ, “Ani oji be-fɛɛ Odasefonyo?” lɛ hetoo akɛ “Hɛɛ!” kɛ hewalɛ diɛŋtsɛ lɛ.