Nyɛjaa Maŋtsɛyeli Sanekpakpa No. 35 lɛ Waa Diɛŋtsɛ
1 October kɛ November baafee nyɔji ni dekã bɛ mli kwraa kɛha wɔ fɛɛ. Yɛ October klɛŋklɛŋ gbii 11 lɛ mli lɛ, wɔbaaha ashɛ Buu-Mɔɔ kɛ Awake! lɛ. Kɛkɛ lɛ, kɛjɛ Hɔgbaa, October 12, kɛyashi Hɔgbaa, November 16 lɛ nɔ lɛ, wɔbaafata he yɛ Maŋtsɛyeli Sanekpakpa No. 35 lɛ jaa yɛ jeŋ fɛɛ lɛ mli. Ebaafee hegbɛ ni wɔná akɛ wɔkɛ shɛɛ sane ni he hiaa nɛɛ baaha gbɔmɛi ni yɔɔ he ni wɔyɔɔ lɛ. Eji sane hetoo kɛha sanebimɔ ni ji, “Ani Gbɔmɛi Fɛɛ Baasumɔ Amɛhe Gbi Ko?” Yɛ nɛkɛ tafãa krɛdɛɛ nɛɛ mli lɛ, wɔbaaja Maŋtsɛyeli Sanekpakpa No. 35 lɛ yɛ otsii lɛ amli. Yɛ nɔ ni fata Maŋtsɛyeli Sanekpakpa lɛ kɛhamɔ mli lɛ he yɛ otsii lɛ anaagbee mli lɛ, wɔbaaha ashɛ woji tɛtrɛbii lɛ.
2 Namɔ Aaaná Mli Gbɛfaŋnɔ? Taakɛ wɔle lɛ, onukpai lɛ baanyiɛ nitsumɔ lɛ hiɛ. Mɔ fɛɛ mɔ náa Maŋtsɛyeli Sanekpakpa lɛ jaa mli ŋɔɔmɔ, ni ŋwanejee ko bɛ he akɛ shiɛlɔi babaoo kɛ amɛhe baawo gbɛgbalɔi awalɔ nitsumɔ lɛ mli nyɔŋ kome loo nyɔji enyɔ lɛ fɛɛ mli yɛ tafãa be lɛ mli. Shiɛlɔi krokomɛi baasumɔ koni amɛkɛ be babaoo atsu nii yɛ shiɛmɔ nitsumɔ lɛ mli fe bei fɛɛ.
3 Ani oyɛ Biblia nikaselɔ ko ni etee hiɛ jogbaŋŋ yɛ Nilee wolo lɛ kasemɔ mli ni etsɛŋ ni ehe baasa akɛ mɔ ni kɛ ehe baawo shiɛmɔ nitsumɔ lɛ mli? Ekolɛ etsɛŋ ni ebaanyɛ ebatsɔ shiɛlɔ ni abaptisiko lɛ koni ekɛ ehe awo Maŋtsɛyeli Sanekpakpa he tafãa lɛ mli. Shiɛmɔ wiemɔ kuku ko ji nɔ ni he hiaa ni akɛaajie dɛhiɛmɔ wolo lɛ kpo. Akɛ nɔkwɛmɔnɔ lɛ, ekolɛ mɔ ko baakɛɛ akɛ: “Nɛkɛ shɛɛ sane nɛɛ he hiaa aahu akɛ aaja yɛ je lɛŋ fɛɛ yɛ nyɔŋ nɛɛ nɔ yɛ wiemɔi 169 amli. Masumɔ koni oná bo diɛŋtsɛ onɔ.” Gbekɛbii po baanyɛ aná nitsumɔ ni miishɛɛ yɔɔ mli nɛɛ mli gbɛfaŋnɔ yɛ gbɛ ni mɔɔ shi nɔ.
4 Esa akɛ woloŋ nikasemɔ nɔkwɛlɔi lɛ awo amɛkuu lɛ mli bii lɛ ateŋ mɔ fɛɛ mɔ hewalɛ koni ekɛ ehe awo Maŋtsɛyeli Sanekpakpa No. 35 lɛ jaa mli kɛmɔ shi. Ekolɛ shiɛlɔi komɛi ni ekpa shiɛmɔyaa ni baasumɔ ni amɛje shiɛmɔ shishi ekoŋŋ kɛji akɛ amɛnine shɛ hewalɛwoo ni he hiaa amɛ lɛ nɔ lɛ hu yɛ. Esa akɛ onukpai lɛ ayasara gbɔmɛi ni tamɔ nɛkɛ lɛ koni amɛkwɛ nɔ ni abaanyɛ afee koni akɛye abua amɛ ni amɛfata shiɛlɔi ni he esa lɛ ahe yɛ nɛkɛ shiɛmɔ nitsumɔ lɛ fã nɛɛ mli kɛtsɔ tafãa be lɛ hiɛ.
5 Mɛɛ Be Mli Wɔbaanyɛ Wɔkpe Kɛha Shiɛmɔyaa? Nɛkɛ nitsumɔ nɛɛ fɛɛ baabi ni ato gbɛjianɔi akɛ kuu kɛha odaseyeli ni hi jogbaŋŋ ni abaanyɛ atsu he nii hu. Kɛ eeehi lɛ, esa akɛ ato kpee kɛha shiɛmɔyaa lɛ he gbɛjianɔ yɛ otsi lɛ mli gbi fɛɛ gbi mli, yɛ otsii lɛ anaagbee mli, kɛ yɛ gbɛkɛnaashi mli. Esa akɛ afee yɛ bei ni baaha shiɛlɔi kɛ gbɛgbalɔi aná odaseyeli be lɛ he sɛɛ kɛmɔ shi. Abaanyɛ ato gbɛjianɔ hu koni akpe shwane mli, koni skulbii, nitsulɔi ni yaa leebi loo shwane, kɛ mɛi krokomɛi ana he sɛɛ. Esa akɛ sɔɔmɔ nɔkwɛlɔ lɛ akwɛ koni aná shia kɛ shia kɛ nitsumɔhe shikpɔŋkukuji babaoo bɔni afee ni mɔ fɛɛ mɔ aná nitsumɔ lɛ mli gbɛfaŋnɔ kɛmɔ shi. Yɛ hei ni shiɛlɔi babaoo yɔɔ akutso ko mli lɛ, esa akɛ amɛkɛ nilee akwɛ mɛi abɔ ni baatsu nii yɛ shikpɔŋkuku ni akɛha lɛ fã ko mli.
6 Ni Mɛi ni Bɛ Shia lɛ Hu? Wɔmiisumɔ ni wɔ diɛŋtsɛ wɔkɛ shiatsɛmɛi babaoo awie bɔ ni wɔɔnyɛ koni wɔtsɔɔ amɛ nɔ hewɔ ni esa akɛ amɛkane Maŋtsɛyeli Sanekpakpa No. 35 lɛ. No hewɔ lɛ, kɛ yɛ be mli ni otee lɛ mɔ ko bɛ shia lɛ, ŋmaa shia lɛ adrɛs, ni oku osɛɛ oya jɛmɛ ekoŋŋ yɛ gbi lɛ mli be kroko mli. Kɛ yɛ tafãa lɛ naagbee otsi lɛ mli ni mɔdɛŋ fɛɛ ni obɔ koni onine ashɛ shiatsɛmɛi nɛɛ anɔ lɛ eko yeee omanye lolo lɛ, obaanyɛ oshi Maŋtsɛyeli Sanekpakpa lɛ ekome yɛ shinaa lɛ naa yɛ he ni mɛi ni hoɔ lɛ nyɛŋ ana. Yɛ shihilɛhei lɛ, bɔɔ mɔdɛŋ koni okɛ Maŋtsɛyeli Sanekpakpa lɛ aha aŋkroaŋkroi ni ekolɛ amɛhoɔ yɛ gbɛjegbɛi ahe lɛ. Kɛ aatsu nii yɛ akrowai kɛ hei ni shikpɔŋkukuji babaoo yɔɔ fe bɔ ni abaanyɛ atsu mli nii yɛ tafãa be lɛ mli lɛ, abaanyɛ ashi Maŋtsɛyeli Sanekpakpa lɛ ekome yɛ hei ni mɛi bɛ shia lɛ, yɛ klɛŋklɛŋ jɛmɛ yaa lɛ mli.
7 Mɛni Ji Oti ni Ma Wɔhiɛ? Esa akɛ asafoi lɛ abɔ mɔdɛŋ koni amɛkɛ Maŋtsɛyeli Sanekpakpa ni amɛnine eshɛ nɔ lɛ fɛɛ atsu amɛshikpɔŋkuku lɛ fɛɛ mli nii dani tafãa lɛ aba naagbee yɛ November 16. Kɛ osafo lɛ shikpɔŋkuku ni akɛha lɛ lɛ da fioo, ni kɛ oshara bɛ he akɛ okome too pɛ oootsu mli nii fe ni mɔ ko aaafata ohe lɛ, ebaahi akɛ ooofee nakai. Enɛ baaha ni okɛ sanekpakpa lɛ ayaha mɛi ni sa lɛ bɔ ni ooonyɛ. (Mat. 10:11) Eeefee nɔ ni sɛɛnamɔ yɔɔ he akɛ ooohiɛ dɛhiɛmɔ woji fioo ko yɛ odɛŋ kɛ Biblia yɛ okotoku loo baagi pɛmpɛoo mli moŋ fe ni okɛ shiɛmɔyaa baagi aaatsu nii. Kwɛmɔ ni oŋmala mɛi ni jie miishɛɛ kpo lɛ ahe saji oshwie shi.
8 Ani Ofee Klalo akɛ Obaaje Shishi? Esa akɛ onukpai lɛ atsɔ hiɛ ale woji tɛtrɛbii abɔ krokomɛi ni ehe baahia asafo lɛ ni esa akɛ amɛshɛ nakai pɛpɛɛpɛ. Ehe ehiaaa ni ashɛ Maŋtsɛyeli Sanekpakpa No. 35 lɛ, akɛni akɛ falɛ ko miimaje asafo fɛɛ asafo lɛ hewɔ. Gbɛgbalɔi krɛdɛɛi, daa gbɛgbalɔi, kɛ gbɛgbalɔi awalɔi baaná ekomekomei 200 ni amɛbaaja, yɛ be mli ni asafoŋ shiɛlɔi baaná ekomekomei 30. Átsɔɔ bɔ ni wɔbaatsu wɔnitsumɔ lɛ wɔha. Ani ooshwe koni oná nifeemɔ ni miishɛɛ yɔɔ mli nɛɛ mli gbɛfaŋnɔ? Ŋwanejee ko bɛ he akɛ ooshwe nakai. Nyɛhaa wɔjaa Biblia mli shɛɛ sane ni he hiaa ni yɔɔ Maŋtsɛyeli Sanekpakpa No. 35 lɛ mli lɛ waa diɛŋtsɛ yɛ he fɛɛ he bɔ ni wɔbaanyɛ!