Kpokpaa nɔ Kpee He Gbɛjianɔtoo Hee

“Yehowa Gbi lɛ ni Aaaha Ehi Jwɛŋmɔ Mli” ji gbii enyɔ kpokpaa nɔ kpee ni baaje shishi yɛ March mli lɛ yitso. (2 Pet. 3:12) Ato he gbɛjianɔ koni akɛtee oyaiyeli henumɔ ni wɔyɔɔ lɛ shi. Etsɛŋ ni Yehowa kojomɔ baaba gbɔmɛi fɛɛ ni yɔɔ shikpɔŋ lɛ nɔ lɛ anɔ. Namɛi ayi baana wala yɛ “Nyɔŋmɔ Ofe lɛ gbi wulu lɛ nɔ ta lɛ” mli? Ja gbɔmɛi ni kãa he amɛhiɔ shi akɛ mɛi ni hiɛ etsɛ̃ yɛ mumɔŋ, ni amɛhiɔ shi yɛ “jeŋbai krɔŋkrɔŋi kɛ Nyɔŋmɔ jamɔi” anaa lɛ pɛ.​—⁠Kpoj. 16:14; 2 Pet. 3:⁠11.

Baptisimɔ he hiaa bɔni afee ni ahere mɔ ko yiwala yɛ Yehowa gbi lɛ nɔ. (1 Pet. 3:21) Shiɛlɔi ni miisumɔ koni abaptisi amɛ lɛ akɛɛ onukpai asɛinɔtalɔ lɛ, ni ebaato nibii ni he hiaa lɛ ahe gbɛjianɔ.

Wiemɔi ejwɛ ni tsara nɔ ni damɔ wiemɔ ni yitso ji “Mɛɛ Gbɔmɛi Sa akɛ Wɔtsɔmɔ” lɛ nɔ lɛ baatsɔɔ nɔ ni esa akɛ wɔfee yɛ be mli ni wɔhaa Yehowa gbi lɛ baa lɛ hiɔ wɔjwɛŋmɔ mli lɛ mli faŋŋ. Maŋshiɛmɔ ni ji “Feemɔ Nii yɛ Nilee Mli yɛ Be Mli ni Yehowa Gbi lɛ Bɛŋkɛɔ Lɛ,” baagbála nɔ ni etsɔɔ ákɛ ‘atao Yehowa sɛɛgbɛ, atao jalɛ sɛɛgbɛ, ni atao heshibaa sɛɛgbɛ,’ bɔni afee ni abaa wɔyi lɛ mli etsɔɔ.​—⁠Zef. 2:⁠3.

Nɔkwɛlɔi gbɛfalɔi lɛ baamu kpokpaa nɔ kpee lɛ naa kɛ wiemɔi enyɔ ni woɔ mɔ hewalɛ ni amɛyitsei ji: “Ani Oshihilɛ Damɔ Anɔkwale lɛ Nɔ?” kɛ “Yehowa Gbi lɛ ni Aaaha Ehi Jwɛŋmɔ Mli Beni Atoɔ Wɔsɛɛ Be He Gbɛjianɔ.” Wiemɔi nɛɛ baakanya wɔ koni wɔpɛi wɔshihilɛ mli wɔkwɛ, ni wɔfee tsakemɔi ni he hiaa. Biblia mli gbalɛ kɛ nibii ni yaa nɔ yɛ je lɛ mli lɛ yeɔ odase yɛ faŋŋ mli akɛ Yehowa gbi lɛ ebɛŋkɛ. Nɛkɛ kpee he gbɛjianɔtoo nɛɛ baawo wɔ hewalɛ koni ‘wɔhiɛ akã shi, ni wɔsara.’ (1 Pet. 5:⁠8) Too gbɛjianɔ jogbaŋŋ koni oya gbii enyɔ lɛ fɛɛ eko.