“Yehowa Ji Miyelikɛbualɔ”
1 Beni Yesu tsu eklɛŋklɛŋ kaselɔi lɛ, ekɛɛ amɛ akɛ: “Naa, miitsu nyɛ tamɔ too gwantɛŋi yɛ klaji ateŋ.” (Mat. 10:16) Ani no ha amɛshe gbeyei, ni amɛkpa? Dabi. Amɛŋɔ subaŋ ni yɛ sɛɛ mli lɛ bɔfo Paulo wie he beni ekɛɛ nanemɛi Kristofoi lɛ akɛ: “Nyɛnáa ekãa ni nyɛkɛa akɛ: ‘Yehowa ji miyelikɛbualɔ; misheŋ gbeyei. Mɛni gbɔmɔ baanyɛ afee mi?’ (Heb. 13:6, NW) Amɛnaa miishɛɛ akɛ aaabu amɛ akɛ mɛi ni esaaa woo yɛ Yesu gbɛi lɛ hewɔ, ni amɛtee nɔ, ni amɛkpaaa nitsɔɔmɔ kɛ sanekpakpa lɛ jajemɔ.—Bɔf. 5:41, 42.
2 Ŋmɛnɛ, jeŋ muu fɛɛ shiɛmɔ nitsumɔ lɛ eshɛ enaagbee bei amli. Taakɛ Yesu gba efɔ shi lɛ, wɔbatsɔmɔ gbɔmɛi ni maji lɛ fɛɛ nyɛɔ. (Mat. 24:9) Áte shi awo wɔshiɛmɔ nitsumɔ lɛ, ni aye he fɛo, ni agu po yɛ shikpɔji komɛi anɔ. Kɛ wɔbɛ hemɔkɛyeli lɛ, wɔbaanyɛ wɔshe gbeyei. Shi kɛlɛ, le ni wɔle akɛ Yehowa ji wɔ-Yelikɛbualɔ lɛ haa wɔnaa miishɛɛ, ni ewoɔ wɔ hewalɛ koni wɔka he.
3 Ekãa ji hewalɛ, tsuisalɛ, nuufeemɔ su ni ayɔɔ. Etamɔɔɔ gbeyeilɔ, mɔ ni tsui faa, feitɔ. Ekãa he bahia Yesu kaselɔi lɛ daa gbi koni amɛŋmɛ amɛtsui shi. Ehe hiaa kɛji akɛ wɔɔtsi wɔhe kɛaaje nijiaŋwujee ni baa kɛtsɔɔ jeŋ ni nyɛɔ Nyɔŋmɔ lɛ subaŋi kɛ nifeemɔi anɔ lɛ he lɛ. Kwɛ bɔ ni eji ekãawoo akɛ wɔɔsusu Yesu ni ji je lɛ nɔ kunimyelɔ lɛ nɔkwɛmɔnɔ ni nɔ bɛ lɛ he! (Yoh. 16:33) Agbɛnɛ kaimɔ bɔfoi lɛ ni beni amɛkɛ kaai ni naa wa kpe lɛ, amɛkɛ ekãa jaje akɛ: “Esa akɛ aboɔ Nyɔŋmɔ moŋ toi fe gbɔmɛi.”—Bɔf. 5:29.
4 Wɔjeee Mɛi ni Kpaleɔ: Esa akɛ wɔmia wɔhiɛ koni wɔya nɔ wɔhiɛ jwɛŋmɔ ni ja yɛ wɔ nitsumɔ lɛ he. (Heb. 10:39) Nyɛhaa wɔhaa ehiaa wɔjwɛŋmɔ mli be fɛɛ be akɛ Yehowa etsu wɔ koni ekɛjie suɔmɔ kɛ mɔbɔnalɛ ni eyɔɔ kɛha adesai fɛɛ lɛ kpo etsɔɔ. Ebiii koni etsuji afee nɔ ko ni sɛɛnamɔ ko bɛ he kɔkɔɔkɔ. Yɛ naagbee lɛ, gbɔmɛi ni sumɔɔ Nyɔŋmɔ lɛ baana nibii fɛɛ ni afãa wɔ koni wɔfee lɛ ahe sɛɛ.—Rom. 8:28.
5 Nibii kpakpai agbɛkpamɔ su ni wɔɔná lɛ baaye abua wɔ koni wɔya nɔ wɔtao gbɔmɛi ni hiɛ gwantɛŋ su ni yɔɔ wɔ shikpɔŋkuku lɛ mli lɛ. Wɔbaanyɛ wɔna shikpilikpii ni gbɔmɛi lɛ feɔ lɛ akɛ eji nifeemɔ ni tsɔɔ bɔ ni amɛnijiaŋ eje wui ni amɛbɛ hiɛnɔkamɔ ko kwraa. Nyɛhaa suɔmɔ ni wɔyɔɔ lɛ atsirɛa wɔ koni wɔna mli wɔha amɛ, ni wɔto wɔtsui shi. Be fɛɛ be ni wɔkɛ wolo aaaha loo ni wɔɔyɔse akɛ aná wiemɔ lɛ he miishɛɛ fioo ko lɛ, esa akɛ wɔ oti ni ma wɔhiɛ lɛ afee akɛ wɔbaafee sɛɛsaramɔ nɔŋŋ, ni wɔtee miishɛɛ lɛ shi lolo. Ehe ehiaaa ni wɔyiŋ afee wɔ kɔshikɔshi yɛ nyɛmɔ ni wɔyɔɔ akɛ wɔɔje Biblia mli nikasemɔ shishi loo ni wɔɔfee kɛmɔ shi lɛ he. Shi moŋ, esa akɛ wɔsɔle daa gbi kɛtao Yehowa dɛŋ yelikɛbuamɔ kɛ gbɛtsɔɔmɔ, kɛ hiɛnɔkamɔ akɛ ebaaye ebua wɔ.
6 Wɔheɔ wɔyeɔ waa diɛŋtsɛ akɛ Yehowa baakwɛ koni agbe nitsumɔ lɛ naa. (Okɛto Filipibii 1:6 he.) Wɔhiɛnɔkamɔ ni yɔɔ shiŋŋ yɛ emli akɛ wɔ-Yelikɛbualɔ lɛ woɔ wɔ hewalɛ, bɔni afee ni ‘ekpakpafeemɔ akatɔ wɔ.’—Gal. 6:9.