“Nyɛŋmɛa Nyɛtsui Shi”
1 Yɛ be mli ni wɔnaa akɛ Satan nibii agbɛjianɔtoo momo lɛ miibɛŋkɛ waa be fɛɛ be lɛ, ehe miihia ni ‘wɔŋmɛ wɔtsui shi’ yɛ be mli ni wɔmɛɔ Yehowa yiwalaheremɔ gbi lɛ. Titri lɛ yɛ nɛkɛ naagbee be nɛɛ mli lɛ, henyɛlɔi tabilɔi ni yi wa miibɔ mɔdɛŋ koni amɛgbala wɔjwɛŋmɔ kɛjɛ Yehowa jeŋ muu fɛɛ maŋtsɛ lɛ he sane ni he hiaa fe fɛɛ lɛ he, ni ekaa wɔ koni nibii ni wɔsumɔɔ babaoo lɛ agbala wɔjwɛŋmɔ. Kɛtsɔ nɛkɛ gbɛ nɔ lɛ, Satan baalaka wɔ koni wɔŋmɛɛ Maŋtsɛyeli shiɛmɔ nitsumɔ lɛ he loo wɔfee kpɔkee yɛ mli. (Yak. 5:7, 8; Mat. 24:13, 14) Mɛɛ gbɛ̀i anɔ wɔbaanyɛ wɔjie nɛkɛ tsuishiŋmɛɛ nɛɛ kpo yɛ?
2 Kɛtsɔ Henɔyeli Nɔ: Kɛ wɔkɛ shikpilikpiifeemɔ loo shitee-kɛ-woo kpe yɛ wɔshiɛmɔ nitsumɔ lɛ mli lɛ, henɔyeli baaye ebua wɔ koni wɔmia wɔhiɛ yɛ shiɛmɔ nitsumɔ lɛ mli. Wɔtsui efaŋ loo wɔmli fuŋ oyayaayai kɛ́ gbɔmɛi ni wɔkɛkpeɔ lɛ fee basabasa loo amɛjieee mlihilɛ kpo. (1 Pet. 2:23) Nɛkɛ mligbɛ nyɛmɔ nɛɛ baanyɛ atsĩ wɔnaa koni wɔkawie mɛi ni yɔɔ wɔshikpɔŋkuku lɛ mli lɛ ni amɛjieɔ shikpilikpiifeemɔ loo nyɛ̃ɛ kpo yɛ wɔnitsumɔ lɛ he lɛ ahe efɔŋ, beni wɔyɔseɔ akɛ nakai wiemɔ lɛ baaje wɔnijiaŋ wui kɛ mɛi ni kɛ wɔ tsuɔ nii yɛ shiɛmɔ nitsumɔ lɛ mli lɛ.
3 Kɛtsɔ Tsuishiŋmɛɛ ni Mli Wa Waa Nɔ: Kɛ́ yɛ be mli ní wɔná sanegbaa fɛfɛo yɛ shiɛmɔ nitsumɔ lɛ mli sɛɛ lɛ, wɔnaaa mɔ ni yɔɔ wiemɔ he miishɛɛ lɛ yɛ shia dɔŋŋ lɛ, ebaanyɛ egba wɔ tsuishiŋmɛɛ lɛ naa wa diɛŋtsɛ. Nakai nɔŋŋ eji anɔkwale kɛji mɛi ni wɔkɛkaseɔ nii lɛ miifee shɔ̃ɔ yɛ shweremɔ mli loo amɛfee shɔ̃ɔ akɛ amɛaakɔ shidaamɔ yɛ anɔkwale lɛ gbɛfaŋ. Shi kɛlɛ, bei pii lɛ, akɛ yibiiwoo kpakpai woɔ wɔ tsuishiŋmɛɛ ni mli wa waa lɛ he nyɔmɔ. (Gal. 6:9) Nyɛmiyoo ko fee sɛɛsaramɔi babaoo yɛ oblayoo ko ŋɔɔ dani aje Biblia mli nikasemɔ diɛŋtsɛ shishi. Yɛ klɛŋklɛŋ saramɔi enumɔ lɛ mli lɛ, yoo lɛ náaa dekã yɛ nibii krokomɛi ahewɔ. Yɛ ejɛmɛ yaa ni ji shii ekpaa lɛ nɔ lɛ, nugbɔnɛmɔ ni naa wa waa fɔ lɛ waa diɛŋtsɛ, ni ena akɛ mɔ ko kwraa bɛ shia. Ni kɛlɛ, akɛni etswa efai shi akɛ ebaaha yoo lɛ hegbɛ kome ekoŋŋ hewɔ lɛ, nyɛmiyoo lɛ tee ekoŋŋ ni ena akɛ yoo lɛ efee klalo kɛha nikasemɔ. No sɛɛ lɛ, nikaselɔ lɛ tee ehiɛ fiofio ni yɛ be fioo ko sɛɛ lɛ ejɔɔ ewala nɔ eha Yehowa.
4 Wɔle akɛ Yehowa gbi lɛ ekpeŋ sɛɛ. No hewɔ lɛ, wɔmiimɛ bɔ ni ebaatsu saji ahe nii eha, ni wɔle akɛ ŋwɛi tsuishiŋmɛɛ baawo yibii kpakpai. (Hab. 2:3; 2 Pet. 3:9-15) Esa akɛ wɔŋmɛ wɔtsui shi taakɛ Yehowa feɔ lɛ, ni wɔkaŋmɛɛ shiɛmɔ nitsumɔ lɛ he. Kwɛmɔ Yehowa gbɛ kɛtsɔ “hemɔkɛyeli kɛ tsuishitoo nɔ” koni ewo bo nyɔmɔ yɛ onitsumɔ dɛŋdɛŋ lɛ hewɔ.—Heb. 6:10-12.