Bɔ ni Aaafee Aná Miishɛɛ Babaoo Kɛjɛ Kpeei Amli
1 Kpeei ahe miihia kɛha wɔmumɔŋ hilɛ-kɛhamɔ. Miishɛɛ ni wɔnáa kɛjɛɔ mli lɛ jɛɔ nɔ ni wɔfeɔ dani ajeɔ kpeei ashishi, kɛ beni kpeei lɛ miiya nɔ kɛ beni agbe naa lɛ mli. Te wɔbaafee tɛŋŋ wɔye wɔbua wɔhe kɛ mɛi krokomɛi koni miishɛɛ ni anáa yɛ kpeeiyaa mli lɛ aya hiɛ waa be fɛɛ be lɛ?
2 Dani Abaaje Kpeei Ashishi: Hesaamɔ titri kɛ miishɛɛ ni wɔnáa yɛ kpeei amli lɛ baa. Kɛ wɔsaa wɔhe jogbaŋŋ lɛ, wɔnyɛɔ wɔboɔ sane toi jogbaŋŋ ni wɔkɛ wɔhe woɔ mli. Kɛfata he lɛ, esa akɛ wɔsaa wɔhe jogbaŋŋ yɛ kpee shishi nifeemɔi fɛɛ ni wɔnine shɛɔ nɔ lɛ mli kɛ yiŋtoi lɛ akɛ wɔkɛ saji ni yɔɔ mli lɛ baaha pɛpɛɛpɛ yɛ gbɛtsɔɔmɔi ni akɛha lɛ naa kɛ toibolɔi lɛ hu amiishɛɛnamɔ ni wɔɔha ehi wɔjwɛŋmɔ mli. Esa akɛ wɔfee lɛ shii abɔ kɛsaa wɔhe. Kɛ wɔha kpeei fee nɔ ni miishɛɛ yɔɔ mli, ní tswaa mɔ emaa shi ní mɔ fɛɛ mɔ náa he sɛɛ lɛ, wɔ hiɛyaa lɛ bafeɔ faŋŋ ni wɔmii shɛɔ wɔhe waa diɛŋtsɛ.—1 Tim. 4:15, 16.
3 Beni Kpeei lɛ Miiya Nɔ: Kɛ wɔha saji ahetoo yɛ kpeei ashishi lɛ, ebaanyɛ eye ebua koni eha wɔmii ashɛ wɔhe waa. Esa akɛ abu emli fãi ni toibolɔi kɛ amɛhe baawo mli lɛ akɛ nitsumɔ diɛŋtsɛ kɛha asafo lɛ mli bii fɛɛ. Bei pii lɛ, hetooi ni wieɔ otii lɛ pɛ ahe ni eyaa lɛ tɛ̃ɛ lɛ mɔɔ shi waa diɛŋtsɛ. Kɛ wɔgbaa niiashikpamɔi ni tswaa mɔ emaa shi ni yɔɔ kuku lɛ, ebaanyɛ ewo mɔ hewalɛ ni ekanya mɔ waa diɛŋtsɛ, ni esa akɛ wɔkwɛ koni wɔkɛ enɛɛmɛi afata he be fɛɛ be ni nifeemɔ lɛ biɔ koni afee nakai. (Abɛi 15:23; Bɔf. 15:3) Kɛ wɔmiitsu kpee lɛ shishi nifeemɔ ko he nii lɛ, esa akɛ wɔkɛ ekãa kɛ yiŋkɔnemɔ awie, koni wɔha efee miishɛɛ, nɔ ni wieɔ nɔ ko pɔtɛɛ he, ní anyɛɔ akɛtsuɔ nii.
4 Beni Akpa Kpeei Lɛ: Kɛ wɔkɛ mɛi krokomɛi wie wiemɔ ni tsɔɔ mlihilɛ, ní wɔkɛ miishɛɛ ŋa amɛ, ní wɔkɛ amɛ gba saji otii ni asusu he yɛ kpeei lɛ ashishi lɛ he sane lɛ, ehe baaba sɛɛnamɔ eha wɔ fɛɛ. Kɛ wɔtsɔɔ bɔ ni wɔmii eshɛ wɔhe akɛ wɔna akɛ gbekɛbii, onukpai, kɛ mɛi heei lɛ kɛ amɛhe miiwo mli lɛ, ehaa suɔmɔ ni yɔɔ wɔnyɛmimɛi anaanyobɔɔ lɛ mli lɛ mli bawaa waa. Yɛ nɔ najiaŋ ni ekolɛ wɔbaawie mɛi komɛi ni baaa kpeei lɛ ahe sane ni ejaaa lɛ, esa akɛ wɔgba amɛ miishɛɛ ni wɔná yɛ kpee ni wɔba lɛ hewɔ, ni yɛ nakai feemɔ mli lɛ wɔkɛmiiwo amɛ hewalɛ koni amɛba kpeei.—Heb. 10:24, 25.
5 Nyɛkahaa wɔŋmɛa gbɛ ni gbɛjianɔ ni he hiaa ni atoɔ kɛha wɔhe hewalɛwoo lɛ jea wɔdɛŋ. (Rom. 1:11, 12) Kɛ wɔkɛ jwɛŋmɔ kpakpa bɔ mɔdɛŋ jogbaŋŋ lɛ, wɔ fɛɛ wɔbaanyɛ wɔhiɛ wɔmiishɛɛ lɛ mli daa yɛ Kristofoi akpeeiyaa mli.