Daniel Gbalɛ Wolo lɛ Kasemɔ
1 Kɛjɛ April 17 otsi lɛ nɔ kɛyaa lɛ, wɔbaakase Bó Daniel Gbalɛ lɛ Toi! yɛ Asafo Woloŋ Nikasemɔ lɛ shishi. Mɛi babaoo ekane wolo ni mli ŋɔɔ waa nɛɛ, shi amrɔ nɛɛ, wɔná hegbɛ akɛ wɔɔná sɛɛnamɔi ni baajɛ nikasemɔ lɛ ni aaasusu he ákɛ kuu lɛ mli kɛba lɛ. Aafɔ̃ nine aatsɛ shiɛlɔi, mɛi ni yɔɔ wiemɔ lɛ he miishɛɛ, kɛ gbekɛbii fɛɛ, hɛɛ, aawo amɛ hewalɛ koni amɛba daa otsi kɛha Biblia wolo ni ji Daniel lɛ he nikasemɔ ni mɔɔ shi jogbaŋŋ nɛɛ.—5 Mose 31:12, 13.
2 Nikasemɔ lɛ He Gbɛjianɔtoo kɛ Gbɛtsɔɔmɔi: Akɛ nikasemɔ lɛ he gbɛjianɔtoo fɛɛ kɛha Daniel Gbalɛ wolo lɛ eha yɛ Wɔ Maŋtsɛyeli Sɔɔmɔ nɛɛ mli. Kwɛmɔ ni okɛ eko ato kɛha wolo ni nyɛbaakase lɛ. Ehe gbɛjianɔtoo lɛ tsɔɔ yitso lɛ kɛ kukuji ni yɔɔ wolo lɛ mli lɛ kɛ agbɛnɛ Daniel ŋmalɛ lɛ mli kukuji lɛ ni abaasusu he yɛ daa otsi nikasemɔ lɛ mli lɛ. Shishigbɛ niŋmaai lɛ tsɔɔ bɔ ni abaakase wolo lɛ mli nikasemɔ lɛ fãi srɔtoi komɛi aha kɛ be ni akɛbaakase. Kɛ agbe nikasemɔ lɛ naa otsi fɛɛ otsi lɛ, aawo nɔkwɛlɔ lɛ hewalɛ koni ekɛ kuu lɛ atĩ Daniel wolo lɛ mli ŋmalɛi pɔtɛɛi komɛi amli taakɛ atsɔɔ yɛ gbɛjianɔtoo lɛ mli kɛha nakai otsi lɛ. Kɛ be yɛ lɛ, abaanyɛ akane ŋmalɛi lɛ ni asusu he. Ŋmalɛi lɛ ekomɛi ni abaasusu he yɛ otsi ko mli lɛ baatsa nɔ yɛ otsi kroko ni baanyiɛ sɛɛ lɛ mli, akɛni ehesusumɔ lɛ miiya nɔ lolo lɛ hewɔ.
3 Saamɔ Ohe Oha Nikasemɔ lɛ Jogbaŋŋ Kɛmɔ Shi: Abɔ mɔdɛŋ koni aná be ni fa saŋŋ kɛha otsi fɛɛ otsi bɔ ni afee ni ato tsui shi blɛoo kɛha nikasemɔ ni akɛha lɛ he susumɔ. Nikasemɔi ejwɛ ji nɔ ni sɛɛ kɛlɛɛɛ kwraa. No hewɔ lɛ, kɛ́ agbe nikasemɔ kɛha June 5 otsi lɛ naa lɛ, nɔkwɛlɔ lɛ baanyɛ ekɛ Daniel 2:1-40 lɛ mlitĩi afata he. Ebaanyɛ etĩ Daniel 3:1-30 lɛ mli kɛha June 26 otsi lɛ. Nɔ ni esa akɛ efata September 4 otsi lɛ he ji mfonirii kɛ ŋmalɛi ni yɔɔ baafa 139 lɛ he susumɔ ni mɔɔ shi jogbaŋŋ. Esa akɛ asusu akrabatsa ni yɔɔ baafai 188 kɛ 189 lɛ he yɛ October 2 otsi lɛ nikasemɔ lɛ mli.
4 Saamɔ ohe ojogbaŋŋ kɛha nikasemɔ lɛ daa otsi, ni oná emli ni okɛ ohe aaawo lɛ mli ŋɔɔmɔ. Ohiɛ asɔ hegbɛ ni oná akɛ okɛ Yehowa gbɛjianɔtoo ni anaa lɛ aaabɔ lɛ, ni oná nilee kɛ shishinumɔ ni enɔkwafoi ni afɔ amɛ mu lɛ kɛhaa lɛ he sɛɛ. (Dan. 12:3, 4) Okɛ mlihilɛ awo mɛi krokomɛi hewalɛ ni amɛya woloŋ nikasemɔ lɛ shishi daa. Eba akɛ wɔ fɛɛ wɔɔbo Nyɔŋmɔ gbalɛ wiemɔ ni ajie lɛ kpo yɛ Daniel wolo ni yɔɔ naakpɛɛ waa lɛ mli lɛ toi.—Heb. 10:23-25; 2 Pet. 1:19.